Ɛ́bɛlʉʉ 5 - Kɑɑ Fí

¹ Pɛ́ zɛɛ ŋ́ɡʉ pɔ tsɛtsɛt pʉɔmɛsɔŋ ńtsɔ́Ꞌ NɔŋpɔꞋ wɛ ɡwɛ́ pɔ nɛpɔ́ yi ɑ ɡʉ ɛ́fɑꞋ mbɔ̌ Sɛ́, nǔu tú-pʉɔmɛsɔŋ. Yɛ́ fɑꞋ pɔ́ nɛlɔk yúu ńtɔ́ mbi Sɛ́ ńnyɛt wɛ́, mbɑ nɛnɔŋ pɔꞋ ńdɔk ḿbúꞋ mbɔ́ mbɔ̌ wɛ́ ŋɡɔ ɑ likŋɛ mɛnu kɛpɔŋ-pʉɔmɛsɔŋ.

² Pɑ́Ꞌ jʉ́ NɔŋpɔꞋ pɛn ŋ́kɑ́ɑ yɛ́ kɑ́ɑnɛ nǔu mɛshʉ́ tsʉʉ lɑ́, ḿbɔ́ ɑ zúꞋ yúu mi ɛ́ ɡɛnɛ lɑ pʉɔ pi pɔ́p kɑ́ pɔ́ ńjí yúu mi pɔ́p ɡɛnɛ pɔ́, mbɑ pʉɔ pi pɔ́p fɑɑnɛ sɛ̂ndúŋ, fɑɑnɛ nu mbɔ̌ Sɛ́.

³ Ɛ́ lɔk pɑ́Ꞌ jʉ́ nɛ́ túmbʉʉ yɛ́ pɛn ŋ́kɑ́ɑ yɛ́ kɑ́ɑnɛ lɑ́, ŋ́ɡẅɛɛ nɛnɔŋ pɔꞋ mbɑ nǔu yɛ́ tú ńdɔk ḿbúꞋ mbɔ́ mbɔ̌ Sɛ́ ŋɡɔ ɑ likŋɛ mɛnu kɛpɔŋ mɛ́ ɡúu, tɛ ɑ pɔɔ nɔŋ pɔꞋ pɔ ndɑꞋ nǔu tú-pʉɔmɛsɔŋ pɔ́,

⁴ ḿbɔ́ ŋu zɛɛ ḿbɔɔ nɑ́ŋ tɛ ńcú ŋɡɔ pɛ́ ɡɑ́ mɛkuꞋ-NɔŋpɔꞋ wɛ ɡwɛ́ mbɔ̌ wɛ́ pɔ́. Sɛ́ tsɔ́Ꞌnɛ ŋu ndʉ́ŋndʉŋ pɑ́Ꞌ ɑ kɑ tsɔ́Ꞌnɛ Álɔŋ.

⁵ Ɛ́ kɑ ɡʉ nǔu Kɛlístɔ ḿbɛn ḿbɔ́ pɔ pɔ́Ꞌɔ. Jʉ́ ŋkɑɑnɛ nɑ́ŋ tɛ ńcú ŋɡɔ ɑ ɡẅɛɛ nɛɡúꞋ wɛ NɔŋpɔꞋ wɛ ɡwɛ́ pɔ́. A kɑ ɡɔ́ ńtsʉ́Ꞌ pɔ́Ꞌɔ ɛ́ fú pɔ mbɔ̌ Sɛ́ wi ɑ kɑ cúnɛ mbɔ̌ wɛ́ ŋɡɔ: «Ɔ Mɔ́ɔ wɑ́ɑ, tɛ ɛ́fú lɔ́Ꞌnɛ m bɔ́ tɑ́t wu.»

⁶ Ɛ́ pɛn ḿbɔ́ pɔ ndʉ́ŋndʉŋ pɑ́Ꞌ ɑ kɑ pɛnnɛ ńcú nǔu yɛcɔ́ zʉꞋ ŋɡɔ: «Ɔ NɔŋpɔꞋ, tɛ ŋ́kɛ́ ńdɑ́Ꞌ ḿbɔ́ pɔ wɛ́tɛ́, nǔu ntɛ́ yi Mɛlkisɛdɛk kɑ pɔ́nɛ yɛ́.»

⁷ A pɛn ḿbɔ́ pɔ jʉ́ Yɛ́su ẅí ɑ kɑ pɔ́nɛ ŋkɑ́ yi ɑ kɑ pɛ́tnɛ ndǔ tsɛ́tsɑ́Ꞌ, ńcɛꞋlɛ Sɛ́ ẅi ḿbɔ́ ɑ ɡɛ tɛ ɑ pɔɔ pfú, ḿbúꞋ mbɔ́ mbɔ̌ wɛ́ lɑ́ ḿbɔ́ ŋ́ɡɑ́ ɡwɑ́t ŋ́kíi. Sɛ́ fú nǔu pɑ́Ꞌ Yɛ́su zẅíꞋlɛ mbɑ kʉ̈ɔ́lɑ́ pɔ mbɔ̌ wɛ́, ńzúꞋ cɛꞋlɛ yɛ́.

⁸ A kɑ pɔ́ pɔ mɔ́ɔ-Sɛ́ lɑ́, ńjʉ́ɔ ŋɡʉ̈ɔ́Ꞌ jʉ́ɔnɛ, tɛ ɛ́fú pɔ nǔu ńzíꞋ nɛzúꞋ ntsu-Sɛ́,

⁹ ḿbɛn ńzúꞋ tɛ ŋ́kuꞋ ŋu ẅí ḿbɔ́ ɑ ɡɛ pʉɔ pi pɔ́p zúꞋnɛ ntsu wɛ́ tɛmtɛ ńduk ndɑꞋ ndɑꞋ.

¹⁰ Ɛ́ ɡɔ́ ḿbɔ́, mbɔ Sɛ́ kɑ lɔk wɛ́ ŋ́ɡɛ NɔŋpɔꞋ wɛ ɡwɛ́ nǔu ntɛ́ yi Mɛlkisɛdɛk kɑ pɔ́nɛ yɛ́.

Ŋu pɑ́ɑ nɛnɑ́ kɛ́ pɔ́ ńzɑ́p pɔ tʉ́m yɛ́ nǔu Sɛ́

¹¹ Ɛ́ ɡʉ nǔu nu-Mɛlkisɛdɛk, mbɔ pɛk ɡẅɛɛ mɛnu mi pɛk ɡʉ ńcú nǔu tɛ ɛ́ zɑ́ɑ zɑ́ɑnɛ, nɛkyɛ́tɛ́ mîmɑ́ mɛnu mbɔ̌ pʉʉ tɛn tɛꞋ, mbíꞋŋɡɔ pɛ́ kɑ́ cú nu pʉʉ fɛ́Ꞌnɛ ńzúꞋ yúu mi pɛ́ lɔknɛ ńcú pɔ́.

¹² Pʉʉ ḿbɔ́ ŋ́ɡʉ ḿbɔ́ ŋkɔ̂ɔnɛ ńtsʉ́Ꞌ ḿbɔ́ pɔ pɑzíꞋ pʉɔ nɛ́ nu-Sɛ́. Lɑ́ pʉʉ pɛn ḿbɔ́ ńtsɑ́ɑ ŋɡɔ pɛ́ pɛn ńzíꞋ wʉ́ʉ nɛ́ mɛnu mi pɛ́ piitɛ́nɛ nǔu nɛzíꞋ ŋu nɛ́ nu-Sɛ́. Ɛ́ pɔ́ pɔ́nɛ tɛ pʉʉ pɛ́t ńtsɑ́ɑ pɔ nɛpʉ́ʉ, lɑ́ mbɔ pʉʉ lɑ́Ꞌ ḿbɔ́ ŋ́ɡʉ ńtsʉ́Ꞌ ńtsɑ́ɑ pɔ yúupɛ́jʉ́ pi ɛ́ sɛ́ ńtɛntɛ.

¹³ Ŋu lɑɑ ŋ́kɛ́ ḿbɛ́t ńnɔ́ŋ pɔ nɛpʉ́ʉ, mbɔ ɛ́ lɑɑ ḿbɔ́ ɑ pɔɔ kuꞋ nɛjí nu nǔu yúu mi ɛ́ tʉ́ʉnɛ ndʉ́ŋndʉŋ pɔ́, mbíꞋŋɡɔ ŋɡɑŋ pɛ́t pɔ mɔ́ɔmbɔ́t.

¹⁴ Lɑ́ ŋ́ɡʉ nǔu pʉɔ pi pɔ́p tsʉklɛ́nɛ, mbɔ pɔ́p ŋ́kwɛ́t pɔ yúupɛ́jʉ́ pi ɛ́ tɛntɛ́nɛ. Pɔ́p pʉɔ pi pɔ́p kɑ zíꞋ mɔ́ tɛ ŋ́ɡẅɛɛ mɑt nɛsɑ́ŋ nu, ńjí yi sʉ́Ꞌnɛ, ńjí yi kɛpɔŋ.