Ɛ́bɛlʉʉ 13 - Kɑɑ Fí

Mɑt ẅí ɛ́ pɔŋnɛ Sɛ́

¹ Pʉʉ kẅiꞋ ŋ́ɡẅɛɛ ŋkɔŋɛ tsɛtsɛt pʉʉ, pɑ́Ꞌ ɛ́ sɛ́ ḿbíkŋɛ ŋɡɔ pʉɔ-Kɛlístɔ ɡɛ pɔ́Ꞌɔ, tsɛtsɛt pɔ́p.

² Kɔɔ pʉʉ likŋɛ nɛkúkŋɛ pɛɡʉʉ pi pɔ́p tɔ́nɛ njɛ́Ꞌ pʉʉ, pɛcɔ́ pʉɔ kɑ lɑ́Ꞌ ŋ́kúkŋɛ pɛɡʉʉ kúkŋɛ́nɛ, tɛ ńdɑ́Ꞌ lɛ́Ꞌ ŋ́kúkŋɛ pɛcʉ̈ɔ́Ꞌ-Sɛ́ kɛ́ jí.

³ Pʉʉ kẅíitɛ pʉɔ pi pɔ́p ndɑ́tsɑ́ŋ tɛ ɛ́ pɔ́ pɔ pɑ́Ꞌ ŋkɑ́ yi pʉʉ pɛ́pɔ́p tɛmtɛnɛ ḿbɔ́ ndɑ́tsɑ́ŋ lɑ́, ŋ́kẅíitɛ mbɑ pʉɔ pi pɛ́ sɛ́ ńnyɛt wɔ́p nɛ́ ŋɡʉ̈ɔ́Ꞌ pɑ́Ꞌ yi pɛ́ ńnyɛt pɔ wʉ́ʉ nɛ́ ŋɡʉ̈ɔ́Ꞌ lɑ́.

⁴ Ɛ́ pɔŋ ŋɡɔ lɑ́ɑndɑ́ pɔ́ mbɔ̌ pʉɔ tsʉʉ ḿbɔ́ yúu mɛkuꞋ, ŋu mbɛ́ɛnɛ jí ndɑꞋ nzwɛ́ wɛ, mɑŋɡɛ́ jí ndɑꞋ ndúu mɛ, Sɛ́ ɡʉ ńzɛɛ ńdɑ́Ꞌ ŋ́ŋɑk pʉɔ pi pɔ́p puutɛnɛ mbɑ wɔ̌ lɑ́ pɔ́p pɛpɔ́p nɔɔ nɔɔnɛ, mbɑ pɑɡɛ ɡɑ́ɑ.

⁵ Kɔɔ pʉʉ kɔŋ ŋkɑ́p kɔŋnɛ tɛ ɛ́ tsʉ́Ꞌ ɛ́sɑ́Ꞌ wʉ́ʉ ɛ́sɑ́nɛ, pʉʉ tsɑ́ɑtɛ tsɑ́ɑtɛ́nɛ nǔu kʉ̈ɔ́ lɑ́ yi pʉʉ ɡẅɛɛnɛ, mbíꞋŋɡɔ Sɛ́ kɑ cú mbɔ̌ ŋumɛsɔŋ ŋɡɔ: «Ŋ kɛ́ lɑ́Ꞌ ḿmɛꞋ wú pɔ́, ŋ́kɛ́ ḿbɔɔ ńnɑ́ kɛ́ pɔ́ ńdíŋɛ wú pɔ́».

⁶ Ɛ́ yúu mi ɛ́ ɡɛnɛ ŋu wɛkŋɛ kuꞋ nɛcú nu tɛ ḿbɔɔ ḿmʉꞋlɛ nǔu yɛ́ tú pɔ́ ŋɡɔ: Tsɑpʉɔ sɛ́ ńtɔ́ ńcẅɛ́lɛ wɑ́ɑ, Ŋ kɑ́ pɔ́ ŋ́ɡʉ ḿbɔ́k yɛcɔ́ yúu pɔ́. Ŋumɛsɔŋ kuꞋ nɛɡɛ kʉ̈ɔ́ nǔu mɔ?

⁷ Pʉʉ kẅíitɛ pʉɔ pi pɔ́p kɑ piitɛ ńtsɑ wʉ́ʉ nǔu sɛ̂ndúŋ-Sɛ́, pʉɔ pi pɔ́p kɑ sẅíinɛ wʉ́ʉ nɛ́ nu-Sɛ́, ŋ́kẅíitɛ ntɛ́ yi pɔ́p kɑ lɔknɛ ńnɑ́ŋ tɛ ńdɑ́Ꞌ ḿpfú, pʉʉ pɛ́ɛ fʉꞋ nǔu yɔp ntɛ́ nɛzɑ́p tʉ́m nǔu Sɛ́.

⁸ Yɛ́su Kɛlístɔ ŋ́kɑɑ kɑ́ kúpmɛ, ɑ kɑ́ kúpmɛ, ɑ kɛ́ lɑ́Ꞌ lɛ́Ꞌ ŋ́kúpmɛ pɔ́.

⁹ Kɔɔ pʉʉ pɛ́m pɛ́ zíꞋ wʉ́ʉ nɛ́ mɛnu ntɛ́ nɛ́ ntɛ́ mi ɛ́ kɑ́ cẅɛ́Ꞌnɛ nǔu nu yi pɛkŋɛ zɑ́pnɛ tʉ́m nǔu pɔ́, ŋ́ɡɛ pʉʉ fɑɑnɛ sɛ̂ndúŋ. Ɛ́ pɔŋ ŋɡɔ tsɑ́ɑmɛjʉ́ŋ-Sɛ́ níꞋnɛ tʉ́m-ŋu tɛ mbʉ́ʉ mi pɛ́ zɑ́pnɛ, ńcú nu nǔu yúu pɛjʉ́ pɔɔ nɑ́ŋ. Pʉɔ pi pɔ́p ɡẅɛɛnɛ mîmɑ́ mbʉ́ʉ kɑ́ pɔ́ ńjʉ́ yɛcɔ́ pii nǔu pɔ́.

¹⁰ PɑnɔŋpɔꞋ pɛ́ pɑyúdɑ, pɔ́p nɔŋ pɔꞋ tsɛt zʉꞋ-Sɛ́, ńdɛɛtɛ nǔu ŋ́kwɛ́t pfuꞋ-mbɑp yi pɛ́ lɔknɛ nɔŋ pɔꞋ, ɛ́ kɛ́ ŋ́ɡʉ nǔu pɔꞋ ẅí Yɛ́su kɑ nɔɔnɛ mbíꞋ wɛkŋɛ, pɔ́p pɔɔ yúu nǔu lúꞋnɛ.

¹¹ Ẅîwɑ́ pɔꞋ pɔ́ wɛ nɔŋpɔꞋ wɛ ɡwɛ́ wɛ pɑyúdɑ. A lɔk mɛci-mɛnɑɑ mi pɛ́ jẅítɛ́nɛ, ŋ́ɡʉ ŋ́ɡɑ́ kwɑꞋ zʉꞋ-Sɛ́, nɛlɔk ńjɛ́p mɛnu kɛpɔŋ-pʉɔmɛsɔŋ, ɛ́ tsʉ́Ꞌ pfú nɑɑ, pɛ́ lɔk fú zʉꞋ yi pɛ́ tsẅɛ́nɛ zúꞋu ńcẅɛt, ŋ́ɡʉ nzɛmpíi ńtɔɔ.

¹² Ɛ́ yúu mi ɛ́ kɑ ɡɛnɛ, mbɑ Yɛ́su ɡúu lɔk mɛci mɛ́ ŋ́ɡɛ pʉɔmɛsɔŋ tsʉ́Ꞌ pʉɔ-Sɛ́, ɑ pfú pɔ nzɛmpíi, tɛ ɑ pɔɔ pfú tʉ́sɔŋ pɔ́. ZʉꞋ yi ɑ kɑ jʉ́ɔnɛ ŋɡʉ̈ɔ́Ꞌ zúꞋu pɔ́.

¹³ Pɔ́Ꞌɔ lɑ́, pɛkŋɛ fú yɛkŋɛ zʉꞋ yi pɛ́ tsẅɛ́nɛ zúꞋu, ńcẅɛt, ŋ́ɡʉ ńtsɛ́t wɛ́, ḿbɔ́ ḿbɛ́m ŋɡɔ pɛ́ zɔɔtɛ wɛkŋɛ pɑ́Ꞌ jʉ́.

¹⁴ MbíꞋŋɡɔ tʉ́sɔŋ yɛkŋɛ yɛ́ ndǔ tsɛ́tsɑ́Ꞌ zɑꞋnɛ kɑ́ pɔ́ yi ɛ́ ɡʉ ńdɑ́Ꞌ ḿbɔ́ pɔ ɡú pɔ́, lɑ́ pɛkŋɛ kɛ́ ḿbɔ́ ńdɔɔ yi ɛ́ ŋ́ɡɛ lɑ ńtɔ́.

¹⁵ Pɛkŋɛ lɛɛ nzʉʉ Yɛ́su, ɛ́ pɔ́ ŋkɑ́ tsʉʉ, pɛkŋɛ lɔk nɛɡúꞋlɛ Sɛ́, ńdɔk ńnɔŋ pɔꞋ, ńdɔk pɔ́Ꞌɔ, ḿbɔ́ pɔꞋ-pʉɔ pi pɔ́p ŋ́ɡɑ́ mɛkuꞋ nǔu lík yɛ́.

¹⁶ Kɔɔ pʉʉ likŋɛ nɛɡɛ nu sʉ́Ꞌnɛ mbɑ nɛlɔk yúu mi pʉʉ ɡẅɛɛnɛ ńcẅɛ́lɛ pʉɔ, mbíꞋŋɡɔ nɛɡɛ mîmɑ́ mɛnu ɛ́ lii-pɔꞋ yi ɛ́ pɔŋnɛ Sɛ́.

¹⁷ Pʉʉ zúꞋ ntsu-pʉɔ pi pɔ́p tsiinɛnɛ wʉ́ʉ. Pʉʉ ɡɑ́ mbʉʉ sɛ́ mbi pɔ́p, mbíꞋŋɡɔ pɔ́p sɛ́ ńdíŋɛ wʉ́ʉ ŋɡɔŋ ŋkɑ́ tsʉʉ, ḿbɔ́ ńjí ŋɡɔ pɔ́p ɡʉ ńdɑ́Ꞌ ńtʉ́ʉ mbi Sɛ́ ḿbɛ́ɛtɛ ntɛ́ yi pɔ́p kɑ lɔknɛ ɛ́fɑꞋ tsɛtsɛt pʉʉ. Pɔ́Ꞌɔ lɑ́, pʉʉ ɡɛ nǔu ntɛ́ yi pɔ́p ɡʉ ɛ́fɑꞋ fɑꞋ yɔ́p nɛ́ tsɑ́ɑtɛ, tɛ pɔ́p pɔɔ pɔ́ tsẅii tsẅiinɛ pɔ́, mbíꞋŋɡɔ ɛ́ lɑɑ ḿbɔ́ pɔ́Ꞌɔ, pʉʉ pɔɔ lúꞋnɛ.

¹⁸ Pʉʉ kɛ́ ḿbɔ́ ḿbúꞋ mbɔ́ mbɔ̌ Sɛ́, ḿbúꞋ mbɔ́ nǔu tú yɛ́k. Pɛk tsuŋ ḿbɔ́ ńzúꞋ ŋɡɔ mbʉʉ yɛk kɑ́ pɔ́ ńtswɑ́ɑ wɛ́k nǔu yɛcɔ́ nu pɔ́, mbíꞋŋɡɔ pɛk sɛ́ ńtsɑ́ɑ nɛpɔ́ yi kʉ̈ɔ́ lɑɑnɛ ńtʉ́ʉ sɛ́, pɛk ɡɛ pɔ yúu mi ɛ́ sɛ́ ḿbíkŋɛ.

¹⁹ N tsuŋ ńdɔ́ɔ mbɔ̌ pʉʉ ŋɡɔ pʉʉ niitɛ ḿbúꞋ mbɔ́ mbɔ̌ mbɔ́ Sɛ́, ɑ pɛ́m m bɛn nzʉʉ ńtɔ́ ńtsɛ́t wʉ́ʉ.

CɛꞋlɛ-Sɛ́

²⁰ Sɛ́ ẅí mbɔ́tnɛ fúnɛ mbɔ̌ wɛ́, ɑ kɑ ɡɛ Yɛ́su, Tsɑpʉɔ wɛkŋɛ fú lɑ́Ꞌ-pɛpfú ŋ́kɔ́Ꞌ. Jʉ́ Tsɑpʉɔ wɛkŋɛ kɑ lɔk pɑ́Ꞌ ɑ tswɛtnɛ mɛci mɛ́, Sɛ́ lɔk ŋ́ɡwɑt kɑɑ yi ɛ́ kɛ́ lɑ́Ꞌ ḿmɛ pɔ́, ńtsʉ́Ꞌ mbyɛ́p mbí wɛ ɡwɛ́, pɑ́Ꞌ ɑ ɡʉ ḿbyɛ́p njinjɔ yɛ́.

²¹ Ɛ́ pɔŋ ŋɡɔ Sɛ́ mbɔ́tnɛ ɛ̂wɑ́, ɡɛ pʉʉ kuꞋ nɛɡɛ nu sʉ́Ꞌnɛ nɛpɔ́ yi pʉʉ ɡʉ ŋ́ɡɛ pɔ yúu mi ɑ sɛ́ ŋ́kɔŋ. Ɛ́ pɔŋ ŋɡɔ jʉ́ Sɛ́ fú nǔu Yɛ́su Kɛlístɔ, ŋ́ɡɛ yúu mi ɛ́ pɔŋnɛ wɛ́ pɔ́ nǔu pɛkŋɛ. NɛɡúꞋ pɔ́ mbɔ̌ Yɛ́su Kɛlístɔ nǔu mɛŋɡuꞋ mɛŋɡuꞋ! Ɛ́ pɔ́Ꞌɔ.

Lɔk ŋ́kút mɛtú mbɑ cɛꞋlɛ

²² Pɔ́ɔpɛ́mɑ́ pɑ́ɑ pɛ́ mbɛ́ɛnɛ mbɑ pɛ́ pɑŋɡɛ́, mɔ sɛ́ ḿbúꞋ mbɔ́ mbɔ̌ pʉ́ʉ ŋɡɔ pʉʉ lɔk kɔkmbʉʉ, ńzẅíꞋlɛ yɔ sẅiŋɛ yi ŋ ɡɑ́nɛ mbɔ̌ pʉʉ, ńdɔk ńníꞋ mɛtʉʉ mʉ́ʉ lɑɑ. N zɛɛ ŋ́kɛ́ mbɔɔ ŋwɑꞋnɛ ɛ́ sɑk pɔ́.

²³ Pʉʉ jí ŋɡɔ pɛ́ tsɔ́Ꞌ mbɔ́ nǔu mɔ́ɔmɑ́ wɛkŋɛ Timɔtɛ̂ɛ. A lɑɑ fɛ́Ꞌnɛ ńtɔ́, mbɔ mɔ ŋ́ɡɛ ŋ́ɡɔ ńtɔ́ jʉ́ɔ wʉ́ʉ pɛknɛ́ pɔ́nɛ.

²⁴ Pʉʉ cɛꞋlɛ pɑtsiinɛ wʉ́ʉ kɛ́ vuꞋ wɛcɔ́, ńcɛꞋlɛ mbɑ pʉɔ-Sɛ́ pɛ́tsʉʉ. Pʉɔ pɛ́ Itɑ́lîi cú ŋɡɔ n cɛꞋlɛ wʉ́ʉ.

²⁵ Sɛ́ pɔ́ ḿbɔ́ nɛ́ pʉʉ pɛtsʉʉ.