Ɛ́bɛlʉʉ 10 - Kɑɑ Fí

¹ Mɛndɛ́ndɑ́k mi ɛ́ nǔu Nɛpʉ́ʉ-Mɔ̌sɛ̂ɛ zɛɛ ḿbɔ́ pɔ jʉ́jʉ́ŋ-mɛyúu sʉ́Ꞌnɛ mi Sɛ́ kɑ ɡɛnɛ pɑ́Ꞌ ɛ́ ɡʉ ńdɑ́Ꞌ ńtɔ́, ɛ́ kɑ́ lɔk ḿbɔ́ kwɑꞋ mîmɑ́ mɛyúu pɔ́. Ɛ́ yúu mi ɛ́ ŋ́ɡɛ, mbɔ nɛpʉ́ʉ ɛ̂nɑ́ pɔɔ lɔk nu pɔꞋ ẅí ɛ́ ḿbɔ́ ḿbíkŋɛ ŋɡɔ pɛ́ lɔk ńtɔ́ mbi Sɛ́ ŋɡuꞋ tsʉʉ, ɛ́ kɛ́ ḿbɔ́ pɔ tɑ́Ꞌ ntɛ́, ńdɔk ŋ́ɡɛ pʉɔ pi pɔ́p sɛ́ ńtsɑ́ɑ nɛkẅɛ́Ꞌlɛ ńtɔ́ nɛ́ nɛjɔ́ŋ Sɛ́, kuꞋ nɛpɔ́ pʉɔ kɛ́ lɔ́Ꞌ pɔ́.

² Ɛ́ kɑ pɔ́ pɛ́Ꞌnɛ ḿbɔ́ yi nɛnɔŋ pɔꞋ mbi Sɛ́ nǔu yîyɑ́ ntɛ́ cẅɛɛtɛ lɔ́Ꞌ nǔu pʉɔ tɛ tʉ́m yɔ́p pɔɔ pɛn ŋ́ŋɑk wɔ́p nǔu yɛcɔ́ nu pɔ́, mbɔ pɛ́ lɔɔ ḿbɛ́t ńnɔŋ wɛcɔ́ pɔꞋ pɔ́.

³ Pɛ́ lɑɑ ńtsuŋ ńdíŋɛ sʉ́Ꞌnɛ, mbɔ yîyɑ́ ntɛ́ nɛnɔŋ pɔꞋ kɑ pɔ́ ŋ́ɡʉ ḿbɔ́ ŋɡuꞋ tsʉʉ ŋ́kẅíitɛ pʉɔmɛsɔŋ ŋɡɔ pɔ́p pʉɔ kɛpɔŋ.

⁴ MbíꞋŋɡɔ yɛcɔ́ luk yí ḿbɔ́ mɛci pɛlúu-pɛfɔŋ mbɑ mɛ́ pɛkɛkɔm fú nǔu ŋumɛsɔŋ ńjɛ́p mɛnu kɛpɔŋ mɛ́ ɡú pɔ́.

⁵ Ɛ́ yúu mi ɛ́ kɑ ɡɛnɛ Kɛlístɔ ɡɔ́ ńtɔ́ ndǔmbí, ńcú mbɔ̌ Sɛ́ ŋɡɔ: Ɔ ŋ́kɑɑ kɛ́ ŋ́kɔŋ yúu-pɔꞋ pɔ́, ŋ́kɛ́ mbɔɔ mɛnɑɑ mi pɛ́ jẅínɛ ńdɔk ŋ́ɡúꞋlɛ wú kɔŋ. Lɑ́ ŋ́kɛ́ ŋ́ɡɑ́ mbʉʉ mbɔ̌ mɔ.

⁶ Ɔ kɑ́ kɔŋ pɔꞋ ẅí pɛ́ tɔɔnɛ nɑɑ pɔ tsʉʉ pɔ́, ŋ́kɛ́ mbɔɔ kɔŋ pɔꞋ ẅí pɛ́ nɔɔnɛ mbi ɡu mbíꞋ nu kɛpɔŋ pɔ́.

⁷ Ɛ́ lɛɛ pɔ́Ꞌɔ, n cú ŋɡɔ: M bʉ́ɔ lɑɑ, mbɑ̌ɑ Sɛ́, mɔ sɛ́ ńtɔ́ nɛɡɛ yúu mi ɔ sɛ́ ŋ́kɔŋ. Ɛ́ pɔ́ ndʉ́ŋndʉŋ yúu mi pɛ́ kɑ ŋwɑꞋnɛ́nɛ tsɛt nɛpúꞋ-ŋwɑꞋnɛ yú mbíꞋ wɑ́ɑ.

⁸ A zɛɛ ḿbiitɛ ńcú ŋɡɔ: «Ɔ kɑ́ kɔŋ pɔꞋ pɔ́, ŋ́kɛ́ mbɔɔ kɔŋ yúu mi pɛ́ lɔknɛ ńtɔ́ mbi ɡu pɔ́, ŋ́kɛ́ mbɔɔ kɔŋ nɑɑ ẅí pɛ́ tɔɔnɛ wɛ́ pɔ tsʉʉ pɔ́, ŋ́kɛ́ mbɔɔ kɔŋ pɔꞋ ẅí pɛ́ nɔŋnɛ mbi ɡu mbíꞋ nu kɛpɔŋ pɔ́, mîmɑ́ mɛyúu kɑ́ pɔŋ wú pɔ́, lɑ́ ɛ́ kɛ́ ḿbɔ́ pɔ mɛyúu mi nɛpʉ́ʉ sɛ́ ḿbíkŋɛ ŋɡɔ pɛ́ ɡɛ».

⁹ Kɛlístɔ pɑ́ɑtɛ ńcú ŋɡɔ: «M bʉ́ɔ lɑɑ, mɔ sɛ́ ńtɔ́ nɛɡɛ yúu mi ɔ sɛ́ ŋ́kɔŋ», Kɛlístɔ cú pɑ́Ꞌɑ, ńdɔk ḿbík nduŋmbi ntɛ́ nɛnɔŋ pɔꞋ, ńdɔk yi fí ŋ́kúpmɛ.

¹⁰ Kɛlístɔ kɑ ɡɛ yúu mi Sɛ́ sɛ́ ŋ́kɔŋ. A kɑ ɡɑ́ túmbʉʉ yɛ́ tɑ́Ꞌ ŋkɑ́ ɛ́ kuꞋ. A lɔk pɔ́Ꞌɔ, ŋ́ɡɛ pɛkŋɛ kuꞋ pʉɔ-Sɛ́.

¹¹ Ɛ́ ɡʉ nǔu nɔŋpɔꞋ wɛ ndɛn kɑɑ, mbɔ ɑ lɛ́Ꞌ tsʉʉ, ńtʉ́ʉ pɔ ntsu fɑꞋ yɛ́, ŋ́kɛ́ ńnɔŋ pɔ tɑ́Ꞌ ntɛ́ pɔꞋ ẅi ḿbɔ́ ɛ́ pɔɔ lɑ́Ꞌ yɛcɔ́ lɛ́Ꞌ ŋ́kuꞋ nɛfú nǔu ŋu ńjɛ́p mɛnu kɛpɔŋ mɛ́ pɔ́.

¹² Lɑ́ ɛ́ kɛ́ ŋ́ɡʉ nǔu Kɛlístɔ, mbɔ ɑ kɑ nɔŋ pɔꞋ mbíꞋ mɛnu kɛpɔŋ pʉɔmɛsɔŋ, ɛ́ kuꞋ pɔ tɑ́Ꞌ ŋkɑ́ ɛ́ kuꞋ pɔ ndɑꞋ ndɑꞋ. A ɡʉ ŋ́kɔkŋɛ ńnɑ́ŋ nǔu ɡúŋ pɔ́-Sɛ́ yɛ́ tʉʉ.

¹³ A zúꞋu tɛ ŋ́kúu ŋkɔ̂ɔnɛ, ḿbɔ́ ńzẅíꞋlɛ ŋɡɔ Sɛ́ lɔk pɛɡɑŋmbuu pɛ́ ŋ́ɡɛ tíknɛ mɛku mɛ́.

¹⁴ Yɔ pɑ́Ꞌ ɑ kɑ lɔknɛ pɔ tɑ́Ꞌ yúu wɛ́mɔ́Ꞌ ẅi ɑ ɡɑ́nɛ mbɔ̌ Sɛ́, ŋ́ɡɛ pʉɔ pi pɔ́p ńdúꞋnɛ wɛ́, ŋ́kuꞋ pʉɔ-Sɛ́, ḿbɔ́ pɛ́ kɛ́ lɔ́Ꞌ pɔ ndɑꞋ ndɑꞋ.

¹⁵ Yúu mi Zẅikŋɛ Lɛ́ɛnɛ́nɛ pɛn ḿbɔ́ ɛ́sẅíi wɛkŋɛ ŋɡɔ ɛ́ nu nɛ́nẅín. Ɛ́ piitɛ ńcú ŋɡɔ:

¹⁶ Tsɑpʉɔ cúnɛ ŋɡɔ: Mîmɑ́ mɛlɛ́Ꞌ ńdɑ́Ꞌ ḿbɔ́ tɛ ńdɛɛ, lii-kɑɑ yi ŋ ɡʉ ńdɑ́Ꞌ ŋ́ɡwɑt tsɛtsɛt pɛk pɛpɔ́p, ɛ́ pʉ́ɔlɑɑ, ŋ ɡʉ ńdɑ́Ꞌ ŋ́ɡɛ tʉ́m yɔ́p tʉ́ʉ pɔ nǔu mbʉ́ʉ mɑ́ɑ. Mbɑ kwɑŋɛ yɔ́p tʉ́ʉ pɔ nǔu mbʉ́ʉ mɑ́ɑ.

¹⁷ Ḿbɛn ḿbɑ́ɑtɛ ńcú ŋɡɔ «Ɛ́ ɡʉ nǔu mɛnu kɛpɔŋ mɔ́p mbɑ nǔu mɛnu mɔ́p mi ɛ́ kɑ́ tʉ́ʉ, m bɔɔ lɑ́Ꞌ ḿbɛn ŋ́kẅíitɛ pɔ́».

¹⁸ Ɛ́ kɛ́ ŋ́ɡʉ nǔu ŋkɑ́ yi Sɛ́ piitɛ tɛ ńdíkŋɛ mɛfɑɑnɛ-ŋu ŋ́ɡɑ́ mbɔ̌ yɛ́, ŋɡɑŋ pɔɔ pɛn ńtɔ́ mbi Sɛ́ ŋ́ɡɑ́ yɛcɔ́ yúu mbíꞋ mɛnu kɛpɔŋ pɔ́.

Pɛkŋɛ kẅɛ́Ꞌlɛ mbʉʉ yɛkŋɛ nɛ́ nɛjɔ́ŋ Sɛ́

¹⁹ Pɔ́ɔpɛ́mɑ́ pɑ́ɑ, pɑ́Ꞌ ɛ́ pɔ́Ꞌɔ lɑ́, pɛkŋɛ ŋkɔ̂ɔnɛ, ńtsuŋ ḿbɔ́ ńjí sʉ́Ꞌnɛ ŋɡɔ yɛcɔ́ yúu kɑ́ pɔ́ ńtɔꞋ wɛkŋɛ nɛlɛɛ ŋ́kúu nǔu kwɑꞋ zʉꞋ-Sɛ́ pɔ́, pɔ́Ꞌɔ, ńdɛɛtɛ nǔu pɑ́Ꞌ Yɛ́su kɑ tswɛtnɛ mɛci mɛ́.

²⁰ A kɑ ɛ́sɑ mɑ́mɑ́ yúu ndẅí yi pɛ́ kɑ lɔknɛ ńtsɛ́t ndúŋ nɛkúu kwɑꞋ zʉꞋ-Sɛ́, ńdɔk pɔ́Ꞌɔ, ńtsɔ́Ꞌ sɛ̂ndúŋ ẅí pɛkŋɛ ɡʉ ńdɛɛ nǔu ŋ́kúu zʉꞋ yi Sɛ́ zúꞋu. Ɛ́ pɔ́ wɛ fí ẅi pɛkŋɛ ɡʉ ńdɛɛ nǔu ḿbɔ́ ɡú. Mɑ́mɑ́ ndẅí yi ɛ́ kɑ ɛ́sɑnɛ́nɛ, ɛ́ pɔ́ pɔ mbɑp mbʉʉ yɛ́ yi pɛ́ kɑ kẅiinɛ nǔu tʉ́ mbɑ́ŋtɛ pɑ́ŋtɛ́nɛ.

²¹ Pɛkŋɛ lɔk pɔ́Ꞌɔ, ŋ́ɡẅɛɛ nɔŋpɔꞋ wɛ ɡwɛ́ ẅi ɑ kwɑꞋ wɛ́tɛ́, jʉ́ líŋɛ́nɛ pʉɔ-Sɛ́.

²² Pɔ́Ꞌɔ lɑ́, pɛkŋɛ pɔ́ kẅɛ́Ꞌlɛ mbʉʉ nɛ́ nɛjɔ́ŋ Sɛ́, ŋ́ɡẅɛɛ tʉ́m ẅi ɛ́ nɛ́nẅín, ḿbɛn ńzɑ́p tʉ́m nǔu Sɛ́ kwɑꞋ sʉ́Ꞌnɛ, mbíꞋŋɡɔ Yɛ́su kɑ lɔk mɛci mɛ́ ɛ́suk tʉ́m yɛkŋɛ tɛ ɛ́ pɔɔ ḿbɛn ḿbɔ́ ŋ́ŋɑk wɛkŋɛ pɔ́, ɑ kɑ lɔk ŋki ẅi ɛ́ sɛ́ ńdɛ́ɛnɛ ɛ́suk mbʉʉ yɛkŋɛ.

²³ Sɛ́ kɑ kɑꞋnɛ yúu mbɔ̌ pɛkŋɛ. A pɛn ŋ́kɑꞋ yúu, ŋ́ɡɛ pɔ yîyɑ́. Pɔ́Ꞌɔ lɑ́, pɛkŋɛ kɛ́ ḿbɔ́ ŋ́kẅiꞋ ɛ́sɑ́ɑnɛ sɑ́ɑnɛ ńcú ŋɡɔ, pɛkŋɛ sɛ́ ńzẅíꞋlɛ yúu mi ɑ kɑ kɑꞋnɛ tɛ pɛkŋɛ pɔɔ ḿbɔ́ ḿmʉꞋlɛ pɔ́.

²⁴ Kɔɔ ŋu wɛkŋɛ likŋɛ nɛlíŋɛ mɔ́ɔmɑ́ wɛ, ḿbɛn ńdíŋɛ wɛ́, ńjí ŋɡɔ pɛkŋɛ ɡʉ ńdɔk pɔ́Ꞌɔ, ńníꞋ mɛtʉʉ mɛkŋɛ nǔu nɛɡẅɛɛ ŋkɔŋɛ mbɑ nǔu nɛfɑꞋ mɛfɑꞋ sʉ́Ꞌnɛ.

²⁵ Kɔɔ pɛkŋɛ nɑ́ nɛ́ kɛ́ ḿbɔ́ ńtɔ́ mɛcúꞋlɛ-mɛkŋɛ tɔ́nɛ, tɛ mbɑ pɑ́Ꞌ nɛtẅí cúꞋlɛ tsʉ́Ꞌ pɔ mɑt mbɔ̌ pɛcɔ́ pʉɔ lɑ́, tɛ ńtsʉ́Ꞌ pɔ́Ꞌɔ, ŋu wɛkŋɛ níꞋ mɛtʉʉ mɔ́ɔmɑ́ wɛ, ḿbɛn ńní kwɑꞋ mɛ́ ɡúu, mbíꞋŋɡɔ pʉʉ sɛ́ ńjʉ́ɔ pɑ́Ꞌ lɛ́Ꞌlɑ́Ꞌ-Tsɑpʉɔ sɛ́ ḿbɑ́ɑtɛ.

²⁶ Pɛ́ lɑɑ ńzɛɛ nyɛt wɛkŋɛ nɛ́ nu nɛ́nẅín tɛ pɛkŋɛ pɔ́ ńjí sʉ́Ꞌnɛ, ḿbɛn ḿmɛꞋ, ŋ́kɛ́ ŋ́ɡɛ pɔ nu kɛpɔŋ tɛ ḿbɔ́ ńjí jínɛ, mbɔ wɛcɔ́ pɔꞋ ndɛꞋ ẅi ḿbɔ́ pɛ́ nɔŋ nɛlɔk ńjɛ́p mɛnu kɛpɔŋ mɛkŋɛ, pɔɔ pɛn ḿbɔ́ ɡú pɔ́.

²⁷ Pɛkŋɛ tsʉ́Ꞌ ŋ́ɡẅɛɛ pɔ nɛɡɔ́ ńzẅíꞋlɛ yúu mi ɛ́ sɛ́ ńtɔ́, ḿbɛn ḿbɔ́ ŋ́ɡwɛt, yîyɑ́ yúu pɔ́ ŋɡɔ pɛ́ ɡʉ ŋ́ɡɛ ŋ́ŋɑk pʉɔmɛsɔŋ mbɑ ŋɡɔ, ŋkʉꞋnɛ pɛmúk ɡʉ ŋ́ɡɛ ńtɔɔ pɑtʉʉtú mbɔ̌ Sɛ́.

²⁸ Pɛ́ zɛɛ ńjí ŋɡɔ, ŋu lɑɑ ɛ́fɑɑnɛ nɛpʉ́ʉ-Mɔ̌sɛ̂ɛ, pɛ́ jẅí ŋɡɑŋ, pɔ kɛ́ tsɑ́ɑ mɛjʉ́ŋ mɛ́, pɑ́Ꞌ pɑjʉ́njʉ́ɔ pɛ́pɑ́ kɛ pɛtɑ́t ɔɔ lɑɑ ńcú ŋɡɔ ɛ́ nunɛ́ẅín.

²⁹ Tɛ ɛ́ lɑɑ ḿbɔ́ pɔ́Ꞌɔ, mbɔ pʉʉ kwɑŋɛ yʉ́ʉ ŋɡɔ ŋɡʉ̈ɔ́Ꞌ yi ɛ́ sɛ́ ḿbíkŋɛ ŋɡɔ pɛ́ zɑ́p tú ŋu ẅi ɑ lɔknɛ mɔ́ɔ-Sɛ́ ɛ́fúŋ yɑ́ yúu ɡʉ ńdɑ́Ꞌ ḿbɔ́ pɑꞋ? Pɛ́ lɑ́Ꞌ ŋu ẅí ɑ ɡwɑ́knɛ nu mɛci mi Sɛ́ lɔknɛ ŋ́ɡwɑt kɑɑ, ɛ́ pɔ́ mi pɛ́ kɑ lɔknɛ ŋ́ɡɛ ɑ tsʉ́Ꞌ ŋu-Sɛ́, ɑ ŋu ẅi ɑ zɔɔtɛ Zẅikŋɛ Lɛ́ɛnɛ́nɛ yi ɛ́ ɡɛnɛ pɛkŋɛ jí pɑ́Ꞌ tʉ́m Sɛ́ pɔŋnɛ nzʉʉ pɛkŋɛ pɔ́Ꞌɔ.

³⁰ Pɛkŋɛ zɛɛ ńtsuŋ ḿbɔ́ ńjí ŋu ẅí ɑ kɑ cúnɛ ŋɡɔ: «Mɔ ɡẅɛɛnɛ nɛtsɔ́Ꞌ nu kɛpɔŋ ŋ́ɡɑ́ yɛcɔ́, mɔ ɡẅɛɛnɛ nɛtsɔ́ꞋfɑꞋ mbɑ wɔ̌ lɑ́». A kɑ pɛn ńcú ŋɡɔ: «Tsɑpʉɔ ɡʉ ŋ́ɡɛ ŋ́ŋɑk pʉɔ pɛ́».

³¹ Yúu mi ḿbɔ́ ŋu ńnɑ́ŋ ḿbɔ́k tɛꞋ, ɛ́ nɛvu ntsɑŋ mbi Sɛ́ ẅi ɑ pɔ́ pɔ ɡú!

³² Lɑ́, Kɔɔ pʉʉ likŋɛ pɑ́Ꞌ ɛ́ kɑ pɔ́ nǔu mɛnduŋmbi mɛlɛ́Ꞌ, nǔu pɑ́Ꞌ pʉʉ kɑ pɔ́ tɛ Sɛ́ lɔk kyɛꞌ ŋ́kyɛꞋ wʉ́ʉ, pʉʉ jʉ́ɔ ŋɡʉ̈ɔ́Ꞌ tɛꞋ. Pɛ́ ḿmɑꞋ wʉ́ʉ nɛ́ ntsɔ tɛꞋ, lɑ́ pʉʉ kɛ ɛ́sʉk sʉknɛ.

³³ Pɛ́ sɛ́ ńtʉ́ʉ mbi lɑ́Ꞌ ńzɔɔtɛ wʉ́ʉ, ŋ́kʉ́ʉnɛ wʉ́ʉ, pʉʉ pɛn ńjʉ́ɔ ŋɡʉ̈ɔ́Ꞌ mbíꞋŋɡɔ pʉʉ sɛ́ ḿbɛꞋ mɛlɑꞋ-pʉɔ pi pɛ́ sɛ́ ŋ́ɡɑ́ɑnɛ wɔ́p pɑ́Ꞌ pʉʉ.

³⁴ Ŋɡɑŋtsɑ́ŋ kɑ pɔ́ ńjʉ́ɔ ŋɡʉ̈ɔ́Ꞌ, pʉʉ kúu yʉ́ʉ tsɛtsɛt pɔ́p. Ŋkɑ́ yi pɛ́ kɑ ɡẅɛɛnɛ yúu pʉ́ʉ ńcẅɛ́ɛ, pʉʉ lɔk pɔ tsɑ́ɑtɛ ḿbɛ́m pɛ́ cẅɛ́ɛ, mbíꞋŋɡɔ pʉʉ kɑ pɔ́ ńjí ŋɡɔ pʉʉ ɡẅɛɛ mɛcɔ́ mɛyúu ɛ́ pɔ́ mi ɛ́ pɔŋ ńdɛɛ mîmɑ́ ḿbɛn ḿbɔ́ mi ɛ́ ɡʉ ńdɑ́Ꞌ ḿbɔ́ pɔ ɡú.

³⁵ Pɔ́Ꞌɔ lɑ́, Kɔɔ pʉʉ kɑ́ɑ nɛzɑ́p tʉ́m nǔu Sɛ́, mbíꞋŋɡɔ mɑ́mɑ́ tsɔ́ꞋfɑꞋ nǔu.

³⁶ Ɛ́ zɛɛ ḿbɔ́ ḿbíkŋɛ ŋɡɔ pʉʉ kɛ́ sɑ́Ꞌ pɔ tʉʉ, ńjí ŋɡɔ pʉʉ ɡʉ ḿbɔ́ ŋ́ɡɛ pɔ yúu mi Sɛ́ sɛ́ ŋ́kɔŋ, ɛ́ fú pɔ́Ꞌɔ, pʉʉ ɡẅɛɛ yúu mi ɑ kɑ kɑꞋnɛ nɛɡɑ́ mbɔ̌ pʉʉ.

³⁷ Ɛ́ zɛɛ ḿbɔ́ tsɛt ŋwɑꞋnɛ-Sɛ́, mbɔ pɛ́ kɑ ŋwɑꞋnɛ ŋɡɔ: Ɛ́ tsʉ́Ꞌ mɔ́zʉꞋ, kwɑꞋ mɔ́ɔ mɔ́zʉꞋ ŋu ẅi ɑ sɛ́ ńtɔ́, tɔ́. Ɛ́ kɛ́ lɑ́ɑtɛ pɔ́.

³⁸ Wɑɑ ŋu ẅi n jʉ́ɔnɛ ŋɡɔ ɑ ndʉ́ŋndʉŋ mbi mɔ, ɡʉ ŋ́ɡɛ ńduk, ɛ́fú nǔu pɑ́Ꞌ ɑ zɑ́pnɛ tʉ́m nǔu mɔ. Lɑ́ ŋ́kɛ́ ḿbɔ́ yi ɑ lɑɑ ḿbɛn nzʉʉ, nu yɛ́ pɔɔ pɛn ḿbɔŋ wɑ́ɑ pɔ́.

³⁹ Lɑ́ ɛ́ kɛ́ ŋ́ɡʉ nǔu pɛkŋɛ, mbɔ pɛkŋɛ kɑ́ pɔ́ ntɛ́ pʉɔ pi pɔ́p pɛnnɛ nzʉʉ, ŋ́kúu pɛ́ pɔ́. Pɛkŋɛ pɑzɑ́p tʉ́m nǔu Sɛ́, ɑ lɛɛtɛ pɔ́Ꞌɔ, ŋ́ɡɛ pɛkŋɛ luk.