ŊwɑꞋnɛ-Gɑŋntúu Yɛ́su Kɛlístɔ 6 - Kɑɑ Fí

Pɛ́ tsɔ́Ꞌ pʉɔ sɑɑmbɑ́ pɑ́Ꞌ pɔ́p ɡʉ ńcẅɛ́lɛ́ ɡɑŋntúu-Yɛ́su

¹ Ɛ́ kɑ pɔ́ nǔu yîyɑ́ ŋkɑ́, nɔɔ-pɑpɛ́m Kɛlístɔ pɔ́ ŋ́kẅiꞋ tɛꞋ. Yɛcɔ́ ɡúŋ pɔ́ pɑyúdɑ pi pɔ́p sẅiŋɛnɛ Ŋɡɛlɛ́k, yɛcɔ́ pɔ́ yi pɑsẅíŋɛ sẅiŋɛ-Hɛbɛlʉʉ. Pɑsẅíŋɛ Ŋɡɛlɛ́k zɛ nɛcútɛ nǔu pɑsẅíŋɛ sẅiŋɛ-Hɛbɛlʉʉ ŋɡɔ: «Pɔ́p lɔ ŋ́ɡɑp yúujʉ́ lɛ́Ꞌ tsʉʉ, ḿbɔɔ ŋ́ɡɑ́ yɛ́ pɛpfúk pɔ́p pɔ́.»

² Gɑŋntúu-Yɛ́su ntsɔ̌ppɑ́ nɛ́ nɛɡɛ́m ɡɔ́ɔ ŋ́kɛ́ ɛ́fúŋ cúꞋlɛ-pɑpɛ́m Kɛlístɔ pɛtsʉʉ ńcú ŋɡɔ: «Ɛ́ kɑ́ pɔŋ ŋɡɔ pɛk nɑ́ nɛsẅíi nu-Sɛ́, ńtsʉ́Ꞌ ḿbɔ́ ŋ́ɡɑp pɔ yúu pɛjʉ́ pɔ́.

³ Pɔ́Ꞌɔ lɑ́ mbɑ̌ɑ pɔ́ɔpɛ́mɑ́, pʉʉ ɡʉ tsɛtsɛt pʉʉ, ńdɔɔ pʉɔ sɑɑmbɑ́ pɑ́Ꞌ pɔ́p ɡʉ ḿbɔ́ ɛ́fɑꞋ yîyɑ́ fɑꞋ. Pʉʉ tsʉ́Ꞌ nɛtsɔ́Ꞌ, ńdíŋɛ pʉɔ pi tswɛ́ wɔp pɔŋnɛ. Pʉɔ pi Zẅikŋɛ-Sɛ́ kɑ jʉ́ mɔ tʉ́m yɔ́p. Pɔ́p pɛn ŋ́ɡẅɛɛ jínu. Pɛk ńníꞋ fɑꞋ-yúupɛ́jʉ́ mbɔ̌ pɔ́p,

⁴ ŋ́ɡʉ nǔu pɛk, pɛk kɛ ńjí yɛ́k pɔ nɛcɛꞋlɛ Sɛ́, ḿbɛn ḿbɔ́ ɛ́sẅíi pʉɔ pɔ nɛ́ nu yɛ́.»

⁵ Pɑpɛ́m Kɛlístɔ zúꞋ, ɛ́ pɔŋ wɔ́p tɛꞋ. Pɔ́p ɡɔ́ɔ ŋ́kɛ́ ńtsɔ́Ꞌ Ɛtiyɛ̂n. A pɔ́ ŋu ńzɑ́p tʉ́m yɛ́ nǔu Sɛ́ tɛꞋ, mbɔ Zẅikŋɛ-Sɛ́ kɑ ńjʉ́ mɔ wɛ́. Pɛ́ pɛn ńtsɔ́Ꞌ Filîp, ńtsɔ́Ꞌ Pɔlɔkɔl, ńtsɔ́Ꞌ Nikɑnɔl, ńtsɔ́Ꞌ Timɔn, ńtsɔ́Ꞌ Pɑlmɛnɑs pɔ́p Nikɔlɑ ẅi ɑ m̄bɔ́ ŋu-Antíyɔshɛ. Mbɔ ɑ kɑ pɛ́m nɔŋŋɡɔŋ-pɑyúdɑ lɑ ŋ́kúu nǔu nɔɔ-pɑpɛ́m Kɛlístɔ.

⁶ Pɔ́p kɑ tsɔ́Ꞌ pʉɔ pɔnɛ, ńdɔk wɔ́p ńtɔ́ ńnyɛt mbɔ̌ ɡɑŋntúu. Gɑŋntúu cɛꞋlɛ Sɛ́, ńzɑ́p mbɔ́ tú pɔ́p.

⁷ Sẅiŋɛ-Sɛ́ kɑ pɔ́ ŋ́kẅiꞋ ɛ́sɑt pɔ zʉꞋ. Nɔɔ-pɑzɑ́p tʉ́m nǔu Yɛ́su pɔ́ ŋ́kẅiꞋ ńzɑ́ɑ Yɛlúsɑlɛm. PɑnɔŋpɔꞋ tɛ ńzɑ́ɑ zɑ́p tʉ́m nǔu Yɛ́su.

Pɛ́ ɡẅɛɛ Ɛtiyɛ̂n

⁸ Ɛtiyɛ̂n ẅí pɛ́ kɑ tsɔ́Ꞌnɛ wɛ́ lɑ́, ɑ m̄bɔ́ ŋu, mbɔ Sɛ́ kɑ tẅiktɛ pɔ́ yɛ́, ḿbɔ́ ŋ́ɡɑ́ wɛ́ nɛ́ mɛtʉʉ. A lɔk ŋ́ɡɛ mɛŋkʉꞋnɛ mɛnu pɔ́p mɛnu mɑ̌ɑmɑɑnɛ tsɛtsɛt pʉɔ.

⁹ Pɛcɔ́ ntɑ́Ꞌ pʉɔ ɡɛ ńzɛ nɛzɔŋ nu yí Ɛtiyɛ̂n cúnɛ. Yɛcɔ́ ɡúŋ pɔ́ pɑyúdɑ pi pɔ́p fúnɛ Silɛ̂nɛ mbɑ Alɛkzɑŋndɛlîi, ḿbɔ́ pʉɔ pi pɔ́p tsɛtsɛt ndɑ́-cúꞋlɛ yi pɛ́ kɑ pɔ́ ɛ́fúŋ ŋɡɔ: «Ndɑ́-cúꞋlɛ-Pɑcẅɛtndɑ́-kwɑɑ.» Yɛcɔ́ ɡúŋ pɔ́ pɑyúdɑ pi pɔ́p fúnɛ tsɛt ŋɡɔŋ-Silisî mbɑ nǔu pɑk-ŋɡɔŋ Azîi.

¹⁰ Pɔ́p pɛpɔ́p pɔ́ ńzɔŋ pɔ́Ꞌɔ, wɛcɔ́ ŋu pɔɔ ŋɑk wɛ́ tɛ ńjʉ́ pɔ́, mbíꞋŋɡɔ Zẅikŋɛ-Sɛ́ kɑ pɔ́ ŋ́ɡɑ́ wɛ́ nɛ́ jínu nɛlɔk ńcú nu.

¹¹ Pɔ́p jʉ́ɔ kɛ́kɑ́ŋ, ɛ́fúŋ pʉɔ, ńcú mbɔ̌ pɔ́p ŋɡɔ pɔ́p cú ŋɡɔ pɔ́p kɑ zúꞋ pɑ́Ꞌ Ɛtiyɛ̂n sẅiŋɛnɛ kɛpɔŋ nǔu Mɔ̌sɛ̂ɛ mbɑ nǔu Sɛ́.

¹² Pɔ́p ɡɛ pɔ́Ꞌɔ, ńdɔk ńtẅítɛ lɑ́Ꞌ, mbɑ pɛkɛ́m mbɑ pɑkyɛ́ꞌtɛ nɛpʉ́ʉ-Mɔ̌sɛ̂ɛ, ḿmɑꞋ wɔ́p nzʉʉ Ɛtiyɛ̂n. Pɔ́p ɡẅɛɛ wɛ́, ńdɔk wɛ́ ŋ́ɡʉ mbi cúꞋlɛ-pɑsɑ́Ꞌ lɑ́Ꞌ pɑ́Ꞌ pɛ́ ɡʉ ŋ́ŋɑk wɛ́.

¹³ Pîpɑ́ pʉɔ lɔk mbɑ pɛcɔ́ ɡɑŋcɔtnu, ŋ́ɡʉ zúꞋu. Pɔ́p tɔ́ ńcú ŋɡɔ: «Ŋu wɔ júk pɔ nɛsẅíŋɛ kɛpɔŋ nǔu ndɑ́-nɔŋpɔꞋ yɛkŋɛ yi ɛ́ Yɛlúsɑlɛm wɔ, mbɑ nǔu nɛpʉ́ʉ-Mɔ̌sɛ̂ɛ.

¹⁴ Pɛk kɑ zɛɛ ńzúꞋ ɑ cú ŋɡɔ Yɛ́su ŋu-Nɑ̌ɑzɑlɛt jʉ́ ɡʉnɛ ŋ́ɡɛ ŋ́kɛm Ndɑ́-nɔŋpɔꞋ yɛkŋɛ, ḿbɛn ŋ́kúp mɑt ẅí Mɔ̌sɛ̂ɛ kɑ ɡɑ́nɛ mbɔ̌ pɛkŋɛ.»

¹⁵ Pɑsɑ́Ꞌ lɑ́Ꞌ pinɛ pɔ́p ḿbɔ́nɛ ndɑ́ cúŋ pɛ́tsʉʉ ɡɔ́ɔ ŋ́kɛ́ ḿbɔ́ ńtík mík nǔu Ɛtiyɛ̂n, ŋ́ɡɔ ńjʉ́ɔ shʉ́ wɛ́ tsʉ́Ꞌ ḿbɔ́ pɔ pɑ́Ꞌ wɛ́ Cʉ̈ɔꞋ-Sɛ́ lɑ́.