ŊwɑꞋnɛ-Gɑŋntúu Yɛ́su Kɛlístɔ 28 - Kɑɑ Fí

Pɔ̂l tsɛt ŋɡɔŋ-Mɑltɛ

¹ Pɛk fú ntsu-nɛvú ńcẅɛt pɑ́Ꞌɑ, pɛ́ kúu ŋɡɑ́ŋ, ɛ́sẅíi wɛ́k ŋɡɔ lík-ŋɡɔŋ ẅi pɛk tʉ́ʉnɛ zúꞋu ɛ́ ŋɡɔ Mɑltɛ, ŋɡɔŋ ẅi ŋki kɑ zɛmɛnɛ ńníꞋ sɔŋ.

² Pɑlɑ́Ꞌ ɛ̂pɑ́, ɡɛ nu sʉ́Ꞌnɛ nǔu pɛk tɛ ńniitɛ mɑ́mɑ́ múk, ɛ́fúŋ wɛ́k ŋɡɔ pɛk tɔ́ ńzɔ́k. Ɛ́ ɡɔ́ ḿbɔ́, mbɔ mbʉŋ zɛ nɛlɔ́, fɑ́k pɛn ḿbɔ́ ŋ́kɔ́.

³ Pɛ́ pɔ́ ńzɔ́k múk, Pɔ̂l ŋwɑt ɡɛ́ɡɛ́ tsẅíi nɛmɑꞋ múk. Nɔ́ pɔ́ tsɛtú, ńzúꞋ jɑ́k-múk, ńnɛ́m pɔ́ yɛ́ ńcʉŋɛ nǔu.

⁴ Pʉɔ-lɑ́Ꞌ ɛ̂pɑ́ jʉ́ɔ pɑ́Ꞌ nɔ́ cʉŋɛ́nɛ nǔu pɔ́ yɛ́, ɛ́shɔtnɛ ńcú tsɛtsɛt pɔ́p ŋɡɔ: «Ŋu wɔ ɡʉ ŋ́ɡɛ ŋɡɔ́ku ɔɔ, ḿbɔ́ njẅíŋu. A luk ŋki lɑ́, sɛ́ wɛk Jẅitis jʉ́ɔ ŋɡɔ ɑ kɛ́ nɑ́ wɛ́ ɑ pɔ́ ɡú pɔ́.»

⁵ Lɑ́ Pɔ̂l sɛn pɔ́ yɛ́, ḿmik ndǔ múk. Nɔ́ cúŋ, ḿvu múk. Yúu pɔɔ Pɔ̂l ɡɛ.

⁶ Pʉɔ pɑ́ pɔ́ ńzẅíꞋlɛ ŋɡɔ Pɔ̂l ɡʉ ŋ́kɔ́Ꞌtɛ mbɑ nɛjʉ́ɔ ɑ vukŋɛ vukŋɛ́nɛ ḿvu ḿpfú, ńzɛ nɛpyɛ́p, ḿbyɛ́p pyɛ́pnɛ ńjʉ́ɔ yɛcɔ́ yúu pɔɔ Pɔ̂l ɡɛ. Pɔ́p shɔtnɛ sẅiŋɛ ńcú ŋɡɔ: «A wɛcɔ́ sɛ́!»

⁷ Tsɛtsɑ́Ꞌ-ŋútlɑ́Ꞌ túmbʉ́ʉ pɔ́ mbʉʉ zúꞋu. Pɛ́ fúŋ ŋɡɑŋ nɛ́ Pubilíyus. A jʉ́ɔ wɛ́k, ŋ́kúkŋɛ wɛ́k pɑ́Ꞌ pɛsúu pɛ́ lɑ́. Pɛk nɑ́ŋ njɛ́Ꞌ yɛ́ lɛ́Ꞌ pɛtɑ́t.

⁸ Ɛ́ ɡɔ́ ḿbɔ́ tɑ́t pɛ́ Pubilíyus ɛ̂wɑ́ nɔɔ ndɑ́, ḿbɔ́ ŋ́ɡɔɔ. Mbʉʉnút pɔ́ nǔu wɛ́, sɑɑkɔ́Ꞌ pɔ́ ŋ́ɡɛ wɛ́. Pɔ̂l ɡʉ ńjʉ́ɔ wɛ́, ńcɛꞋlɛ Sɛ́ ńzɑ́p mbɔ́ tú yɛ́, ŋ́ɡɛ ɑ fíitɛ.

⁹ Pɛcɔ́ ɡɑŋɡɔɔ zúꞋ, ɛ́fú mɛshʉ́ mɛshʉ́ tsɛt ŋɡɔŋ ɛ̂wɑ́, ńtɔ́ ńjʉ́ɔ Pɔ̂l. A ɡɛ pɔ́p fíitɛ.

¹⁰ Pʉɔ-zúꞋu kɑ ɡɛ mɛkuꞋ mɛ́k tɛꞋ. Tɛ lɛ́Ꞌ yi pɛk ḿbɔ́ ŋ́ɡʉ ŋ́ɡʉ, pɔ́p ɡɑ́ wɛ́k nɛ́ mbɑ kʉ̈ɔ́ lɑ́ yi ɛ́ lɑɑ ḿbɔ́ ɛ́ kúu ndúŋ-nɛnɛn ńcẅɛ́lɛ́ wɛ́k.

Pɔ̂l kúu tʉ́sɔŋ-Lɔ́mɑ

¹¹ Pɛk kɑ tswɛ́ tsɛt ŋɡɔŋ ɛ̂wɑ́ pɛsɑŋ pɛtɑ́t, ŋ́ɡɛ ŋ́ɡʉ, ŋ́kúu yɛcɔ́ mɑ́mɑ́ kɑnúꞋ ẅi pɛ́ fúŋnɛ ŋɡɔ: Mɛsɛ́ mi pɔ́p mɛfɑ́k. Ɛ́ pɔ́ wɛ tʉ́sɔŋ-Alɛkzɑŋndɛlíi, ŋ́ɡɔ ŋ́kúu zúꞋu, ɛ́ pɔ́ ŋkɑ́ kɛpɔŋ, ɛ́ ŋ́ɡɔ́ŋ zúꞋu.

¹² Pɛk fú tsɛt ŋɡɔŋ-Mɑltɛ, ŋ́ɡʉ tɛ ŋ́kúu mbʉʉ-tʉ́sɔŋ-Silɑkuzɛ, ḿpfúu, ńnɑ́ŋ zúꞋu lɛ́Ꞌ pɛtɑ́t.

¹³ Ŋ́ɡɛ ɛ́fú zúꞋu ńdɔk kɑnúꞋ, ŋ́kwɑnɛ pɔ mɛmbʉʉ-ŋki tɛ ŋ́kúu tʉ́sɔŋ-Lɛjyɔ́. Njí ɡɛ ŋ́kiɛ, wɛcɔ́ fɛfʉ̈ɔt fú shʉ́ ntsʉ́ʉ ńzɛ nɛtsʉꞌnɛ, ńcẅɛ́lɛ́ wɛ́k, pɛk lɔk lɛ́Ꞌ pɛ́pɑ́, ŋ́kúu mbʉʉ tʉ́sɔŋ-Puzɔlɛs.

¹⁴ Ŋ́kúu zúꞋu, ńjʉ́ɔ pɛcɔ́ pɔ́ɔpɛ́mɑ́. Pɔ́p fúŋ wɛ́k ŋɡɔ pɛk pɛpɔ́p nɑ́ŋ njɛ́Ꞌ pɔ́p tɑ́Ꞌ ŋɡɑplɑ́Ꞌ. Yɔ pɑ́Ꞌ pɛk kɑ fúnɛ zúꞋu ńnɛn nɛ mɛku ŋ́kúu tʉ́sɔŋ-Lɔ́mɑ

¹⁵ Ɛ́ ɡɔ́ ḿbɔ́, mbɔ pɛk kɑ pɔ́ ńtɔ́ pɔ́ɔpɛ́mɑ́ pi pɔ́p tʉ́sɔŋ-Lɔ́mɑ zúꞋ, ńcẅɛt ńtɔ́ ńzɑ́Ꞌ wɛ́k. Pɛcɔ́ zɑ́Ꞌ wɛ́k ndǔ Mɛtɑ́ɑ-Apíyus, pɛcɔ́ zɑ́Ꞌ wɛ́k zʉꞋ yi pɛ́ fúŋnɛ ŋɡɔ Mɛndɑ́ Mɛ́ntɑ́t mi ɛ́ mɛ́ pɛɡʉʉ. Pɔ̂l kɑ pɔ́ tɛ ńjʉ́ɔ pɔ́ɔpɛ́mɑ́, ŋ́ɡɛ́mtɛ Sɛ́, ḿbɛn sʉk.

¹⁶ Pɛk kúu tʉ́sɔŋ-Lɔ́mɑ pɛ́ pɛ́m ŋɡɔ Pɔ̂l pɔ́p tɑ́Ꞌ ndʉ̈ɔ́Ꞌntsɔ ẅi ɑ ɡʉ ḿbɔ́ ḿbyɛ́p wɛ́ ɡʉ ńtswɛ́ zʉꞋ yi Pɔ̂l kɔŋnɛ.

Pɔ̂l tʉ́sɔŋ-Lɔ́mɑ ḿbɔ́ ɛ́sẅíi pʉɔ nɛ́ nu-Sɛ́

¹⁷ Pɛk kúu Lɔ́mɑ pɔ́Ꞌɔ, ɛ́ lɛɛ lɛ́Ꞌ pɛtɑ́t, Pɔ̂l fúŋ pɛkɛ́m-pɑyúdɑ pi pɔ́p tswɛ́nɛ Lɔ́mɑ ŋɡɔ pɔ́p tɔ́ zʉꞋ yi ɑ nɑ́ŋnɛ zúꞋu. Pɔ́p tɔ́ tɛ ńnɑ́ŋ sɛ́, ɑ cú mbɔ̌ pɔ́p ŋɡɔ: «Pɔ́ɔpɛ́mɑ́ pɑ́ɑ, n tʉ́ʉ pɑ́Ꞌɑ, mbɔ mɔ ŋkɑɑ yɛcɔ́ nu mbɔ̌ pɑlɑ́Ꞌ pɛkŋɛ fɑɑnɛ, ḿbɛn ŋ́kɛ́ mbɔɔ yɛcɔ́ nu nǔu mɑt-pɛmɑɑŋɡɑpnjẅɛt pɛkŋɛ fɑɑnɛ. Lɑ́, ɛ́ pʉ̈ɔ́lɑɑ, mbɔ pɛ́ kɑ ɡẅɛɛ wɑ́ɑ tʉ́sɔŋ-Yɛlúsɑlɛm, ńníꞋ wɑ́ɑ mbɔ̌ Pɑlɔ́mɑ lɑɑ.

¹⁸ Pɔ́p kɑ ŋɑk wɑ́ɑ tɛ ḿbɔ́ ńdɔɔ nɛnɑ́ wɑ́ɑ, ɛ́ zɛɛ ŋ́ɡɔ ḿbɔ́, mbɔ pɔ́p kɑ́ jʉ́ɔ yɛcɔ́ yúu mi ŋ kɑ ɡɛnɛ tɛ ɛ́ lɑɑ ḿbɔ́ pɛ́ lɛɛ nǔu ńjẅí wɑ́ɑ pɔ́.

¹⁹ Lɑ́ pɑyúdɑ pɔɔ pɛ́m. N jʉ́ɔ kɛ́kɑ́ŋ, ŋɡɔ ɛ́ lɑɑ ḿbɔ́ pɔ́Ꞌɔ, mbɔ Kɑ́sɑ-Pɑlɔ́mɑ ɡʉnɛ ŋ́ŋɑk yɑɑ ntsɑŋ. Lɑ́, ŋ́kɛ́ ḿbɔɔ ńcú pɔ́Ꞌɔ ńdɔk ɛ́fɛn lɑ́Ꞌ yɛkŋɛ pɔ́.

²⁰ Yɔ yúu mi ɛ́ lɑ́Ꞌnɛ ŋ́ɡɛ lɑ́ n tsɑ́ɑ nɛjʉ́ɔ wʉ́ʉ pɛkŋɛ sẅiŋɛ. Pʉʉ jí yʉ́ʉ yúu mi pɑíslɑyɛ̂l lɔ ńjúk ḿbyɛ́p. Mɛcɛ̂n mɔnɛ pɛn ḿbɔ́ nǔu mbɔ́ mɑ́ɑ pɑ́Ꞌɑ ntɛ́ pɔ yúu mi pɛkŋɛ pyɛ́pnɛ.»

²¹ Pɑyúdɑ zúꞋ tɛ ńtsɔ́Ꞌ mbɔ̌ Pɔ̂l ŋɡɔ, pɛk ŋkɑɑ zɛɛ ńcẅɛ́ɛ yɛcɔ́ ŋwɑꞋnɛ yi ɛ́ fúnɛ Judɛ̂ ńcú nu nǔu ɡu pɔ́. Wɛcɔ́ mɔ́ɔmɑ́ wɛkŋɛ kɛ́ ḿbɔɔ tɔ́ zɑꞋnɛ ḿbɛ́ɛtɛ yɛcɔ́ nu ɛ́sẅíi wɛ́k nǔu ɡu pɔ́, wɛcɔ́ ŋu pɔɔ cú ŋɡɔ ɔ ɡɛ yɛcɔ́ nu kɛpɔŋ pɔ́.

²² Lɑ́ pɛk sɛ́ ŋ́kɔŋ ŋɡɔ ɔ tsuŋ ŋ́kyɛ́Ꞌtɛ yúu mi ɛ́ lɔ́ŋ wu ɛ́sẅíi wɛ́k. Pɛk cú pɑ́Ꞌɑ lɑ́ ŋ́kɛ́ ńzɛɛ ḿbɔ́ ńjí ŋɡɔ pɛ́ mbɑ ɡɔ́ lɑ́, ɛ́sẅíŋɛ pɔ kɛpɔŋ nǔu pɑfɑk mbʉʉ pi ɔ nǔu lɑ́.

²³ Pɑyúdɑ cú pɔ́Ꞌɔ, pɔ́p pɛ́ Pɔ̂l tɑ́ŋ lɛ́Ꞌ yi pɔ́p pɛpɔ́p ɡʉ ŋ́ɡɛ ḿbɛn ḿbuutɛ. Lɛ́Ꞌ ɛ̂yɑ́ ɡɛ ŋ́kuꞋ, pɔ́p pɛn ńtɔ́, ŋ́kẅɛ́ɛtɛ wɛ́ zʉꞋ yi ɑ nɑ́ŋnɛ zúꞋu, ŋ́ɡɔ ńtɔ́ yîyɑ́ ku ńzɑ́ɑ tɛꞋ. Pɔ̂l kyɛ́Ꞌtɛ nu-nɛfɔɔ-Sɛ́ ɛ́sẅíi wɔ́p tɛ ɛ́fú mbɑꞋmbɑꞋɑ́ ŋ́kúu ntsuŋkẅɛ́Ꞌ, ńdɔɔ shʉ́ nɛɡɛ tɛ pɔ́p niitɛ ńjí ŋu ẅí Yɛ́su jʉ́, ḿbɔ́ ńcẅɛɛtɛ mɛnu tsɛt mɛŋwɑꞋnɛ nɛpʉ́ʉ-Mɔ̌sɛ̂ɛ mbɑ tsɛt mɛŋwɑꞋnɛ -pɛŋɡɛ́mndʉ̈ɔ́Ꞌ-Sɛ́.

²⁴ Pɛcɔ́ pʉɔ tsɛtsɛt pɔ́p zúꞋ nu yi ɑ cúnɛ ḿbɛ́m. Pɛcɔ́ pʉɔ lʉꞋ lʉꞋnɛ.

²⁵ Pɔ́p tsʉ́Ꞌ nɛɡʉ, mbɔɔ pɛn ɛ́sẅíŋɛ ńzúꞋnɛ pɔ́. Pɔ̂l tsʉ́Ꞌ ńcú mbɔ̌ pɔ́p pɔ ŋɡɔ: «Zẅikŋɛ-Sɛ́ kɑ pɔ́ ńcú sẅíinu. A kɑ lɔk ntsu-Ŋɡɛ́mdʉ̈ɔ́Ꞌ-Sɛ́ Ɛsɑ̌yɑ ńcú mbɔ̌ pɛtɑ́t pʉʉ ŋɡɔ:

²⁶ Gʉ ńcú mbɔ̌ pʉɔ-ŋɡɔŋ wɔ ŋɡɔ: Pɛ́ ɡʉ ŋ́ɡɛ ńcú nu, pʉʉ zúꞋ sʉ́Ꞌnɛ, ŋ́kɛ́ mbɔɔ jí yúu mi pɛ́ cúnɛ pɔ́; tsuŋ ńdíŋɛ, ŋ́kɛ́ mbɔɔ jʉ́ɔ

²⁷ Ɔ́ɔŋ, pʉɔ-ŋɡɔŋ wɔ kɑ́ pɔ́ ŋ́kɔŋ nɛzúꞋ yɛcɔ́ yúu pɔ́. Pɔ́p kɑ zʉʉnɛ mɛtúutɛ́ mɔ́p, pɔ́p kɑ tsɛ́t mík mɔ́p. Pɔ́p kɑ́ pɔ́ ŋ́kɔŋ nɛlɔk mík mɔ́p ńjʉ́ɔ zʉꞋ pɔ́, ŋ́kɛ́ mbɔɔ pɔ́ ŋ́kɔŋ nɛlɔk mɛtúutɛ́ mɔ́p ńzúꞋ pɔ́. Pɔ́p jʉ́ɔꞋ tʉ́m yɔ́p mbíꞋŋɡɔ pɔ́p ŋ́kɔŋ nɛzúꞋ pɔ́, ŋ́kɛ́ ŋ́ɡɛtɛ pɔ pɔ́Ꞌɔ, ńjí ŋɡɔ pɔ́p kɛ́ pɛn mbɔ̌ mɔ Sɛ́, ŋ ɡɛ pɔ́p fíitɛ pɔ́.»

²⁸ Pɔ̂l pɛn ńcú mbɔ̌ pɔ́p ŋɡɔ: «Pʉʉ ɡẅɛɛ nɛjí ŋɡɔ, ɛ́ kɛ́ ḿbɔ́ ŋkɔ̂ɔnɛ, mbɔ Sɛ́ kɑ túu Ŋkʉʉ Sʉ́Ꞌnɛ ẅi ɛ́ ɡɛnɛ pɛ́ luk, mbɔ̌ pʉɔ pi pɔ́p kɑ́ pɔ́ pɑyúdɑ pɔ́. Ŋ́ɡʉ nǔu pɔ́p, pɔ́p ɡʉ ńzúꞋ ḿbɛ́m.» [

²⁹ A cú pɔ́Ꞌɔ, pɑyúdɑ ɡɔ́ ɛ́fú zúꞋu ŋ́ɡʉ, ńnɛn ńzɔŋ nu ɛ̂yɑ́ tɛ ńcʉ̈ɔ́k cʉ́ɔknɛ.]

³⁰ Pɔ̂l nɑ́ŋ nɑŋnɛ ŋɡuꞋ yɛ́pɑ́, tsɛt ndɑ́ yi ɑ kɑ cẅɛ́ɛnɛ ḿbɔ́ ḿbíi. Wɛ́t ŋu lɑ́ ẅi ɑ kɔŋnɛ nɛjʉ́ɔ wɛ́, tɔ́ zúꞋu, pɔ́pmɛ́ sẅiŋɛ.

³¹ A pɔ́ ɛ́sɑ́Ꞌ ɛ́sẅíi pʉɔ nɛ́ yúu mi nɛfɔɔ-Sɛ́ yɛ́tɛ́, ḿbɛn ńtsuŋ ńzíꞋ wɔ́p nɛ́ ŋu ẅí Tsɑpʉɔ Yɛ́su Kɛlístɔ jʉ́ pɔ sɑ́ɑnɛ sɑ́ɑnɛ́nɛ, wɛcɔ́ ŋu pɛn ŋ́kɛ́ mbɔɔ wɛ́ tɔꞋ.