ŊwɑꞋnɛ-Gɑŋntúu Yɛ́su Kɛlístɔ 27 - Kɑɑ Fí

Pɛ́ túu Pɔ̂l Lɔ́mɑ

¹ Pɛ́ ɡɛ ḿbɔ́ tɛ ńzɑ́p ŋɡɔ pɛk ɡʉ ŋ́kúu mɑ́mɑ́ kɑnúꞋ, ŋ́ɡʉ tsɛt ŋɡɔŋ-Itɑlî, ńníꞋ Pɔ̂l pɔ́p pɛcɔ́ ɡɑŋtsɑ́ŋ mbɔ̌ wɛcɔ́ tɑ́tndɑ́-ntsɔ. Lík yɛ́ pɔ́ ŋɡɔ Julíyus. A pɔ́ wɛcɔ́ tɑ́Ꞌ ŋu nǔu ku-pɑlʉ̈ɔ́Ꞌntsɔ pinɛ pɔ́p ḿbɔ́nɛ pɛ́ Kɑ́sɑ.

² Pɛk ɡɔ́ ŋ́kúu wɛcɔ́ mɑ́mɑ́ kɑnúꞋ, ɛ́ pɔ́ wɛ tʉ́sɔŋ-Andɛlɑmítɛ, ḿbɔ́ ŋ́ɡʉ mbʉʉ mɛtʉ́sɔŋ mi ɛ́ mbʉʉ-ŋki, tsɛt pɑk-ŋɡɔŋ-Azîi. Pɛk pɛ́ wɛcɔ́ ŋu pɔ́ tɑ́Ꞌ ku. Lík yɛ́ pɔ́ ŋɡɔ Alistɑk. Mbɔ pɛ́ kɑ pí wɛ́ tʉ́sɔŋ-Tɛsɑlɔ́ník, tsɛt ŋɡɔŋ-Mɑsɛ́ndwɑn, pɛk cʉ́ɔ sɛ̂ndúŋ.

³ Njí ɡɛ ŋ́ɡɔ ŋ́kiɛ, pɛk kúu tʉ́sɔ-Sidɔŋ. Julíyus ɡẅɛɛ tʉ́m sʉ́Ꞌnɛ nǔu Pɔ̂l tɛ ńnɑ́ wɛ́ ɑ cẅɛt tsɛt kɑnúꞋ ŋ́ɡʉ ŋ́ɡwɑ́ pɛsúu pɛ́ pɔ́p kúu ńcẅɛ́lɛ́ wɛ́.

⁴ Pɛk pɛn ɛ́fú nǔu yîyɑ́ tʉ́sɔŋ tɛ ḿbɔ́ ŋ́ɡʉ, fɛfʉ̈ɔt fú mbi nɛ́ mbi ńtɔꞋ mɑ́mɑ́ kɑnúꞋ nɛɡʉ ndʉ́ŋndʉŋ. Pɛk lʉ́ɔꞋ fɛfʉ̈ɔt ńdɔk shʉ́ wɛ Shíipɛlɛ ŋ́ɡʉ, ɛ́ pɔ́ yɛcɔ́ ŋɡɔŋ, mbɔ ŋki kɑ zɛmɛ ńníꞋ sɔŋ.

⁵ Ńnɛn pɔ pɔ́Ꞌɔ, ńdɛɛ mɑ́mɑ́ ŋki ẅi ɛ́ mbʉʉ-ŋɡɔŋ-Silísíyɑ, pɔ́p ŋɡɔŋ-Pɑnfilî, ŋ́ɡɔ́ɔ ŋ́kɛ́ ŋ́kúu mbʉʉ-tʉ́sɔŋ-Mílɑ, tsɛt ŋɡɔŋ-Silisî ńtʉ́ʉ.

⁶ Ŋ́kúu zúꞋu pɔ́Ꞌɔ, tɑ́tndɑ́-ntsɔ ẅí pɛk pɛpɔ́p nɛnnɛ lɑ́, jʉ́ɔ wɛcɔ́ mɑ́mɑ́ kɑnúꞋ tʉ́sɔŋ-Alɛkzɑŋndɛlii, ńdɔk shʉ́-ŋɡɔŋ-Itɑ́líyɑ ŋ́ɡʉ. A ɡɛ pɛk kúu tsɛt ẅîwɑ́ kɑnúꞋ ŋ́ɡʉ.

⁷ Fɛfʉ̈ɔt ɡɛ pɛk lɔk mɛlɛ́Ꞌlɑ́Ꞌ tɛ ńzɑ́ɑ, ŋ́kɛ́ ńnɛn pɔ ndɑ̌ɑ ndɑɑ. Tɛ ŋ́ɡɔ ńjʉ́ɔ tʉ́sɔŋ-Sníidɛ, mbɔ pɛk jʉ́ɔ ŋɡʉ̈ɔ́Ꞌ tɛꞋ. Fɛ́m tɔꞋ wɛ́k nɛɡʉ ndʉ́ŋndʉŋ tɛ ndɑꞋ. Pɛk tsʉ́Ꞌ ḿbɑŋtɛ ńdɔk pɔ Shʉ́-kɛlɛ̂tɛ ŋ́ɡʉ, ɛ́ pɛn ḿbɔ́ yɛcɔ́ ŋɡɔŋ ẅi ŋki kɑ zɛmɛnɛ ńníꞋ sɔŋ. Pɛk kúu zúꞋu, ńnɑ́Ꞌ ńdʉ̈ɔ́Ꞌ fɛ́m ńdɔk wɛ Sɑlɛmɔnɛ, ŋ́ɡʉ. Ɛ́ pɔ́ zʉꞋ-tsɛ́tsɑ́Ꞌ-Kɛlɛ̂t yi ɛ́ kɑ sẅiklɛnɛ ŋ́kúu ŋki.

⁸ Pɛk pɔ́ ńnɛn mɛmbʉʉ-ŋki-Kɛlɛ̂t, ńjʉ́ɔ ŋɡʉ̈ɔ́Ꞌ tɛꞋ, ŋ́ɡʉ tɛ ŋ́kúu nǔu yɛcɔ́ zʉꞋ yi pɛ́ fúŋnɛ ŋɡɔ: Nɛtʉ́ʉ mɑ́mɑ́ kɑnúꞋ wɛ Sʉ́Ꞌnɛ, ɛ́ pɔ́ Shʉ́-tʉ́sɔŋ-Lɑsɛ́ɛ.

⁹ Pɛk ɡɔ́ ŋ́kúu zúꞋu pɔ́Ꞌɔ, mbɔ pɛk tswɛ́ sɛ̂ndúŋ tɛꞋ. Tɛ mbɔ sɑŋ yɛ́nɛ́pfúꞋu ẅi pɑyúdɑ ŋ́kɔŋ kɔŋnɛ ńnɑ́ŋ njí lɛɛ mɔ. Pɔ́Ꞌɔ, ḿbɔ́ yi ŋu lɑɑ ḿbɛn ńdɔk mɑ́mɑ́ kɑnúꞋ ńnɛn nɛnnɛ, ɑ tsʉ́Ꞌ ńdɔɔ pɔ nɛvú wɛ. Ɛ́ yúu mi ɛ́ kɑ ɡɛnɛ, Pɔ̂l zɑ́Ꞌ njí ɛ́sẅíi pʉɔ mɑ́mɑ́ kɑnúꞋ ŋɡɔ:

¹⁰ «Pɛsúu pɑ́ɑ, mɔ sɛ́ ńjʉ́ɔ ŋɡɔ pɛkŋɛ lɑɑ ḿbɛn ŋ́ɡʉ mbi, mbɔ ɛ́ nɛɡɑ́ tú. Mbɔ mɑ́mɑ́ kɑnúꞋ ŋ́ɡɛ yúu-mɛtɑ́ɑ mi ɛ́ tsɛtú ḿbʉ́ʉpɛ. Lɛ́Ꞌcɔ́ pɛkŋɛ ɡúu pɔɔ luk.»

¹¹ Pɔ̂l cú pɔ́Ꞌɔ, tɑ́tndɑ́-ntsɔ zúꞋ, ḿbɔɔ yîyɑ́ nu pɑ́t, ńzúꞋ pɔ nu yí ɛ́ cẅɛtnɛ ntsu-ŋu ẅí ɑ sɑ́Ꞌnɛ pʉɔ pinɛ pɔ́p fɑꞋnɛ tsɛt mɑ́mɑ́ kɑnúꞋ tɛ mbɑ yi ŋɡɑŋ-mɑ́mɑ́ kɑnúꞋ cúnɛ.

¹² Ńzɛɛ ŋ́ɡɔ ḿbɔ́, zʉꞋ nɛtʉ́ʉ pɛmɑ́mɑ́ kɑnúꞋ yi ɛ́ zúꞋu pɔɔ lii zʉꞋ yi ɛ́ lɑɑ ḿbɔ́ pʉɔ tswɛ́ zúꞋu nǔu ŋkɑ́-fɛ́m tɛ nu pɔŋ wɔ́p pɔ́. Ɛ́ lɛɛ pɔ́Ꞌɔ, pʉɔ pɛtsʉʉ pi pɔ́p ḿbɔ́nɛ tsɛt mɑ́mɑ́ kɑnúꞋ tsʉ́Ꞌ ńzɑ́p pɔ ŋɡɔ pɛ́ fú zúꞋu ŋ́ɡʉ, ḿbɔ́ ŋ́kwɑŋɛ ŋɡɔ ɛ́ lɑɑ ŋ́ɡɑ́ shʉ́, pɔ́p ɡʉ tɛ ŋ́kúu nǔu zʉꞋ nɛtʉ́ʉ pɛmɑ́mɑ́ kɑnúꞋ yi ɛ́ tsɛt ŋɡɔŋ-Kɛlɛ̂t ɛ̂wɑ́ pɛ́ fúŋ ŋɡɔ Fɛnís. Fɛnís pɔ́ tʉ́sɔŋ ẅí nɛlẅí-tsɛ́tsɑ́Ꞌ kɑ tɔ́ zúꞋu ńcẅɛt, yɛcɔ́ sɑ́k-tʉ́sɔŋ pɔ́ ńdíŋɛ ɡúŋ-Mbɛ́ nɛm yi kɔŋ, yɛcɔ́ líŋɛ ɡúŋ-Mbɛ́ nɛm yi ntsʉ́ʉ. Pɔ́p tsɑ́ɑ pɔ́Ꞌɔ, nɛkúu zúꞋu ńdɑ́Ꞌ ńnɑ́ŋ tɛ ŋkɑ́-fɛ́m lɛɛ.

Fɛ́m sɛ́ ŋ́ɡɑ́ɑnɛ mɑ́mɑ́ kɑnúꞋ pɛ́ Pɔ̂l

¹³ Ŋkwɑŋɛ pɔ́Ꞌɔ, mɔ́ɔ mɔ́ fɛfʉ̈ɔt nɑ́Ꞌ ɛ́fú shʉ́ ntsʉ́ʉ ńzɛ nɛtsʉꞌnɛ, pʉɔ-mɑ́mɑ́ kɑnúꞋ jí yɔ́p pɔ ŋɡɔ nu yi pɔ́p kwɑŋɛ́nɛ ɡʉ ńnɛn, ŋ́ɡɔ́ɔ ńcẅɛɛtɛ mɑ́mɑ́ tʉ́n yi ɛ́ ɡẅɛɛnɛ kɑnúꞋ ŋki, ńtíi mɑ́mɑ́ kɑnúꞋ ńdɔk mbɑ́ŋtɛ pɔ kwɑꞋ mbʉʉ-ŋɡɔŋ-Kɛlɛ̂t.

¹⁴ Lɑ́, ŋ́ɡɔ ńtɔ́ nɛnɛn, wɛcɔ́ mɑ́mɑ́ fɛ́m ẅi pɛ́ fúŋnɛ ŋɡɔ Ɛlɑkilɔŋ fú ndǔ mɛŋkɔ́Ꞌ tsɛt lɑ́Ꞌ, ńzɛ ńtsʉꞋnɛ pɔ́Ꞌɔ, kwɑꞋ nɛ́ tʉʉ.

¹⁵ Tsʉ́Ꞌnɛ ńdɔk mɑ́mɑ́ kɑnúꞋ ńdɛɛ shʉ́ wɛ ndɛꞋ. Pɛk jʉ́ɔ kɛ́kɑ́ŋ, ńtsʉ́Ꞌ ńnɑ́ mɑ́mɑ́ kɑnúꞋ. A lɔk wɛ́k ŋ́ɡʉ nɛ́ zʉꞋ yi fɛ́m kɔŋnɛ.

¹⁶ A lɔk wɛ́k ŋ́ɡʉ tɛ ḿbɔ́ ńdɔk wɛ shʉ́ ntsʉ́ʉ mɔ́ɔ mɔ́ŋɡɔŋ ẅi pɛ́ fúŋnɛ ŋɡɔ Kɔ́ɔdɑ, mbɔ ŋki kɑ zɛmɛ ńníꞋ sɔŋ. Ŋɡɔŋ ɛ̂wɑ́ nɑ́Ꞌ ŋ́kʉŋ fɛ́m nǔu mɑ́mɑ́ kɑnúꞋ. Pɛk jɛ́Ꞌ, ɛ́sɑ́Ꞌ tʉʉ tɛ ŋ́ɡẅɛɛ mɔ́ncɛꞋ kɑnúꞋ ẅi pɛ́ lɔknɛ kɔk yúu-mɛtɑ́ɑ tsɛt mɑ́mɑ́ kɑnúꞋ ŋ́ɡɑ́ sɛ́.

¹⁷ Ḿbɔ́ tɛ ŋ́kɑꞋ kɑnúꞋ ɛ̂wɑ́ ńzɑ́p tʉ́ mɑ́mɑ́ kɑnúꞋ, ɡɑŋfɑꞋ ɡɔ́ɔ ńdɔk mɛŋkʉ ńzɛmɛ mɑ́mɑ́ kɑnúꞋ, ŋ́kút sʉ́Ꞌnɛ, ŋ́kɔk mɑ́mɑ́ kɛm-tʉ́ ẅi pɛ́ cʉŋɛ́nɛ nǔu mɑ́mɑ́ kɑnúꞋ, ḿmɑꞋ ŋki, ḿbɔ́k pɑ́Ꞌ ɛ́ lɑɑ ḿbɔ́ fɛfʉ̈ɔt lɔk wɔ́p ŋ́ɡʉ ɡʉnɛ tɛ ɛ́sɔ́klɛ tsɛt sɑŋsɑ́ŋ ẅi ɛ́ lɔ ńcúꞋlɛ tsɛt ŋki mbʉʉ-ŋɡɔŋ-Libíyɑ.

¹⁸ Njí ɡɛ ŋ́kiɛ, fɛ́m kɛ́ ḿbɛ́t ńtsʉ́Ꞌnɛ pɔ nɛ́ tʉʉ. GɑŋfɑꞋ jʉ́ɔ kɛ́kɑ́ŋ, ńcẅɛɛtɛ yɛcɔ́ yúu-mɛtɑ́ɑ, ḿmɑꞋ ŋki nɛlɔk ŋ́ɡɛ ŋɡɔ kɑnúꞋ zɑŋɛ.

¹⁹ Yɛcɔ́ njí ɡɛ ḿbɛn ŋ́kiɛ, kwɑꞋ pɔ́p shɔtnɛ ńtsɔ́Ꞌ mɛtʉ́-mɑ́mɑ́ kɑnúꞋ pɔ́p mɛndẅí nǔu, ḿmɛꞋ tsɛt ŋki.

²⁰ Fɛ́m kɛ́ ńtsʉꞋnɛ pɔ pɔ́Ꞌɔ, nǔu mɛlɛ́Ꞌ tɛ ńzɑ́ɑ. Pɛ́ pɔɔ pɛn ńjʉ́ɔ lík-nɛm pɔ́, ŋ́kɛ́ ḿbɔɔ pɛn ńjʉ́ɔ cʉ̈ɔ́Ꞌ-sɑŋ pɔ́. Ɛ́ pɔ́ pɔ́nɛ tɛ pɛk pɔɔ pɛn ńjí ŋɡɔ pɛk ɡʉ ńduk pɔ́.

²¹ Pʉɔ nɑ́ŋ njí nǔu mɛlɛ́Ꞌ tɛńzɑ́ɑ. Pɔ̂l lɔ sɛ́, ńtʉ́ʉ mbi pʉɔ tsʉʉ ńcú ŋɡɔ: «Pɛsúu pɑ́ɑ, pʉʉ ḿbɔ́ pɛ́Ꞌɛ ńzúꞋ ntsu wɑ́ɑ, mbɔ pɛkŋɛ ŋkɑɑ kɛ́ ɛ́fú Kɛlɛ̂t ŋ́ɡʉ zʉꞋ pɔ́. Mbɔ mɑ́mɑ́ kɑnúꞋ ŋkɑɑ pʉ́ʉpɛ, yúu-mɛtɑ́ɑ pɛn ŋ́kɛ́ mbɔɔ kúu pɛ́ pɔ́.

²² Lɑ́, ɛ́ kɛ́ ḿbɔ́ ŋkɔ̂ɔnɛ pɑ́Ꞌɑ, mɔ sɛ́ ḿbíkŋɛ wʉ́ʉ ŋɡɔ pʉʉ sʉk. MbíꞋŋɡɔ sɑ̌ɑ ŋu wʉʉ ŋ́ɡʉ ḿpfú pɔ́. Yúu mi ɛ́ ɡʉ ḿbɛ́ pɔ́ pɔ ndɑꞋ mɑ́mɑ́ kɑnúꞋ.

²³ N cú pɑ́Ꞌɑ, mbɔ ɛ́ lɑ́Ꞌ ḿbɔ́ nɛtúꞋ lɔ́Ꞌnɛ, Sɛ́ ẅi ŋ ɡúꞋlɛ, túu wɛcɔ́ cʉ̈ɔ́Ꞌ wɛ mbɔ̌ mɔ ẅi mɔ ŋɡɑŋfɑꞋ wɛ.

²⁴ A tɔ́ ńcú mbɔ̌ mɔ ŋɡɔ: Pɔ̂l, pɑ́ɑ nɛpɔ́k. Ɛ́ sɛ́ ḿbíkŋɛ ŋɡɔ pɛ́ ŋɑk ntsɑŋ yú mbi Kɑ́sɑ. Sɛ́ ɡʉ ńdɔk pɑ́Ꞌ ɑ ɡɛnɛ nu sʉ́Ꞌnɛ nǔu ɡu, ńnɑ́ pʉɔ pinɛ pʉʉ pɛpɔ́p nɛnnɛ lɑ́ ńduk tɛ wɛcɔ́ tɑ́Ꞌ ŋu nǔu pɔ́p pɔɔ pfú.

²⁵ Pɛsúu pɑ́ɑ, pʉʉ sʉk! N tɛ́m ŋkwɛn yɑɑ ŋ́ɡɑ́ mbɔ̌ Sɛ́. Nu yi Sɛ́ lɑ́Ꞌnɛ ńcú mbɔ̌ mɔ lɑɑ, ɛ́ ɡʉ ḿbuutɛ pɔ́Ꞌɔ.

²⁶ Fɛ́m ɡʉ ńtíi wɛkŋɛ pɔ pɑꞋnɛ tɛ ŋ́ɡʉ ḿmɑꞋ wɛkŋɛ tsɛt wɛcɔ́ ŋɡɔŋ ẅi ŋki kɑ zɛmɛnɛ ńníꞋ sɔŋ.»

²⁷ Ɛ́ ḿbɔ́ pɔ́Ꞌɔ, mbɔ fɛ́m tsʉ́Ꞌnɛ tsʉ́Ꞌnɛnɛ pɛnɛtúꞋ ntsɔ̌pɛ́nɛ́kwɑ nɛ́ nɛɡɛ́m. Fɛ́m kɛ́ ḿbɛ́t ńtíi wɛ́k ńdɔk ńnɛn pɔ tsɛt ŋki-Mɛndítɛlɑnɛ́ɛ. Ɛ́ ɡɛ ḿbɔ́ nɛtúꞋ, pʉɔ pi pɔ́p fɑꞋnɛ tʉ́ mɑ́mɑ́ kɑnúꞋ zúꞋ ɛ́ pɔ́ pɑ́Ꞌ ŋkɑ́ yi pɛk pɛpɔ́p sɛ́ ŋ́kúu nǔu yɛcɔ́ zʉꞋ-tsɛ́tsɑ́Ꞌ lɑ́.

²⁸ Pɔ́p cʉŋɛ yúu mi ɛ́ sɛ́ ńjɔt nǔu tɑ́Ꞌ sɛsɑ ŋkʉ, ŋ́kɔk ḿmɑꞋ sɛ́ ŋki, ńdɔk ɛ́fʉꞋ pɑ́Ꞌ ŋki kɔkŋɛ́nɛ pɔ́Ꞌɔ, ńjʉ́ɔ ɛ́ pɔ́ mítɑ ntsɔ̌psɑɑmbɑ́ nɛ́ mɛɡɛ́mɛ́ntɑ́t. Pɔ́p pɛn ńnɑ́Ꞌ ńzɛ ńnɛn, ḿmɑꞋ, ńjʉ́ɔ ɛ́ cẅɛt mítɑ ntsɔ̌pɛ́nɛ́fɔ́m nɛ́ mɛɡɛ́mɛ́mbɑ́.

²⁹ Pɔ́p tsʉ́Ꞌ ḿbɔ́k pɔ́knɛ ŋɡɔ ɛ́ lɑɑ ḿbɔ́, mɑ́mɑ́ kɑnúꞋ wɛk kwɛn pɛmɑ́ mɛŋɡɔꞋ, ŋ́ɡɔ́ɔ ŋ́kɛ́ kɔk pɛ́ mɑ́mɑ́ tʉ́n pi pɛ́ lɔknɛ ŋ́kúꞋlɛ mɑ́mɑ́ kɑnúꞋ tɑ́Ꞌ zʉꞋ, yɛ́nɛ́kwɑ, ḿmɑꞋ tsɛt ŋki nzʉʉ mɑ́mɑ́ kɑnúꞋ, ŋ́ɡɔ ńnɑ́ŋ, ḿbɔ́ ńtsɑ́ɑ ŋɡɔ njí fɛ́Ꞌnɛ ŋ́kiɛ.

³⁰ Ŋ́ɡɔ́ ńzẅíꞋlɛ ɡɑŋfɑꞋ-kɑnúꞋ wɛk pɔ́ ńdɔɔ nɛkʉɔ, ŋ́kɔk mɔ́ncɛꞋ kɑnúꞋ ńtík tsɛt ŋki, ɛ́sẅíi pʉɔ ŋɡɔ pɔ́p ɡʉ mbi ḿmɑꞋ mɛtʉ́n mi ɛ́ ɡʉ ŋ́ɡẅɛɛ mɑ́mɑ́ kɑnúꞋ ɛ́ pɔɔ pɛn ńnɛn pɔ́ ŋki.

³¹ Pɔ̂l jʉ́ɔ pɔ́Ꞌɔ, ńcú mbɔ̌ tɑ́tndɑ́-ntsɔ-Pɑlɔ́mɑ pɔ́p pɑlʉ̈ɔ́Ꞌntsɔ ŋɡɔ: «Pʉɔ pɔ́nɛ lɑɑ mbɔɔ nɑ́ŋ pɔ tsɛt mɑ́mɑ́ kɑnúꞋ pɔ́, mbɔ pʉʉ kɛ́ luk pɔ́.»

³² Ńjʉ́ɔ pɔ́Ꞌɔ, pɑlʉ̈ɔ́Ꞌntsɔ ɡɔ́ɔ ŋ́kɛ́ ńcitɛ mɛŋkʉ mi ɛ́ lɑ́Ꞌnɛ ŋ́ɡẅɛɛ kɑnúꞋ, ńnɑ́ ɛ́ ɡʉ ŋki.

³³ Pɛ́ pɔ́ ńzẅíꞋlɛ ŋɡɔ njí kiɛ, Pɔ̂l ńníꞋ tʉ́m-pʉɔ pɛtsʉʉ ŋɡɔ pɔ́p kwɛ́t mɔ́yúu, ńcú mbɔ̌ pɔ́p ŋɡɔ: «Ɛ́ ŋkɔ̂ɔnɛ ńdɔk ḿbɔ́ lɛ́Ꞌlɑ́Ꞌ ntsɔ̌pɛ́nɛ́kwɑ nɛ́ nɛɡɛ́m pɑ́Ꞌ pʉʉ kɑ zɛnɛ nɛpyɛ́p ŋɡɔ zʉꞋ pɔŋ, ḿbɛn ŋ́kɛ́ ḿbɔɔ ḿbɔ́ ŋ́kwɛ́t sɑ̌ɑ yúu pɔ́.»

³⁴ Ɛ́ yúu mi ɛ́ ɡɛnɛ lɑ́, n cú ŋɡɔ pʉʉ kwɛ́t yúu. MbíꞋŋɡɔ yɛ́tɛ́ ɡʉnɛ ŋ́ɡɛ lɑ́ mbʉʉ yʉʉ tɛntɛ pʉʉ luk. Yɛcɔ́ yúu ŋ́ɡʉ ŋ́ɡɛ wʉ́ʉ pɔ́, tɛ mbɑ tɑ́Ꞌ nuk-tú yʉʉ ŋ́ɡʉ ḿbɛ́ pɔ́.

³⁵ Pɔ̂l cú pɔ́Ꞌɔ, ḿbɛ́ɛ mbɛlɛ̂ɛt, ńtʉ́ʉ mbi pʉɔ tsʉʉ, ŋ́ɡɑ́ pɑꞋlɑ́ mbɔ̌ Sɛ́, ḿbʉ̈ɔ́Ꞌ, ńzɛ nɛkwɛ́t.

³⁶ Pʉɔ tsʉʉ ɡɔ́ɔ ŋ́kɛ́ sʉk. Mbɑ wɔ̌ lɑ́ kwɛ́t yɛ́.

³⁷ Pɛk pɔ́ pɔ́Ꞌɔ, ḿbɔ́ tsɛt mɑ́mɑ́ kɑnúꞋ, ŋumɛsɔŋ ŋkʉ yɛ́pɑ́ nɛ́ ntsɔ̌pɛ́nɛ́ntúkú nɛ́ mɛɡɛ́msɑɑmbɑ́.

³⁸ Pɔ́p pɔ́ tɛ ŋ́kwɛ́t yúu tɛ ńzwɛ́t, ŋ́kɔk mɛpɑɑ-mɛjʉ́ tsʉʉ ḿmɑꞋ ŋki nɛlɔk ŋ́ɡɛ ŋɡɔ mɑ́mɑ́ kɑnúꞋ zɑŋɛ.

Mɑ́mɑ́ kɑnúꞋ puu ḿbʉ̈ɔ́Ꞌtɛ lɑ́ pʉɔ tsʉʉ kɛ́ ńduk

³⁹ Njí pɔ́ tɛ ŋ́kiɛ, pɛ́ jʉ́ɔ tsɛ́tsɑ́Ꞌ lɑ́ pʉɔ pinɛ pɔ́p fɑꞋnɛ tsɛt mɑ́mɑ́ kɑnúꞋ pɔɔ jí zʉꞋ yi pɔ́p tʉ́ʉnɛ zúꞋu pɔ́. Lɑ́ ŋ́kɛ́ ńjʉ́ɔ yɛcɔ́ zʉꞋ-ŋki yi ɛ́ sẅiklɛnɛ ŋ́kúu nǔu sɑŋsɑ́ŋ. Pɔ́p zɑ́p ŋɡɔ ɛ́ lɑɑ ŋ́ɡɑ́ shʉ́ pɛ́ lɔk mɑ́mɑ́ kɑnúꞋ ŋ́ɡʉ zúꞋu.

⁴⁰ Ńcú pɔ́Ꞌɔ, ŋ́kíɛꞋ yúu mi ɛ́ ɡẅɛɛnɛ mɑ́mɑ́ kɑnúꞋ tɑ́Ꞌ zʉꞋ, ḿmɑꞋ tsɛt ŋki, ḿbɛn ŋ́kíɛꞋ mbɑ mɛŋkʉ mi ɛ́ cʉŋɛ́nɛ nǔu yúu mi pɛ́ lɔknɛ ńnyɛt mɑ́mɑ́ kɑnúꞋ nɛ́ ndúŋ, ḿbɑ́ɑtɛ, ŋ́kíɛꞋ yɛcɔ́ mɑ́mɑ́ ndẅí yi ɛ́ mbi mɑ́mɑ́ kɑnúꞋ, nɛpɔ́ yi fɛ́m ɡʉ ŋ́kúu tsɛtú tsʉ́ʉ mɑ́mɑ́ kɑnúꞋ ŋ́ɡɑ́ mbʉʉ-ŋki.

⁴¹ Lɑ́ ḿbɔ́ ŋ́ɡʉ, mbi mɑ́mɑ́ kɑnúꞋ sɔ́ ŋ́kúu tsɛt sɑŋsɑ́ŋ yi ɛ́ cúꞋlɛ́nɛ ŋ́kɔ́Ꞌ tsɛt ŋki, ńdɛ́Ꞌ tɛ yɛcɔ́ nɛɡɛ pɔɔ pɛn ḿbɔ́ ɡú pɔ́. Mɑ́mɑ́ fɛ́m tíi ŋki ńdɔk ńtswɑ́ɑ nzʉʉ mɑ́mɑ́ kɑnúꞋ nɛtʉʉ ḿbʉ̈ɔ́Ꞌtɛ.

⁴² Ɛ́ lɛɛ pɔ́Ꞌɔ, pɑlʉ̈ɔ́Ꞌntsɔ lɔɔ nɛjẅítɛ ɡɑŋtsɑ́ŋ, ḿbɔ́k pɑ́Ꞌ ɛ́ lɑɑ ḿbɔ́ wɛcɔ́ tɑ́Ꞌ púꞋ ŋki ŋ́kʉɔ.

⁴³ Lɑ́, tɑ́tndɑ́-ntsɔ pɛn mbɔɔ ḿbɔ́ ŋ́kɔŋ ŋɡɔ pɛ́ jẅí Pɔ̂l pɔ́, ńtɔꞋ wɔ́p nɛɡɛ yúu mi pɔ́p kwɑŋɛ́nɛ, ńcú mbɔ̌ pʉɔ pi pɔ́p jí nɛpúꞋ ŋki ŋɡɔ pɔ́p piitɛ ŋ́kúu ŋki, ḿbúꞋ ŋki ńcẅɛt ŋɡɑ́ŋ.

⁴⁴ Ḿbɛn ŋɡɔ pɛcɔ́ pʉɔ ɡɔ́ ńcẅɛt yɔ́p, kɛ ńcʉŋɛ pɔ nǔu mɛkɛm-pɛlɑ́ŋ ɔɔ, kɛ nǔu mɛkɛm yúu mi ɛ́ tsɔ́Ꞌtɛnɛ nǔu mɑ́mɑ́ kɑnúꞋ ɔɔ. Yɔ pɑ́Ꞌ ɛ́ kɑ lɛɛnɛ pɔ́Ꞌɔ, pʉɔtsʉʉ fú ŋki ŋ́kɔ́Ꞌ tɛ wɛcɔ́ ŋu pɔɔ pfú.