ŊwɑꞋnɛ-Gɑŋntúu Yɛ́su Kɛlístɔ 25 - Kɑɑ Fí

Pɛ́ sɛ́ ŋ́ŋɑk Pɔ̂l mbi ŋɡɔ́mnɑɑ Fɛstus

¹ Pɛ́ kɑ tsẅíkŋɛ Fɛstus nɛsɑ́Ꞌ yîyɑ́ pɑk-ŋɡɔŋ ɛ́ lɛɛ lɛ́Ꞌ pɛtɑ́t, ɑ fú tʉ́sɔŋ-Sɛ́zɑlɛ̂ ɛ̂wɑ́ ḿbʉʉ ŋ́ɡʉ Yɛlúsɑlɛm.

² Ŋ́kúu zúꞋu, pɛtɑ́tndɑ́-pɑnɔŋpɔꞋ pɔ́p pɛkɛ́m-pɑyúdɑ tɔ́ ɛ́fɛn Pɔ̂l mbi yɛ́, ḿbuu ńníꞋ mɛtɛn tɛn mɛnu nǔu tɛꞋ. ḾbúꞋ mbɔ́ mbɔ̌ wɛ́ ŋɡɔ:

³ «Sɛ́sẅii ɡɛ, Pɔ̂l tɔ́ tɛ ŋ́kúu Yɛlúsɑlɛm,» ńcú pɔ́Ꞌɔ, ḿbɔ́ ńdɔɔ nɛnɔŋ mɑnzɔŋ ẅí ɛ́ ɡʉ zɑ́Ꞌ Pɔ̂l sɛ̂ndúŋ ńjẅí wɛ́.

⁴ Fɛstus zúꞋ, ńtsɔ́Ꞌ mbɔ̌ pɔ́p ŋɡɔ: «Pɔ̂l ndɑ́tsɑ́ŋ Sɛ́zɑlɛ̂. KwɑꞋ mɔ yɑ́ɑ ŋ kɛ́ nɑ́ŋ zɑꞋnɛ tɛꞋ pɔ́.

⁵ Pɛkɛ́m-lɑ́Ꞌ pʉ́ʉ lɑɑnɛ ḿbɔ́ pɔ́p tɔ́ pɛk pɛpɔ́p ɡʉ tɛ ŋ́kúu Sɛ́zɑlɛ̂, ḿbɔ́ yi ŋu ɛ̂wɑ́, kɑ ɡɛ nu kɛpɔŋ, pɔ́p fɛn ntsɑŋ.»

⁶ Fɛstus ɡɛ pɔ́Ꞌɔ, ńnɑ́ŋ tsɛtsɛt pɔ́p Yɛlúsɑlɛm yúu lɛ́Ꞌ pɛ́nɛ́fɔ́m kɛ lɛ́Ꞌ nɛɡɛ́m yɛcɔ́ ɔɔ ndɑꞋ, ŋ́ɡɔ́ɔ ŋ́kɛ́ ḿbɛn nzʉʉ nɛ́ Sɛ́zɑlɛ̂. Njí ɡɛ ŋ́kiɛ, ɑ nɑ́ŋ sɛ́ nɛŋɑk ntsɑŋ, ńcú ŋɡɔ pɛ́ ɡɛ Pɔ̂l tɔ́.

⁷ Pɔ̂l tɔ́, Pɑyúdɑ cúŋ ɛ́fú Yɛlúsɑlɛm ńtɔ́, ńtʉ̈ɔ́Ꞌlɛ wɛ́ ńníꞋ sɔŋ, ńtík mɛnu mi ɛ́ tɛn tɛnnɛ tú wɛ́ tɛ ɛ́ zɑ́ɑ zɑ́ɑnɛ. Ŋu wɔp ẅi ɑ ɡʉ ŋ́kɛ́ ḿbɛ́ɛtɛ tɛ mɛtú cẅɛt kɛ́ ḿbɔɔ ɡú pɔ́.

⁸ Pɔ̂l pɔ́nɛ ńcú ŋɡɔ: «Mɔ ŋkɑɑ nu kɛpɔŋ ɡɛ. Mɔ ŋkɑɑ nɛpʉ́ʉ-pɑyúdɑ fɑɑnɛ. Mɔ ŋkɑɑ níꞋ lɔ́Ꞌ nǔu ZʉꞋ-nɔŋpɔꞋ pɔ́, ŋ́kɛ́ mbɔɔ sẅiŋɛ kɛpɔŋ nǔu Kɑ́sɑ-Pɑlɔ́mɑ pɔ́.»

⁹ Fɛstus pɛn ḿbɔ́ ńdɔɔ nɛɡɛ pɑ́Ꞌ nu ɡʉ ḿbɔŋ pɑyúdɑ, ḿbíkŋɛ Pɔ̂l ŋɡɔ: «Tɛ ɛ́ lɑɑ ḿbɔ́ ɔ pɛ́m ḿbɛn Yɛlúsɑlɛm ńjí ŋɡɔ Ŋ ɡʉ ŋ́ŋɑk ntsɑŋ yú?»

¹⁰ Pɔ̂l tsɔ́Ꞌ mbɔ̌ wɛ́ ŋɡɔ: «N tʉ́ʉ pɑ́Ꞌɑ zʉꞋ-ntsɑŋ-Kɑ́sɑ. Pɛ́ ɡʉ ŋ́ŋɑk yɑɑ ntsɑŋ pɔ zɑꞋnɛ. Mɔ ŋkɑɑ yɛcɔ́ nu mbɔ̌ pɑyúdɑ fɑɑnɛ. Ɔ tsuŋ ḿbɔ́ ńjí.

¹¹ Ɛ́ pɛ́Ꞌɛ ḿbɔ́ yi ɛ fɑɑnɛ yɛcɔ́ nu, tɛ ɛ́ pɔ́ ḿbíkŋɛ ŋɡɔ pɛ́ jẅí wɑ́ɑ jẅínɛ, ŋ kɑ́ pɔ́ ńzɛɛ ńdʉꞋ nɛpfú pɔ́. Pɑ́Ꞌ yɛcɔ́ nu nɛ́nẅín kɑ́ pɔ́ nǔu nu yi pɔ́p zɑ́pnɛ tú mɔ lɑ́ pɔ́ lɑ́, wɛcɔ́ ŋu kɑ́ ɡẅɛɛ pɑ́Ꞌ ɛ́ lɑɑ ḿbɔ́ ɑ ńcɑklɛ wɑ́ɑ ŋ́ɡɑ́ mbɔ̌ pɔ́p pɔ́. Mɔ sɛ́ ḿbíkŋɛ ŋɡɔ, pɛ́ zɛɛ ńtsʉ́Ꞌ ŋ́ŋɑk yɑɑ ntsɑŋ pɔ mbi Kɑ́sɑ.»

¹² Pɔ̂l cú pɔ́Ꞌɔ, Fɛstus pɔ́p pʉɔ pɛ́ pi pɔ́p ɡɑ́nɛ wɛ́ nɛ́ ntík tɔ́ɔtɛ nu nǔu ńcú mbɔ̌ Pɔ̂l ŋɡɔ: «Pɑ́Ꞌ ɔ píkŋɛ ŋɡɔ Kɑ́sɑ ŋɑknɛ yú ntsɑŋ lɑ́, ɔ ɡʉ ŋ́kɛ́ ŋ́ɡʉ mbi yɛ́.»

Pɔ̂l mbi fɔɔ Aŋɡɛlípɑ

¹³ «Ɛ́ lɛɛ mɛcɔ́ mɛlɛ́Ꞌ, fɔɔ Aŋɡɛlípɑ pɔ́p mɔ́ɔmɑ́ wɛ wɛ mɑŋɡɛ́ ẅi pɛ́ fúŋnɛ wɛ́ ŋɡɔ Mbɛlɛnís, tɔ́ tʉsɔŋ-Sɛ́zɑlɛ̂, nɛcɛꞋlɛ Fɛstus.

¹⁴ Pɔ́p pɛpɔ́p nɑ́Ꞌ ńzɛɛ ńnɑ́ŋ, Fɛstus pɛ́ɛtɛ nu-ntsɑŋ Pɔ̂l ɛ́sẅíi fɔɔ Aŋɡɛlípɑ, ńcú ŋɡɔ: Wɛcɔ́ ŋu zɑꞋnɛ, mbɔ ŋɡɔ́mnɑɑ Fɛlɛshi kɑ ɡɔ́ ŋ́ɡʉ ɑ pɔ́ ndɑ́tsɑ́ŋ.

¹⁵ Ŋ kɑ ɡʉ Yɛlúsɑlɛm, ŋ́kúu zúꞋu, pɛtɑ́tndɑ́-pɑnɔŋpɔꞋ pɔ́p pɑsɑ́Ꞌlɑ́Ꞌ-pɑyúdɑ fɛn wɛ́ mbɔ̌ mɔ, ŋɡɔ n zɑ́p ŋɡɔ ɑ vu ntsɑŋ.

¹⁶ Lɑ́ n tsɔ́Ꞌ mbɔ̌ pɔ́p ŋɡɔ pɛk pʉɔ-Lɔ́mɑ kɑ́ ɡẅɛɛ mɑt nɛzɑ́Ꞌ ntsɑŋ-ŋu lɑ ŋ́ŋɑk wɛ́ pɔ́. Ɛ́ píkŋɛ ŋɡɔ ŋu ẅí pɛ́ fɛnnɛ wɛ́ pɔ́p pʉɔ pi pɔ́p fɛnnɛ wɛ́ puutɛ sɛ́. Ŋu ẅí pɛ́ fɛnnɛ wɛ́ pɛ́ɛtɛ ntsu wɛ́.

¹⁷ Ŋ kɑ cú pɔ́Ꞌɔ, pɛk pɑyúdɑ ɛ̂pɑ́ ńtɛmtɛ ńtɔ́ nɛ́ zɑꞋnɛ. Njí kiɛ, ŋ ɡɔ́ɔ ɛ́fúŋ ntsɑŋ kɛ́ lɑ́ɑtɛ, ńcú pɛ́ lɔk ŋu ɛ̂wɑ́ ńtɔ́ mbi mɔ.

¹⁸ Pɑfɛn wɛ́ tɔ́ yɔ́p. M bɔ́ ŋ́kwɑŋɛ ŋɡɔ pɔ́p fɛn wɛ́ nǔu yɛcɔ́ ntʉʉ nu tɛꞋ. Lɑ́ ɛ́ kɛ́ ḿbɔɔ pɔ́Ꞌɔ cẅɛt,

¹⁹ ńjʉ́ɔ pɔ́p pɛpɔ́p pɔ́ ńzɔŋ nu pɔ nǔu nu-sɛ́ wɔp. Mbɑ nǔu nu-wɛcɔ́ ŋu ẅí pɛ́ fúŋnɛ wɛ́ ŋɡɔ Yɛ́su. Mbɔ ɑ kɑ pfú, Pɔ̂l pɛn ḿbɔ́ ńcú ŋɡɔ ɑ ntʉʉ.

²⁰ Ŋ ɡɔ́ɔ ńtɛplɛ, ḿbɔɔ jʉ́ɔ shʉ́ nɛzɑ́Ꞌ ntsɑŋ pɔ́, ŋ́ɡɑɑpɛ tsɛtsɛt, ḿbíkŋɛ Pɔ̂l ŋɡɔ ɑ lɑɑ ŋ́kɔŋ pɛ́ lɔk wɛ́ ŋ́ɡʉ Yɛlúsɑlɛm lɑ ŋ́ŋɑk wɛ́ nǔu yɔ nu.

²¹ Lɑ́ Pɔ̂l ɡɔ́ ɑ ɡʉ ŋ́ɡɑ́ ntsɑŋ mbi, ńzɛɛ ńcú pɔ́Ꞌɔ, mbíꞋŋɡɔ ɑ sɛ́ ŋ́kɔŋ ŋɡɔ Kɑ́sɑ ńtsʉꞋnɛ ŋ́ŋɑk wɛ́. Ɛ́ lɛɛ pɔ́Ꞌɔ, lɑ n cú pɛ́ nɑ́Ꞌ ńdẅɛꞋ wɛ́ ndɑ́tsɑ́ŋ tɛ ŋ́kúu ŋkɑ́ yi mɔ ńtúu wɛ́ ŋ́ɡɑ́ mbɔ̌ Kɑ́sɑ.»

²² Fɔɔ Aŋɡɛlípɑ zúꞋ tɛ ńcú mbɔ̌ Fɛstus ŋɡɔ: «KwɑꞋ mɔ yɑ́ɑ, mɔ sɛ́ ŋ́kɔŋ nɛzúꞋ nu yi ɛ́ ɡʉ ńcẅɛt ntsu-ŋu ɛ̂wɑ́.» Fɛstus tsɔ́Ꞌ mbɔ̌ wɛ́ ŋɡɔ: «Ɔ ɡʉ ŋ́ɡɛ ńzúꞋ nu ntsu wɛ́ zɔ́n.»

²³ Njí ɡɛ ŋ́kiɛ, fɔɔ Aŋɡɛlípɑ pɔ́p mɔ́ɔmɑ́ wɛ Mbɛlɛnís nɛn pɔ sɑɑnɛ sɑɑnɛ́nɛ, ŋ́ɡɔ ŋ́kúu tsɛt mɑ́mɑ́ ndɑ́-zɑ́n, nɔɔ-pɛmɑ́ pʉɔ tʉ̈ɔ́Ꞌlɛ wɛ́. Pɔ́p pɛtɑ́tndɑ́-pɛtɑ́tndɑ́-ntsɔ mbɑ pɛkɛ́m pi pɔ́p tʉ́sɔŋ pɔ́ tsɛtsɛt. Ŋɡɔ́mnɑɑ Fɛstus cú pɛ́ lɔk Pɔ̂l ńtɔ́.

²⁴ Pɔ̂l tɔ́, ɑ cú ŋɡɔ: «Nɑɑ kɛ́mɑꞋ fɔɔ Aŋɡɛlípɑ, mbɑ pʉʉ pɛtsʉʉ pi pʉʉ tɔ́nɛ tɛ ńnɑ́ŋ zɑꞋnɛ lɑɑ. Pʉʉ líŋɛ ŋu wɑ́ ńjʉ́ɔ. A tʉ́ʉ pɑ́Ꞌɑ, mbɔ pɑyúdɑ tɛ ńzɑ́ɑ kɑ fɛnnɛ wɛ́ mbɔ̌ mɔ ŋkɑ́ yi mɔ ŋ́ɡʉnɛ Yɛlúsɑlɛm, ḿbɛn ńtɔ́ zɑꞋnɛ Sɛ́zɑlɛ̂ ɛ́fɛn wɛ́. Lɑ́ ḿbɔ́ ḿbíkŋɛ yɔ́p pɔ ŋɡɔ pɛ́ kɛ́ ńjẅí wɛ́ jẅínɛ.

²⁵ Ɛ́ ɡʉ nǔu mɔ, mbɔ ŋ kɑ́ jʉ́ɔ yɛcɔ́ yúu mi ɑ kɑ ɡɛnɛ tɛ ḿbɔ́ pɛ́ lɛɛ nǔu ńjẅí wɛ́ jẅínɛ pɔ́. KwɑꞋ jʉ́ kɑ píkŋɛ ŋɡɔ Kɑ́sɑ ńtsʉꞋnɛ ŋ́ŋɑk wɛ́. Lɑ́ n zɑ́p yɑ́ɑ ŋɡɔ ŋ ɡʉ ńtúu wɛ́ Lɔ́mɑ ŋ́ɡɑ́ mbɔ̌ wɛ́.

²⁶ Ŋ ɡʉ ńtúu wɛ́ pɑ́Ꞌɑ lɑ́, ŋ́kɛ́ ḿbɔɔ ḿbɔ́ ńjí yɛcɔ́ nu yi n tsuŋnɛ ńzúꞋ tɛ ŋ́ŋwɑꞋnɛ nǔu ŋwɑꞋnɛ, nɛlɔk ńtúu wɛ́ ŋ́ɡɑ́ mbɔ̌ Kɑ́sɑ pɔ́. Ɛ́ yúu mi ɛ́ ɡɛnɛ n dɔk wɛ́ ńtɔ́ mbi pʉʉ. Lɑ́, ŋ kɛ́ ńtík wɛ́ pɔ mbi nɑɑ kɛ́mɑꞋ fɔɔ Aŋɡɛlípɑ. Nɑɑ kɛ́mɑꞋ, kwɑꞋ ɡu píkŋɛ wɛ́ nɛ́ nu, kɛ ɛ́ lɑɑ ḿbɔ́ n dík, ŋ́ɡẅɛɛ nu yi ŋ ɡʉ ŋ́ŋwɑꞋnɛ tsɛt ŋwɑꞋnɛ lɑ́ ńdɔk ńtúu wɛ́, ŋ́ɡɑ́ mbɔ̌ Kɑ́sɑ ɔɔ.

²⁷ N dɑɑ ńzɛɛ ńtúu ŋɡɑŋtsɑ́ŋ, ŋ́ɡɑ́ mbɔ̌ Kɑ́sɑ kɛ́ cú yúu mi ɑ fɑɑnɛ́nɛ, ɛ́ tsʉ́Ꞌ ḿbɔ́ pɔ nu ɡʉɡʉʉ.»