ŊwɑꞋnɛ-Gɑŋntúu Yɛ́su Kɛlístɔ 23 - Kɑɑ Fí1 Pɔ̂l niitɛ ńtík mík mɛ́ nǔu pɑsɑ́Ꞌlɑ́Ꞌ ńcú ŋɡɔ: «Pɔ́ɔpɛ́mɑ́ pɑ́ɑ, n dɔ ńjúk ḿbɔ́ pɔ mbi Sɛ́ nɛ́ tʉ́m lɛ́ɛnɛ́nɛ tɛ ŋ́kúu lɔ́Ꞌnɛ. Yɛcɔ́ yúu kɑ́ pɔ́ tsɛt tʉ́m mɔ ḿbɔ́ ŋ́ɡɑ́ɑnɛ wɑ́ɑ pɔ́.» 2 Ńcú pɔ́Ꞌɔ, Anɑníyɑs, tɑ́tndɑ́-pɑnɔŋpɔꞋ cú mbɔ̌ pʉɔ pi pɔ́p nɛjɔ́ŋ Pɔ̂l ŋɡɔ pɔ́p tswɑ́ɑ wɛ́ ntsu wɛ́. 3 Pɔ̂l ɡɔ́ɔ ŋ́kɛ́ ńcú mbɔ̌ wɛ́ ŋɡɔ: «Sɛ́ ɡʉ tswɑ́ɑ pɔ wú ŋɡɑŋ-mɛfʉklɛ. Ɔ pʉ́ɔlɑ́ ńnɑ́ŋ sɛ́ ḿbɔ́ ńdɔk nɛpʉ́ʉ ŋ́ŋɑk wɑ́ɑ. Ɔ pɛn ńcú ŋɡɔ pɛ́ tswɑ́ɑ wɑ́ɑ. Ɛ́ yúu mi nɛpʉ́ʉ sɛ́ ḿbíkŋɛ.» 4 Pɛ́ zúꞋ pɔ́Ꞌɔ, pʉɔ pi pɔ́p tʉ́ʉnɛ nɛjɔ́ŋ Pɔ̂l cú mbɔ̌ wɛ́ ŋɡɔ: «Ɔ zɔɔtɛ tɑ́tndɑ́-pɑnɔŋpɔꞋ ẅi Sɛ́ kɑ zɑ́pnɛ pʉ́ɔ?» 5 Pɔ̂l tsɔ́Ꞌ ŋɡɔ: «Pɔ́ɔpɛ́mɑ́ pɑ́ɑ, n zɛɛ ḿbɔɔ jí ŋɡɔ yɑ́ tɑ́tndɑ́-pɑnɔŋpɔꞋ pɔ́. ŊWɑꞋnɛ-Sɛ́ zɛɛ ńcú ŋɡɔ kɔɔ lɑ́Ꞌ ɛ́sẅíŋɛ kɛpɔŋ nǔu fɔɔ-lɑ́Ꞌ wʉʉ.» 6 Pɔ̂l pɔ́ ńjí ŋɡɔ ɛ́ tsɛtsɛt pʉɔ pinɛ pɔ́p sɛ́ ŋ́ŋɑk ntsɑŋ yɛ́, pɛcɔ́ pʉɔ pɔ́ pɑsɑdukɑy, pɛcɔ́ pɔ́ pɑfɑlísɑy, ŋ́ɡɔ́ɔ ŋ́kɛ́ ńtʉ́ʉ mbi pɔ́p ńdɔk ŋɡi tɛnnɛ ńcú ŋɡɔ: «Pɔ́ɔpɛ́mɑ́ pɑ́ɑ, mɔ ŋu-fɑlísɑy. Mbɑ tɑ̌ɑ mɔ kɑ pɔ́ ŋu-fɑlísɑy. Mɔ sɛ́ ḿbyɛ́p lɛ́Ꞌ yi pɛpfú ɡʉ ńdɑ́Ꞌ zẅíimɛ nǔu nɛvú. Pɛ́ zɑꞋnɛ ŋ́ŋɑk wɑ́ɑ pɑ́Ꞌɑ ntɛ́ pɔ yîyɑ́ nu.» 7 Pɔ̂l kíꞋ tú-nu ḿbɛ́t kɛ́ mɛkŋɛ. Pɑfɑlísɑy pɔ́p pɑsɑdukɑy zɛ nɛzɔŋ. CúꞋlɛ ɡɑpmɛ nji yɛ́pɑ́. 8 Ɛ́ zɛɛ ŋ́ɡɔ ḿbɔ́, pɑfɑlísɑy cú ŋɡɔ pɛpfú ɡʉ ńdɑ́Ꞌ ńzẅíimɛ, ŋɡɔ pɛcʉ̈ɔ́Ꞌ-Sɛ́ mbɑ mɛzẅikŋɛ kɛpɔŋ ɡú, lɑ́ ŋ́ɡʉ nǔu pʉɔ sɑdukɑy pɔ́p pɔɔ ḿbɛ́m yɔ́p pɔ́Ꞌɔ pɔ́. 9 Pʉɔ tsʉʉ zɛ nɛsẅíi nɛsẅii. Pɛcɔ́ pɑkyɛ́Ꞌtɛ nɛpʉ́ʉ-Mɔ̌sɛ̂ɛ tsɛtsɛt Pɑfɑlísɑy lɔ sɛ́ ńcú nɛ́ mɛtʉʉ ŋɡɔ: «Pɛk kɑ́ jʉ́ɔ nu kɛpɔŋ yi ŋu wɑ́ ɡɛnɛ pɔ́. Lɛ́Ꞌcɔ́, tɛ yɛcɔ́ Zẅikŋɛ kɛ pɔ́ wɛcɔ́ Cʉ̈ɔꞋ-Sɛ́ kɑ́nɛ cú nu mbɔ̌ wɛ́ pɔ́ ɔɔ?» 10 Pɛ́ ɡɑ́Ꞌ nɛzɔŋ. Tɑ́tndɑ́-pɛtɑ́tndɑ́-ntsɔ-Lɔ́mɑ jʉ́ɔ ḿbɔ́k, ŋɡɔ pɔ́p ɡʉ ńcitɛ Pɔ̂l mɛkɛm mɛkɛm, ńcú mbɔ̌ pɑlʉ̈ɔ́Ꞌntsɔ ŋɡɔ pɔ́p fɛ́Ꞌnɛ ḿpfúu, ŋ́ɡɛ pɛ́ lɔk Pɔ̂l ɛ́fú zʉꞋ yi pɛ́ ŋɑknɛ ntsɑŋ zúꞋu ńcẅɛt, ŋɡɔ pɔ́p lɔk wɛ́ ŋ́ɡʉ tsɛt mɑ́mɑ́ ŋkɑ́Ꞌ-pɑlʉ̈ɔ́Ꞌntsɔ. 11 Ɛ́ ɡɛ ḿbɔ́ nɛtúꞋ, Tsɑpʉɔ tɔ́ ńcú mbɔ̌ Pɔ̂l ŋɡɔ: «Sɑ́Ꞌ pɔ mɛtʉʉ. Ɔ kɑ cú ŋu ẅi mɔ jʉ́ Yɛlúsɑlɛm wɔ. Ɛ́ pɛn ḿbɔ́ ḿbíkŋɛ ŋɡɔ ɔ pɛn ńcú ŋu ẅi mɔ jʉ́ tʉ́sɔŋ-Lɔ́mɑ.» Pɑyúdɑ sɛ́ ńdɔɔ nɛjẅí Pɔ̂l 12 Njí ɡɛ ŋ́kiɛ, pɛcɔ́ pɑyúdɑ tík ntsɛm ŋ́ɡɛ tɑ́Ꞌ ntsu, ńtʉ́ʉ mbi Sɛ́ ŋ́kɑɑ ŋɡɔ pɔ́p kɛ́ jʉ́ yúu pɔ́, ŋ́kɛ́ ḿbɔɔ ŋki nɔ́. Tɛ ńdɑ́Ꞌ ńjẅí Pɔ̂l. 13 Pʉɔ pinɛ pɔ́p kɑ kɑ́ɑnɛ pɑ́Ꞌnɛ kɑ lɛɛ pʉɔ mɛɡɛ́mɛ́nɛ́kwɑ. 14 Pɔ́p ɡʉ ńjʉ́ɔ pɛtɑ́tndɑ́-pɑnɔŋpɔꞋ pɔ́p pɛkɛ́m ńcú mbɔ̌ pɔ́p ŋɡɔ: «Pɛk lɑ́Ꞌ ńtʉ́ʉ mbi Sɛ́ ńdɔk tɑ́Ꞌ ntsu ŋ́kɑɑ ŋɡɔ pɛk kɛ́ ɡɛ ńjʉ́ yúu kɛ́ pɔ́ yi pɛk jẅí Pɔ̂l pɔ́. 15 Ɛ́ nǔu ŋkɔ̂ɔnɛ pɑ́Ꞌɑ ḿbɔ́ ḿbíkŋɛ ŋɡɔ; pʉʉ pɛcɔ́ pɑsɑ́Ꞌlɑ́Ꞌ túu pɛ́ ɡʉ njɛ́Ꞌ-Tɑ́tndɑ́-pɛtɑ́tndɑ́-ntsɔ, ḿbíkŋɛ wɛ́ ŋɡɔ ɑ ɡɛ pɛ́ lɔk Pɔ̂l ńtɔ́ mbi pʉʉ, ŋɡɔ pɛ́ tɔ́ ɛ́sẅíi wɛ́ ŋɡɔ pʉʉ sɛ́ ńdɔɔ nɛniitɛ ɛ́shyɛ́ɛ kɔŋ nǔu ntsɑŋ-ŋu ɛ̂wɑ́ kwɑꞋ sʉ́Ꞌnɛ, ŋ́ɡʉ nǔu pɛk, mbɔ pɛk tʉ́ʉ nɛjẅí wɛ́ tɛ ɑ pɔɔ tɔ́ tɛ ŋ́kúu zɑꞋnɛ pɔ́.» 16 Pɔ́p ɡɔ́ ńcú pɔ́Ꞌɔ, wɛcɔ́ mɔ́ɔ mbɛ́ɛnɛ, ḿbɔ́ mɔ́ɔ-mɔ́ɔmɑ́ pɛ́ Pɔ̂l wɛ mɑŋɡɛ́, pɔ́ ńzúꞋ pɑ́Ꞌ pɔ́p lʉꞋnɛ ŋkʉ, ńdɔ sɛ́ ŋ́ɡʉ tsɛt mɑ́mɑ́ ŋkɑ́Ꞌ-pɑlʉ̈ɔ́Ꞌntsɔ, ŋ́kúu ndɑ́ ńzɑ́Ꞌ njí ɛ́sẅíi Pɔ̂l. 17 Pɔ̂l zúꞋ, ɛ́fúŋ wɛcɔ́ tɑ́Ꞌ tɑ́tndɑ́-ntsɔ, ńcú mbɔ̌ wɛ́ ŋɡɔ: «Lɔk mɔ́ɔsuu wɔ, ŋ́ɡʉ ńcɑklɛ wɛ́ njɛ́Ꞌ tɑ́tndɑ́ wʉʉ. A ɡẅɛɛ nu yi ɑ ɡʉ nɛsẅíi wɛ́.» 18 A lɔk wɛ́ ŋ́ɡʉ ńcɑklɛ njɛ́Ꞌ-tɑ́tndɑ́ wɔp, ńcú ŋɡɔ: «Pɔ̂l ŋɡɑŋtsɑ́ŋ, ɑ fúŋ wɑ́ɑ, ńcú ŋɡɔ n dɔk wɔ mɔ́ɔsuu ńtɔ́, ńcɑklɛ wɛ́ mbɔ̌ wu, ŋɡɔ ɑ ɡẅɛɛ nu yi ɑ ɡʉ nɛsẅíi wu.» 19 Tɑ́tndɑ́-pɛtɑ́tndɑ́-ntsɔ ɡẅɛɛ pɔ́ mɔ́ɔsuu pɔ́pmɛ́ ɡʉ nzʉʉ. A píkŋɛ wɛ́ ŋɡɔ: «Ɔ ɡẅɛɛ kʉ̈ɔ́ yi ɔ ɡʉ nɛsẅíi wɑ́ɑ?» 20 A pʉ̈ɔt ŋɡɔ: «Pɑyúdɑ ŋ́kút ŋɡɔ, njí ɡʉ kiɛ, pɔ́p tɔ́ ḿbíkŋɛ wú ŋɡɔ ɔ ɡɛ pɛ́ lɔk Pɔ̂l ńtɔ́ mbi pɑzɑ́Ꞌ ntsɑŋ, ɛ́ lɔk pɔ́Ꞌɔ, ɛ́fúklɛ wú ŋɡɔ pɔ́p lɔɔ nɛniitɛ ńdíŋɛ nu ŋ́ɡɑ́ nǔu yɛ ntsɑŋ kwɑꞋ sʉ́Ꞌnɛ. 21 Lɑ́ pɔ́p lɑɑ ńtɔ́ ńcú ɔ pɑ́ɑ nɛpɛ́m, mbíꞋŋɡɔ pʉɔ tɛ ńdɛɛ mɛɡɛ́mɛ́nɛ́kwɑ ɡʉ ńdʉꞋ ŋkʉ nɛlɔk ŋ́ɡẅɛɛ Pɔ̂l. Pɔ́p lɑ́Ꞌ ńcú tɛ ŋ́kɑɑ ŋɡɔ, pɔ́p lɑɑ ńnɑ́ kɛ́ jẅí Pɔ̂l, pɔ́p pɔɔ yúu zẅíꞋ, ŋ́kɛ́ ḿbɔɔ ŋki nɔ́. Pɔ́p nǔu ŋkɔ̂ɔnɛ, mbɔ pɔ́p niitɛ mbʉʉ yɔ́p ḿbɔ́ ńzẅíꞋlɛ pɔ ŋɡɔ ɔ pɛ́m.» 22 Tɑ́tndɑ́-pɛtɑ́tndɑ́-ntsɔ zúꞋ pɔ́Ꞌɔ, ńcú mbɔ̌ mɔ́ɔsuu ŋɡɔ: «Kɔɔ pɛn ɛ́sẅíi wɛcɔ́ ŋu ndɛꞋ nɛ́ nu yi ɔ lɔnɛ sɛ́ nɛsẅíi wɑ́ɑ lɑ́,» ńcú ɑ ɡʉ. Pɛ́ túu Pɔ̂l ŋ́ɡɑ́ mbɔ̌ Ŋɡɔ́mnɑɑ Fɛlíshi 23 Tɑ́tndɑ́-pɛtɑ́tndɑ́-ntsɔ pɛn ŋ́ɡʉ nǔu pɛtɑ́tndɑ́-ntsɔ pɛ́, ńtsɔ́Ꞌ pɛ́ pɛ́pɑ́, ńcú mbɔ̌ pɔ́p ŋɡɔ pɔ́p niitɛ pɑlʉ̈ɔ́Ꞌntsɔ ŋkʉ yɛ́pɑ́, ŋ́ɡɛ pɑkɔ́Ꞌ lʉ̈ɔ́ mɛɡɛ́msɑɑmbɑ́, nɛ́ pɑɡẅɛɛ mɛkɔŋ ŋkʉ yɛ́pɑ́. Pɔ́p tʉ́ʉ pɑ́Ꞌ nɛm yɛ́nɛ́pfúꞋu nɛtúꞋ ɡʉ ŋ́ɡɛ ŋ́ɡɔ ŋ́kuꞋ pɔ́p lɔ sɛ́ ŋ́ɡʉ nɛ́ tʉ́sɔŋ-Sɛ́zɑlɛ̂. 24 Ḿbɛn ŋ́kẅiꞋ ńcú ŋɡɔ: «Pʉʉ pɛn ńniitɛ pɛcɔ́ pɛlʉ̈ɔ́ pinɛ Pɔ̂l ɡʉ ŋ́kɔ́Ꞌ ndǔ ńdɔk ńnɛn, ḿbɛn ŋ́ɡʉ ńcɑklɛ wɛ́ mbi ŋɡɔ́mnɑɑ Fɛlɛshi tɛ ɡi pɔɔ wɛ́ kɑ.» 25 A cú pɔ́Ꞌɔ, ŋ́ŋwɑꞋnɛ ŋwɑꞋnɛ ŋ́ɡɑ́ mbɔ̌ ŋɡɔ́mnɑɑ Fɛlɛshi, ńcú tsɛtú ŋɡɔ: 26 «A mɔ Kɛlɔ̂dɛ Lisíyɑs. Ŋ ŋwɑꞋnɛ yɔ ŋwɑꞋnɛ ŋ́ɡɑ́ mbɔ̌ ɡu ŋɡɔ́mnɑɑ Fɛlɛshi. Mɑ̂ɑkwɑ́ŋ wɛk, n cɛꞋlɛ. 27 Ɛ́ pɑ́Ꞌɑ, mbɔ pɑyúdɑ kɑ ɡẅɛɛ ŋu ẅi n túunɛ wɛ́ ŋ́ɡɑ́ mbɔ̌ wu lɑ́, ḿbɔ́ ńdɔɔ nɛjẅí wɛ́. N zúꞋ pɛ́ cú ŋɡɔ ɑ mɔ́ɔ-lɑ́Ꞌ-Lɔ́mɑ n dɔk pɑlʉ̈ɔ́Ꞌntsɔ pɑ́ɑ ńtɔ́ ńcẅɛ́ɛ wɛ́ mbɔ̌ pɔ́p. 28 M bɛn ḿbɔ́ ńdɔɔ nɛpi mbʉʉ yɑɑ ńjí yúu mi pɔ́p cẅɛ́ɛnɛ mbɔ̌ wɛ́, lɑ ńdɔk wɛ́ ŋ́ɡʉ mbi pɑsɑ́Ꞌlɑ́Ꞌ pɔ́p. 29 Lɑ́ ńjʉ́ɔ ŋɡɔ pɔ́p fɛn wɛ́ pɔ nǔu yɛcɔ́ mɔ́zʉꞋ nǔu nɛpʉ́ʉ nɔ́p ni pɔ́p pɛpɔ́p kɑ́ sẅiŋɛ ńzúꞋnɛ nǔu pɔ́. M bɛn ŋ́kɛ́ ḿbɔɔ jʉ́ɔ yɛcɔ́ yúu mi ḿbɔ́ pɛ́ lɛɛ nǔu ńjẅí wɛ́ kɛ ńníꞋ wɛ́ pɔ tsɑ́ŋ pɔ́. 30 Pɛ́ pɛn ńtɔ́ ɛ́sẅíi wɑ́ɑ ɡúu ŋɡɔ pɛcɔ́ pɑyúdɑ ɡɛ tɑ́Ꞌ ntsu ŋ́kɑɑ nɛjẅí ŋu ɛ̂wɑ́. Ɛ́ yúu mi ɛ́ ɡɛnɛ, ŋ ɡɔ́ɔ ńtúu wɛ́ ŋ́ɡɑ́ mbɔ̌ ɡu kɛ́ lɑ́ɑtɛ. M bíkŋɛ mbɔ̌ pʉɔ pi pɔ́p fɛnnɛ wɛ́ ŋɡɔ pɔ́p ɡʉ ɛ́fɛn ntsɑŋ pɔ kwɑꞋ mbɔ̌ ɡu.» 31 Pɑlʉ̈ɔ́Ꞌntsɔ ɡɛ yúu mi tɑ́tndɑ́ wɔ́p cúnɛ mbɔ̌ pɔ́p, ńdɛ́ lɑ́Ꞌ ńdɔk Pɔ̂l ŋ́ɡʉ tɛ ŋ́kúu Antípɑtɛlis. 32 Njí ɡɛ ŋ́kiɛ, pɛcɔ́ pɑlʉ̈ɔ́Ꞌntsɔ nɑ́ Pɔ̂l mbɔ̌ pʉɔ pi pɔ́p ɡẅɛɛnɛ pɛlʉ́ɔ. Pɔ́p ɡɔ́ ńdɔk wɛ́ ŋ́ɡʉ, pɑnɛn sɛ́ pɛn nzʉʉ tsɛt mɑ́mɑ́ ŋkɑ́Ꞌ Yɛlúsɑlɛm. 33 Pɑkɔ́Ꞌ pɛlʉ́ɔ lɔk wɛ́ ŋ́ɡʉ tɛ ŋ́kúu Sɛ́zɑlɛ̂, ŋ́ɡɑ́ ŋwɑꞋnɛ mbɔ̌ ŋɡɔ́mnɑɑ, ḿbɛn ńnɑ́ Pɔ̂l mbɔ̌ wɛ́. 34 Ŋɡɔ́mnɑɑ fúŋ ŋwɑꞋnɛ, ḿbíkŋɛ Pɔ̂l ŋɡɔ: «Ɔ fú nǔu yɛ́tɛ́ pɑk-ŋɡɔŋ?» Pɔ̂l pʉ̈ɔt ŋɡɔ: Ɛ fú nǔu ŋɡɔŋ-Silisî. 35 Ŋɡɔ́mnɑɑ cú mbɔ̌ wɛ́ ŋɡɔ: «Ŋ ɡʉ zẅíꞋlɛ tɛ pʉɔ pi pɔ́p fɛnnɛ wú tɔ́ lɑ́ m bíkŋɛ wú nɛ́ nu,» ńcú pɔ́Ꞌɔ, ńcú ŋɡɔ pɛ́ ɡʉ ńdẅɛꞋ Pɔ̂l ntɔ́Ꞌ-mpfú fɔɔ Ɛlɔ̂dɛ. |
CABTAL, 2017