ŊwɑꞋnɛ-Gɑŋntúu Yɛ́su Kɛlístɔ 19 - Kɑɑ FíPɔ̂l sɛ́ ńzíꞋ pʉɔ-Ɛ́fɛ̂zɛ nɛ́ nu-Sɛ́ 1 Apɔlɔ́s ɡɔ́ ḿbɔ́ Kɔlɛ̂ŋntɛ pɑ́Ꞌɑ, Pɔ̂l pɔ́ ńjɛ́Ꞌ tsɛt pɑk-ŋɡɔŋ yi mɛmɑ́ mɛŋkɔ́Ꞌ zúꞋu, ŋ́ɡʉ tɛ ŋ́kúu Ɛ́fɛ̂zɛ, ńjʉ́ɔ pɛcɔ́ ntɑ́Ꞌpʉɔ-Kɛlístɔ pɔ́ zúꞋu, 2 ḿbíkŋɛ wɔ́p ŋɡɔ: «Pʉʉ kɑ pɔ́ tɛ ńzɑ́p tʉ́m nǔu Yɛ́su pɛ́Ꞌɛ tɛ Sɛ́ ɡɑ́ Zẅikŋɛ Lɛ́ɛnɛ́nɛ mbɔ̌ pʉʉ?» Pɔ́p pʉ̈ɔt ŋɡɔ: «Pɛk ŋkɑɑ mɔ zɛɛ ńzúꞋ pɑ́Ꞌ pɛ́ kẅíinɛ yɛcɔ́ Zẅikŋɛ Lɛ́ɛnɛ́nɛ pɔ́.» 3 Pɔ́p cú pɔ́Ꞌɔ, Pɔ̂l píkŋɛ wɔ́p ŋɡɔ: «Tɛ ntɛ́ nɛnuꞋ wʉ́ʉ ŋki kɑ pɔ́ pɔ yɛ́tɛ́?» Pɔ́p pʉ̈ɔt ŋɡɔ: «Ɛ́ m̄bɔ́ yi ntɛ́ Jɑ̂ŋ kɑ pɔ́nɛ ŋ́ɡɑ́.» 4 Pɔ̂l cú mbɔ̌ pɔ́p ŋɡɔ: «Jɑ̂ŋ kɑ pɔ́ ńnuꞋ pʉɔ ŋki ńdɔk ńnyɛt ŋɡɔ pɔ́p pɛ́m nɛkúpmɛ mɑt, lɑ́ ŋ́kɛ́ ḿbɔ́ ńcú mbɔ̌ lɑ́Ꞌ ŋɡɔ pɔ́p zɑ́p tʉ́m yɔ́p nǔu ŋu ẅí ɑ nzʉʉ yɛ́ ḿbɔ́ ńtɔ́, ńcú pɔ́Ꞌɔ, ŋɡɑŋ pɔ́ Yɛ́su.» 5 Pʉɔ ɛ̂pɑ́ zúꞋ yɔ sẅiŋɛ, ŋ́ɡɛ pɛ́ nuꞋ wɔ́p ŋki nǔu lík-Tsɑpʉɔ Yɛ́su. 6 Pɔ̂l pɔ́ tɛ ńzɑ́p mbɔ́ tú pɔ́p, Zẅikŋɛ Lɛ́ɛnɛ́nɛ kúu nǔu pɔ́p. Pɔ́p zɛ nɛsẅíŋɛ mɛsẅíŋɛ mí pɔ́p ŋkɑɑ mɔ zɛɛ ńzíꞋ pɔ́, ḿbɛn ḿbɔ́ ńcẅi Ŋkʉʉ ẅi ɛ́ fúnɛ mbɔ̌ Sɛ́. 7 Pʉɔ ɛ̂pɑ́ pɛ́tsʉʉ ḿbɔ́ yúu ntsɔ̌ppɑ́ nɛ́ nɛɡɛ́m. 8 Pɔ̂l lɔk pɛsɑŋ pɛtɑ́t, ŋ́kɛ́ ŋ́ɡʉ pɔ ndɑ́-cúꞋlɛ-pɑyúdɑ Ɛ́fɛ̂zɛ ɛ̂wɑ́. Ɛ́sẅíi nu-Sɛ́ ɛ́sɑ́ɑnɛ sɑ́ɑnɛ́nɛ, ɛ́sẅíi pʉɔ pɑ́Ꞌ nɛfɔɔ-Sɛ́ pɔ́nɛ, ńdɔɔ shʉ́ nɛkyɛ́Ꞌtɛ tɛ pɔ́p pɛ́m. 9 Lɑ́, pɛcɔ́ pʉɔ tʉʉ pɔ tú, ńdʉꞋ nɛpɛ́m, ńtʉ́ʉ pɔ mbi lɑ́Ꞌ ŋ́ɡwɑ́k nu nǔu sɛ̂ndúŋ-Yɛ́su ẅi Pɔ̂l sɛ́ ńcú. Pɔ̂l ɡɔ́ɔ ŋ́kɛ́ ńnɑ́ wɔ́p, ɛ́fɑk pʉɔ pi pɔ́p pɛ́mnɛ nɛtsʉ́Ꞌ pʉɔ-Kɛlístɔ, ńdɔk ŋ́ɡʉ nɛ́ zʉꞋ-sɛkút wɛk ŋu ẅi pɛ́ fúŋnɛ ŋɡɔ Tilɑnus, ḿbɔ́ ńzíꞋ wɔ́p nɛ́ yúu lɛ́Ꞌ tsʉʉ, 10 ŋ́ɡɛ pɔ pɔ́Ꞌɔ, nǔu ŋɡuꞋlɑ́Ꞌ yɛ́pɑ́. Tɛ pʉɔ tsʉʉ pi pɔ́p ńtswɛ́nɛ tsɛt pɑk-ŋɡɔŋ-Azîi ɛ̂wɑ́, kɛ ɑ ŋu-Yúdɑ ɔɔ, kɛ ɑ kɑ́ pɔ́ ŋu-Yúdɑ pɔ́ ɔɔ, ɑ zúꞋ nu-Tsɑpʉɔ. Pɔ́ɔ-Sɛ́vɑ lɔɔ shʉ́ nɛlɔk lík-Yɛ́su ńzuŋ mɛzẅikŋɛ kɛpɔŋ 11 Sɛ́ lɛɛ nǔu mbɔ́-Pɔ̂l ŋ́ɡɛ kwɑꞋ mɛnu mɑ̌ɑmɑɑnɛ mi pɛ́ ŋkɑɑ mɔ jʉ́ɔ pɔ́, 12 tɛ pɛ́ tsʉ́Ꞌ ńdɔk yúu-ndẅí lɔk ńtuk shʉ́ yi ɛ́ kuunɛ ZʉꞋ-mbʉʉ Pɔ̂l, ŋ́ɡʉ ŋ́ɡɑ́ mbɔ̌ ɡɑŋɡɔɔ. Mɛɡɔɔ mɔ́p ḿmɛ ḿbɔ́ yi, mɛzẅikŋɛ kɛpɔŋ nǔu pɔ́p pɔ́p cẅɛt. 13 Pɛcɔ́ pɑyúdɑ pɛn ḿbɔ́ yɔ́p zúꞋu, ḿbɔ́ pʉɔ pí pɔ́p ḿbɔ́ ńnɛn ńzuŋ mɛzẅikŋɛ kɛpɔŋ nǔu pʉɔ, ɡɛ ńdɔɔ shʉ́ nɛlɔk lík-Tsɑpʉɔ Yɛ́su ńzuŋ mɛzẅikŋɛ kɛpɔŋ nǔu pʉɔ, ḿbɔ́ ńcú mbɔ̌ mɛzẅikŋɛ kɛpɔŋ ŋɡɔ: «N dɔk lík-Yɛ́su ẅi Pɔ̂l cúnɛ lɑ́, ńcú ŋɡɔ pʉʉ ńcẅɛt!» 14 Yɔ nu pɑ́Ꞌɑ, pɔ́ɔ-tɑ́tndɑ́-pɑnɔŋpɔꞋ-pɑyúdɑ sɑɑmbɑ́, lík yɛ́ pɔ́ ŋɡɔ Sɛ́vɑ, kɑ pɔ́nɛ ŋ́ɡɛ. 15 Lɑ́, zẅikŋɛ kɛpɔŋ tsɔ́Ꞌ mbɔ̌ pɔ́p ŋɡɔ: «Mɔ sɛ́ ńjí Yɛ́su, ḿbɛn ḿbɔ́ ńjí ŋu ẅi Pɔ̂l jʉ́, ŋ́ɡʉ nǔu pʉʉ, pʉʉ zɛɛ ḿbɔ́ pɛ́ wɔ̌?» 16 Ŋu ẅí zẅikŋɛ kɛpɔŋ kɑ pɔ́nɛ nǔu wɛ́ lɑ́, kɛm pɔ́ɔ-Sɛ́vɑ nɛ́ ŋkɔt, ńtɛn ńtsɑ wɔ́p, ńníꞋ mɛfʉ́ŋ nǔu pɔ́p, tɛ pɔ́p fú ndɑ́ ńcẅɛt ŋ́kʉɔ kɛ́ ndẅí nǔu pɔ́p. 17 Pʉɔ pi pɔ́p tʉ́sɔŋ-Ɛ́fɛ̂zɛ, pɑyúdɑ pɔ́p pʉɔ pi pɔ́p kɑ́ pɔ́ pɑyúdɑ pɔ́, zúꞋ yɔ nu, ḿbɔ́k, ńcú ŋɡɔ: «Tsɑpʉɔ Yɛ́su kwɑꞋ ɡú tɛꞋ.» 18 Nɛzɑ́ɑ pʉɔ pɛ́m nu-Yɛ́su, ḿbɛn ḿbɔ́ ńtɔ́ ńtʉ́ʉ tsɛtsɛt pʉɔ ḿbɛ́m sɑ́ɑnɛ sɑ́ɑnɛ́nɛ ŋɡɔ yúu mi pɔ́p kɑ ɡɛnɛ, ŋkɑɑ pɔŋ. 19 Pɛcɔ́ tsɛtsɛt pɔ́p pínɛ pɔ́p ḿbɔ́nɛ ɡɑŋ-nɛkɑŋ lɔk mɛŋwɑꞋnɛ-nɛkɑŋ mɔ́p ńtɔ́ pɛ́ tɔɔ pɔ mbi lɑ́Ꞌ. Pɛ́ tsík ŋkɑ́p-mɛŋwɑꞋnɛ ɛ̂mɑ́, ɛ́ pɔ́ pɑk-tʉ́n-ŋkɑ́p ntsɑ́Ꞌ mɛɡɛ́mɛ́ntɑɑ 20 Yɔ pɑ́Ꞌ Tsɑpʉɔ kɑ pɔ́ ńdɔk mɛtʉʉ mɛ́ ŋ́ɡɛ, sẅiŋɛ yɛ́ pɔ́ ŋ́kẅiꞋ ɛ́sɑt zʉꞋ, ḿbɔ́ ŋ́kẅiꞋ ŋ́ɡẅɛɛ tʉʉ ńdɔk ŋ́ɡʉ nɛ́ mbi. VɑꞋ vu tʉ́sɔŋ-Ɛ́fɛ̂zɛ 21 Mɔnɛ mɛnu kɑ lɛɛ, Pɔ̂l zɑ́p ŋɡɔ ɑ ɡʉ ŋ́ɡʉ Yɛlúsɑlɛm, ŋ́ɡɔ ŋ́ɡʉ ńdɛɛ tsɛt pɑk-ŋɡɔŋ-Mɑsɛ́ndwɑn pɔ́p Akɑ̂y, ḿbɔ́ ńcú ŋɡɔ: «Ɛ́ sɛ́ ḿbíkŋɛ ŋɡɔ n dɑɑ ŋ́ɡʉ tɛ ŋ́kúu zúꞋu, m bɛn ŋ́ɡʉ Lɔ́mɑ.» 22 Ŋ́kwɑŋɛ pɔ́Ꞌɔ, ńzɑ́Ꞌ njí ńtúu Timɔtɛ̂ɛ pɔ́p Ɛlɑ̂stɛ Mɑsɛ́ndwɑn, pɔ́p pɔ́ pʉɔ pinɛ pɔ́p cẅɛ́lɛ́nɛ wɛ́. Lɑ́ kwɑꞋ jʉ́ nɛ́ tú yɛ́ pɛn ńnɑ́Ꞌ ńzɛɛ ńnɑ́ŋ tsɛt pɑk-ŋɡɔŋ-Azîi. 23 Ɛ́ pɔ́ ŋkɑ́ yîyɑ́ wɛcɔ́ mɑ́mɑ́ vɑꞋ vu ntɛ́ pʉɔ pi pɔ́p nǔu sɛ̂ndúŋ-Yɛ́su. 24 Ɛ́ ɡɔ́ ḿbɔ́ wɛcɔ́ tɑ̌ɑlɑɑ pɔ́ ɡú pɛ́ fúŋ wɛ́ ŋɡɔ Ndɛlmɛ́tɛ́lẅís, ɑ júk ńdɔk tʉ́n-ŋkɑ́p ńtẅí pɛcɔ́ pɔ́ɔ-mɛndɑ́ ńdɔk fʉꞋ mɑ́mɑ́ ndɑ́ yɛcɔ́ sɛ́ yi pɛ́ kɑ pɔ́ ɛ́fúŋ yîyɑ́ sɛ́ nɛ́ Altɛmîs, ńtẅí pɛ́ fɛn, ɛ́ ɡɑ́ ŋkɑ́p mbɔ̌ wɛ́ mbɑ mbɔ̌ pɑtẅí tɛꞋ. 25 A cúꞋlɛ pɑtẅí pɔ́p pɛcɔ́ pʉɔ pí pɔ́p kɑ pɔ́ ɛ́fɑꞋ yɔ́p yîyɑ́ ntɛ́ fɑꞋ, ńcú mbɔ̌ pɔ́p ŋɡɔ: «Pɛsúu pɑ́ɑ, pʉʉ sɛ́ ńjí sʉ́Ꞌnɛ ŋɡɔ pɛkŋɛ zúꞋ sʉ́Ꞌnɛ pɑ́Ꞌɑ ntɛ́ yɔ fɑꞋ. 26 Lɑ́, pʉʉ sɛ́ ńjʉ́ɔ yʉ́ʉ ḿbɛn ḿbɔ́ ńzúꞋ yúu mi ŋu wɔ ẅí pɛ́ fúŋnɛ ŋɡɔ Pɔ̂l sɛ́ ńcú. A sɛ́ ɛ́sẅíi pʉɔ ŋɡɔ mɛsɛ́ mi pɛ́ lɔknɛ pɔ mbɔ́ ńniitɛ kɑ́ pɔ́ Sɛ́ pɔ́. A cú pɔ́Ꞌɔ, tɛ nɛzɑ́ɑ pʉɔ zɑꞋnɛ pɛ́m. Ɛ́ kɑ́ pɔ́ pɔ ndɑꞋ Ɛ́fɛ̂zɛ pɔ́. Ɛ́ tsʉ́Ꞌ pɔ mɔ́zʉꞋ ɛ́ pɔ́ pɔ pɑk-ŋɡɔŋ-Azîi tsʉʉ tsʉʉ. 27 Yɔ nu lɔɔ nɛpʉ́ʉpɛ fɑꞋ yɛkŋɛ. A ɡʉ ŋ́ɡɛ pɔ́Ꞌɔ, pɛ́ pɔɔ pɛn ńdɔk ndɑ́-mɑ́mɑ́ sɛ́ Altɛmîs ɛ́fúŋ yɛcɔ́ yúu pɔ́. Pʉɔ pɔɔ pɛn ńcú ŋɡɔ Altɛmîs ɑ mɑ́mɑ́ sɛ́ wɛkŋɛ pɔ́. Lɑ́ pʉɔtsʉʉ sɛ́ ŋ́ɡúꞋlɛ wɛ́ tsɛt pɑk-ŋɡɔŋ-Azîi tɛ mbɑ zʉꞋ tsʉʉ ndǔ tsɛ́tsɑ́Ꞌ.» 28 Lɔ́ŋ-pʉɔ pí pɔ́p kɑ zúꞋnɛ yɔ sẅiŋɛ, kɑ fɔꞋ. Pɔ́p zɛ nɛlɔk ŋɡi tɛnnɛ ńzɛ́plɛ ńcú ŋɡɔ: «Altɛmîs, sɛ́-pʉɔ-Ɛ́fɛ̂zɛ, ɡúꞋ.» 29 Tʉ́sɔŋ tsʉʉ tsʉʉ tɑ́kŋɛ. Lɑ́Ꞌ ɡẅɛɛ Ŋɡɑẅîs pɔ́p Alistɑk, pɔ́p pɔ́ pʉɔ-Mɑsɛ́ndwɑn pi pɔ́p Pɔ̂l kɑ pɔ́ ńnɛn, ɛ́shuŋ wɔ́p ńdɔk ŋ́ɡʉ nɛ́ ndǔ yɛcɔ́ ntɛ́ zɑ́n yi pɛ́ cúꞋlɛ́nɛ zúꞋu, ŋ́ɡɛ mɛɡɑɑ. 30 Pɔ̂l pɔ́ ńdɔɔ nɛjɛ́Ꞌ ŋ́kúu tsɛt nɔɔ-lɑ́Ꞌ, lɑ́ pʉɔ-Kɛlístɔ tɔꞋ wɛ́. 31 Pɛcɔ́ ɡɑŋfɑꞋ-ŋɡɔ́mnɑɑ nǔu pɑk-ŋɡɔŋ-Azîi, pinɛ pɔ́p pɛsúu-Pɔ̂l, pɔ́p túu pʉɔ pɔ́p ɡʉ ḿbúꞋ mbɔ́ mbɔ̌ Pɔ̂l ŋɡɔ ɑ pɑ́ɑ nɛɡʉ zɑ́n. 32 Ɛ́ ɡɔ́ ḿbɔ́ ŋkɑ́ ɛ̂yɑ́, mbɔ zʉꞋ tɑ́kŋɛ. Pɔnɛ pʉɔ pɔ́ zɑꞋnɛ ŋ́ɡíɛt nɛ yɔp ŋɡi, pɛcɔ́ pɔ́ zíꞋnɛ ŋ́ɡíɛt nɛ yɔp ɛ́ pɔ́ pɔ ndɛꞋ. Nɛzɑ́ɑ pʉɔ pɔɔ ńjí yúu mi pɛ́ zɛɛ ńcúꞋlɛ ntɛ́ yɛ́tɛ́ pɔ́. 33 Pɛcɔ́ pʉɔ fú tsɛtsɛt lɑ́Ꞌ, ŋ́kyɛ́Ꞌtɛ yúu mi ɛ́ lɛɛnɛ, ɛ́sẅíi wɛcɔ́ ŋu pɛ́ fúŋnɛ ŋɡɔ Lɑksɑ́ndɑ ẅi pɑyúdɑ lɑ́Ꞌnɛ ńtsʉ́ʉnɛ wɛ́ ńtík mbi. A kúu zúꞋu, ŋ́kɑꞋ pɔ́ yɛ́ ŋ́ɡɑ́ tʉ́, nɛlɔk ɛ́sẅíi lɑ́Ꞌ ŋɡɔ ɑ ɡẅɛɛ nu yi ɑ ɡʉ ńcú. 34 Lɑ́ lɑ́Ꞌ zúꞋ ŋɡɔ ɑ ŋu-pɑyúdɑ, ńzɛ́plɛ ŋ́ɡíɛt nɛ ŋɡi tɛnnɛ, nǔu yúu nɛm yɛ́pɑ́, ŋɡɔ: «Altɛmîs, sɛ́-pʉɔ-Ɛ́fɛ̂zɛ ɡúꞋ.» 35 Wɛcɔ́ ŋu ẅi ɑ tʉ́sɔŋ, yɛ́ fɑꞋ pɔ́ nɛŋwɑꞋnɛ yúu, ɡɔ́ ńdẅiklɛ ŋ́ɡɛ tɛ lɑ́Ꞌ nɑ́Ꞌ. A cú mbɔ̌ pɔ́p ŋɡɔ: «Pʉɔ-Ɛ́fɛ̂zɛ, wɔ̌ tsɛtsɛt pɛkŋɛ ḿbɔ́ ḿmuŋɛ ŋɡɔ tʉ́sɔŋ-Ɛ́fɛ̂zɛ pyɛ́pnɛ mɑ́mɑ́ ndɑ́sɛ́-Altɛ́mís, tɛ mbɑ tɛ́tɔ́k wɛ ẅi ɑ kɑ fúnɛ nɛpú ḿvu? 36 Mbɔ ŋu pɔɔ sẅiŋɛ yɔ lúꞋ. Ɛ́ yɛ́tɛ́ lɑ́ n cú ŋɡɔ pʉʉ nɑ́Ꞌ, ŋ́ɡɔ ŋ́ɡɛ nu ŋ́kwɑŋɛ. 37 Pʉʉ lɔk pʉɔ pɔ́nɛ ńtɔ́ zɑꞋnɛ, mbɔ pɔ́p kɑ́ pʉ́ʉpɛ yɛcɔ́ yúu nǔu ndɑ́s-ɛ́-Altɛ́mís pɔ́, ŋ́kɛ́ ḿbɔɔ wɛ́ ńzɔɔtɛ. 38 Ɛ́ lɑɑ ḿbɔ́ yi Ndɛlmɛ́tɛ́lẅís pɔ́p ku-fɑꞋ yɔ́p ɡẅɛɛ nɛfɛn ŋu pɑ́Ꞌ pɛ́ ɡʉ ŋ́ŋɑk wɛ́, mbɔ pɑzɑ́Ꞌntsɑŋ ɡú. Mɛlɛ́Ꞌ mi pɛ́ ŋɑknɛ mɛtsɑŋ pɛn ḿbɔ́ ɡú. Ɛ́ zʉꞋ yi pɔ́p ɡẅɛɛnɛ nɛɡʉ zúꞋu ɛ́fɛn ntsɑŋ! 39 Mbɔ yi pʉʉ zɛɛ ŋ́ɡẅɛɛ yɛcɔ́ nu ndɛꞋ yi pʉʉ ɡʉ nɛpíkŋɛ, pʉʉ lɔk ńtɔ́ tsɛt cúꞋlɛ yi pɑsɑ́Ꞌlɑ́Ꞌ niitɛ́nɛ mɛnu zúꞋu pɑ́Ꞌ nɛpʉ́ʉ píkŋɛnɛ, 40 mbɔ pʉʉ ɡɛ pɑ́Ꞌɑ tɛ pɛ́ zɑ́p ntsɑŋ tú pɛkŋɛ ŋɡɔ pɛkŋɛ mɑꞋ vɑꞋ. Pɔ́Ꞌɔ, ɛ́fú nǔu mɛnu mi ɛ́ ɡɛnɛ lɔ́Ꞌnɛ. MbíꞋŋɡɔ pɛ́ lɑɑ ḿbíkŋɛ wɛkŋɛ, pɛkŋɛ pɔɔ kuꞋ nɛsẅíi yúu mi ɛ́ ɡɛnɛ lɑ́ lɑ́Ꞌ ŋɑ́ɑmɛ zɑꞋnɛ ndɛn wɔ pɔ́.» 41 Ŋu ẅi ɑ tʉ́sɔŋ yɛ́ fɑꞋ pɔ́ nɛŋwɑꞋnɛ yúu lɑ́, cú yɔ nu tɛ ḿbɔ́tnɛ ńnɑ́ŋ, ńcú ŋɡɔ lɑ́Ꞌ pɛn nɛ́ mɛnjɛ́Ꞌ mɔ́p. |
CABTAL, 2017