ŊwɑꞋnɛ-Gɑŋntúu Yɛ́su Kɛlístɔ 18 - Kɑɑ Fí

Pɔ̂l tʉ́sɔŋ-Kɔlɛŋntɛ

¹ Yɔ nu lɛɛ, Pɔ̂l fú tʉ́sɔŋ-Atɛ̂n ŋ́ɡʉ nɛ́ tʉ́sɔŋ-Kɔlɛŋntɛ,

² ŋ́ɡʉ tɛ ŋ́kúu zúꞋu, ńjʉ́ɔ wɛcɔ́ ŋu-Yúdɑ ẅi pɛ́ fúŋnɛ wɛ́ ŋɡɔ Akilɑs. Mbɔ pɛ́ kɑ pí wɛ́ tsɛt pɑk-ŋɡɔŋ-Pɔ̂ŋ. Pɔ́p nzwɛ́ wɛ Pɛlɛsîl pɛ́t lɑ́ ńtɔ́, ɛ́fú nɛ́ ŋɡɔŋ-Itɑlî. Mbɔ Kɑ́sɑ Kɛlɔ̂dɛ kɑ cú ŋɡɔ pɑyúdɑ tsʉʉ fú tʉ́sɔŋ-Lɔ́mɑ ŋ́ɡʉ. Pɔ̂l ɡʉ ŋ́ɡwɑ́ wɔ́p.

³ Pɑ́Ꞌ pɔ́p pɛ́ pɔ́p kɑ pɔ́ ɛ́fɑꞋ pɔ tɑ́Ꞌ ntɛ́ fɑꞋ, ɛ́ pɔ́ ńniitɛ mɛntɑp lɑ́, Pɔ̂l tsʉ́Ꞌ ńtswɛ́ pɔ njɛ́Ꞌ pɔ́p, pɔ́p pɛ́ pɔ́p tɛmtɛ ɛ́fɑꞋ.

⁴ Ŋɡɔŋ lɛ́Ꞌnji-pɑyúdɑ, Pɔ̂l ɡʉ ndɑ́-cúꞋlɛ pɔ́p, ńdɔɔ shʉ́ nɛsẅíi pɑyúdɑ pɔ́p pɑŋɡɛlɛ́k nɛ́ nu tɛ pɔ́p zúꞋ nu-Yɛ́su.

⁵ Sílɑs pɔ́p Timɔtɛ̂ɛ ɡɛ ḿbɔ́ tɛ ɛ́fú pɑk-ŋɡɔŋ-Mɑsɛ́ndwɑn ńtɔ́, Pɔ̂l tsʉ́Ꞌ ńníꞋ tú yɛ́ pɔ ndɑꞋ nɛsẅíi nu-Sɛ́, ḿbɔ́ ńniitɛ ŋ́kyɛ́Ꞌtɛ, ɛ́sẅíi pɑyúdɑ ŋɡɔ Yɛ́su pɔ́nɛ Nzɑ́Ꞌŋkʉ ẅi pɔ́p tswɛ́nɛ ḿbyɛ́p.

⁶ Lɑ́ pɑyúdɑ tɛn pɔ ndʉꞋ, ńzɔɔtɛ Pɔ̂l. A ɡɔ́ɔ ńtsʉ́Ꞌ ḿbúꞋ pɔ pɛ́pɛ́p nǔu mɛndẅí mɛ́, ńcú mbɔ̌ pɔ́p ŋɡɔ mɛci mɔ́p lɑɑ ńtswɛtnɛ tú pɔ́p, mbɔ yɛ́ nu kɑ́ pɔ́ nǔu pɔ́. Ŋɡɔ ɑ fú ŋkɔ̂ɔnɛ, ńtsʉ́Ꞌ ɛ́sẅíi nu-Sɛ́ pɔ mbɔ̌ pʉɔ pinɛ pɔ́p kɑ́ pɔ́ pɑyúdɑ pɔ́.

⁷ Pɔ̂l cú pɔ́Ꞌɔ, ɛ́fú ndɑ́-cúꞋlɛ ńcẅɛt, ŋ́ɡʉ nɛ́ njɛ́Ꞌ wɛcɔ́ ŋu, pɛ́ fúŋnɛ wɛ́ ŋɡɔ Tutius Jẅistẅis. A pɔ́ ŋu, mbɔ ɑ kɑ zɑ́p tʉ́m yɛ́ nǔu Sɛ́ wɛk. Ndɑ́ yɛ ɡɔ́ɔ ḿbɔ́ pɔ mbʉʉ ndɑ́-cúꞋlɛ-pɑyúdɑ.

⁸ Kɛlíspus ẅi ɑ ndʉ́m tsɛt ndɑ́-cúꞋlɛ-pɑyúdɑ pɔ́p njẅɛtndɑ́ yɛ tsʉʉ ɡɛ ńzɑ́p tʉ́m yɔ́p nǔu Tsɑpʉɔ. Pɛ́ nuꞋ wɔ́p ŋki. Pʉɔ-Kɔlɛŋntɛ tɛ ńzɑ́ɑ zúꞋ sẅíŋɛ-Pɔ̂l ḿbɛ́m yɔ́p nɛpɔ́ pʉɔ-Kɛlístɔ. Pɛ́ nuꞋ wɔ́p ɡúu ŋki.

⁹ Ɛ́ pɔ́ yɛcɔ́ nɛtúꞋ, Tsɑpʉɔ cú ńníɛꞋ mík-Pɔ̂l ńcú mbɔ̌ wɛ́ tsɛt njʉɔ ŋɡɔ: «Pɑ́ɑ nɛcʉɔꞋ! Sẅíi nu yɑ́ɑ sẅíinɛ, kɔɔ nɑ́Ꞌ,

¹⁰ mbíꞋŋɡɔ pûu nɛnnɛ. Wɛcɔ́ ŋu kɑ́ kuꞋ nɛɡẅɛɛ wú tɛ ŋ́ɡɛ nu kɛpɔŋ nǔu ɡu pɔ́. N cú pɑ́Ꞌɑ, mbíꞌŋɡɔ pʉɔ pi pɔ́p pɑ́ɑ, tʉ́sɔŋ zɑꞋnɛ tɛ ńzɑ́ɑ.»

¹¹ Pɔ̂l tswɛ́ Kɔlɛ̂ŋntɛ tɑ́Ꞌ ŋɡuꞋ nɛ́ pɛsɑŋ pɛ́nɛ́túkú, ḿbɔ́ ńzíꞋ pʉɔ nɛ́ nu-Sɛ́.

¹² Ɛ́ ɡɔ́ ḿbɔ́ yɛcɔ́ ŋkɑ́, Ŋɡɑlíyɔn tsʉ́Ꞌnɛ ŋɡɔ́mnɑɑ nǔu pɑk-ŋɡɔŋ-Pɑlɔ́mɑ yi pɛ́ fúŋnɛ ŋɡɔ Akɑ̂y. Pɑyúdɑ nɑ́ŋ tɛ ńdɔ sɛ́ nzʉʉ Pɔ̂l, ŋ́ɡẅɛɛ wɛ́ ńdɔk ŋ́ɡʉ zʉꞋ yi pɛ́ ŋɑknɛ ntsɑŋ zúꞋu, ɛ́fɛn wɛ́,

¹³ ńcú ŋɡɔ: «Ŋu wɔ sɛ́ ńníꞋ mɛtʉʉ pʉɔ ŋɡɔ pɔ́p ɡúꞋlɛ Sɛ́ nǔu ntɛ́ yi nɛpʉ́ʉ nɛkŋɛ kɑ́ pɔ́ ŋ́kɔŋ pɔ́.»

¹⁴ Pɔ̂l zúꞋ tɛ ḿbɔ́ ńdɔɔ nɛpʉ̈ɔt, Ŋɡɑlíyɔn ɡɔ́ɔ ńzɑ́Ꞌ, ńcú mbɔ̌ pɑyúdɑ ŋɡɔ: «Pɑyúdɑ ɛ́ ḿbɔ́ pɛ́Ꞌɛ ḿbɔ́ nu nɛjẅí ŋu kɛ pɔ yɛcɔ́ mɑ́mɑ́ nu kɛpɔŋ yi ŋu ɡɛnɛ ɔɔ, mbɔ ŋ ŋɑk nu yʉ́ʉ.

¹⁵ Lɑ́ pɑ́Ꞌ pʉʉ kɛ́ ɛ́shɔtnɛ pɔ tsɛtsɛt pʉʉ, ńzɔŋ nu pɔ nǔu mɛsẅíŋɛ, pɔ́p mɛlík mbɑ nɛpʉ́ʉ ni ɛ́ pɔ́ pɔ nʉ́ʉ lɑ́, ɛ́ líŋɛ pɔ wʉ́ʉ. Ŋ kɑ pɔ́ ŋ́kɔŋ nɛŋɑk yîyɑ́ ntɛ́ mɛtsɑŋ pɔ́!»

¹⁶ Ŋɡɑlíyɔn cú pɔ́Ꞌɔ, ɛ́fú zʉꞋ yi pɛ́ ŋɑknɛ ntsɑŋ zúꞋu, ńzuŋ wɔ́p.

¹⁷ Nu tsɑ wɔ́p pɔ́p pɛ́tsʉʉ tsʉ́Ꞌ ŋ́ɡẅɛɛ Sɔstɛ̂n ẅi ɑ ndʉ́m tsɛt ndɑ́-cúꞋlɛ pɔ́p, ńzɛ pɔ zʉꞋ yi pɛ́ ŋɑknɛ ntsɑŋ zúꞋu nɛtswɑ́ɑ wɛ́. Ŋɡɑlíyɔn pɔɔ tsɔ́p.

Pɔ̂l pɛn nzʉʉ nɛ́ Antíyɔshɛ wɛ Siliyɑ

¹⁸ Pɔ̂l nɑ́Ꞌ ḿbɛn ńzɛ ńnɑ́ŋ Kɔlɛ̂ŋntɛ. Lɑ́ ńdɛɛmɛ pɔ́ɔpɛ́mɑ́, ŋ́ɡʉ Sɛnkɛ́lɛ́ pɑ́Ꞌ ɑ ɡʉ ŋ́kúu mɑ́mɑ́ kɑnúꞋ ŋ́ɡʉ nɛ́ Siliyɑ. Pɔ̂l pɔ́p Pɛlɛsîl ŋ́ɡɛ Akilɑs ɡʉnɛ. Pɔ̂l ɡɔ́ ŋ́kúu kɑnúꞋ, ŋ́kɔ́ɔ tú yɛ́ ńdɔk ńcú ŋɡɔ ɑ ɡɛ yúu mi ɑ kɑ kɑꞋnɛ mbɔ̌ Sɛ́ tɛ ńdẅiklɛ.

¹⁹ Pɔ́p ɡʉ tɛ ŋ́kúu Ɛ́fɛ̂zɛ ńcẅɛt tsɛt kɑnúꞋ, Pɔ̂l nɑ́ Pɛlɛsɛkɑ pɔ́p Akilɑs, ŋ́ɡʉ ŋ́kúu ndɑ́-cúꞋlɛ-pɑyúdɑ, nɛsẅíi pɑyúdɑ nɛ́ nu-Tsɑpʉɔ.

²⁰ Pɔ́p píkŋɛ wɛ́ ŋɡɔ pɔ́p pɛ́ pɔ́p nɑ́Ꞌ ńzɛɛ ńnɑ́ŋ. Lɑ́ ɑ pɔɔ pɛ́m.

²¹ Lɑ́ ŋ́ɡɔ ńdɛɛmɛ wɔ́p ńcú mbɔ̌ pɔ́p ŋɡɔ: «Sɛ́ lɑɑ ḿbɛ́m, mbɔ mɔ ńtɑ́ɑ lɑ́ ḿbɛn ńtɔ́ njɛ́Ꞌ pʉʉ.» A cú pɑ́Ꞌɑ, ŋ́ɡɔ́ɔ ŋ́kɛ́ ŋ́ɡʉ ŋ́kúu kɑnúꞋ, ɛ́fú Ɛ́fɛ̂zɛ ŋ́ɡʉ.

²² KɑnúꞋ ɡɛ ŋ́kúu Sɛ́zɑlɛ̂ Pɔ̂l pfúu ḿbʉʉ nɛ́ Yɛlúsɑlɛm, ńcɛꞋlɛ cúlɛ-pʉɔ-Kɛlístɔ lɑ́ ḿbɛn ɛ́fú zúꞋu ŋ́ɡʉ nɛ́ Antíyɔshɛ,

²³ ŋ́kúu Antíyɔshɛ, ńnɑ́Ꞌ ńzɛɛ ńnɑ́ŋ lɑ́ ŋ́ɡʉ, ńjɛ́Ꞌ wɛ́ pɑk-ŋɡɔŋ-Ŋɡɑlɑ̂t pɔ́p Filíjîi, ńnɛn ńníꞋ mɛtʉʉ pʉɔ-Kɛlístɔ.

Apɔlɔ́s zíꞋ pʉɔ nɛ́ nu-Sɛ́ tʉ́sɔŋ-Ɛ́fɛ̂zɛ mbɑ Kɔlɛ̂ŋntɛ

²⁴ Wɛcɔ́ ŋu-Yúdɑ ẅí pɛ́ kɑ pínɛ wɛ́ Alɛkzɑŋndɛlîi, pɛ́ fúŋ wɛ́ ŋɡɔ Apɔlɔ́s tɔ́ Ɛ́fɛ̂zɛ, ḿbɔ́ ŋu ńcú nu ɛ́ ńcẅɛt, ḿbɛn ńjí ŋwɑꞋnɛ-Sɛ́ sʉ́Ꞌnɛ.

²⁵ Mbɔ pɛ́ kɑ zíꞋ wɛ́ nɛ́ nu ŋ́ɡɑ́ nǔu sɛ̂ndúŋ-Tsɑpʉɔ Yɛ́su. A pɔ́ ńníꞋ tú kwɑꞋ sʉ́Ꞌnɛ ɛ́sẅíi yîyɑ́ nu ḿbɛn ńzíꞋ pʉɔ nɛ́ nu-Yɛ́su pɔ ndʉ́ŋndʉŋ pɑ́Ꞌ ɛ́ pɔ́nɛ. Lɑ́ ŋ́ɡʉ nǔu nu cẅɛ́ɛ ŋki, ɑ jí yɛ́ pɔ pɑ́Ꞌ Jɑ̂ŋ kɑ pɔ́ ńnuꞋ pʉɔ ŋki.

²⁶ A cú nu-Sɛ́ ndɑ́-cúꞋlɛ-pɑyúdɑ, ɛ́sɑ́ɑnɛ sɑ́ɑnɛ́nɛ. Pɛlɛsîl pɔ́p Akilɑs zúꞋ sẅiŋɛ yɛ́ ńdɔk wɛ́ ŋ́ɡʉ, ńniitɛ ńdɛꞋlɛ wɛ́ nɛ́ nu ŋ́ɡɑ́ nǔu sɛ̂ndúŋ-Tsɑpʉɔ.

²⁷ Apɔlɔ́s ɡɛ ḿbɔ́ ńtsɑ́ɑ nɛfú Ɛ́fɛ̂zɛ ŋ́ɡʉ nǔu pɑk-ŋɡɔŋ-Akɑ́y, pɔ́ɔpɛ́mɑ́ zúꞋ ńníꞋ mɛtʉʉ mɛ́, ŋ́ŋwɑꞋnɛ ŋwɑꞋnɛ ŋ́ɡɑ́ mbɔ̌ wɛ́, nɛpɔ́ yi ɑ ɡʉ ŋ́kúu zúꞋu, ŋ́ɡɑ́ mbɔ̌ pʉɔ-Kɛlístɔ pi pɔ́p zúꞋu pɔ́p kúkŋɛ wɛ́ sʉ́Ꞌnɛ. A ɡʉ tɛ ŋ́kúu zúꞋu, ńcẅɛ́lɛ́ pʉɔ-Kɛlístɔ pɑ́ꞋtɛꞋ, mbíꞋŋɡɔ Sɛ́ kɑ pɔ́ ńtɔ́ɔtɛ wɛ́,

²⁸ pɔ́p pɛ́ pɑyúdɑ zɛɛ ńtʉ́ʉ mbi lɑ́Ꞌ, ńzɔŋ nu ŋ́ɡɑ́ nǔu Yɛ́su. A pɔ́ ńdɔk nu yi ɛ́ fúnɛ tsɛt ŋwɑꞋnɛ-Sɛ́ ńniitɛ nnyɛt ŋɡɔ Yɛ́su pɔ́nɛ Nzɑ́Ꞌŋkʉ ẅi Sɛ́ kɑ kɑꞋnɛ, ḿbɔ́ ńdɔk yɛ sẅiŋɛ ńjɔ́Ꞌ ntsu-pɑyúdɑ.