ŊwɑꞋnɛ-Gɑŋntúu Yɛ́su Kɛlístɔ 17 - Kɑɑ Fí

Pɔ̂l pɔ́p Sílɑs ɡʉ nɛ́ Tɛsɑlɔnik

¹ Pɔ̂l pɔ́p Sílɑs lɔ sɛ́ ńdɛɛ wɛ́ tʉ́sɔŋ-Afípɔlíyɑ mbɑ wɛ́ Apɔlɔ́nîi, ŋ́ɡʉ tɛ ŋ́kúu tʉ́sɔŋ-Tɛsɑlɔ́ník, ńjʉ́ɔ tɑ́Ꞌ ndɑ́-cúꞋlɛ-pɑyúdɑ pɔ́ zúꞋu.

² Pɔ̂l kúu tsɛt yîyɑ́ ndɑ́-cúꞋlɛ nɛjʉ́ɔ pɑyúdɑ, pɑ́Ꞌ ɛ́ ḿbɔ́nɛ mɑt mbɔ̌ wɛ́, nɛkúu mbɑ yɛ́tɛ́ tʉ́sɔŋ lɑ́ ńjʉ́ɔ ndɑ́-cúꞋlɛ-Pɑyúdɑ. Pɔ́p pɛ́ pɑyúdɑ pɔ́ ɛ́fúŋ ŋwɑꞋnɛ-Sɛ́ ɛ́shyɛ́ɛ kɔŋ ŋ́ɡɑ́ nǔu mɛlɛ́Ꞌnji mɛ́ntɑ́t.

³ Pɔ̂l pɔ́ ńniitɛ ŋ́kyɛ́Ꞌtɛ ɛ́sẅíi wɔ́p ŋɡɔ Nzɑ́Ꞌŋkʉ ẅí Sɛ́ kɑ kɑꞋnɛ, kɑ ɡẅɛɛ nɛjʉ́ɔ ŋɡʉ̈ɔ́Ꞌ, ḿpfú, ḿbɛn ńzẅíimɛ nǔu nɛvú. Nzɑ́Ꞌŋkʉ ɛ̂wɑ́ Yɛ́su ẅi ɑ sẅíinɛ wɔ́p lɑɑ.

⁴ Pɛcɔ́ ntɑ́Ꞌ pɑyúdɑ zúꞋ ɛ́ kúutɛ wɔ́p, pɔ́p pɛ́m, ńcʉ́ɔ nzʉʉ Pɔ̂l pɔ́p Sílɑs, tɛ mbɑ pɛcɔ́ pɑŋɡɛlɛ́kíyɑ tɛ ńzɑ́ɑ pi pɔ́p kɑ pɛ́mnɛ nu-Sɛ́ wɛk. Tɛ mbɑ pɛcɔ́ pɑŋɡɛ́ cʉ́ʉnɛ́nɛ pinɛ pɔ́p tʉ́sɔŋ, jʉ́ɔ lɑ́ ḿbɛ́m yɔ́p.

⁵ Lɑ́ pɑyúdɑ pinɛ pɔ́p lʉꞋnɛ jʉ́ɔ pɔ́Ꞌɔ, ŋ́kɔ́Ꞌ lɔ́ŋ, ŋ́ɡʉ mɛtú-ndúŋ-ńcúꞋlɛ pɑ kɛ́ kúu nǔu nu, pɔ́p pɛ́ pɔ́p kuutɛ lɑ́Ꞌ, ḿmɑꞋ vɑꞋ tʉ́sɔŋ. Pɔ́p ɡʉ ndɑ́-Jɑ́sɔŋ nɛlɔɔ Pɔ̂l pɔ́p Sílɑs pɑ́Ꞌ pɔ́p ɡʉ ŋ́ɡẅɛɛ wɔ́p ŋ́ɡʉ tík wɔ́p mbi lɑ́Ꞌ,

⁶ ŋ́kúu zúꞋu, ḿbɔɔ wɔ́p jʉ́ɔ, ŋ́ɡẅɛɛ Jɑ́sɔŋ pɔ́p pɛcɔ́ pɔ́ɔpɛ́mɑ́ ńdɔk wɔ́p ŋ́ɡʉ tɛ ŋ́kúu mbi pɑsɑ́Ꞌlɑ́Ꞌ, pɑyúdɑ lɔk ŋɡi tɛnnɛ ńcú ŋɡɔ: «Pʉɔ pɔnɛ mɑꞋ vɑꞋ zʉꞋ tsʉʉ. Ɛ́ pʉ́ɔlɑ́ pɔ́p lɔknɛ ńtɔ́ tɛ ŋ́kúu zɑꞋnɛ lɑɑ!

⁷ Jɑ́sɔŋ ŋkɛmɑ́ɑ ŋ́kúkŋɛ wɔ́p njɛ́Ꞌ yɛ́. Pɔ́p sɛ́ ḿbɔ́ ŋ́ɡwɑ́k nɛpʉ́ʉ-Kɑ́sɑ, ńcú ŋɡɔ wɛcɔ́ fɔɔ ɡú, pɛ́ fúŋ wɛ́ ŋɡɔ Yɛ́su.»

⁸ Yɔ sẅiŋɛ tɑ́ktɛ tú-lɑ́Ꞌ tɛ mbɑ yi pɑsɑ́ꞋlɑꞋ tʉ́sɔŋ.

⁹ Ɛ́ pɔ́ tɛ pɑsɑ́Ꞌ lɑ́Ꞌ píkŋɛ mbɔ̌ Jɑ́sɔŋ pɔ́p pɛcɔ́ pɔ́ɔpɛ́mɑ́ ŋɡɔ pɔ́p nɔŋ mbʉɔꞋ-ŋkɑ́p sɛ́ lɑ́ pɛ́ nɑ́ wɔ́p. Ɛ́ pɔ́ ŋkɑ́p yi vɑꞋ lɑɑ ḿbɛn ḿvu tʉ́sɔŋ pɔ́p pɛ́ yiyɑ́ ŋkɑ́p.

Pɔ̂l pɔ́p Sílɑs kúu Mbɛlɛ́ɛ

¹⁰ Nzɛ́nzʉ́ʉ vu, pɔ́ɔpɛ́mɑ́ ɡɛ Pɔ̂l pɔ́p Sílɑs ɡʉ nɛ tʉ́sɔŋ-Mbɛlɛ́ɛ, ŋ́ɡʉ tɛ ŋ́kúu zúꞋu, ŋ́ɡʉ ndɑ́-cúꞋlɛ-pɑyúdɑ.

¹¹ Pɑyúdɑ pinɛ pɔ́p nǔu yîyɑ́ tʉ́sɔŋ ɡẅɛɛ tʉ́m sʉ́Ꞌnɛ ńdɛɛ pinɛ pɔ́p Tɛsɑlɔnik. Pɔ́p pɛ́m sẅíŋɛ-Pɔ̂l pɔ́p Sílɑs nɛ́ tʉ́m sʉ́Ꞌnɛ, ḿbɔ́ lɛ́Ꞌ tsʉʉ, ḿbɔ́ ɛ́fúŋ ŋwɑꞋnɛ-Sɛ́, ńtúŋtɛ nu ŋ́ɡɑ́ nǔu, ńdɔɔ nɛjí kɛ nu yi pɔ́p sẅíinɛ wɔ́p, ɛ́ pɔ́Ꞌɔ ɔɔ.

¹² Pʉɔ tɛ ńzɑ́ɑ tsɛtsɛt pɔ́p fú pɔ́Ꞌɔ, ńzɑ́p tʉ́m yɔ́p nǔu Yɛ́su. Tɛ mbɑ pɑŋɡɛ́-Ŋɡɛlɛ́k pinɛ pɔ́p ɡɑŋyúu, mbɑ mbɛ́ɛnɛ tɛ ńzɑ́ɑ pɛn ńzɑ́p yɔ́p.

¹³ Lɑ́ pɑyúdɑ pɛ́ Tɛsɑlɔnik nɑ́ŋ tɛ ńzúꞋ pɑ́Ꞌ Pɔ̂l Mbɛlɛ́ɛ, ḿbɔ́ ŋ́kẅiꞋ ɛ́sẅíi nu-Sɛ́, ńnɑ́ɑtɛ ńtɔ́ zúꞋu, ńzɛ nɛmɑꞋ vɑꞋ ńdɔk ńníꞋ mɛtʉʉ lɑ́Ꞌ.

¹⁴ Ɛ́ ɡɛ pɔ́Ꞌɔ, pɔ́ɔpɛ́mɑ́ ɡɔ́ɔ ŋ́ɡɛ Pɔ̂l lɔk shʉ́-ŋki kɛ́ ndẅiklɛ ŋ́ɡʉ. Sílɑs pɔ́p Timɔtɛ̂ɛ tsʉ́Ꞌ ŋ́ɡɔ́ŋ Mbɛlɛ́ɛ.

¹⁵ Pʉɔ pí pɔ́p kɑ ɡʉnɛ ńcɑklɛ Pɔ̂l lɔk wɛ́ ŋ́ɡʉ tɛ ŋ́kúu Atɛ̂n, ŋ́ɡɔ ḿbɛn nzʉʉ, Pɔ̂l cú mbɔ̌ pɔ́p ŋɡɔ pɔ́p ɡɛ Sílɑs pɔ́p Timɔtɛ̂ɛ fɛ́Ꞌnɛ ńtɔ́ ŋ́kẅɛ́ɛtɛ wɛ́ tʉ́sɔŋ-Atɛ̂n.

Pɔ̂l sɛ́ ɛ́sẅíi nu-Sɛ́ Atɛ̂n

¹⁶ Pɔ̂l ɡɔ́ ḿbɔ́ ńzẅíꞋlɛ wɔ́p Atɛ̂n, ḿbɔ́ ŋ́kɑ́t ńjʉ́ɔ yúu ntɛ́ ntɛ́ yi pʉɔ-tʉ́sɔŋ ɛ̂yɑ́ ɡúꞋlɛnɛ ŋɡɔ ɛ́ mɛsɛ́. Ɛ́ zɑ́ɑ pɑ́ꞋtɛꞋ, mbʉʉ yɛ citɛ.

¹⁷ A pɔ́ ŋ́ɡʉ ndɑ́-cúꞋlɛ-pɑyúdɑ, ŋ́kẅɛ́ɛtɛ pɑyúdɑ mbɑ pɑpɛ́m nu-Sɛ́ wɛk ḿbɔ́ ɛ́sẅíi wɔ́p nɛ́ nu, ḿbɔ́ lɛ́Ꞌ tsʉʉ, ŋ́ɡʉ ndǔ zɑ́n, ńjʉ́ɔ pʉɔ pi pɔ́p zúꞋu, ḿbɛn ɛ́sẅíi wɔ́p nɛ́ nu.

¹⁸ Pɔ́p pɛcɔ́ pɑkwɑŋɛ nu, kɑ pɛn ḿbɔ́ ɛ́sẅíŋɛ, pɔ́p pɔ́ pʉɔ pi pɔ́p tsɛtsɛt pʉɔ-Ɛ́pikẅíl mbɑ pinɛ pɔ́p tsɛtsɛt pʉɔ-Sɛtɔyisíyɛ̂ŋ. Ɛ́ kɑ pɔ́ pɔ́Ꞌɔ, Pɔ̂l pɔ́ ńcú nu-Yɛ́su mbɔ̌ pɔ́p, mbɑ nu nǔu nɛzẅíimɛ nǔu nɛvú. Pɛcɔ́ zúꞋ pɔ́Ꞌɔ, ḿbíkŋɛ ŋɡɔ: «Wɑ́ ŋɡɑŋ-nɛsẅii cú ŋɡɔ kʉ̈ɔ́ lɑ́?» Pɛcɔ́ pɔ́ ŋɡɔ ɛ́ fí pɔ pɑ́Ꞌ ɑ sẅíi wɛkŋɛ nɛ́ nu nǔu mɛcɔ́ mɛsɛ́ mɛndɛꞋ.

¹⁹ Pɔ́p lɔk Pɔ̂l ŋ́ɡʉ mbi Ayɛlɔpɑɑjɛ, ɛ́ pɔ́ cúꞋlɛ-pɑzɑ́Ꞌntsɑŋ tʉ́sɔŋ, ŋ́kúu zúꞋu, ḿbíkŋɛ wɛ́ ŋɡɔ: «Ɛ́ lɑɑ ḿbɔ́ pɛk jí yɛ́k nu fí ɛ̂yɑ́ yi ɔ zíꞋnɛ pʉɔ lɑ́?

²⁰ Mɛnu mi ɔ sẅíinɛ wɛ́k sɛ́ ŋ́kʉꞋnɛ wɛ́k kʉꞋnɛ́nɛ. Pɛk sɛ́ ŋ́kɔŋ nɛtsuŋ ńjí pɑ́Ꞌ ɔ lɔknɛ ńcú.»

²¹ Ɛ́ kɑ ɡɔ́ ḿbɔ́ pɔ́Ꞌɔ, mbíꞌŋɡɔ pʉɔ pi pɔ́p tʉ́sɔŋ-Atɛ̂n mbɑ pʉɔ pi pɔ́p fúnɛ túu ńtɔ́ ńtswɛ́ zúꞋu, kɑ pɔ́ ŋkɑ́ tsʉʉ ńjúk yɔ́p pɔ nɛzúꞋ ḿbɛn ńcú mɛnu fí mi ɛ́ pɛ́t lɑ́ ńcẅɛt.

²² Pɔ̂l ɡɔ́ɔ ŋ́kɛ́ ńdɔ sɛ́ ńtʉ́ʉ tsɛtsɛt cúꞋlɛ-pɑsɑ́Ꞌ tʉ́sɔŋ ńcú ŋɡɔ: «Pʉɔ-Atɛ̂n, n jʉ́ɔ pʉʉ tʉ́ʉ nǔu mbɑ kʉ̈ɔ́ lɑ́, ḿbɔ́ pʉɔ ńníꞋ tú nǔu nu-Sɛ́ tɛꞋ.

²³ Mɔ sɛ́ ńnɛn tsɛt tʉ́sɔŋ yʉ́ʉ, ńjʉ́ɔ mɛndɑ́-mɛsɛ́ mʉ́ʉ jʉ́ɔnɛ, tɛ ńjʉ́ɔ yɛcɔ́ pɔ́ ɡú, mbɔ pɛ́ kɑ ŋwɑꞋnɛ nǔu ŋɡɔ: “Yɔ ndɑ́-nɔŋpɔꞋ yi pɛk kɑ́ jí lík yɛ́ pɔ́.” Ɛ́ pɔ́Ꞌɔ lɑ́, yîyɑ́ Sɛ́ yi pʉʉ tswɛ́nɛ ŋ́ɡúꞋlɛ wɛ́ kɛ́ jí wɛ́ lɑ́, n tɔ́ pɑ́Ꞌɑ nɛsẅíi wʉ́ʉ nɛ́ nu yɛ́.

²⁴ Sɛ́ ẅi ɑ kɑ niitɛ́nɛ mbí ŋ́ɡɛ yúu mi ɛ́ tsɛtú. Jʉ́ pɔ́nɛ Tsɑpʉɔ tʉ́nɛ́pú mbɑ ndǔ tsɛ́tsɑ́Ꞌ. A lɔɔ ńtswɛ́ tsɛt mɛzʉꞋ-sɛ́ mi pʉɔmɛsɔŋ lɔknɛ mbɔ́ mɔ́p ŋ́kút pɔ́.

²⁵ A kɛ́ ḿbɔɔ ḿbɔ́ ńzẅíꞋlɛ ŋɡɔ pʉɔmɛsɔŋ ɡɛ yɛcɔ́ yúu lɑ ɑ lɔk ḿbɔ́ yɛ́ ɡú pɔ́. Yɛcɔ́ yúu kɑ́ pɔ́ ńjɑ́k mbɔ̌ wɛ́ pɔ́. Jʉ́ ɡɑ́nɛ zẅikŋɛ mbɔ̌ pʉɔmɛsɔŋ, lɑ́ pɔ́p lɔk ḿbɔ́ ɡú, tɛ ŋ́ɡɑ́ mbɑ kʉ̈ɔ́ lɑ́.

²⁶ A kɑ fú nǔu tɑ́Ꞌ ŋu wɛ́mɔ́Ꞌ, ŋ́ɡɛ mɛlɑ́Ꞌ mɛlɑ́Ꞌ, nɛlɔk ŋ́ɡɛ ŋɡɔ pʉɔmɛsɔŋ nɑ́ŋ zʉꞋ tsʉʉ ndǔ tsɛ́tsɑ́Ꞌ. Ńzɑ́Ꞌ njí ńzɑ́p mɛkɛm-ŋkɑ́ mɔ́p mbɑ mɛzʉꞋ mi pɔ́p ɡʉ ńdɑ́Ꞌ ńnɑ́ŋ zúꞋu.

²⁷ Sɛ́ ɡɛ pɔ́Ꞌɔ, nɛpɔ́ yi pʉɔmɛsɔŋ ɡʉ ńdɔɔ wɛ́. Tɛ mbɑ pɑ́Ꞌ pɔ́p lɑɑ ńdɔɔ wɛ́ pɔ ŋkẅɛpmɛ ŋkẅɛpmɛ, mbɔ lɛ́Ꞌcɔ́ pɔ́p kɛ́ ńjʉ́ɔ wɛ́ jʉ́ɔnɛ. Pɛkŋɛ zɛɛ ŋ́ɡɔ ńnɑ́ŋ pɑ́Ꞌɑ, ɑ zɛɛ ḿbɔ́ nɛjɔ́ŋ mbɑ wɔ̌ lɑ́ tsɛtsɛt pɛkŋɛ.

²⁸ Pɛ́ zɛɛ ńcú ŋɡɔ: “Pɛkŋɛ lɔk pɔ wɛ́ lɑ́ ḿbɔ́ ɡú. Jʉ́ ɡɛnɛ pɛkŋɛ ŋɑtnɛ. Jʉ́ ɡɛnɛ pɛkŋɛ pɔ́ ɡú.” Mbɑ pɛcɔ́ pɑsɑknɛkɛt pʉ́ʉ kɑ pɛn ńcú ŋɡɔ: “Pɛkŋɛ zɛɛ ḿbɔ́ pɔ pʉɔ nǔu njẅɛt yɛ́.”

²⁹ Pɛkŋɛ lɔk ḿbɔ́ pʉɔ-Sɛ́. Pɔ́Ꞌɔ lɑ́, kɔɔ pɛkŋɛ kwɑŋɛ ŋɡɔ Sɛ́ yɛcɔ́ yúu mi pʉɔ kɑ lɔk jínu, ńdɔk tʉ́n-ŋɡɔ̂l, kɛ pɔ tʉ́n-ŋkɑ́p ɔɔ, kɛ ŋɡɔꞋ ɔɔ, ńdɔk ńniitɛ wɛ́.

³⁰ Jínɛ ŋɡɔ Sɛ́ pɛn ŋ́kɛ́ ḿbɔɔ ɛ́sɑ́ŋ yîyɑ́ ŋkɑ́ yi ŋumɛsɔŋ ḿbɔ́ ŋ́ɡɛ pɔ́Ꞌɔ ńdɔk ŋ́ɡʉʉnɛ ɡʉʉnɛnɛ pɔ́. Lɑ́ ɑ ŋkɔ̂ɔnɛ, ḿbɔ́ ɛ́fúŋ ŋɡɔŋ pʉɔ tsʉʉ, tsɛt mɛlɑ́Ꞌ tsʉʉ ŋɡɔ pɔ́p kúpmɛ mɑt wɔp.

³¹ Ɛ́ zɛɛ ŋ́ɡɔ ḿbɔ́ pɔ́Ꞌɔ, mbɔ Sɛ́ zɑ́p lɛ́Ꞌ yi ɑ ɡʉ ńdɑ́Ꞌ ńdɔk ŋu ẅí ɑ kɑ tsɔ́Ꞌnɛ wɛ́, ŋ́ŋɑk mbí, ŋ́kɛ́ ŋ́ŋɑk pɔ nǔu ntɛ́ yi ɛ́ ndʉ́ŋndʉŋ. A kɑ zẅíimɛ ŋɡɑŋ nǔu nɛvú nɛlɔk ńnyɛt mbɔ̌ pʉɔtsʉʉ ŋɡɔ ɑ ɡʉ ńdɑ́Ꞌ ŋ́ɡɛ pɔ́Ꞌɔ.»

³² Pɑŋɡɛlɛ́k pɔ́ tɛ ńzúꞋ pɑ́Ꞌ Pɔ̂l cúnɛ ŋɡɔ ŋu kɑ zẅíimɛ nǔu nɛvú, pɛcɔ́ pʉɔ pɔ́p pɔ́ ńzɔɔtɛ wɛ́, pɛcɔ́ cú nɛ́ jʉ́ ŋɡɔ: «Pɛk ɡʉ ńdɑ́Ꞌ yɛcɔ́ lɛ́Ꞌ lɑ́ ḿbɛn zẅíꞋlɛ nu yi ɔ cúnɛ lɑ́!»

³³ Pɔ̂l tsʉ́Ꞌ ńcẅɛt tsɛtsɛt pɔ́p ŋ́ɡʉ ɡʉnɛ.

³⁴ Lɑ́ pɛcɔ́ ntɑ́Ꞌpʉɔ kɛ́ ńcʉ́ɔ nzʉʉ yɛ́, ńtsʉ́Ꞌ pʉɔ-Kɛlístɔ. Ɛ́ ɡʉ tsɛtsɛt pɔ́p, pɛ́ jʉ́ɔ Ndɛ́nîs ẅí ɑ ḿbɔ́nɛ tsɛtsɛt pɑzɑ́Ꞌntsɑŋ Ayɛlɔpɑɑjɛ ɛ̂wɑ́, ńjʉ́ɔ wɛcɔ́ mɑŋɡɛ́ ẅi pɛ́ fúŋnɛ wɛ́ ŋɡɔ Ndɑmɑlís ŋ́ɡɛ mbɑ pɛcɔ́ pʉɔ.