ŊwɑꞋnɛ-Gɑŋntúu Yɛ́su Kɛlístɔ 16 - Kɑɑ Fí

Timɔtɛ̂ɛ cʉ́ɔ ku-Pɔ̂l pɔ́p Sílɑs

¹ Pɔ̂l ɡʉ tɛ ŋ́kúu tʉ́sɔŋ-Ndɛlbɛ, ŋ́ɡɛ ɛ́fú zúꞋu ńdɔk wɛ Listɛlɛ. Wɛcɔ́ ŋu-Kɛlístɔ pɔ́ zúꞋu, pɛ́ fúŋ wɛ́ ŋɡɔ Timɔtɛ̂ɛ. Mɑ́ wɛ pɔ́ mɔ́ɔ-Yúdɑ, mbɔ ɑ kɑ pɛ́m mɔ nu-Yɛ́su. Mbɔ tɑ́t wɛ ḿbɔ́ ŋu-Ŋɡɛlɛk.

² Timɔtɛ̂ɛ pɔ́ ŋu, pʉɔ-Kɛlístɔ pi pɔ́p Listɛlɛ mbɑ Ikɔnyɔm kẅíi lík yɛ́ sʉ́Ꞌnɛ tɛꞋ.

³ Pɔ̂l pɔ́ ŋ́kɔŋ ŋɡɔ pɔ́p Timɔtɛ̂ɛ tɛ́m ku, ńzɛɛ ḿbiitɛ ŋ́ɡɛ pɛ́ púꞋ wɛ́, ńjí ŋɡɔ pɑyúdɑ ɡʉ ḿbɛ́m wɛ́, mbíꞋŋɡɔ pɑyúdɑ pi pɔ́p nǔu yîyɑ́ pɑk-ŋɡɔŋ kɑ pɔ́ ńjí ŋɡɔ tɑ̌ɑ pɛ́ Timɔtɛ̂ɛ kɑ pɔ́ ŋu-Ŋɡɛlɛk

⁴ Pɔ́p Pɔ̂l ɡɔ́ ŋ́kɛ́ ḿbɔ́ ŋ́ɡɔ ńnɛn tsɛt mɛtʉ́sɔŋ ńcú pɑ́Ꞌ pɑpɛ́m Yɛ́su pɔ́p pɑcẅɛ́ɛ mbi tsɛt cúlɛ-pʉɔ-Kɛlístɔ yɛ Yɛlúsɑlɛm, kɑ zɑ́pnɛ, ḿbɔ́ ńcú mbɔ̌ pɔ́p ŋɡɔ pɔ́p ɡẅɛɛ yîyɑ́ nu sʉ́Ꞌnɛ.

⁵ Pʉɔ-Kɛlístɔ pɔ́ ŋ́kẅiꞋ ńzɑ́p tʉ́m nǔu Sɛ́ ńdɔk ŋ́ɡʉ pɔ nɛ́ mbi. Ndɛn wɔ́p pɔ́ ḿbɔ́ lɛ́Ꞌ tsʉʉ, ŋ́kẅiꞋ kẅiꞋnɛ.

Pɛ́ fúŋ Pɔ̂l Mɑsɛ́ndwɑn

⁶ Pɔ̂l pɔ́p Sílɑs kɛ ḿbɔ́ ńnɛn nɛnnɛ, Zẅikŋɛ-Sɛ́ ɡɛ ńtɔꞋ wɔ́p nɛɡʉ tsɛt pɑk-ŋɡɔŋ Azîi ɛ́sẅíi nu-Sɛ́, Pɔ́p tsʉ́Ꞌ ńjɛ́Ꞌ tsɛt pɑk-ŋɡɔŋ Filíjîi pɔ́p wɛ Ŋɡɑlɑ̂t jɛ́Ꞌnɛ,

⁷ ŋ́ɡʉ tɛ ńtsʉ́Ꞌ nɛkúu tsɛt pɑk-ŋɡɔŋ Misii, ńdɔɔ shʉ́ nɛɡʉ Mbitinî. Lɑ́ Zẅikŋɛ-Yɛ́su pɔɔ pɛ́m ŋɡɔ pɔ́p ɡʉ zúꞋu pɔ́.

⁸ Pɔ́Ꞌɔ, tɛ pɔ́p tsʉ́Ꞌ ńjɛ́Ꞌ Misii jɛ́Ꞌnɛ, ńcúŋ ŋ́ɡʉ nɛ́ tʉ́sɔŋ-Tɔ̂lɑ́s.

⁹ Ɛ́ ɡɛ ḿbɔ́ yɛcɔ́ nɛtúꞋ, Sɛ́ ŋíɛꞋ mík-Pɔ̂l, ɑ jʉ́ɔ yɛcɔ́ ŋkʉꞋnɛ nu. A jʉ́ɔ wɛcɔ́ ŋu-Mɑsɛ́ndwɑn tʉ́ʉ, ḿbɔ́ ḿbúꞋ mbɔ́ mbɔ̌ wɛ́ ńcú ŋɡɔ: «Sɛ́sẅíi, tɔ́ tɛ ŋ́kúu Mɑsɛ́ndwɑn, ńcẅɛ́lɛ́ wɛ́k.»

¹⁰ Pɔ̂l jʉ́ɔ pɔ́Ꞌɔ, pɛk ɡɔ́ɔ ńdɔɔ shʉ́ ŋ́ɡʉ Mɑsɛ́ndwɑn, ḿbɔ́ ńtsuŋ ńjí ŋɡɔ Sɛ́ fúŋnɛ wɛ́k zúꞋu ŋɡɔ pɛk cẅi Ŋkʉʉ Sʉ́Ꞌnɛ ẅi Sɛ́ kɑ kɑꞋnɛ.

Lítíyɑ pɛ́m nu-Yɛ́su

¹¹ Pɛk kúu mɑ́mɑ́ kɑnúꞋ tʉ́sɔŋ-Tɔ̂lɑ́s, ŋ́ɡʉ pɔ ndʉ́ŋndʉŋ tɛ ŋ́kúu tsɛt yɛcɔ́ lɑ́Ꞌ yi ŋki kɑ zɛmɛnɛ ńníꞋ sɔŋ, pɛ́ fúŋ nɛ́ Sɑmɔtɛ́lɑs. Njí kiɛ pɛk pɛn ńdɔk pɔ kɑnúꞋ ŋ́ɡʉ nɛ́ tʉ́sɔŋ-Nɛ́ɑpɔlís,

¹² ńtɔ́ zúꞋu ńcẅɛt tsɛt kɑnúꞋ ŋ́ɡʉ nɛ́ tʉ́sɔŋ-Fílîp. Ɛ́ pɔ́ mɑ́mɑ́ tʉ́sɔŋ tsɛt pɑk-ŋɡɔŋ-Mɑsɛ́ndwɑn, mbɔ pɛ́ kɑ lɔk wɛ́ ŋ́ɡɛ yɛcɔ́ tʉ́sɔŋ-Pɑlɔ́mɑ Pɛk nɑ́ŋ zúꞋu mɛcɔ́ ndɛn mɛlɛ́Ꞌ.

¹³ Lɛ́Ꞌnji-pɑyúdɑ pɔ́, pɛk fú tʉ́sɔŋ ńcẅɛt, ŋ́ɡʉ tɛ ŋ́kúu mbʉʉ yɛcɔ́ ŋki, ḿbɔ́ ŋ́kwɑŋɛ yɛ́k pɔ ŋɡɔ pɛk ɡʉ ŋ́ɡʉ tɛ ŋ́kúu zúꞋu, ɛ́ ɡɛ ŋɡɔ́ku ɔɔ pɛk jʉ́ɔ zʉꞋ yí pɑyúdɑ cúꞋlɛ́nɛ zúꞋu ńcɛꞋlɛ Sɛ́. Ŋ́kẅɛ́ɛtɛ pɛcɔ́ pɑŋɡɛ́ zúꞋu, ńnɑ́ŋ yɛ́k sɛ́ ńcú nu-Sɛ́ mbɔ̌ pɔ́p.

¹⁴ Wɛcɔ́ tɑ́Ꞌ pɔ́ tsɛtsɛt pɔ́p, pɛ́ fúŋ wɛ́ ŋɡɔ Lítíyɑ. Mbɔ ɑ kɑ fú tʉ́sɔŋ-Tiyɑtil. A tɑ́ŋtɛ yɛcɔ́ pɛpɑŋ ndẅí ɛ́ pɔŋ tɛꞋ. Mbɔ ɑ kɑ pɛ́m nu-Sɛ́-pɑyúdɑ. Pɛk pɔ́ ńcú nu, ɑ niitɛ ńzẅíꞋlɛ kwɑꞋ sʉ́Ꞌnɛ, mbíꞌŋɡɔ Tsɑpʉɔ kɑ tsɔ́Ꞌ tʉ́m yɛ́ pɑ́Ꞌ ɑ ɡʉ ńtʉ̈ɔ́ŋɛ nɛtúutɛ nɛ́ ńniitɛ zẅíꞋlɛ nu yí Pɔ̂l sɛ́ ńcú.

¹⁵ Pɛ́ pɑ́ɑtɛ ńtɛmtɛ ńnuꞋ wɔ́p njẅɛtndɑ́ yɛ́ ŋki. A pɑ́ɑtɛ ŋ́ɡɔ ɛ́fúŋ wɛ́k njɛ́Ꞌ yɛ́ ńcú ŋɡɔ: «Pɛk lɑɑ ńjʉ́ɔ yɛ́k ŋɡɔ ɑ pɛ́m nu-Tsɑpʉɔ tɛ ɛ́sẅíi nu, pɛk tɔ́ ńtswɛ́ njɛ́Ꞌ yɛ́.» Ńcú pɔ́Ꞌɔ, ńtsʉ́ʉnɛ wɛ́k tsʉ́ʉnɛ́nɛ nɛpɛ́m.

Pɛ́ mɑꞋ Pɔ̂l pɔ́p Sílɑs ndɑ́tsɑ́ŋ, tʉ́sɔŋ-Fílîp

¹⁶ Pɛk fú lɛ́Ꞌ ɛ̂yɑ́ ńcẅɛt ḿbɔ́ ŋ́ɡʉ zʉꞋ yi pɛ́ cɛꞋlɛ́nɛ Sɛ́ zúꞋu, wɛcɔ́ mɔ́ɔ mɑŋɡɛ́ ẅi ɑ ḿbɔ́nɛ ŋkwɑɑ tɔ́ ńzɑ́Ꞌ wɛ́k. Mbɔ yɛcɔ́ zẅikŋɛ kɛpɔŋ kɑ kúu nǔu wɛ́, ŋ́ɡɛ ɑ kuꞋ nɛsẅíi pʉɔ nɛ́ mɛnu mi ɛ́ ɡʉ ńtɑ́ɑ lɑ́ ŋ́ɡɛ wɔ́p. Pɑzúu wɛ́ pɔ́ ńdɔk wɛ́ ńdɛp ŋkɑ́p tɛ ɛ́ zɑ́ɑ zɑ́ɑnɛ.

¹⁷ A cʉ́ɔ nzʉʉ pɛk Pɔ̂l, ńnɛn ńcú nɛ́ tʉʉ ŋɡɔ: «Pʉɔ pɔnɛ ɡɑŋfɑꞋ mbɔ̌ Sɛ́ ẅi ɑ piꞋnɛ mbɑ kʉ̈ɔ́ lɑ́! Pɔ́p sɛ́ ɛ́sẅíi wʉ́ʉ pɑ́Ꞌ ɛ́ lɑɑ ḿbɔ́ pʉʉ nɛn pɔ́Ꞌɔ lɑ ńduk.»

¹⁸ A kɛ́ ŋ́ɡɛ pɔ pɔ́Ꞌɔ, nǔu mɛlɛ́Ꞌ tɛ ńzɑ́ɑ. Pɔ̂l ɡɑɑpɛ tsɛtsɛt ńzɑ́ŋ lɔ́ŋ, ɛ́shɔtnɛ ńcú mbɔ̌ zẅikŋɛ kɛpɔŋ ŋɡɔ: «N dɔk lík-Yɛ́su Kɛlístɔ ńcú ŋɡɔ ɔ fú nǔu mɑŋɡɛ́ wɑ́ ńcẅɛt!» Zẅikŋɛ kɛpɔŋ ɡɔ́ɔ ɛ́fú nǔu wɛ́ ńcẅɛt.

¹⁹ Pʉɔ pí pɔ́p kɑ zúunɛ wɛ́, jʉ́ɔ ŋɡɔ pɔ́p kɑ́ pɛn ŋ́kuꞋ nɛlɔk wɛ́ ńdɛp ŋkɑ́p pɔ́, ŋ́ɡɔ́ɔ ŋ́kɛ́ ŋ́ɡẅɛɛ Pɔ̂l pɔ́p Sílɑs, ɛ́shuŋ wɔ́p ńdɔk ŋ́ɡʉ ndǔ zɑ́n.

²⁰ Ńtík wɔ́p mbi pɑsɑ́Ꞌlɑ́Ꞌ ńcú mbɔ̌ pɑlɔ́mɑ pí pɔ́p kɑ pɔ́nɛ ɛ́sɑ́Ꞌ lɑ́Ꞌ ŋɡɔ: «Pʉɔ pɔnɛ sɛ́ ḿmɑꞋ tɑkŋɛ tsɛt tʉ́sɔŋ yɛkŋɛ, ḿbɛn ḿbɔ́ pɑyúdɑ.

²¹ Pɔ́p sɛ́ ńdɛꞋlɛ pʉɔ nɛ́ wɛcɔ́ mɑt wɛ fí. Ɛ́ pɔ́ yi pɛkŋɛ Pɑlɔ́mɑ kɑ́ pɔ́ ŋ́ɡẅɛɛ nɛpɛ́m pɔ́, ḿbɛn ŋ́kɛ́ ḿbɔɔ ɡẅɛɛ nɛnɛn pɑ́Ꞌ pɔ́p lɛꞋlɛ́nɛ pɔ́.»

²² Lɑ́Ꞌ zɑ́ŋ lɔ́ŋ nǔu Pɔ̂l pɔ́p Sílɑs. Pɑlɔ́mɑ pinɛ pɔ́p kɑ pɔ́nɛ ɛ́sɑ́Ꞌ lɑ́Ꞌ ńcú pɛ́ lɔk tʉʉ ɛ́sɔt mɛndẅí mɔ́p, ńdɔk ŋɡwɑɑ ńniitɛ ńtswɑ́ɑ wɔ́p.

²³ Pɛ́ tswɑ́ɑ wɔ́p kwɑꞋ sʉ́Ꞌnɛ, ŋ́ɡʉ ḿmɑꞋ wɔ́p ndɑ́tsɑ́ŋ, ńcú mbɔ̌ mbyɛ́p ndɑ́tsɑ́ŋ ŋɡɔ ɑ niitɛ ḿbyɛ́p wɔ́p kwɑꞋ sʉ́Ꞌnɛ.

²⁴ Pɛ́ cú pɔ́Ꞌɔ, ŋu ẅi ɑ pyɛ́pnɛ ndɑ́tsɑ́ŋ ɡʉ ńníꞋ wɔ́p tsɛt lûm ẅí ɛ́ kwɑꞋ tsɛtsɛt-ndɑ́tsɑ́ŋ, ńníꞋ kɔꞋ nǔu mɛku mɔ́p.

²⁵ Tʉʉ túꞋ ɡɛ ḿbɔ́ ŋ́kuꞋ, Pɔ̂l pɔ́p Sílɑs pɔ́ ńcɛꞋlɛ Sɛ́, ńzɔp ŋki ńdɔk ŋ́ɡúꞋlɛ wɛ́. Pɛcɔ́ ɡɑŋtsɑ́ŋ pɔ́ ńzúꞋ,

²⁶ ńnɑ́ŋ tɛ ńzúꞋ tsɛ́tsɑ́ꞌ tsʉ́Ꞌnɛ nɛ́ tʉʉ tɛ mɛsɑ́k-ndɑ́tsɑ́ŋ nʉꞋnɛ. Mɛtsundɑ́ ɡɔ́ɔ ńtsɔ́Ꞌnɛ ńtʉ́ʉtɛ. Mɛcɛ̂n fú nǔu ɡɑŋtsɑ́ŋ tsʉʉ kíɛꞋnɛ ḿbʉ̈ɔtnɛ sɛ́.

²⁷ Ŋu ẅí ɑ kɑ pɔ́ ḿbyɛ́p ndɑ́tsɑ́ŋ jʉɔmɛ, ńjʉ́ɔ mɛtsu-ndɑ́tsɑ́ŋ pɔ́ pɔ mɛ́ tsɔ́Ꞌnɛ. A ɡɔ́ɔ sɔŋ mɔ́níi, ḿbɔ́ ńdɔɔ nɛlɔk ɛ́sɔp mbʉʉ yɛ, ḿbɔ́ ŋ́kwɑŋɛ pɔ ŋɡɔ ɡɑŋtsɑ́ŋ lɑ́Ꞌ ńcẅɛt ŋ́kʉɔtɛ.

²⁸ Lɑ́ Pɔ̂l kíi nɛ́ tʉʉ ŋɡɔ: «Kɔɔ sɔp mbʉʉ yu, pɛk sɛ́ pɛ́tsʉʉ.»

²⁹ Mbyɛ́p ndɑ́tsɑ́ŋ zúꞋ ńcú pɛ́ lɔk kyɛꞌ ńtɔ́. A lɔk ŋ́kʉɔ ŋ́kúu tsɛt ndɑ́tsɑ́ŋ. Ḿbɔ́ ńcʉ̈ɔꞋ tɛ ŋ́ɡwɛt ɡwɛtnɛ, ńcúŋ ńnɔɔ mɛku-Pɔ̂l pɔ́p Sílɑs,

³⁰ ḿbɛn ŋ́ɡɛ pɔ́p pɛ́ pɔ́p fú tsɛt ndɑ́tsɑ́ŋ ńcẅɛt, ɑ píkŋɛ wɔ́p ŋɡɔ: «Pɛ́ ndɛ, m bɔ́ ŋ́ɡɛ ŋɡɔ́ku lɑ́ ńduk?»

³¹ Pɔ́p tsɔ́Ꞌ mbɔ̌ wɛ́ ŋɡɔ: «Zɑ́p tʉ́m yú nǔu Tsɑpʉɔ Yɛ́su. A ɡɛ pʉʉ njẅɛtndɑ́ yu luk.»

³² Pɔ̂l pɔ́p Sílɑs sẅíi nu-Tsɑpʉɔ mbɔ̌ pɔ́p pɛ́ njẅɛtndɑ́ yɛ́.

³³ Pɔ ŋkɑ́ yîyɑ́ ŋkɑ́ yîyɑ́, pɔ kwɑꞋ nɛtúꞋ ɛ̂wɑ́, mbyɛ́p ndɑ́tsɑ́ŋ lɔk wɔ́p ŋ́kúu tsɛt wɛcɔ́ lûmndɑ́, ɛ́suk mɛfʉ́ŋ mɔ́p, ńcɔꞋ. Pɔ́p ɡɔ́ɔ ńnuꞋ wɔ́p njẅɛtndɑ́ yɛ tsɛt ŋki.

³⁴ A pɛn ńdɔk wɔ́p pɛ́pɑ́ ḿbʉ́ʉ ŋ́ɡʉ ndɑ́ yɛ, ŋ́ɡɑ́ yúu pɔ́p jʉ́. Pɔ́p pɛ́ njẅɛtndɑ́ yɛ tsɑ́ɑtɛ, mbíꞋŋɡɔ pɔ́p zɑ́b tʉ́m yɔ́p nǔu Sɛ́.

³⁵ Njí ɡɛ ŋ́kiɛ, pɑsɑ́Ꞌlɑ́Ꞌ-Pɑlɔ́mɑ túu pɛmɑ́kɑ́ɑ ŋɡɔ pɔ́p ɡʉ ńcú mbɔ̌ ŋu ẅí ɑ pyɛ́pnɛ ndɑ́tsɑ́ŋ ŋɡɔ ɑ nɑ́ pʉɔ pɑ́ pɔ́p ɡʉ.

³⁶ Ŋu ẅi ɑ pyɛ́pnɛ ndɑ́tsɑ́ŋ tɔ́ ńcú mbɔ̌ Pɔ̂l ŋɡɔ: «Pɑsɑlɑ́Ꞌ pɛk cú ŋɡɔ n nɑ́ wʉ́ʉ pʉʉ ɡʉ, ḿbɔ́ pʉʉ ńcẅɛt ŋkɔ̂ɔnɛ ŋ́ɡʉ nɛ́ mbɔ́tnɛ!»

³⁷ Lɑ́, Pɔ̂l cú mbɔ̌ pɛmɑ́kɑ́ɑ ŋɡɔ: «ZúꞋnɛ, pɔ́p kɑ pɛ́t pɔ kɛ́ ŋɑk ntsɑŋ yɛk, ńcú pɛ́ tswɑ́ɑ wɛ́k mbi lɑ́Ꞌ. Lɑ́ pɛk pɔ́ pʉɔ-ŋɡɔŋ-pɑlɔ́mɑ. Pɔ́p kɑ tswɑ́ɑ wɛ́k pɔ́Ꞌɔ, tɛ ɛ́ kuꞋ pɔ́p níꞋ wɛ́k tsɑ́ŋ. Pɔ́p pɛn ḿbɔ́ pɑ́Ꞌɑ ńdɔɔ nɛsɔ́tɛ sɔ́tɛ́nɛ ńcẅɛɛtɛ wɛ́k. Pɛk lʉꞋ. Ɛ́ píkŋɛ ŋɡɔ kwɑꞋ pɔ́p tɔ́nɛ ńcẅɛɛtɛ wɛ́k ndɑ́tsɑ́ŋ.»

³⁸ Pɛmɑ́kɑ́ɑ ɡʉ ḿbɛ́ɛtɛ yɔ nu ɛ́sẅíi pɑsɑ́Ꞌŋɡɔŋ-Pɑlɔ́mɑ pɔ́p zúꞋ ŋɡɔ Pɔ̂l pɔ́p Sílɑs pʉɔ-lɑ́Ꞌ-Pɑlɔ́mɑ ḿbɔ́k tɛꞋ,

³⁹ kwɑꞋ pɔ́p tɔ́, ḿbúꞋ mbɔ́ ŋ́ɡɛ pɔ́p fú ndɑ́tsɑ́ŋ ńcẅɛt, ḿbɛn ḿbúꞋ mbɔ́ mbɔ̌ pɔ́p ŋɡɔ pɔ́p fú tʉ́sɔŋ ŋ́ɡʉ.

⁴⁰ Pɔ̂l pɔ́p Sílɑs cẅɛt ŋkɔ̂ɔnɛ, ŋ́ɡʉ nɛ njɛ́Ꞌ-Lítíyɑ, ŋ́kúu zúꞋu, ḿbɛ́ɛtɛ mbɑ kʉ̈ɔ́ lɑ́ ɛ́sẅíi pɔ́ɔpɛ́mɑ́, ńníꞋ mɛtʉʉ wɔ́p, lɑ ŋ́ɡʉ.