ŊwɑꞋnɛ-Gɑŋntúu Yɛ́su Kɛlístɔ 12 - Kɑɑ Fí

Pɛ́ jẅí Jɑ̂k, ŋ́ɡẅɛɛ Pyɛ̂

¹ Ɛ́ pɔ́ ŋkɑ́ yîyɑ́, fɔɔ Ɛlɔ̂dɛ zɛ nɛtsɔ́Ꞌ ku pɛcɔ́ ɡɑŋ-cúꞋlɛ-pʉɔ-Kɛlístɔ kɛpɔŋ,

² ńtúu pɛ́ ɡʉ ńdɔk níi-ntsɔ ńjẅí Jɑ̂k ẅí ɑ mɔ́ɔmɑ́ pɛ́ Jɑ̂ŋ.

³ A jʉ́ɔ, mbɔ ɑ ɡɛ pɔ́Ꞌɔ, ɛ́ pɔŋ pɑyúdɑ. A pɛn ŋ́ɡɛ pɛ́ ɡẅɛɛ Pyɛ̂ ɡúu, ŋ́ɡɔ ŋ́ɡẅɛɛ wɛ́ pɔ́Ꞌɔ, ɛ́ pɔ́ ŋkɑ́ yi pɛ́ jʉ́nɛ ndínɑ-mbɛlɛ̂ɛt kɛ́ fɛntɛ.

⁴ Ɛlɔ̂dɛ cú pɛ́ ɡẅɛɛ Pyɛ̂ pɔ́Ꞌɔ, ńdɔk wɛ́ ŋ́ɡʉ ńjɔ́Ꞌ ndɑ́tsɑ́ŋ. A niitɛ pɑlʉ̈ɔ́Ꞌntsɔ pɛ́nɛ́kwɑ ŋkɑ́ yɛ́nɛ́kwɑ ńtíktɛ ŋɡɔ pɔ́p pɔ́ ḿbyɛ́p wɛ́, ḿbɔ́ ńzẅíꞋlɛ pɑ́Ꞌ ndínɑ-Pɑ́skɑ ɡʉ ńdɛɛ, ɑ tík wɛ́ mbi lɑ́Ꞌ, pɛ́ ŋɑk wɛ́.

⁵ Pɛ́ jʉ́ɔꞋ Pyɛ̂ ndɑ́tsɑ́ŋ pɔ́Ꞌɔ, cúlɛ-pʉɔ-Kɛlístɔ pɔ́ ńcɛꞋlɛ Sɛ́ nǔu tú yɛ́ kɛ́ kɑ́ɑ.

Cʉ̈ɔ́Ꞌ-Tsɑpʉɔ ɡɛ Pyɛ̂ fú ndɑ́tsɑ́ŋ ńcẅɛt

⁶ Njí ḿbɔ́ ŋ́ɡʉ ŋ́kiɛ, fɔɔ Ɛlɔ̂dɛ tík Pyɛ̂ mbi lɑ́Ꞌ, pɛ́ ŋɑk wɛ́. Pyɛ̂ pɔ́ nɛtúꞋ, ńnɔɔ tsɛtsɛt pɑlʉ̈ɔ́Ꞌntsɔ pɛ́pɑ́, ḿbɔ́ ńdɛ́. Mbɔ pɛ́ lɔk mɛcɛ̂n mɛmbɑ́ ŋ́kút mbɔ́ mɛ́. Pɑpyɛ́p zʉꞋ pɔ́ ntsundɑ́, nɛpyɛ́p wɛ́.

⁷ Wɛcɔ́ cʉ̈ɔ́Ꞌ-Tsɑpʉɔ vukŋɛ vukŋɛ́nɛ ńcẅɛt zʉꞋ yí Pyɛ̂ zúꞋu, zʉꞋ kyɛꞋnɛ tsɛt ndɑ́. Cʉ̈ɔꞋ-Sɛ́ púꞋtɛ ɡúŋ mbʉʉ-Pyɛ̂, ńjʉɔmɛ wɛ́, ńcú mbɔ̌ wɛ́ ŋɡɔ: «Lɔ sɛ́ nɛ́ tʉʉ!» Mɛcɛ̂n ɡɔ́ɔ ŋ́kɛ́ ɛ́fú nǔu mbɔ́ mɛ́ ŋ́kíɛꞋnɛ ḿbʉ̈ɔtnɛ sɛ́.

⁸ Cʉ̈ɔꞋ-Sɛ́ pɛn ńcú mbɔ̌ wɛ́ ŋɡɔ: «Zẅík ndẅí yu, ńzẅík mɛtɑp mú.» Pyɛ̂ lɔ sɛ́ ŋ́ɡɛ pɔ́Ꞌɔ. Cʉ̈ɔꞋ-Sɛ́ pɛn ńcú mbɔ̌ wɛ́ ŋɡɔ: «MɑꞋ ndẅí-fɑ́k yu, ńcʉ́ɔ nzʉʉ mɔ.»

⁹ Pyɛ̂ fú ndɑ́tsɑ́ŋ ńcẅɛt, ńcʉ́ɔ nzʉʉ yɛ́. A pɔɔ ḿbɔ́ ńjí ŋɡɔ Cʉ̈ɔꞋ-Sɛ́ tsuŋ ńtɔ́ pɔ nɛcẅɛɛtɛ wɛ́ pɔ́, ŋ́kwɑŋɛ ŋɡɔ Sɛ́ níɛꞋ pɔ mík mɛ́ lɑ́ ɑ jʉ́ɔ mîmɑ́ mɛnu tsɛt njʉɔ.

¹⁰ Cʉ̈ɔꞋ-Sɛ́ lɔk Pyɛ̂ ńdɛɛ mbi nduŋmbi nɔɔ-pɑlʉ̈ɔ́Ꞌntsɔ, ḿbɛn ḿbɑ́ɑtɛ ńdɛɛ mbi yɛcɔ́ nɔɔ, ŋ́ɡʉ tɛ ŋ́kúu ntsundɑ́ ẅi pɛ́ kɑ lɔknɛ tʉ́n ńniitɛ, pɛ́ fú zúꞋu ńcẅɛt ŋ́kúu tʉ́sɔŋ. Ntsundɑ́ tsɔ́Ꞌnɛ zɛ́nɛjʉ́, mbi pɔ́p, pɔ́p ɡɔ́ɔ ńcẅɛt, ńcʉ́ɔ sɛ̂ndúŋ tɛ ńnɑ́Ꞌ ńzɛ ńnɛn, Cʉ̈ɔꞋ-Sɛ́ ɡɔ́ɔ ńnɑ́ Pyɛ̂ ŋ́ɡʉ.

¹¹ Jínu yɛ́ ɡɔ́ɔ ŋ́kɛ́ ńtɔ́. A cú ŋɡɔ: «Ŋ ɡɔ́ɔ mɔ ŋ́kɛ́ ńtsuŋ ńjʉ́ɔ sʉ́Ꞌnɛ ŋkɔ̂ɔnɛ ŋɡɔ ɛ́ nu nɛ́nẅín, Tsɑpʉɔ túu cʉ̈ɔ́Ꞌ wɛ, ɑ tɔ́ ńcẅɛ́ɛ wɑ́ɑ mbɔ̌ fɔɔ Ɛlɔ̂dɛ. A pɛn ńcẅɛ́ɛ wɑ́ɑ nǔu nu kɛpɔŋ tsʉʉ yi pɑyúdɑ kɑ pɔ́ ńtsɑ́ɑ ŋɡɔ ɛ́ ɡɛ wɑ́ɑ.»

¹² Pyɛ̂ kwɑŋɛ, ŋ́ɡʉ nɛ́ ndɑ́-Mɑlíyɑ, mɑ́ pɛ́ Jɑ̂ŋ ẅi pɛ́ pɛnnɛ ɛ́fúŋ wɛ́ ŋɡɔ Mɑ́lɛ́kúshi. Ɛ́ ɡɔ́ ḿbɔ́, mbɔ pʉɔ-Kɛlístɔ cúꞋlɛ tɛ ńzɑ́ɑ ḿbɔ́ ńcɛꞋlɛ Sɛ́.

¹³ A púꞋtɛ ntsuŋkɑ́Ꞌ ńdɑꞋ ŋɡi, wɛcɔ́ ŋɡɑŋfɑꞋ wɛ mɑŋɡɛ́, pɛ́ fúŋnɛ wɛ́ ŋɡɔ Lɔ̂dɛ, ɑ tɔ́ nɛtsɔ́Ꞌ,

¹⁴ ńzúꞋ ŋɡi-Pyɛ̂, ńdii. Ɛ́ pɔŋ wɛ́ pɔŋnɛ tɛ ɑ likŋɛ nɛtsɔ́Ꞌ ntsuŋkɑ́Ꞌ, ŋ́kʉɔ ḿbɛn ndɑ́ ńcú mbɔ̌ pɛcɔ́ pʉɔ ŋɡɔ: «Pyɛ̂ pʉɔlɑ́ ntsuŋkɑ́Ꞌ!»

¹⁵ Pɔ́p cú mbɔ̌ wɛ́ ŋɡɔ: «Ɔ pɑ́lɛ!» A cú ŋɡɔ: «N cú sẅíinu.» A pʉɔlɑ́ ntsuŋkɑ́Ꞌ. Pɔ́p cú ŋɡɔ lɛ́Ꞌcɔ́, mbɔ ɑ pɔ́ pɔ Cʉ̈ɔꞋ-Sɛ́ ẅi ɑ lɔ ḿbyɛ́p wɛ́.

¹⁶ Pyɛ̂ kɛ ḿbúꞋtɛ ntsuŋkɑ́Ꞌ púꞋtɛnɛ tɛ pɔ́p tsɔ́Ꞌ, ńjʉ́ɔ ɑ pɔ́ jʉ́, ɛ́ kʉꞋnɛ wɔ́p tɛꞋ.

¹⁷ Pyɛ̂ mɑꞋtɛ pɔ́ ńdɔk ńcú ŋɡɔ pɔ́p nɑ́Ꞌ. Pɔ́p nɑ́Ꞌ, ɑ zɛ nɛpɛ́ɛtɛ ɛ́sẅíi wɔ́p pɑ́Ꞌ Tsɑpʉɔ lɑ́Ꞌnɛ ŋ́ɡɛ lɑ́ ɑ cẅɛt ndɑ́tsɑ́ŋ, ḿbɛn ńcú mbɔ̌ pɔ́p ŋɡɔ: «Pʉʉ ɡʉ ńdɛꞋlɛ yɔ nu, mbɔ̌ Jɑ̂k mbɑ mbɔ̌ pɛcɔ́ pɔ́ɔpɛ́mɑ́, ńcú pɔ́Ꞌɔ, ńcẅɛt, ŋ́ɡʉ nɛ́ zʉꞋ ndɛꞋ.»

¹⁸ Njí ɡɛ ŋ́kiɛ, pɑlʉ̈ɔ́Ꞌntsɔ pɔɔ Pyɛ̂ jʉ́ɔ, zʉꞋ nʉꞋnɛ tsɛtsɛt pɔ́p. Pɔ́p pɔɔ jí yúu mi Pyɛ̂ lɑ́Ꞌnɛ ńtsʉ́Ꞌ yɛ́tɛ́ pɔ́.

¹⁹ Fɔɔ Ɛlɔ̂dɛ cú pɛ́ lɔɔ wɛ́ zʉꞋ tsʉʉ, mbɔɔ wɛ́ jʉ́ɔ. A píkŋɛ mɛnu mbɔ̌ pɑlʉ̈ɔ́Ꞌntsɔ pínɛ pɔ́p kɑ pɔ́ ḿbyɛ́p Pyɛ̂, ŋ́ɡɔ́ɔ ŋ́kɛ́ ńcú ŋɡɔ pɛ́ jẅítɛ wɔ́p. Ɛlɔ̂dɛ ɡɛ pɔ́Ꞌɔ, ɛ́fú tsɛt pɑk-ŋɡɔŋ-Judɛ̂ ńcẅɛt, ŋ́ɡʉ nɛ́ tʉ́sɔŋ-Sɛ́zɑlɛ̂, ŋ́kúu zúꞋu, ńnɑ́Ꞌ ńzɛ ńnɑ́ŋ.

Fɔɔ Ɛlɔ̂dɛ pfú

²⁰ Ɛ́ ḿbɔ́ ŋkɑ́ ɛ̂yɑ́, Fɔɔ Ɛlɔ̂dɛ pɔ́ ńzɑ́ŋ lɔ́ŋ nǔu pʉɔ-tʉ́sɔŋ Tîi pɔ́p tʉ́sɔŋ Sidɔŋ pɑ́Ꞌɑ tɛꞋ. Pɔ́p kɑ zúꞋ pɔ́Ꞌɔ cúꞋlɛ ḿbɔ́ tɑ́Ꞌ ntsu nɛɡʉ ńjʉ́ɔ wɛ́. Ɛ́ lɛɛ pɔ́Ꞌɔ, pɔ́p kút nɛpúꞋ-Mbɛlɑ́tus, ɑ pɔ́ ŋu ẅí jʉ́ pyɛ́pnɛ ndɑ́-fɔɔ, pɑ́Ꞌ ɑ ɡʉ ńnɛn kɛ́m wɔp ŋ́ɡɑ́, cɔ́k yi ɛ́ tsɛtsɛt pɔ́p pɛ́ fɔɔ mɛ. Ńtsɑ́ɑ pɔ́Ꞌɔ, mbíꞌŋɡɔ yúupɛjʉ́ pi pɛ́ kɑ pɔ́ ńjʉ́ tʉ́sɔŋ-Tîi pɔ́p tʉ́sɔŋ-Sidɔŋ, kɑ pɔ́ ɛ́fú pɔ ŋɡɔŋ-fɔɔ Ɛlɔ̂dɛ.

²¹ Pɛ́ tɑ́ŋ lɛ́Ꞌ, fɔɔ Ɛlɔ̂dɛ mɑꞋ ndẅí nɛfɔɔ nɛ́, ńtɔ́ ńnɑ́ŋ ndǔ kɔꞋ-nɛfɔɔ nɛ́, ḿbɔ́ ńcú nu mbɔ̌ pɔ́p,

²² lɑ́Ꞌ pɔ́ ŋ́ɡúꞋlɛ wɛ́ ńcú ŋɡɔ: «Ŋumɛsɔŋ kɑ nɛpɔ́ ńcú nu pɑ́Ꞌɑ pɔ́, ɔ pɔ́ pɔ wɛcɔ́ sɛ́.»

²³ Wɛcɔ́ cʉ̈ɔ́Ꞌ-Tsɑpʉɔ ɡɔ́ɔ ńtʉ́ʉ pɔ ŋkɑ́ yîyɑ́, ḿmɑꞋ ɡɔɔ nǔu fɔɔ Ɛlɔ̂dɛ, mbíꞋŋɡɔ ɑ kɑŋ mɛkuꞋ mí ɛ́ pɔ́ pɔ mɛ Sɛ́, ńdɔk ŋ́ɡɛ mɛ́. Mɛnɔ́ lúꞋlɛ wɛ́ ɑ pfú.

²⁴ Ɛ́ kɛ ŋ́ɡʉ nǔu sẅíŋɛ-Sɛ́, ɛ́ pɔ́ ŋ́kẅiꞋ ɛ́sɑt zʉꞋ ŋ́ɡʉ pɔ nɛ́ mbi.

²⁵ Pɑnɛpɑ́ɑshi pɔ́p Sɔ̂l pɔ́ tɛ ḿmik yɔ́p fɑꞋ yi pɛ́ lɑ́Ꞌnɛ ńtúu wɔ́p nǔu Yɛlúsɑlɛm, ŋ́ɡɔ ḿbɛn Antíyɔshɛ ńdɔk Jɑ̂ŋ ẅí pɛ́ fúŋnɛ wɛ́ ŋɡɔ Mɑ́lɛ́kúshi ŋ́ɡʉ.