ŊwɑꞋnɛ-Gɑŋntúu Yɛ́su Kɛlístɔ 11 - Kɑɑ Fí

Pyɛ̂ pɛ́ɛtɛ ntsu wɛ́ mbi pɑpɛ́m Yɛ́su Yɛlúsɑlɛm

¹ Gɑŋntúu-Yɛ́su, pɔ́p pɔ́ɔpɛ́mɑ́ pi pɔ́p Judɛ̂ lɛɛ tɛ ńzúꞋ pɛ́ pɔ́ ńcú ŋɡɔ, Pʉɔ pi pɔ́p kɑ́ pɔ́ pɑyúdɑ pɔ́ kɑ kɛ́ mɔ́ ḿbɛ́m yɔ́p nu-Sɛ́.

² Pyɛ̂ ɡɛ ḿbɔ́ tɛ ḿbɛn Yɛlúsɑlɛm, pɑpɛ́m Yɛ́su pi pɔ́p pɑyúdɑ zɛ nɛŋɑk wɛ́

³ ńcú ŋɡɔ: «Ɔ kɑ kúu ndɑ́-pʉɔ pí pɔ́p kɑ́ pɔ́ Pɑyúdɑ pɔ́ tɛ pʉʉ pɛpɔ́p zɛɛ ńjʉ́ mbɑ yúupɛjʉ́.»

⁴ Pyɛ̂ ɡɔ́ɔ ŋ́kɛ́ ḿbɛ́ɛtɛ mbɑ kʉ̈ɔ́ lɑ́ yi ɛ́ kɑ lɛɛnɛ, ɛ́sẅíi wɔ́p tɛ ɛ́fú nzɛnɛ, ńcú mbɔ̌ pɔ́p ŋɡɔ:

⁵ «Mɔ ḿbɔ́ tʉ́sɔŋ-Jɔp, ḿbɔ́ ńcɛꞋlɛ Sɛ́, Sɛ́ ŋíɛꞋ mík mɑ́ɑ, n jʉ́ɔ ŋkʉꞋnɛ nu, n jʉ́ɔ yɛcɔ́ yúu mɑ́, ɛ́ pɔ́ pɑ́Ꞌ mɑ́mɑ́ pɔ́-ndẅí yi pɛ́ ɡẅɛɛnɛ nǔu mɛlẅí mɛ́nɛ́kwɑ lɑ́, ɛ́ fú tʉ́nɛ́pú ńcúŋ ńtɔ́ ńcɔ́ŋɛ mbi mɔ.

⁶ N niitɛ ńdíŋɛ yúu mi ɛ́ tsɛtú, ńjʉ́ɔ mɛyúumɛku mi ɛ́ ndǔ tsɛ́tsɑ́Ꞌ ŋ́ɡẅɛɛ mɛku mɛ́nɛ́kwɑ pɔ́ tsɛtú, ńjʉ́ɔ mɛyúumɛku tɛt pɔ́ tsɛtú, ńjʉ́ɔ mbɑ mi pɔ́p shuŋnɛ nɛpɛm nɔ́p pɔ sɛ́, mbɑ pɛshʉ́ŋ.

⁷ Ŋ ɡɔ́ɔ ńzúꞋ yɛcɔ́ ŋɡi-ŋu fú tʉ́nɛ́pú ńcú mbɔ̌ mɔ ŋɡɔ: “Pyɛ̂, lɔ sɛ́, ńjẅí, ŋ́kwɛ́t!”»

⁸ N tsɔ́Ꞌ ŋɡɔ: «Ŋɡɑŋ mbɑ̌ɑ Tsɑpʉɔ! Yúu pʉ́ʉnɛ, kɛ pɔ yi lɔ́Ꞌ ɔɔ, ŋkɑɑ ntsu wɑ́ɑ jɛ́Ꞌ.

⁹ M bɛn ńzúꞋ ŋɡi ɛ̂yɑ́ nǔu mbɑ́ɑtɛ yɛ́pɑ́, cú ŋɡɔ: “Yúu lɑɑ ḿbɔ́ tɛ Sɛ́ cẅɛɛtɛ lɔ́Ꞌ nǔu kɔɔ pɛn ńji nji nǔu.”

¹⁰ Ŋ́ɡɛ pɔ pɔ́Ꞌɔ, tɛ ɛ́ pɔ́ ŋkɑ́ yɛ́tɑ́t. Yúu ɛ̂mɑ́ kɔ́Ꞌ ŋ́ɡʉ nɛ́ tʉ́nɛ́pú.

¹¹ Ɛ́ ɡɔ́ɔ ḿbɔ́ pɔ ŋkɑ́ yîyɑ́, pʉɔ pɛtɑ́t tɔ́ ndɑ́ zʉꞋ yí pɛk kɑ pɔ́nɛ zúꞋu. Mbɔ pɛ́ fú Sɛ́zɑlɛ̂ ńtúu wɔ́p mbɔ̌ mɔ.

¹² Zẅikŋɛ-Sɛ́ cú mbɔ̌ mɔ ŋɡɔ: Lɔ sɛ́ pʉʉ pɛ́pɔ́p ɡʉ, kɔɔ zɔŋ.» Pʉɔ pɛ́nɛ́túkú pɔnɛ pi n dɔknɛ wɔ́p ńtɔ́ zɑꞋnɛ lɑɑ, kɑ ɡʉ ńcɑklɛ wɑ́ɑ Sɛ́zɑlɛ̂. Pɛk pɛ́pɔ́p tɛmtɛ ŋ́kúu ndɑ́-Kɔ̂lnɛ́ɛ.

¹³ Kɔ̂lnɛ́ɛ pɛ́ɛtɛ ɛ́sẅíi wɛ́k ŋɡɔ: Jʉ́ lɑ́Ꞌnɛ ḿvukŋɛ ńjʉ́ɔ Cʉ̈ɔꞋ-Sɛ́ tʉ́ʉ mbi yɛ́, tsɛt ndɑ́ yɛ, ńcú mbɔ̌ wɛ́ ŋɡɔ, túu pʉɔ pɔ́p ɡʉ Jɔp, ńcú, wɛcɔ́ ŋu ẅi ɑ zúꞋu, pɛ́ fúŋ wɛ́ ŋɡɔ Símɔ̂ŋ, ḿbɛn ɛ́fúŋ wɛ́ ŋɡɔ Pyɛ̂ tɔ́.

¹⁴ A ɡʉ ńtɔ́ ɛ́sẅíi wú nɛ́ mɛnu mi Sɛ́ ɡʉ ńdɛɛ nǔu ŋ́ɡɛ pʉʉ njẅɛtndɑ́ yu luk.

¹⁵ N tɔ́, ŋ́ɡɔ́ɔ ŋ́kɛ́ ńzɛ nɛcú nu mbɔ̌ pɔ́p pɛ́ pʉɔ pinɛ ŋ ɡɔ ńtɔ́, pɔ́p pɔ́ ndɑ́, ḿbɛ́t ńcú nu mbɔ̌ pɔ́p cúnɛ, Zẅikŋɛ Lɛ́ɛnɛ́nɛ ńcúŋ ŋ́kúu nǔu pɔ́p ndʉ́ŋndʉŋ pɑ́Ꞌ ɛ́ kɑ kúunɛ nǔu pɛkŋɛ, nzɛnɛ lɑ́.

¹⁶ Ŋ ɡɔ́ɔ ŋ́kɛ́ kẅíitɛ sẅiŋɛ-Tsɑpʉɔ pɑ́Ꞌ ɑ kɑ cúnɛ ŋɡɔ: «Jɑ̂ŋ kɑ nuꞋ pʉɔ ŋki, lɑ́ ŋ́ɡʉ nǔu pʉʉ, mbɔ Sɛ́ ɡʉ ŋ́ɡɛ ńnuꞋ wʉ́ʉ mbɔ̌ Zẅikŋɛ Lɛ́ɛnɛ́nɛ.

¹⁷ Sɛ́ lɔk pɔ́Ꞌɔ, ŋ́ɡɑ́ yɔ́p yúu mi pɛkŋɛ kɑ zɑ́pnɛ tʉ́m nǔu Tsɑpʉɔ Yɛ́su Kɛlístɔ, ɑ ɡɑ́ mbɔ̌ pɛkŋɛ lɑ́. N zɛɛ ḿbɔ́ yɑ́ɑ pɔ wɔ̌, tɛ ḿbɔ́ yi mbɔ n tɔꞋ Sɛ́ nɛɡɛ yúu?»

¹⁸ Pɑpɛm Yɛ́su pi pɔ́p Pɑyúdɑ zúꞋ mɛnu mɔnɛ, ḿbɔ́tnɛ ńnɑ́ŋ, ḿbɛn ḿbɔ́ ŋ́ɡɑ́ pɑꞋlɑ́ mbɔ̌ Sɛ́ ńcú ŋɡɔ: «Ɛ́ pʉ̈ɔ́lɑ́ yi Sɛ́ kɑ ɡɑ́ shʉ́ mbɑ mbɔ̌ pʉɔ pi pɔ́p kɑ́ pɔ́ pɑyúdɑ pɔ́, nɛkúpmɛ mɑt, ɑ ɡɛ pɔ́p ɡẅɛɛ luk kɛ́mɛ.»

Nu-Kɛlístɔ kúu Antíyɔshɛ

¹⁹ Ɛ́ ɡɔ́ ḿbɔ́, mbɔ pɛ́ kɑ pɔ́ tɛ ńjẅí Ɛtiyɛ̂n pɑꞋnɛ, ńzɛ nɛtsɔ́Ꞌ ku pɑpɛ́m Yɛ́su kɛpɔŋ. Pɔ́p fú Yɛlúsɑlɛm ńcẅɛt sɑt zʉꞋ. Pɛcɔ́ pʉɔ lɔk yi pɑk-ŋɡɔŋ-Fɛnisîí. Pɛcɔ́ lɔk yi Shíipɛlɛ. Pɛcɔ́ lɔk yi tʉ́sɔŋ-Antíyɔshɛ, ŋ́kúu mbɑ ɡɔ́ lɑ́, ɛ́sẅíi nu-Sɛ́ pɔ ndɑꞋ mbɔ̌ pɑyúdɑ.

²⁰ Lɑ́, pɛcɔ́ ntɑ́Ꞌ-pɑpɛ́m Yɛ́su tsɛtsɛt pɔ́p pi pɔ́p ḿbɔ́nɛ pʉɔ-Silɛ̂nɛ, mbɑ pɛ́ Shíipɛlɛ, ɡʉ tɛ ŋ́kúu Antíyɔshɛ ɡúu, ɛ́sẅíi nu-Ŋkʉʉ Sʉ́Ꞌnɛ-Tsɑpʉɔ Yɛ́su mbɑ mbɔ̌ pʉɔ pinɛ pɔ́p kɑ́ pɔ́ pɑyúdɑ pɔ́.

²¹ Tsɑpʉɔ pɔ́ ńtɔ́ɔtɛ wɔ́p tɔ́ɔtɛnɛ, pʉɔ tɛ ńzɑ́ɑ pɔ́ ńzɑ́p tʉ́m nǔu Tsɑpʉɔ Yɛ́su, ḿbɔ́ ɛ́shɔtnɛ ńtsʉ́Ꞌ pʉɔ pɛ́.

²² Yɔ nu vu nɛtúutɛ-pʉɔ-cúꞋlɛ-Kɛlístɔ pi ɛ́ Yɛlúsɑlɛm. Pɔ́p tsɔ́Ꞌ Pɑnɛpɑ́ɑshi, ńtúu wɛ́ Antíyɔshɛ.

²³ A ɡʉ tɛ ŋ́kúu zúꞋu, ńjʉ́ɔ yɛ́ pɑ́Ꞌ Sɛ́ líŋɛ́nɛ pʉɔ pi pɔ́ zɑ́pnɛ tʉ́m nǔu wɛ́ pɔ́Ꞌɔ, nu pɔŋ wɛ́ tɛꞋ. A níꞋ mɛtʉʉ mɔ́p pɛ́tsʉʉ, ŋɡɔ pɔ́p kɛ ńjí pɔ ndɑꞋ Tsɑpʉɔ, ḿbɛn ńcʉŋɛ pɔ nǔu wɛ́.

²⁴ Pɑnɛpɑ́ɑshi ɛ̂wɑ́ zɛɛ ḿbɔ́ ŋu ŋ́ɡẅɛɛ tswɛ́ sʉ́Ꞌnɛ. Mbɔ Zẅikŋɛ Lɛ́ɛnɛ́nɛ kɑ jʉ́ mɔ́ wɛ́. A pɛn ńzɑ́p tʉ́m yɛ́ nǔu Tsɑpʉɔ tɛꞋ. Pʉɔ tɛ ńzɑ́ɑ fú lɛ́Ꞌ ɛ̂yɑ́, ńtsʉ́Ꞌ pʉɔ-Tsɑpʉɔ.

²⁵ Pɑnɛpɑ́ɑshi pɛn ŋ́ɡʉ tʉ́sɔŋ-Tɑ́lsɔ, nɛlɔɔ Sɔ̂l,

²⁶ ŋ́kúu zúꞋu, ńjʉ́ɔ wɛ́, ńdɔk wɛ́ ḿbɛn nɛ́ Antíyɔshɛ. Pɔ́p pɛ́pɑ́ ŋ́ɡɛ pɑpɛ́m Yɛ́su tɛmtɛ ńnɑ́ŋ Antíyɔshɛ nǔu tɑ́Ꞌ ŋɡuꞋlɑ́Ꞌ. Pɔ́p pɔ́ ńzíꞋ pʉɔ tɛ ńzɑ́ɑ nɛ́ yúu. Pɛ́ kɑ zɛ pɔ Antíyɔshɛ ɛ̂wɑ́ nɛfúŋ pɑpɛ́m Yɛ́su ŋɡɔ: «Pʉɔ-Kɛlístɔ.»

²⁷ Ɛ́ pɔ́ ŋkɑ́ yîyɑ́, pʉɔ fú lɛ́Ꞌ ɛ̂yɑ́, ɛ́fú Yɛlúsɑlɛm ńtɔ́ Antíyɔshɛ, ḿbɔ́ pʉɔ pi pɔ́p nɑ́ŋnɛ ńcẅi Ŋkʉʉ ẅí ɛ́ fúnɛ mbɔ̌ Sɛ́.

²⁸ Wɛcɔ́ tɑ́Ꞌ ŋu pɔ́ tsɛtsɛt pɔ́p, pɛ́ fúŋ wɛ́ ŋɡɔ Aɡɑbus. Zẅikŋɛ-Sɛ́ cú, ɑ zɑ́Ꞌ njí ńcú ŋɡɔ: «Wɛcɔ́ mɑ́mɑ́ cʉ́ ŋ́ɡɛ ḿvu ndǔ tsɛ́tsɑ́Ꞌ tsʉʉ». Ńcú pɔ́Ꞌɔ, ẅîwɑ́ cʉ́ kɑ tsúŋ ḿvu ŋkɑ́ yi Kɛlɔ̂dɛ tsʉ́Ꞌnɛ ḿbɔ́ Kɑ́sɑ ɡwɛ́-Pɑlɔ́mɑ.

²⁹ Aɡɑbus cú pɑ́Ꞌɑ, pʉɔ-Kɛlístɔ pɔ́ yɛcɔ́ lɛ́Ꞌ ńzɑ́p ŋɡɔ mbɑ wɔ̌ lɑ́ ɡɑ́ yɛ́ yúu mi ɑ kuꞋnɛ nǔu, pɛ́ túu, ńdɔk ńcẅɛ́lɛ́ pɔ́ɔpɛ́mɑ́ pi pɔ́p tswɛ́nɛ tsɛt pɑk-ŋɡɔŋ-Judɛ̂.

³⁰ Mbɑ wɔ̌ lɑ́ mɔɔtɛ pɑɑ yɛ́. Pɛ́ cúꞋlɛ ŋ́ɡɑ́ mbɔ̌ Pɑnɛpɑ́ɑshi pɔ́p Sɔ̂l. Pɔ́p lɔk ŋ́ɡʉ nɛɡɑ́ mbɔ̌ pɑcẅɛ́ɛ mbi tsɛt cúꞋlɛ-pʉɔ-Kɛlístɔ-Judɛ̂ ɛ̂wɑ́.