2 Pyɛ̂ 3 - Kɑɑ Fí

Tsɑpʉɔ ɡʉ ŋ́ɡɛ ńtɔ́

¹ Pɛsúu pɑ́ɑ pɛ́ tʉʉndɛn, mɔ pɑ́Ꞌɑ ńdɔk ŋ́ɡɑ́ ŋwɑꞋnɛ mbɔ̌ pʉʉ ŋkɑ́ yɛ́pɑ́. Ɛ́ tsɛt mɛŋwɑꞋnɛ ɛ̂mɑ́, m bɔ́ ńdɔɔ nɛkẅíitɛ wʉ́ʉ nɛ́ yúu mi pʉʉ kɑ zíꞋnɛ, ńdɔk pɔ́Ꞌɔ, ḿbʉ́Ꞌtɛ jínu yʉ́ʉ ŋɡɔ ɛ́ kwɑŋɛ nu ndʉ́ŋndʉŋ.

² Pʉʉ kẅíitɛ sẅiŋɛ yi pɑcẅiŋkʉʉ-Sɛ́ pɛ́ Lɛ́ɛnɛ́nɛ kɑ zɑ́Ꞌnɛ njí ńcú, mbɑ nɛpʉ́ʉ ni ɡɑŋntúu-Yɛ́su kɑ zíꞋnɛ wʉ́ʉ, ɛ́fú mbɔ̌ Tsɑpʉɔ ɑ pɔ́ ŋu ẅí ɑ ɡɛnɛ pɛkŋɛ luk.

³ Pʉʉ zɛɛ ḿbiitɛ ńjí ŋɡɔ, ɛ́ ŋ́ɡɛ ḿbɔ́ nǔu ndẅiknzʉʉ mɛlɛ́Ꞌlɑ́Ꞌ, pɛcɔ́ pʉɔ cẅɛt, ŋ́ɡɛ yɔ́p pɔ yúu mi mɛtʉʉ mɔ́p sɛ́ ńtsʉ́ʉnɛ wɔ́p ŋɡɔ pɔ́p ɡɛ. Pɔ́p ŋ́ɡɛ ŋ́ɡwɛ wʉ́ʉ,

⁴ ńcú ŋɡɔ: Yɛ́su ŋkɑɑ cú ŋɡɔ ɑ ɡʉ ńtɔ́ pɔ́ɔ? Tɛ ɑ pɔ ɡɔ́? Pɛtɑ́t pɛk kɑ lɑ́Ꞌ mɔ́ ḿpfútɛ, yɛcɔ́ yúu ŋ́kɛ́ mbɔɔ kúpmɛ, mbɑ kʉ̈ɔ́ lɑ́ kɛ́ ḿbɔ́ pɔ pɑ́Ꞌ ɛ́ kɑ pɔ́nɛ tɛ ɛ́fúnɛ pɑ́Ꞌ pɛ́ kɑ niitɛ́nɛ ndǔmbí.

⁵ Pɔ́p ɡɔ́ ńcú pɔ́Ꞌɔ, ḿbɔ́ ńdikŋɛ tɛ ńjí jínɛ ŋɡɔ Sɛ́ kɑ lɑ́Ꞌ ńniitɛ tʉ́nɛ́pú pɔ́p tsɛ́tsɑ́Ꞌ tɛ ntí sɑk. A kɑ lɔk pɔ sẅiŋɛ yɛ́ ŋ́ɡɛ, tsɛ́tsɑ́Ꞌ fú tsɛt ŋki ńcẅɛt, ɑ lɔk pɔ ŋki ńniitɛ.

⁶ A kɑ pɛn ńdɔk pɔ ŋki ẅí ɛ́ kɑ jʉ́nɛ tsɛ́tsɑ́Ꞌ ńdɔk ḿbík ŋɡɔŋ-ŋkɑ́mbi,

⁷ ŋ́ɡʉ nǔu nɛfɑŋ ŋkɔ̂ɔnɛ, mbɑ tsɛ́tsɑ́Ꞌ ŋkɔ̂ɔnɛ, mbɔ yîyɑ́ Sẅiŋɛ lẅɛꞋ wɔ́p lẅɛꞋnɛ ńdɔk ńzẅíꞋlɛ lɛ́Ꞌ yi Sɛ́ ɡʉ ŋ́ɡɛ ŋ́ŋɑk pɛɡɑŋmbuu pɛ́. Ɛ́ ɡʉ ńdɑ́Ꞌ ḿbɔ́ lɛ́Ꞌ ɛ̂yɑ́, múk ɡɛ tʉ́nɛ́pú pɔ́p tsɛ́tsɑ́Ꞌ tɛmtɛ ńdɑ́kŋɛ.

⁸ Lɑ́ pɛsúu pɑ́ɑ pɛ́ tʉʉndɛn, yɛcɔ́ tɑ́Ꞌ yúu ɡú yi ɛ́ kɑ́ pɔŋ ŋɡɔ pʉʉ likŋɛ pɔ́. Ɛ́ mbɔ̌ Tsɑpʉɔ tɑ́Ꞌ lɛ́Ꞌ pɔ́ pɑ́Ꞌ ŋɡuꞋ ntsɑ́Ꞌ, ŋɡuꞋ ntsɑ́Ꞌ pɔ́ pɑ́Ꞌ tɑ́Ꞌ lɛ́Ꞌ.

⁹ Tsɑpʉɔ ŋ́kɑɑ líi nɛɡɛ yúu mi ɑ kɑ kɑꞋnɛ nɛɡɛ pɑ́Ꞌ pɛcɔ́ pʉɔ sɛ́ ŋ́kwɑŋɛ pɔ́. A ɡẅɛɛ pɔ kɔkmbʉʉ mbíꞋ wʉ́ʉ, mbíꞋŋɡɔ ɑ kɑ́ pɔ́ ŋ́kɔŋ ŋɡɔ wɛcɔ́ tɑ́Ꞌ ŋu pɛ́ pɔ́, ɑ sɛ́ ŋ́kɔŋ pɔ ŋɡɔ pʉɔ pɛtsʉʉ ɡẅɛɛ shʉ́ nɛkúpmɛ mɑt.

¹⁰ Lɛ́Ꞌ lɑ́Ꞌ-Tsɑpʉɔ ɡʉ ńdɑ́Ꞌ ńtɔ́ pɔ pɑ́Ꞌ tsɔ́ŋ tɔ́nɛ lɑ́. Ɛ́ pɔ́ lɛ́Ꞌ ɛ̂yɑ́, nɛfɑŋ ɡɔ́ ḿmɛ, zʉꞋ zɔtnɛ tɛ pɛ́ pɔ́k. Yúu mi ɛ́ nɛfɑŋ puu ɛ́shí, tsɛ́tsɑ́Ꞌ pɔ́p yúu mi ɛ́ ndǔ puu mɛ.

¹¹ Pɑ́Ꞌ yúu ɛ̂pɑ́ ɡʉ ŋ́ɡɛ ḿmɛ lɑɑ, ɛ́ lɔk ɛ́sẅíi wʉ́ʉ nɛ́ ntɛ́ yi ɛ́ pɔ́ŋnɛ ŋɡɔ pʉʉ nɑ́ŋ pɔ́Ꞌɔ. Ɛ́ sɛ́ ḿbíkŋɛ ŋɡɔ pʉʉ nɑ́ŋ pɔ nǔu ntɛ́ yi Sɛ́ sɛ́ ŋ́kɔŋ, ńjí pɔ ndɑꞋ wɛ́,

¹² ḿbɔ́ ńzẅíꞋlɛ ŋɡɔ lɛ́Ꞌlɑ́Ꞌ-Sɛ́ tɔ́, ḿbɔ́ ɛ́sɑ́Ꞌ tʉʉ nɛpɔ́ yi ɑ ɡʉ fɛ́Ꞌnɛ ńtɔ́. Lɛ́Ꞌ yi múk ɡʉ ńdɑ́Ꞌ ńtɔɔ nɛfɑŋ ɛ́ kɛ́mɛ, zʉꞋ tɔɔnɛ, mbɑ kʉ̈ɔ́ lɑ́ yi ɛ́ nɛfɑŋ síi ńcʉ́ɔtɛ.

¹³ Lɑ́ Sɛ́ kɑ pʉ́ nɛfɑŋ fí, ḿbʉ́ tsɛ́tsɑ́Ꞌ fí, zʉꞋ yi pɛ́ ɡʉ ńdɑ́Ꞌ ḿbɔ́ zúꞋu ŋ́ɡɛ pɔ yúu mi ɛ́ ndʉ́ŋndʉŋ mbi yɛ́. Ɛ́ yúu mi pɛkŋɛ nɑ́ŋ ḿbɔ́ ńzẅíꞋlɛ.

¹⁴ Pɛsúu pɑ́ɑ pɛ́ tʉʉndɛn, ɛ́ yúu mi ɛ́ ɡɛnɛ, pʉʉ pɔ́ ńzẅíꞋlɛ yîyɑ́ lɛ́Ꞌlɑ́Ꞌ, ɛ́sɑ́Ꞌ tʉʉ ńnɑ́ŋ kɛ́ lɔ́Ꞌ. Pʉʉ pɔɔ ɡɛ yɛcɔ́ yúu mi Sɛ́ ɡʉ ŋ́kɑkŋɛ wʉ́ʉ nǔu pɔ́, pʉʉ pɛpɔ́p pɛn ḿbɔ́ kɛ́ cʉ́ɔk.

¹⁵ Tɑ́Ꞌ yúu mi ɛ́ pɛn ḿbɔ́ ḿbíkŋɛ ŋɡɔ pʉʉ kẅíitɛ ɛ́ pɔ́ pɔ ŋɡɔ, Tsɑpʉɔ pɔ́tnɛ ńzẅíꞋlɛ, ɑ kɑ́ pɔ́ fɛ́Ꞌnɛ ńtɔ́ pɔ́, nɛɡɑ́ shʉ́ pɑ́Ꞌ ḿbɔ́ pʉɔ luk. Ɛ́ pɛn ḿbɔ́ pɔ yúu mi Pɔ̂l, mɔ́ɔmɑ́ wɛkŋɛ, ḿbɔ́ súu wɛkŋɛ kɑ cúnɛ tsɛt mɛŋwɑꞋnɛ mi ɑ kɑ ɡɑ́nɛ mbɔ̌ pʉʉ. A kɑ lɔk pɔ jínu nu yi Sɛ́ kɑ ɡɑ́nɛ mbɔ̌ wɛ́ lɑ ńdɔk ńcú.

¹⁶ A cú yîyɑ́ nu tsɛt mɛŋwɑꞋnɛ mi ɑ ŋwɑꞋnɛnɛ tsʉʉ, ŋkɑ́ yi ɑ cúnɛ nu tɛ ŋ́kẅíi yɔ tú-nu. MɛzʉꞋ mi ɛ́ tɛn nɛzúꞋ ɛ́ tsɛt mɛŋwɑꞋnɛ mɛ́. Ɛ́ yúu mi ɛ́ ɡɛnɛ pʉɔ pi pɔ́p mɔɔtɛ mɔɔtɛ́nɛ, ḿbɛ́t kɛ́ tsuŋ ńjí zʉꞋ yi pɔ́p tʉ́ʉnɛ zúꞋu kúpmɛ nu yi ɛ́ lɔknɛ ńcú. Ɛ́ pɛn ḿbɔ́ pɔ pɑ́Ꞌ pɔ́p ɡɛnɛ nǔu mɛcɔ́ mɛzʉꞋ-ŋwɑꞋnɛ-Sɛ́. Pɔ́p kɛ́ ŋ́ɡɛ pɔ́Ꞌɔ, ńdɔk ɛ́fúŋ ndɔɔ ńníꞋ tú pɔ́p.

¹⁷ Pɛsúu pɑ́ɑ pɛ́ tʉʉndɛn, ɛ́ ɡʉ nǔu pʉʉ, mbɔ mɔ ńzɑ́Ꞌ njí ɛ́sẅíi wʉ́ʉ. Pʉʉ kɛ́ ńdɑk tú yʉ́ʉ, ḿbɔ́k pɑkɛ́kɔ́sʉ́ʉ nɛfúklɛ wʉ́ʉ pʉʉ fɑɑnɛ sɛ̂ndúŋ, ńzɛ nɛmʉ́Ꞌlɛ nǔu yúu mi tʉ́m yʉ́ʉ kɑ zɛɛnɛ ńtʉ́ʉ nǔu tɛ ńtʉ́ʉ.

¹⁸ Pʉʉ lɔk pɔ pɑ́Ꞌ pʉʉ sɛ́ ńjí Yɛ́su Kɛlístɔ, Tsɑpʉɔ wɛkŋɛ, ḿbɔ́ ŋu ẅí ɑ ɡɛnɛ pɛkŋɛ luk, ńdɔk ŋ́ɡʉ nɛ́ mbi, ńjí ŋɡɔ ɑ ɡʉ kẅiꞋ ŋ́ɡɑ́ fuꞋ yʉ́ʉ, ɛ́ pɔ́ mbɔ̌ pʉʉ. NɛɡúꞋ pɔ́ mbɔ̌ wɛ́ tɛ ɛ́fú ŋkɔ̂ɔnɛ, ɛ́ ńdɑ́Ꞌ ḿbɔ́ pɔ pɔ́Ꞌɔ! Ɛ́ pɔ́Ꞌɔ.