2 Kɔlɛ̂ŋtɛ 13 - Kɑɑ Fí

Pɔ̂l sɛ́ ńtík pʉɔ ḿbɛn ḿbɔ́ ńcɛꞋlɛ wɔ́p

¹ Mɔ ńtɔ́ njɛ́Ꞌ pʉʉ ŋkɔ̂ɔnɛ ɛ́ lɔk ḿbɔ́ ŋkɑ́ yɛ́tɑ́t, ńtɔ́ pɛ́ ɡɔ́ ŋ́ŋɑk mbɑ yɛ́tɛ́ ntsɑŋ lɑ́, ńzẅíꞋlɛ nu ntsu-pʉɔ pɛ́pɑ́ kɛ pʉɔ pɛtɑ́t ɔɔ pɑ́Ꞌ ŋwɑꞋnɛ-Sɛ́ sɛ́ ńcú.

² Mɔ zɑ́Ꞌnɛ njí ŋkɔ̂ɔnɛ, ḿbɛn ńcú nu mbɔ̌ pʉɔ pi pɔ́p kɑ ɡɔ́ ḿbɔ́ mɛcɔ́ mɛku, mbɔ pɔ́p ɡɛ mɛnu kɛpɔŋ mbɑ mbɔ̌ pʉɔ tsʉʉ. Ɛ́ nǔu lɔ́Ꞌnɛ, ŋ kɑ́ pɔ́ tsɛtsɛt pʉʉ pɔ́, lɑ́ mɔ ŋ́kẅíitɛ wʉ́ʉ nɛ́ nu yi ŋ kɑ cúnɛ mbɔ̌ pʉʉ ŋkɑ́ yi ŋ kɑ tɔ́nɛ lɑ́Ꞌ pʉʉ nǔu mbɑ́ɑtɛ yɛ́pɑ́. Ŋ kɑ cú ŋɡɔ ŋ ɡʉ ŋ́ɡɛ ńtɔ́, ńníꞋ ntsɑŋ tú-pʉɔ tsʉʉ pi pɔ́p fɑɑnɛ́nɛ nu.

³ Pɑ́Ꞌ pʉʉ kɛ́ ḿbɔ́ ńdɔɔ nɛjʉ́ɔ yúu mi ɛ́ nyɛtnɛ ŋɡɔ nu yí ɛ́ cẅɛtnɛ ntsu mɔ ɛ́ fú mbɔ̌ Kɛlístɔ lɑ́, pʉʉ ɡʉ ŋ́kɛ́ ŋ́ɡɛ ńjʉ́ɔ. Pʉʉ jí ŋɡɔ Kɛlístɔ kɑ́ pɔ́ ńzɔɔtɛ wʉ́ʉ pɔ́. A sɛ́ ńnyɛt mɛtʉʉ mɛ́ tsɛtsɛt pʉʉ.

⁴ Ɛ́ nɛ́nẅín ŋɡɔ ɑ kɑ pɔ́ yɛcɔ́ ŋkɑ́, ḿbɔ́t pɑ́Ꞌ ŋumɛsɔŋ, pɛ́ kẅii wɛ́ nǔu tʉ́ mbɑ́ŋtɛ pɑ́ŋtɛ́nɛ. Lɑ́ ɑ kɛ́ ḿbɔ́ ŋkɔ̂ɔnɛ ḿbɔ́ ntʉʉ, ɛ́ pɔ́ mɛtʉʉ-Sɛ́. Pɛk yɛ́k, pɛk fú nǔu pɑ́Ꞌ pɛk lɑtnɛ mbʉʉ nǔu wɛ́, ḿbɔ́t pɑ́Ꞌ ɑ kɑ pɔ́nɛ. Lɑ́ ŋ́kɛ́ ŋ́ɡɛ ńdɔk yɛk ntɛ́ nɛɡẅɛɛ wʉ́ʉ, ńnyɛt wʉ́ʉ ŋɡɔ pɛkŋɛ pɛ́ Kɛlístɔ ntʉʉ, ɛ́ pɔ́ mɛtʉʉ-Sɛ́.

⁵ Pʉʉ nɛ́ tú yʉ́ʉ pʉʉ líŋɛ́nɛ mbʉʉ yʉ́ʉ ńjʉ́ɔ. Kɛ pʉʉ sɛ́ ńnɛn ndʉ́ŋndʉŋ nǔu nu-Kɛlístɔ yi pʉʉ kɑ pɛ́mnɛ ɔɔ. Pʉʉ niitɛ ńtsɑꞋ. Pʉʉ kɑ́ pɔ́ ńjʉ́ɔ ŋɡɔ Kɛlístɔ tsɛt tʉ́m pʉʉ pɔ́ ɔɔ? Ɛ́ pɔ́ pɛ́Ꞌnɛ ḿbɔɔ pɔ́Ꞌɔ pɔ́, mbɔ ɛ́ lɔk ḿbɔ́ ŋɡɔ pʉʉ kɑ́ pɔ́ pʉɔ-Kɛlístɔ pɔ́.

⁶ Ŋ kwɑŋɛ ŋɡɔ pʉʉ ɡʉ ḿbɛ́m ŋɡɔ ɛ́ ɡʉ nǔu pɛk, mbɔ pɛk kɑ kɛ́ ńnyɛt kwɑꞋ sʉ́Ꞌnɛ ŋɡɔ pɛk ɡɑŋntúu-Kɛlístɔ.

⁷ Pɛk sɛ́ ḿbúꞋ mbɔ́ mbɔ̌ Sɛ́ ŋɡɔ ɑ cẅɛ́lɛ́ wʉ́ʉ tɛ pʉʉ pɔɔ ɡɛ sɑ̌ɑ nu kɛpɔŋ pɔ́. Ŋ kɑ́ pɔ́ ńdɔk ńdɔɔ pɔ́Ꞌɔ, pɔ nɛɡɛ lɑ́ pʉʉ jʉ́ɔ ŋɡɔ pɛk ɡɑŋntúu-Yɛ́su Kɛlístɔ pɔ́. Pɛk tsɑ́ɑ pɔ ndɑꞋ ŋɡɔ pʉʉ ɡɛ nu sʉ́Ꞌnɛ tɛ mbɑ pɑ́Ꞌ fɑꞋ yɛ́k ɡʉ ḿbɔ́ pɔ pɑꞋ fɑꞋ yi pɛ́ ɡwɑ́k ɡwɑ́knɛ.

⁸ Pɛk zɛɛ ŋ́ɡẅɛɛ yɛ́k pɔ nɛfúŋ nu yi ɛ́ nɛ́nẅín, pɛk kɑ́ ɡẅɛɛ nɛtɑ́ktɛ nu yi ɛ́ nɛ́nẅín pɔ́.

⁹ Pʉʉ lɑɑ ḿbɔ́ nǔu sɛ̂ndúŋ-Sɛ́, ḿbɔ́ pɛntʉʉ-pʉɔ, pɛk pɔ́ yɛ́k nǔu, ḿbɔ́ pɔ pɛpɔ́t pʉɔ, mbɔ nu ɡʉ ḿbɔŋ wɛ́k pɔŋnɛ. Ɛ́ yúu mi ɛ́ ɡɛnɛ pɛk pɔ́ tɛ ḿbɔ́ ńcɛꞋlɛ Sɛ́, ńdɔ́ɔ ŋɡɔ ɑ ɡɛ pʉʉ ńnɛn pɔ nǔu sɛ̂ndúŋ wɛ́ tɛ ńdẅiklɛ.

¹⁰ Yúu mi ɛ́ ɡɛnɛ, m bɛ́t pɔ ŋɡɑ sɛsɑ ŋ́ŋwɑꞋnɛ yɔ nu tsʉʉ, ḿbɔ́ ńtsɑ́ɑ ŋɡɔ ŋ kɛ́ ɡɛ ńtɔ́ tɛ kúu tsɛtsɛt pʉʉ ńdɔk pɑ́Ꞌ Tsɑpʉɔ kɑ tíknɛ wɑ́ɑ mbi pʉʉ, ńcʉ̈ɔ́k wʉ́ʉ cʉ́ɔknɛ pɔ́. Tsɑpʉɔ kɑ tík wɑ́ɑ mbi pʉʉ pɔ nɛɡɛ cúꞋlɛ kẅiꞋ ŋ́ɡʉ nɛ́ mbi. A ŋkɑɑ tík wɑ́ɑ ŋɡɔ n tɑ́k tɑ́knɛ pɔ́.

¹¹ Ɛ́ nǔu ŋkɔ̂ɔnɛ pɔ́ɔpɛ́mɑ́ pɑ́ɑ, pʉʉ ńnɑ́ŋ nɛ́ tsɑ́ɑtɛ. Pʉʉ pɔ́ ńdɔɔ shʉ́ pɑ́Ꞌ yɛcɔ́ lɔ́Ꞌ kɛ́ ɡɛ ḿbɔ́ tsɛtsɛt pʉʉ pɔ́. Pʉʉ pɔ́ ńní mɛtʉʉ-mɛmbʉʉ mʉ́ʉ. Pʉʉ sɛ́ ŋ́ɡẅɛɛ tɑ́Ꞌ ntsu, ńnɑ́ŋ nɛ́ mbɔ́tnɛ, ɛ́ lɛɛ pɔ́Ꞌɔ, Sɛ́, jʉ́ ẅi ɑ ɡẅɛɛnɛ ŋkɔŋɛ pɔ́p mbɔ́tnɛ pɔ́ tsɛtsɛt pʉʉ.

¹² Ŋu wʉʉ cɛꞋlɛ mɔ́ɔmɑ́ wɛ, ŋu cɛꞋlɛ mɔ́ɔmɑ́ wɛ, ńtsʉ́Ꞌ nɛcɛꞋlɛ ńniitɛ mɛmbʉʉ mʉ́ʉ nǔu ntɛ́ yɛ́ pʉɔ-Sɛ́. MɛcúꞋlɛ-pʉɔ-Sɛ́ tsʉʉ tɛmtɛ ńcɛꞋlɛ wʉ́ʉ.

¹³ Tsɑpʉɔ Yɛ́su Kɛlístɔ pɔ́ ḿbɔ́ nɛ́ pʉʉ pɛtsʉʉ, ŋkɔŋɛ-Sɛ́ mbɑ Zẅikŋɛ Lɛ́ɛnɛ́nɛ yi ɛ́ tɛ́mtɛ́nɛ wɛkŋɛ pɔ́ ḿbɔ́ tsɛtsɛt pʉʉ pɛtsʉʉ.