2 Kɔlɛ̂ŋtɛ 11 - Kɑɑ Fí

Pɔ̂l sɛ́ ḿbʉ̈ɔt nu mbɔ̌ ɡɑŋntúu-Kɛlístɔ pi pɔ́p pɔ́ pɔ pɛɡwɑtŋkúu

¹ Ŋ kwɑŋɛ ŋɡɔ n dɑɑ ńcú yɑ́ɑ nu mbɔ̌ pʉʉ pɑ́Ꞌ ŋu ẅí ɑ pɑ́lɛ́ lɑ́, mbɔ pʉʉ ɡʉ ḿbɛ́m, pʉʉ kɛ́ ńzẅíꞋlɛ n cú nu nǔu yîyɑ́ ntɛ́.

² Pʉʉ jí ŋɡɔ ŋ kɔŋ wʉ́ʉ tɛ ŋ kɑ́ pɛ́m ŋɡɔ ŋu ɡɔ́ ŋ́ɡɛ yúu nǔu pʉʉ m bɔ́ ńjʉ́ɔ pɔ́. Yîyɑ́ ntɛ́ ŋkɔŋɛ yi ŋ ɡẅɛɛnɛ nzʉʉ pʉʉ fú pɔ mbɔ̌ Sɛ́, mbíꞋŋɡɔ pʉʉ mbɔ̌ mɔ, ḿbɔ́ pɑ́Ꞌ mɔ́ɔ mɑŋɡɛ́ ẅi ŋ kɑ pʉ́nɛ mbɔ̌ tɑ́Ꞌ ŋu wɛ́mɔ́Ꞌ, ŋɡɑŋ pɔ́ Kɛlístɔ. Mɔ sɛ́ ńdɛꞋlɛ wʉ́ʉ mbɔ̌ wɛ́ ŋɡɔ pʉʉ pɑ́Ꞌ mɔ́ɔŋɡɔɔ ẅi ɑ kɑ́ tíi yɛcɔ́ lɔ́Ꞌ pɔ́.

³ Lɑ́ ŋ kɑ pɔ́k pɔ ŋɡɔ, ɛ́ lɑɑ ḿbɔ́ wɛcɔ́ ŋu pʉ́ʉpɛ tú yʉ́ʉ pɑ́Ꞌ nɔ́ kɑ lɔknɛ mɛzúŋ ɛ́fúklɛ Ɛ́fɑ, pʉʉ pɔɔ pɛn ḿbɔ́ pʉɔ pi pɔ́p ɡɔ́ ńcú ŋɡɔ pɔ́p jí yɔ́p pɔ ndɑꞋ nu-Kɛlístɔ ńcú ɛ́sẅíi nu pɔ́.

⁴ N cú pɑ́Ꞌɑ mbíꞋŋɡɔ mɔ sɛ́ ńjʉ́ɔ ŋɡɔ ŋu pɔ́ tɛ ńtɔ́, ɛ́sẅíi wʉ́ʉ nɛ́ nu nǔu wɛcɔ́ Yɛ́su, ɑ kɛ́ mbɔɔ ẅi pɛk kɑ cúnɛ nu nǔu wɛ́ pɔ́, pʉʉ ɡɔ́ɔ ḿbɛ́m, ḿbɛn ḿbɔ́ ńjʉ́ɔ, ŋu tɔ́ ńcú nu ndɛꞋ nǔu Zẅikŋɛ Lɛ́ɛnɛ́nɛ, kɛ pɔ nǔu Ŋkʉʉ Sʉ́Ꞌnɛ ɔɔ, ɛ́ pɔɔ ḿbuutɛ nǔu mɛnu mi pʉʉ kɑ piitɛnɛ ḿbɛ́m pɔ́, pʉʉ pɛ́m pɛ́mnɛ.

⁵ Lɑ́ mɔ sɛ́ ŋ́kwɑŋɛ yɑ́ɑ ŋɡɔ pʉɔ pi pʉʉ jʉ́ɔnɛ ŋɡɔ pɔ́p pɔ pɛmɑ́ ɡɑŋntúu-Yɛ́su lɑ́, pɔ́p kɑ́ lɛɛ wɑ́ɑ nǔu yɛcɔ́ yúu pɔ́.

⁶ Líkcɔ́ ɛ́ nɛ́nẅín ŋɡɔ ḿmʉꞋ mʉꞋnɛ lɑ́, ŋ́ɡʉ nǔu nɛjí nu-Sɛ́, yɛcɔ́ lɔ́Ꞌ kɑ́ cẅɛt. Pɛk kɑ nyɛt mɔ́ yîyɑ́ luk mbɔ̌ pʉʉ nǔu mɛntɛ́ tɛ ńzɑ́ɑ, ŋɡɔŋ ŋkɑ́ tsʉʉ yi ɛ́ kɑ ɡɑ́nɛ shʉ́.

⁷ Ŋ kɑ ɡɔ́ ńcẅi Ŋkʉʉ Sʉ́Ꞌnɛ-Sɛ́ mbɔ̌ pʉʉ, ńcẅi pɔ níinɛ. Ŋ́kɔk mbʉʉ yɑɑ ŋ́ɡɑ́ sɛ́, nɛlɔk ŋ́kɑꞋ pɔ́ yʉ́ʉ ŋ́ɡɑ́ tʉ́ pɛ́Ꞌnɛ ɛ́ lɔk ḿbɔ́ pɔ yɛcɔ́ lɔ́Ꞌ kɛkʉ̈ɔ́?

⁸ Ŋ kɑ pɔ́ ɛ́fɑꞋ lɑ́Ꞌ pʉʉ, ḿbɛ́m mɛcɔ́ mɛcúꞋlɛ-pʉɔ-Kɛlístɔ pɔ́ ŋ́ɡɑ́ ŋkɑ́p mbɔ̌ mɔ, ńdɔk ńtɔ́ɔtɛ wɑ́ɑ tɛ ḿbɔ́ pɛ́ cú ŋɡɔ ŋ kɑ ɡɛ pɔ́p púŋ.

⁹ Ŋ kɑ pɔ́ lɑ́Ꞌ pʉʉ, ɛ́ pɔ́ ŋkɑ́ n jɑ́knɛ yúu, m bɔɔ cẅɛ́ɛ yúu mbɔ̌ wɛcɔ́ ŋu wʉ́ʉ pɔ́. Pɔ́ɔpɛ́mɑ́ pi pɔ́p kɑ fúnɛ Mɑsɛndwɑn kɑ ɡɑ́ kʉ̈ɔ́ lɑ́ yi ɛ́ kɑ pɔ́ ńjɑ́k mbɔ̌ mɔ. Ɛ́ kɑ ɡʉ nǔu kʉ̈ɔ́ lɑ́, m bɔɔ pɛ́m nɛpɔ́ piꞋ mbɔ̌ wɛcɔ́ ŋu wʉ́ʉ pɔ́, ŋ́kɛ́ mbɔɔ lɑ́Ꞌ yɛcɔ́ lɛ́Ꞌ lɑ ḿbɔ́ piꞋ mbɔ̌ wɛcɔ́ ŋu wʉ́ʉ pɔ́.

¹⁰ Mɔ ɛ́fú nǔu nu nɛ́nẅín-Kɛlístɔ yi ɛ́ tsɛt tʉ́m mɔ, ńcú mbɔ̌ pʉʉ ŋɡɔ, n dɑɑ ŋ́ɡʉ pɔ ɡɔ́ tsɛt Akɑ̂y, m bɔɔ mɛꞋ yîyɑ́ luk yi n dɔknɛ ŋ́kɑꞋmɛ pɔ́. M bɔɔ lɑ́Ꞌ yɛcɔ́ lɛ́Ꞌ ńcẅɛ́ɛ yúu mbɔ̌ ŋu wʉʉ pɔ́.

¹¹ N cú pɔ́Ꞌɔ, mɛlɑ́Ꞌ kʉ̈ɔ́? MbíꞋŋɡɔ ŋ kɑ́ kɔŋ wʉ́ʉ pɔ́ kɛkʉ̈ɔ́? Ŋɡɑ́ŋ, Sɛ́ sɛ́ ńjí ŋɡɔ ŋ kɔŋ wʉ́ʉ.

¹² Ɛ́ yúu mi mɔ sɛ́ ŋ́ɡɛ, ŋ ɡʉ ḿbɛn ŋ́kẅiꞋ ŋ́ɡɛ pɔ pɔ́Ꞌɔ, ńdɔk ŋ́ɡʉ nɛ́ mbi, ńjí ŋɡɔ ŋ ɡʉ ńdɔk ńzɑ́Ꞌ mɛku-pʉɔ pi pɔ́p sɛ́ ńdɔɔ mbɛ̌tntɑ́ŋ nɛlɔk ŋ́kɑꞋmɛ ńcú ŋɡɔ pɛkŋɛ pɛ́pɔ́p fɑꞋ pɔ tɑ́Ꞌ ntɛ́.

¹³ Pʉɔ ɛ̂pɑ́ kɑ́ pɔ́ kwɑꞋ ɡɑŋntúu-Kɛlístɔ pɔ́, pɔ́p cɔtnu ŋɡɔ pɔ́p fɑꞋ fɑꞋ-Kɛlístɔ. Mbɔ pɔ́p kɑ ɡɛmɔ́ tɛ ḿbɔ́ yi pɛ́ lɑɑ ńjʉ́ɔ wɔ́p pɛ́ cú ŋɡɔ pɔ́p ɡɑŋntúu-Yɛ́su.

¹⁴ Ɛ́ kɑ́ pɔ́ pɔ́Ꞌɔ, ḿbɔ́ pɔ yɛcɔ́ nu mɑ̌ɑmɑɑnɛ pɔ́, mbíꞋŋɡɔ Sɑ́ttɑ pɛn ńnɑ́ŋ yɛ́ tɛ ɛ́shɔtnɛ ńtsʉ́Ꞌ ḿbɔ́ pɔ pɑ́Ꞌ Cʉ̈ɔꞋ-Sɛ́ ẅi ɑ fúnɛ zʉꞋ yi kyɛꞌ zúꞋu lɑ́.

¹⁵ Pʉʉ lɔk ńjʉ́ɔ ŋɡɔ, ɛ́ kɑ́ tɛn mbɔ̌ pɑfɑꞋ fɑꞋ-Sɑ́ttɑ nɛshɔtnɛ tɛ pɛ́ tsʉ́Ꞌ ńjʉ́ɔ wɔ́p ńcú pɔ ŋɡɔ pɔ́p pɑfɑꞋ fɑꞋ-Sɛ́ pɔ́. Lɑ́ ɛ́ ɡʉ ŋ́kɛ́ ńdɑ́Ꞌ tsʉ́Ꞌ nɛlẅiklɛ, pɔ́p cẅɛ́ɛ tsɔ́ꞋfɑꞋ ɛ́ pɔ́ pɔ pɑ́Ꞌ mɛfɑꞋ mɔ́p pɔ́nɛ.

Ŋɡʉ̈ɔ́Ꞌ yi Pɔ̂l jʉ́ɔnɛ fú nǔu pɑ́Ꞌ ɑ ŋɡɑŋntúu-Yɛ́su

¹⁶ Tsʉ́Ꞌnɛ m bɛn ɛ́sẅíi wʉ́ʉ, ḿbɑ́ɑ ŋu wʉʉ nɛkwɑŋɛ ŋɡɔ mɔ pɑ́lɛ́, ŋ́kɔŋ pʉʉ kwɑŋɛ, ḿbɛ́m ŋɡɔ ŋ ɡɛ pɑ́Ꞌ pɑ́lɛ́ lɑ́, mbíꞋ pɔ́Ꞌɔ ńnɑ́Ꞌ ŋ́kɑꞋmɛ mɔ́zʉꞋ.

¹⁷ Pɑ́Ꞌ ɛ́ pɔ́ mɔ́ ŋɡɔ ŋ kɑꞋmɛ lɑ́, yúu mi ŋ ɡʉnɛ cú ŋkɔ̂ɔnɛ, ŋ kɑ́ pɔ́ ŋ́ɡʉ ńcú nǔu ntɛ́ yi Tsɑpʉɔ kɔŋnɛ pɔ́. Ŋ ɡʉ ńcú pɔ pɑ́Ꞌ ŋkɑ́ yi n tsuŋ ḿbɑ́ lɑ́.

¹⁸ Pʉɔ tɛ ńzɑ́ɑ sɛ́ ńdɔk pɔ yúu mi ɛ́ pɔ́ pɔ yɛ pʉɔmɛsɔŋ ŋ́kɑꞋmɛ, pɔ́Ꞌɔ lɑ́, ŋ ɡʉ kɑꞋmɛ yɑ́ɑ.

¹⁹ Pʉʉ sɛ́ ŋ́kwɑŋɛ ŋɡɔ jínu yʉ́ʉ ɡú, lɑ́ pʉʉ pɛ́mnɛ lɑ́ nu pɛpɑ́lɛ́!

²⁰ Pʉɔ sɛ́ ńdɔk wʉ́ʉ ŋ́ɡɛ pɛkwɑɑ pɔ́p, pʉʉ ɛ́fɑꞋ pɔ́p jʉ́, pɔ́p sɛ́ ńjɔ yúu pʉ́ʉ, ḿbɔ́ ńnɔt wʉ́ʉ, ńtɔ́ pɔ́ nɛɡʉ̈ɔꞋ pʉʉ, pʉʉ pɛ́m pɛ́mnɛ.

²¹ Sʉ́ʉ tsuŋ ḿbɔ́ ŋ́kɔ́ wɑ́ɑ pɑ́Ꞌ mɔ ŋkɑɑ ɡẅɛɛ sʉk tʉ́m nɛnyɛt wʉ́ʉ nɛ́ nu pɑ́Ꞌ pɔ́p pɔ́. Lɑ́, ŋu lɑɑ ńnɑ́Ꞌ ɛ́fʉꞋ fʉꞋnɛ ńdɔk yɛcɔ́ yúu ŋ́kɑꞋmɛ, mbɔ ŋ ɡʉ kɑꞋmɛ ńdɛɛ wɛ́, ńcú nu pɑ́Ꞌ pɑ́lɛ́ lɑ́.

²² Pɔ́p lɔk pɔ pɑ́Ꞌ pɔ́p pʉɔ-Hɛbɛlʉʉ ŋ́kɑꞋmɛ kɛkʉ̈ɔ́? Mbɑ mɔ yɑ́ɑ mɔ pɔ wɛcɔ́. Kɛ pɔ pɑ́Ꞌ pɔ́p pʉɔ-Íslɑyɛ̂l? Mbɔ n tʉ́ʉ pɑ́Ꞌɑ ḿbɔ́ pɔ wɛcɔ́. Kɛ pɔ pɑ́Ꞌ pɔ́p pʉɔ nǔu njẅɛt-Ábɛlɛhɑ̂m? Mbɑ mɔ yɑ́ɑ m bɔ́ pɔ wɛcɔ́.

²³ Kɛ pɔ pɑ́Ꞌ pɔ́p pɑfɑꞋ fɑꞋ-Kɛlístɔ? M bɔ́ ńcú nu kwɑꞋ pɑ́Ꞌ pɑ́lɛ́ lɑ́, ńcú ŋɡɔ mɔ ŋu ẅi ɛ fɑꞋnɛ fɑꞋ-Kɛlístɔ tɛ ńdɛɛ wɔ́p pɛ́tsʉʉ, ńcú pɔ́Ꞌɔ, ɛ́fú nǔu pɑ́Ꞌ ŋ kɑ kíɛ ziꞋnɛ ńdɛɛ wɔ́p, ɛ́fú nǔu ndɛn ẅi ŋ kɑ kúunɛ tsɑ́ŋ ńdɛɛ wɔ́p, ɛ́fú nǔu ndɛn ẅí pɛ́ kɑ tswɑ́ɑnɛ wɑ́ɑ ńdɛɛ wɔ́p, ɛ́fú nǔu ndɛn mɛŋkɑ́ tɛ ńzɑ́ɑ mi nɛvú kɑ nʉknɛ wɑ́ɑ ńdɛɛ wɔ́p,

²⁴ ɛ́ ŋkɑ́ yɛ́tɑɑ pɑ́Ꞌ pɑyúdɑ kɑ tswɑ́ɑnɛ wɑ́ɑ ŋɡwɑɑ ntsɔ̌pɛ́nɛ́pfuꞋú nɛ́ mɛɡɛ́mɛ́ntɑ́t,

²⁵ ɛ́ ŋkɑ́ yɛ́tɑ́t pɑ́Ꞌ Pɑlɔ́mɑ kɑ lɔknɛ kɛm-yúu ńtswɑ́ɑ wɑ́ɑ, pɛ́ kɑ lɔk mɛŋɡɔꞋ ńtɛ́mtɛ wɑ́ɑ tɑ́Ꞌ ŋkɑ́, ńdɔɔ nɛjẅí wɑ́ɑ, ɛ́ ŋkɑ́ yɛ́tɑ́t pɑ́Ꞌ ɛ́ kɑ tsʉ́Ꞌnɛ mɔ́zʉꞋ, sɛtímɑ lɔk wɑ́ɑ ɛ́fʉ̈ɔ́t ŋki. Ŋ kɑ lɛ́ ndǔ ŋki tɛ ḿbɛn ńjúk.

²⁶ Ŋ kɑ ńnɛn tɛꞋ, nɛvú ńnʉk wɑ́ɑ tɛꞋ, ńjúk ńjʉ́ɔ ŋɡʉ̈ɔ́Ꞌ mɛŋki mi ɛ́ kɔ́Ꞌnɛ tɛ ɛ́sɑt zʉꞋ, ńjúk ḿvu nu mbɔ̌ pɛsɛmntsu, ńjúk ḿvu nu mbɔ̌ pɔ́ɔpɛ́mɑ́ pɑ́ɑ pɑyúdɑ, ńjúk ḿvu nu mbɔ̌ pʉɔ pi pɔ́p kɑ́ pɔ́ pɑyúdɑ pɔ́, ńjúk ŋ́kúu nu tsɛt mɛtʉ́sɔŋ, ńjúk ŋ́kúu nu kɔ̂ŋtɛt, ńjúk ŋ́kúu nu tsɛt ŋki kɛ́ nɛpɑt, ńjúk ŋ́kúu nu mbɔ̌ pʉɔ pi pɔ́p cɔtnɛ nu ŋɡɔ pɔ́p pʉɔ-Kɛlístɔ,

²⁷ ńjúk ɛ́fɑꞋ mɛfɑꞋ mi ɛ́ tɛnnɛ tɛ ńzúꞋ ŋ́kɑ́ɑ tɛꞋ, ńjúk ńdɛ́ kɛ́ lɛ́. Nji júk ńzɑ́ŋ wɑ́ɑ, ɡɑ́k yɑ́ɑ júk ɛ́shí, ḿbɔ́ yɛcɔ́ ŋkɑ́, yúu pɛjʉ́ ḿmɛ mbɔ̌ mɔ, fɑ́k ɡɔ́ ŋ́kɔ́ wɑ́ɑ, mbɔ n jɑ́k ndẅí.

²⁸ Ŋ kɑ́ tʉ́ʉ tsʉʉ pɔ́, ɛ́ lɛ́Ꞌ tsʉʉ ḿbɔ́ ɛ́sɑ́ŋ nu nǔu mɛcúꞋlɛ-pʉɔ-Kɛlístɔ mi ɛ́ zʉꞋ tsʉʉ,

²⁹ ḿbɔ́ yi ŋu-Kɛlístɔ lɑɑ ḿbɔ́t n zúꞋ ɛ́ pɔ́ pɔ pɑ́Ꞌ ŋkɑ́ yi m bɔ́t yɑ́ɑ lɑ́, ḿbɔ́ yi ŋu-Kɛlístɔ lɑɑ ŋ́ɡɛ nu kɛpɔŋ, ɛ́ ɡɑ́ɑnɛ wɑ́ɑ tɛꞋ.

³⁰ Ɛ́ pɔ́ pɛ́Ꞌnɛ ḿbɔ́ ḿbíkŋɛ ŋɡɔ pɛ́ kɑꞋmɛ, mbɔ m bɔ́ ńdɔk pɔ pɑ́Ꞌ m bɔ́t pɔ́tnɛ ŋ́kɑꞋmɛ.

³¹ Sɛ́ ẅi ɑ tɑ́t pɛ́ Ndɛ wɛkŋɛ Yɛ́su Kɛlístɔ, jʉ́ Sɛ́ ẅi ɑ sɛ́ ḿbíkŋɛ ŋɡɔ pɛ́ ɡúꞋlɛ wɛ́ kɛ́ zɑ́Ꞌ nɛpɑt, ɑ sɛ́ ńjí ŋɡɔ ŋ kɑ́ pɔ́ ńcú pɑ́Ꞌɑ ńdɔk ńcʉ̈ɔt nu pɔ́.

³² Ɛ́ kɑ pɔ́ ŋkɑ́ yi ŋ kɑ pɔ́nɛ tʉ́sɔŋ-Ndɑ́mɑ́s, ŋɡɔ́mnɑɑ ẅí fɔɔ Alɛstɑ kɑ zɑ́pnɛ wɛ́, ɑ cú pɛ́ pɔ́ ḿbyɛ́p mɛntsu-ŋkɑ́Ꞌ-tʉ́sɔŋ, lɔɔ nɛɡẅɛɛ wɑ́ɑ.

³³ Lɑ́ pɛ́ níꞋ wɑ́ɑ tsɛt kɛkɑk, ɛ́fú nǔu yɛcɔ́ tɔ́k yi ɛ́ nǔu ŋkɑ́Ꞌ ńcɑklɛ wɑ́ɑ, ŋ́kɔk wɑ́ɑ ńtík sɛ́, lɑ́ n duk wɛ́.