1 Pyɛ̂ 4 - Kɑɑ Fí

Nɛnɑ́ŋ wɛ fí

¹ Pɑ́Ꞌ Kɛlístɔ kɑ jʉ́ɔnɛ ŋɡʉ̈ɔ́Ꞌ nǔu mbɑp-mbʉʉ lɑ́, pʉʉ yʉ́ʉ pʉʉ pɔ́ tú pʉʉ, ńtʉ́ʉ nɛjʉ́ɔ ŋɡʉ̈ɔ́Ꞌ pɑ́Ꞌ jʉ́, ḿbɔ́ ńjí ŋɡɔ jʉ́ Kɛlístɔ ẅí ɑ kɑ jʉ́ɔnɛ ŋɡʉ̈ɔ́Ꞌ nǔu mbɑp-mbʉʉ yɛ, ɑ kɑ ḿmɛk nu kɛpɔŋ.

² Pɔ́Ꞌɔ lɑ́, pʉʉ ɡʉ nǔu mɛlɛ́Ꞌlɑ́Ꞌ mi pʉʉ pɛ́tnɛ ŋ́ɡẅɛɛ ndǔ tsɛ́tsɑ́Ꞌ, ŋ́ɡɛ pɔ yúu mi Sɛ́ sɛ́ ŋ́kɔŋ, kɔɔ pʉʉ ɡɛ yúu mi mbʉʉ-ŋu tsʉ́ʉnɛ́nɛ wɛ́ ɑ ɡɛ.

³ Yɔ ndẅiklɛ pɑ́Ꞌ ɛ́ zɛɛ ŋ́ɡɔ́ ḿbɔ́ mbɔ pʉʉ kɑ pɔ́ yɛcɔ́ ŋkɑ́ ḿbɔ́ ŋ́ɡɛ yúu mi pɑkɛ́jí Sɛ́ sɛ́ ŋ́kɔŋ. Pʉʉ kɔŋ nɛfʉꞋ mɛnu tɛ ɛ́sɑ́Ꞌ sɑ́Ꞌnɛ, ḿbɔ́ ŋ́ɡɛ mbɑ kʉ̈ɔ́ lɑ́ yi mbʉʉ yʉʉ tsʉ́ʉnɛ́nɛ wʉ́ʉ nɛɡɛ, ḿbɑ́ mɛluꞋ, ńcúꞋlɛ nǔu ndínɑ nɛkwɛ́t yúu ŋ́ɡɛ mɛnu sʉ́ʉ, pʉʉ kɔŋ nɛjúk pɔ nɛnɔ́ mɛluꞋ, pʉʉ kɔŋ nɛɡúꞋlɛ yúu ŋɡɔ ɛ́ mɛsɛ́, ɛ́ pɔ́ yúu mi Sɛ́ kɑ́ sii ŋ́kɔŋ pɔ́.

⁴ Ɛ́ pɛn ḿbɔ́ nǔu ŋkɔ̂ɔnɛ pɑkɛ́jí Sɛ́ tsʉ́Ꞌ ńjʉ́ɔ yʉʉ ntɛ́ ḿmɑɑ mɑɑnɛ, mbíꞋŋɡɔ pʉʉ pɛ́pɔ́p kɑ́ pɛ́t ńtɛmtɛ ku ńnɛn nɛɡɛ mɛnu mi pɔ́p ɡɛnɛ ɛ́ pɔ́ pɔ mɛnu sʉ́ʉ pɔ́. Pɔ́p kɛ ńtsʉ́Ꞌ ńzɔɔtɛ wʉ́ʉ zɔɔtɛnɛ.

⁵ Lɑ́ pɔ́p ɡʉ ŋ́ɡɛ ńtʉ́ʉ mbi Sɛ́ ẅí ɑ tʉ́ʉnɛ pɑ́Ꞌ ɑ ɡʉ ńzɑ́Ꞌ ntsɑŋ-pʉɔ ntʉʉ pɔ́p pɛpfúsɛ́, ḿbɛ́ɛtɛ ntsu wɔ́p nǔu ŋɡɛnɛ mɛnu mɔ́p.

⁶ Ɛ́ yúu mi ɛ́ kɑ ɡɛnɛ lɑ pɛ́ cẅi Ŋkʉʉ Sʉ́Ꞌnɛ mbɑ mbɔ̌ pɛpfú. Pɛ́ kɑ cẅi tɛ mbɑ pɑ́Ꞌ Sɛ́ kɑ ŋɑknɛ mbʉʉ yɔp, pɑ́Ꞌ ɑ ŋɑknɛ pʉɔ tsʉʉ, pɔ́p ɡẅɛɛ nɛpfú. Pɔ́p ŋkɔ̂ɔnɛ ŋ́kuꞋ pɑ́Ꞌ ḿbɔ́ pɔ́p pɔ́ nǔu zẅikŋɛ yɔ́p pɔ́p pɛ́ Sɛ́ nɑ́ŋ.

Mbɑ wɔ̌ lɑ́ niitɛ ŋ́kúꞋlɛ pɔ yúu mi Sɛ́ kɑ lɔknɛ ŋ́ɡɑ́ fuꞋ yɛ́

⁷ Ndẅiknzʉʉ ŋkɑ́ yɛ mbɑ kʉ̈ɔ́ lɑ́ sɛ́ ŋ́kuꞋ. Pɑ́Ꞌ ɛ́ pɔ́Ꞌɔ lɑ́, pʉʉ pɔ́ pɑjínu. Kɔɔ pʉʉ ḿmɛꞋ mbʉʉ yʉʉ, ńjí ŋɡɔ pʉʉ ɡʉ ŋ́kuꞋ nɛcɛꞋlɛ Sɛ́.

⁸ Nduŋmbi yúu mi pʉʉ ɡʉ ŋ́ɡɛ, ɑ pʉʉ nɛɡẅɛɛ ŋkɔŋɛ tsɛtsɛt pʉʉ, mbíꞋŋɡɔ ŋkɔŋɛ píknɛ nɛlʉ́m mɛnu kɛpɔŋ.

⁹ Pʉʉ kúkŋɛ pɔ́ɔpɛ́mɑ́ pʉʉ tsɛtsɛt pʉʉ tsɛt mɛndɑ́ mʉ́ʉ kɛ́ pɔ́ ńcútɛ.

¹⁰ Mbɑ wɔ̌ lɑ́ lɔk yɛ́ pɔ́fɑꞋ yi Sɛ́ kɑ lɔknɛ ŋ́ɡɑ́ fuꞋ níinɛ yɛ́, ńcẅɛ́lɛ pɔ́ɔpɛ́mɑ́ pɛ́. Pʉʉ pɔ́ pɑ́Ꞌ ɡɑŋfɑꞋ sʉ́Ꞌnɛ pi pɔ́p sɛ́ ŋ́kúꞋlɛ pɔ́fɑꞋ ntɛ́ nɛ́ ntɛ́ yi Sɛ́ ɡɑ́nɛ mbɔ̌ pɔ́p pɑ́Ꞌ ɛ́ ɡʉ ńcẅɛ́lɛ́ pɛcɔ́ pʉɔ.

¹¹ Pɔ́fɑꞋ-ŋu lɑɑ ḿbɔ́ nɛcú nu-Sɛ́, ɑ cú pɔ yi ɛ́ fúnɛ mbɔ̌ Sɛ́. Yɛ ŋu pɔ́ nɛfɑꞋ mɛfɑꞋ tsɛt cúꞋlɛ, ɑ lɔk pɔ mɛtʉʉ mi Sɛ́ ɡɑ́nɛ mbɔ̌ wɛ́ ńdɔk ɛ́fɑꞋ. Pʉʉ ɡɛ pɑ́Ꞌɑ ńjí ŋɡɔ pɛ́ ɡʉ ńdɛɛ nǔu Yɛ́su Kɛlístɔ, ŋ́ɡúꞋlɛ Sɛ́ nǔu mbɑ kʉ̈ɔ́ lɑ́, jʉ́ ẅi mɛtʉʉ tsʉʉ, mbɑ nɛsɑ́Ꞌ mbí mbɔ̌ wɛ́ nǔu mɛŋɡuꞋ mɛŋɡuꞋ. Ɛ́ pɔ́Ꞌɔ.

Nɛjʉ́ɔ ŋɡʉ̈ɔ́Ꞌ nǔu lík-Kɛlístɔ

¹² Pɛsúu pɑ́ɑ pɛ́ tʉʉndɛn, pʉʉ tsɛt múk ḿbɔ́ ńjʉ́ɔ ŋɡʉ̈ɔ́Ꞌ. Kɔɔ pʉʉ jʉ́ɔ ɛ́ kʉꞋnɛ wʉ́ʉ, ɛ́ kɑ́ pɔ́ yɛcɔ́ nu fí pɔ́. Pɛ́ ɡʉ ɛ́fú nǔu ńjí yúu mi pʉʉ yɛ́tɛ́.

¹³ Pʉʉ tsʉ́Ꞌ ńtsɑ́ɑtɛ tsɑ́ɑtɛ́nɛ mbíꞋŋɡɔ pʉʉ sɛ́ ńjʉ́ɔ yʉʉ ŋɡʉ̈ɔ́Ꞌ pɑ́Ꞌ Kɛlístɔ, ɛ́ lɛɛ pɔ́Ꞌɔ, pʉʉ ɡɛ ḿbɔ́ tɛ ńjʉ́ɔ nɛɡúꞋ wɛ ḿbɛn ŋ́ɡẅɛɛ yʉ́ʉ mɑ́mɑ́ tsɑ́ɑtɛ.

¹⁴ Pɛ́ lɑɑ ńzɔɔtɛ wʉ́ʉ mbíꞋ lík-Kɛlístɔ, mbɔ pʉʉ pɛpɔ́ttú, mbíꞋŋɡɔ Zẅikŋɛ nɛɡúꞋ, Zẅikŋɛ-Sɛ́ nǔu pʉʉ,

¹⁵ ḿbɑ́ɑ ŋu wʉʉ nɛɡɔ́ ńjʉ́ɔ ŋɡʉ̈ɔ́Ꞌ ɛ́ pɔ́ ŋɡɔ ɑ jẅí ŋu, ŋɡɔ ɑ jʉ̈ɔ, kɛ pɔ ŋɡɔ ɑ ɡɛ nu kɛpɔŋ ɔɔ, kɛ pɔ ŋɡɔ ɑ jʉ́ɔ nu-ŋu ŋ́kúu nǔu ɔɔ.

¹⁶ Lɑ́ ḿbɔ́ yi ŋu lɑɑ ŋ́ɡɔ́ ńjʉ́ɔ ŋɡʉ̈ɔ́Ꞌ, ɛ́ pɔ́ ŋɡɔ ɑ ŋu-Kɛlístɔ, kɔɔ ŋɡɑŋ kɔ́ sʉ́ʉ. Tɛ ńtsʉ́Ꞌ pɔ́Ꞌɔ, ɑ ɡúꞋlɛ pɔ Sɛ́ mbíꞋ lík-Kɛlístɔ yi ɑ ɡẅɛɛnɛ.

¹⁷ Ŋkɑ́ pɑ́Ꞌɑ, mbɔ ɛ́ kuꞋ pɑ́Ꞌ Sɛ́ ɡʉ ńzɑ́Ꞌ ntsɑŋ-pʉɔmɛsɔŋ, ɑ ɡʉ ńzɛ pɔ nǔu pʉɔ pɛ́. A lɑɑ ńzɛ nǔu pɛkŋɛ, mbɔ ɛ́ ɡʉ ńtsʉ́Ꞌ nɛlẅiklɛ ɛ́ pɔ́ ŋɡɔ́ku nǔu pʉɔ pi pɔ́p kɑ́ kɔŋ nɛpɛ́m Ŋkʉʉ Sʉ́Ꞌnɛ-Sɛ́ pɔ́ ɔɔ?

¹⁸ Pɛ́ kɑ ŋwɑꞋnɛ tsɛt ŋwɑꞋnɛ-Sɛ́ ŋɡɔ: «Ɛ́ lɑɑ ḿbɔ́ yi pʉɔ pi pɔ́p ɡɛnɛ yúu mi ɛ́ ndʉ́ŋndʉŋ mbi Sɛ́, nɛɡɔ́ ńduk tɛn tɛꞋ, mbɔ ɛ́ ɡʉ ńtɔ́ ḿbɔ́ nǔu pʉɔ pi pɔ́p kɑ́ pɔ́ ŋ́ɡɛ yúu mi Sɛ́ sɛ́ ŋ́kɔŋ pɔ́, pʉɔ kɛpɔŋ, ḿbɔ́ ŋɡɔ́ku?»

¹⁹ Pɔ́Ꞌɔ lɑ́, ɛ́ pɔŋ ŋɡɔ pʉɔ pi pɔ́p ɡɔ́ ḿbɔ́ ńjʉ́ɔ ŋɡʉ̈ɔ́Ꞌ, ɛ́ pɔ́ mbíꞋŋɡɔ pɔ́p sɛ́ ŋ́ɡɛ yúu mi Sɛ́ sɛ́ ŋ́kɔŋ, pɔ́p ɡɑ́ yɔ́p nu tsʉʉ mbɔ̌ mbuꞋŋɡɔŋ ẅí ɑ kɑꞋnɛ yúu, ŋ́ɡɛ ŋ́ɡɑ́, ŋ́ɡɑ́ pɔ́Ꞌɔ, ŋ́kẅiꞋ ŋ́ɡɛ pɔ nu sʉ́Ꞌnɛ.