1 Pyɛ̂ 3 - Kɑɑ Fí

Ntɛ́ yi pʉɔ-Kɛlístɔ ɡẅɛɛnɛ nɛlɔk ńnɑ́ŋ tsɛt lɑ́ɑndɑ́ yɔ́p

¹ Mbɑ pʉʉ yʉ́ʉ pɑŋɡɛ́, pʉʉ kɔk mbʉʉ yʉʉ ŋ́ɡɑ́ sɛ́ mbi pɛlúu pʉ́ʉ, ɛ́ lɛɛ pɔ́Ꞌɔ, ḿbɔ́ yi pɛcɔ́ pʉɔ tsɛtsɛt pɔ́p sɛ́ ńdʉꞋ nɛzɑ́p tʉ́m nǔu sẅiŋɛ-sɛ́, pɔ́p cʉ́ɔ nzʉʉ pʉʉ kɛ́ pɔ́ yi pʉʉ cú nu, ɛ́fú nǔu mɑt wʉʉ.

² Mbɔ pɔ́p ńjʉ́ɔ ku-nɛnɛn yʉ́ʉ yi lɔ́Ꞌ kɑ́ pɔ́ nǔu pɔ́, ḿbɛn ŋ́ɡẅɛɛ mɛkuꞋ.

³ Pʉʉ pɑ́ɑ nɛkẅii mbʉʉ yʉʉ pɔ nzɛmpíi, pɑ́Ꞌ nɛniitɛ ḿbɑ́Ꞌ tú yʉ́ʉ, ńzẅík pɛkwɑ́ŋ pi pɛ́ lɔknɛ ŋɡɔ̂l ńniitɛ, ḿmɑꞋ mɛndẅí sʉ́Ꞌnɛ.

⁴ Ɛ́ pɔŋ ŋɡɔ yʉ́ʉ kẅii-mbʉʉ fú pɔ tsɛt tʉ́m pʉʉ. Yîyɑ́ ɛ́ kẅii-mbʉʉ yí ɛ́ ɡʉ ńdɑ́Ꞌ ńjúk nɑ́ŋ nɑ́ŋnɛ, ɛ́ pɔ́ nɛpɔ́tnɛ pɔ́tnɛnɛ kɛ́ lɔɔ fɛꞋ. Ɛ́ mbɔ̌ Sɛ́ ḿbɔ́ mɑ́mɑ́ kẅii.

⁵ Yîyɑ́ pɔ́nɛ ntɛ́ yi pɑŋɡɛ́ pɛ́ ŋkɑ́mbi pi pɔ́p kɑ pɔ́ ḿbɔ́k Sɛ́, nɑ́ŋ ḿbɔ́ ńzẅíꞋlɛ yúu mi Sɛ́ kɑ kɑꞋnɛ, kɑ pɔ́ ŋ́kẅii mbʉʉ yɔp pɔ́Ꞌɔ, ḿbɔ́ ŋ́kɔk mbʉʉ yɔ́p ŋ́ɡɑ́ sɛ́ mbi pɛlúu pɔ́p,

⁶ pɑ́Ꞌ Sɑ̌lɑɑ ẅí ɑ kɑ pɔ́ ńzúꞋ ntsu-ndúu mɛ Ábɛlɛhɑ̂m, tɛ ɛ́fúŋ wɛ́ ŋɡɔ Ndɛ wɛ. Pʉʉ ŋkɔ̂ɔnɛ pɑ́Ꞌɑ ḿbɔ́ yi pʉʉ lɑɑ ŋ́ɡɛ nu sʉ́Ꞌnɛ kɛ́ pɔ́k yɛcɔ́ yúu, mbɔ pʉʉ ɡʉ ńtsʉ́Ꞌ pɔ́ɔ pɛ́ pɛ́ pɑŋɡɛ́.

⁷ Mbɑ pʉʉ yʉ́ʉ mbɛ́ɛnɛ pʉʉ ɡẅɛɛ pɛzwɛ́ pʉ́ʉ sʉ́Ꞌnɛ, ŋ́kẅíitɛ pɑ́Ꞌ pɑŋɡɛ́ pɔ́ pɔ pʉɔ zɔ́plɛ zɔ́plɛ́nɛ. Pʉʉ ɡɑ́ mɛkuꞋ mɔ́p, mbíꞋŋɡɔ Sɛ́ kɑ ɡɑ́ fuꞋ yʉ́ʉ pɛpɔ́p pɛtsʉʉ, ŋ́ɡɛ pɑ́Ꞌ pʉʉ ɡʉ ńdɑ́Ꞌ ŋ́ɡẅɛɛ kwɑꞋ nɛpɔ́. Pʉʉ ɡɛ pɔ́Ꞌɔ, ńcɛꞋlɛ Sɛ́, yɛcɔ́ yúu pɔɔ wʉ́ʉ tɑɑtɛ.

Nɛjʉ́ɔ ŋɡʉ̈ɔ́Ꞌ ŋ́kɛ́ ŋ́ɡɛ pɔ yúu mi Sɛ́ kɔŋnɛ

⁸ Mɔ ŋ́ɡɔ́ ńdẅiklɛ, ńcú ŋkɔ̂ɔnɛ mbɔ̌ pʉɔ tsʉʉ ŋɡɔ, pʉʉ ɡẅɛɛ tɑ́Ꞌ ntsu, ŋu wʉʉ jʉ́ɔ nu-ŋu pɑ́Ꞌ yɛ́, ḿbɔ́ ŋɡɑŋ tsɑ́ɑ mɛjʉ́ŋ, ŋ́ɡẅɛɛ ŋkɔŋɛ tsɛtsɛt pɔ́ɔpɛ́mɑ́, ŋ́ɡɑ́ mbʉʉ sɛ́.

⁹ Kɔɔ pʉʉ lɔk nu kɛpɔŋ ḿbɑꞋ nu kɛpɔŋ. Kɔɔ pɛ́ zɔɔtɛ wʉ́ʉ pʉʉ pɑ́Ꞌ. Tɛ tsʉꞋ pɔ́Ꞌɔ, pʉʉ cú ŋɡɔ Sɛ́ pɔ́ nɛ́ ŋɡɑŋ, Sɛ́ kɑ tsɔ́Ꞌ wʉ́ʉ pɔ pɑ́Ꞌ ɑ ɡʉ ḿbɔ́ nɛ́ pʉʉ.

¹⁰ Pɛ́ kɑ zɛɛ ŋ́ŋwɑꞋnɛ tsɛt ŋwɑꞋnɛ-Sɛ́ ŋɡɔ: Ŋu lɑɑ ḿbɔ́ ŋ́kɔŋ nɛnɑ́ŋ sʉ́Ꞌnɛ, ḿbɛn ŋ́ɡẅɛɛ mɛlɛ́Ꞌlɑ́Ꞌ sʉ́Ꞌnɛ, ɛ́ pɔŋ ŋɡɔ ŋɡɑŋ shɔt lʉ́m yɛ́ lɑ ńcú nu, ḿbɔ́k nu kɛpɔŋ, ḿbɑ́ɑ ntsu wɛ́, ḿbɔ́k cɔtnu.

¹¹ Ɛ́ pɔŋ ŋɡɔ ɑ lʉ́ɔꞋ nu kɛpɔŋ, ŋ́ɡɛ pɔ nu sʉ́Ꞌnɛ, ńdɔɔ mbɔ́tnɛ, ńcʉŋɛ nzʉʉ yɛ́.

¹² MbíꞋŋɡɔ mík-Tsɑpʉɔ tʉ́ʉ nǔu pʉɔ pi pɔ́p ɡɛnɛ yúu mi ɛ́ ndʉ́ŋndʉŋ mbi yɛ́. Mɛtúutɛ mɛ́ pɔ́ ńzẅíꞋlɛ pɑ́Ꞌ pɔ́p cɛꞋlɛ́nɛ wɛ́. Lɑ́ Tsɑpʉɔ lɔ ŋ́kɛ́ ńtɛ́m ŋkwɛn yɛ pɔ nzʉʉ pʉɔ pi pɔ́p ɡɛnɛ nu kɛpɔŋ.

¹³ Pʉʉ lɑɑ ńníꞋ tú ŋ́ɡɛ pɔ nu sʉ́Ꞌnɛ, mbɔ wɔ̌ ɡʉ ŋ́ɡɛ nu kɛpɔŋ nǔu pʉʉ?

¹⁴ Pʉʉ kɛ́ ńdɑꞋ lɛ́Ꞌ ŋ́ɡɔ ńjʉ́ɔ ŋɡʉ̈ɔ́Ꞌ, ɛ́ pɔ́ mbíꞋŋɡɔ pʉʉ sɛ́ ŋ́ɡɛ yúu mi ɛ́ ndʉ́ŋndʉŋ mbi Sɛ́, mbɔ pʉʉ pɛpɔ́ttú. Kɔɔ pʉʉ mɑɑ tɛ ḿbɔ́k pʉɔmɛsɔŋ. Kɔɔ tʉ́m-ŋu wʉʉ mɑɑ tɛ ḿvukŋɛ.

¹⁵ Tɛ ńtsʉ́Ꞌ pɔ́Ꞌɔ, pʉʉ pɔ́ tsɛt tʉ́m pʉʉ, ḿbɔ́ ŋ́ɡɑ́ pɔ mɛkuꞋ-Kɛlístɔ ŋɡɔ jʉ́ pɔ́nɛ Ndɛ wʉʉ. Pʉʉ pɔ́ ŋkɑ́ tsʉʉ ńtʉ́ʉ pɔ pɑ́Ꞌ ŋu lɑɑ píkŋɛ wʉ́ʉ ŋɡɔ mɛlɑ́Ꞌ kʉ̈ɔ́ pʉʉ tík kwɑŋɛ yʉ́ʉ nǔu Kɛlístɔ ɔɔ, pʉʉ kyɛ́Ꞌtɛ ɛ́sẅíi ŋɡɑŋ.

¹⁶ Pʉʉ tsʉ́Ꞌ nɛsẅíi wɛ́ ńdɔk pɔ ndɑ̌ɑ ndɑɑ, ńdɔk mɛkuꞋ. Ɛ́ pɔŋ ŋɡɔ kɔɔ ɛ́ ɡɔ́ ḿbɔ́ mbʉʉ yʉʉ pɔ́ ńtswɑ́ɑ wʉ́ʉ nǔu yɛcɔ́ yúu, lɑ ɛ́ lɛɛ pɔ́Ꞌɔ, ḿbɔ́ yi pʉɔ lɑɑ ḿbɔ́ ńtík sɔ́ɔ tú pʉʉ, ɛ́fú nǔu pɑ́Ꞌ pɔ́p sɛ́ ńzɔɔtɛ nɛnɑ́ŋ wʉʉ wɛ pʉɔ-Kɛlístɔ ẅi ɛ́ pɔŋnɛ, sʉ́ʉ kɔ́ wɔ́p.

¹⁷ Mbii ŋu nɛɡɔ́ ńjʉ́ɔ ŋɡʉ̈ɔ́Ꞌ ḿbɔ́ ŋ́ɡɛ pɔ nu sʉ́Ꞌnɛ pɑ́Ꞌ Sɛ́ lɑɑ ŋ́kɔŋ ŋɡɔ ɛ́ pɔ́ pɔ́Ꞌɔ, ńdɛɛ pɑ́Ꞌ mbɔ ŋu ɡɔ́ ńjʉ́ɔ ŋɡʉ̈ɔ́Ꞌ ḿbɔ́ ŋ́ɡɛ nu kɛpɔŋ.

¹⁸ Kɛlístɔ kɑ zɛɛ ńjʉ́ɔ yɛ́ ŋɡʉ̈ɔ́Ꞌ tɛ ḿpfú nɛlɔk ńjɛ́p mɛnu kɛpɔŋ-pʉɔmɛsɔŋ, ŋ́kɛ́ ḿpfú ndɑꞋ tɑ́Ꞌ ŋkɑ́, ɛ́ kuꞋ. Jʉ́ kɛ́ fɑɑnɛ ḿpfú ntɛ́ ɡɑŋ-mɛfɑɑnɛ, pɔ́Ꞌɔ, nɛlɔk wʉ́ʉ ńtɔ́ mbi Sɛ́. Pɛ́ kɑ jẅí mbɑp-mbʉʉ yɛ, lɑ Zẅikŋɛ Lɛ́ɛnɛ́nɛ ɡɛ ɑ pɛn ḿbɔ́ ɡú.

¹⁹ Zẅikŋɛ Lɛ́ɛnɛ́nɛ ɛ̂yɑ́ ɡɛ ɑ ɡʉ lɑ́Ꞌ-pɛpfú ɛ́sẅíi nu-Sɛ́ mbɔ̌ mɛzẅikŋɛ-pʉɔmɛsɔŋ mi ɛ́ kɑ pɔ́nɛ ndɑ́tsɑ́ŋ.

²⁰ Mîmɑ́ mɛzẅikŋɛ pɔ́ mɛ́ pʉɔ pi pɔ́p kɑ tʉʉnɛ tú mbɔ̌ Sɛ́ ŋkɑ́ yi Nɔwɛ kɑ pɔ́ ńniitɛ kɑnúꞋ, Sɛ́ pɔ́ ńdɔk kɔkmbʉʉ ńzẅíꞋlɛ pʉɔ zẅíꞋlɛnɛ. Lɑ́ pʉɔ pɛ́nɛ́fɔ́m ndɑꞋ ɡɛnɛ ŋ́kúu tsɛt kɑnúꞋ tɛ ńduk ŋki.

²¹ Ẅîwɑ́ ŋki kɑ pɔ́ lii cẅɛ́ɛŋki yi ɛ́ ɡɛnɛ pʉʉ luk ŋkɔ̂ɔnɛ lɑɑ. Pɛ́ kɑ́ pɔ́ ńdɔk ɛ́suk pɔ ntsɛ́llɛ́ nǔu mbʉʉ pɔ́. Ɛ́ pɔ́ pɔ nɛlɔk ńdɔ́ɔ mbɔ̌ Sɛ́ ŋɡɔ ɑ suk mɛtʉ́m mɛkŋɛ, ɛ́ pɔɔ pɛn ŋ́ŋɑk wɛkŋɛ pɔ́. Cẅɛ́ɛŋki lɔk pɔ́Ꞌɔ, ŋ́ɡɛ pʉʉ luk, ńdúꞋnɛ pɑ́Ꞌ Yɛ́su Kɛlístɔ kɑ zẅíimɛnɛ nǔu nɛvú.

²² A kɑ kɔ́Ꞌ nɛ́ tʉ́nɛ́pú, ńnɑ́ŋ nǔu ɡúŋ pɔ́-Sɛ́ yi tʉʉ. A ŋkɔ̂ɔnɛ ḿbɔ́ ɛ́sɑ́Ꞌ pɛcʉ̈ɔ́Ꞌ-Sɛ́ tsʉʉ, ḿbɔ́ ɛ́sɑ́Ꞌ kʉ̈ɔ́ lɑ́ yi ɛ́ sɑ́Ꞌnɛ mbí, ɛ́sɑ́Ꞌ mɛtʉʉ tsʉʉ mi ɛ́ tʉ́.