1 Kɔlɛ̂ŋtɛ 16 - Kɑɑ Fí

Ntsup yi pɛ́ mɑꞋnɛ ntɛ́ pɔ́ɔpɛ́mɑ́ pi pɔ́p Yɛlúsɑlɛm

¹ Ɛ́ ɡʉ nǔu nu-ntsup yi pɛ́ sɛ́ ńcúꞋlɛ nɛɡɑ́ mbɔ̌ pʉɔ-Kɛlístɔ pi pɔ́p Yɛlúsɑlɛm, pʉʉ ɡúu ɡɛ pɑ́Ꞌ ŋ kɑ cúnɛ mbɔ̌ mɛcúꞋlɛ mi ɛ́ Ŋɡɑlɑ̂t lɑ́.

² Ɛ́ pɔŋ ŋɡɔ ɛ́ nɑ́ŋ ḿbɔ́ mbɑ wɛ́tɛ́ sɔ́ndii lɑ́, mbɑ wɛ́tɛ́ ŋu wʉʉ, ɡʉ nǔu yúu mi ɑ ɡẅɛɛnɛ, ńdʉŋtɛ ḿbɛ́ɛ yɛcɔ́ ndɛn-ŋkɑ́p nǔu, ńdẅɛꞋ ndɑ́ yɛ́, ńjí ŋɡɔ pɛ́ kɛ́ ɡɛ ńzẅíꞋlɛ tɛ n tɔ́ lɑ pɛ́ mɑꞋ ntsup pɔ́.

³ Mɔ ŋ́ɡɛ ńtɔ́, ńtúu pʉɔ pi pʉʉ tsɔ́Ꞌnɛ, ŋ́ɡɑ́ mɛŋwɑꞋnɛ mbɔ̌ pɔ́p, pɔ́p lɔk ŋ́ɡʉ Yɛlúsɑlɛm ŋ́ɡɑ́ ŋkɑ́p yi pʉʉ cúꞋlɛ́nɛ.

⁴ Ɛ́ lɑɑ ńtɔ́ ḿbɔ́ ḿbíkŋɛ ŋɡɔ ŋ ɡʉ yɑ́ɑ zúꞋu, mbɔ pɛk pɛpɔ́p ɡʉ ḿbɔ́ tɑ́Ꞌku.

Mɛnu mi Pɔ̂l sɛ́ ŋ́kwɑŋɛ nɛɡɛ

⁵ Mɔ ŋ́ɡɛ ŋ́ɡɔ́ ńtɔ́ lɑ́Ꞌ pʉʉ, ńzɛɛ ńdɔk wɛ tsɛt pɑk-ŋɡɔŋ-Mɑsɛndwɑn, mbíꞋŋɡɔ ŋ ɡẅɛɛ nɛɡʉ zúꞋu.

⁶ Líkcɔ́ mɔ ŋ́ɡɛ ńnɑ́Ꞌ ńdɑ́ɑtɛ lɑ́Ꞌ pʉʉ, líkcɔ́ ŋ ɡɛ ńnɑ́ŋ tɛ ŋkɑ́-mbʉŋ lɑ́Ꞌ ḿmɛ, pɔ́Ꞌɔ, m bɔ́ tɛ ŋ́kwɑŋɛ zʉꞋ yi ŋ ɡʉnɛ nɛ́ zúꞋu pʉʉ cẅɛ́lɛ́ wɑ́ɑ.

⁷ Ŋ kɑ́ pɔ́ ŋ́kɔŋ nɛɡɔ́ ńjʉ́ɔ wʉ́ʉ ŋkɔ̂ɔnɛ, ḿbɔ́ ńdɛɛ lɛɛnɛ pɔ́. Tsɑpʉɔ lɑɑ ḿbɛ́m, mbɔ pɛkŋɛ ɡʉ ńnɑ́Ꞌ ńnɑ́ŋ.

⁸ Lɑ́ mɔ sɛ́ ŋ́kwɑŋɛ nɛnɑ́ŋ Ɛ́fɛ̂zɛ wɔ tɛ ndíinɑ-Pɑŋntɛkɔ̂t lɑ́Ꞌ ńdɛɛ,

⁹ mbíꞋŋɡɔ wɛcɔ́ sɛ̂ndúŋ ńtsɔ́Ꞌnɛ mbɔ̌ mɔ zɑꞋnɛ nɛlɔɔ fɑꞋ yi ɛ́ ɡʉ cẅɛ́lɛ́ tɛꞋ. Tɛ mbɑ pɑ́Ꞌ pɑlʉꞋ nu yi n cúnɛ zɑ́ɑ tɛꞋ lɑ́.

¹⁰ Timɔtɛ̂ɛ lɑɑ ńtɔ́ lɑ́Ꞌ pʉʉ, pʉʉ kúkŋɛ wɛ́ sʉ́Ꞌnɛ. Nɛpɔ́ yi ɑ ɡʉ ńnɑ́ŋ tsɛtsɛt pʉʉ, ńzúꞋ mbʉʉ yɛ́ pɔŋ, mbíꞋŋɡɔ ɑ fɑꞋ yɛ́ pɔ fɑꞋ-Tsɑpʉɔ pɑ́Ꞌ mɔ.

¹¹ Pɔ́Ꞌɔ lɑ́, kɔɔ ŋu ɡwɑ́k wɛ́. Pʉʉ ɡɑ́ wɛ́ nɛ́ shʉ́ pɑ́Ꞌ ɑ ɡʉ ŋ́ɡɔ ḿbɛn ŋ́kẅɛ́ɛtɛ wɑ́ɑ, ńnɛn ḿbɔ́ ńtsɑ́ɑtɛ tsɑ́ɑtɛ́nɛ. Mɔ sɛ́ ńzẅíꞋlɛ wɛ́ pɑ́Ꞌ pɔ́p pɔ́ɔpɛ́mɑ́ ɡʉ ńtɔ́.

¹² Ɛ́ ɡʉ nǔu mɔ́ɔmɑ́ wɛkŋɛ Apɔlɔ́s, mbɔ n zɛ mɔ́ ńníꞋ mɛtʉʉ mɛ́ pɑ́Ꞌ pɔ́p pɛcɔ́ pɔ́ɔpɛ́mɑ́ ɡʉ ŋ́ɡʉ lɑ́Ꞌ pʉʉ. Lɑ́ ɑ kɑ́ pɔ́ ŋ́kɔŋ nɛɡʉ ŋkɔ̂ɔnɛ pɔ́, ɑ ɡʉ ŋ́ɡɛ ŋ́ɡẅɛɛ ŋkɑ́ lɑ ŋ́ɡʉ.

CɛꞋlɛ pɔ́p lɔk ŋ́kút mɛtú

¹³ Kɔɔ pʉʉ mɛꞋ mbʉʉ yʉʉ ńdɛ́, pʉʉ zɑ́p tʉ́m nǔu Sɛ́ kɛ́ kɑ́ɑ, pʉʉ pɔ́ɔ mbɛ́ɛnɛ, pʉʉ tɛntɛ tɛntɛ́nɛ.

¹⁴ Pʉʉ lɑɑ ḿbɔ́ ŋ́ɡɛ pɔ kʉ̈ɔ́ ɔɔ, pʉʉ lɔk pɔ ŋkɔŋɛ.

¹⁵ Pɔ́ɔpɛ́mɑ́ pɑ́ɑ, pʉʉ sɛ́ ńjí ŋɡɔ Stɛfɑnɑs pɔ́p tsɛ́nndɑ́ yɛ́, pɛluŋmbi-pɑzɑ́p tʉ́m nǔu Kɛlístɔ tsɛt ndɑ́ yʉʉ Akɑ̂y, pɔ́p sɛ́ ńníꞋ mɛtʉʉ ŋ́ɡɛ yúu mi cúꞋlɛ-pʉɔ-Kɛlístɔ ɡʉ ńdúꞋnɛ. Ɛ́ pɔ́Ꞌɔ, lɑ m bɛn ḿbɔ́ ḿbíkŋɛ wʉ́ʉ ŋɡɔ:

¹⁶ Pʉʉ zúꞋ ntsu-pʉɔ pɑ́Ꞌ pɔ́p, mbɑ wɛ pʉɔ pi pɔ́p pɛpɔ́p ŋ́kíɛnɛ ziꞋnɛ.

¹⁷ Nu sɛ́ ḿbɔŋ wɑ́ɑ tɛꞋ mbíꞋ pɑ́Ꞌ Stɛfɑnɑs, pɔ́p Fɔtunɑ́tus pɔ́p Akɑkẅis tɔ́ tɛ ḿbɔ́ nɛjɔ́ŋ mɔ lɑɑ. Pɔ́p zɑꞋnɛ, mbɔ́ ŋ́kúpmɛ tú yʉ́ʉ nɛjɔ́ŋ mɔ.

¹⁸ Pɔ́p kɑ níꞋ tʉ́m yɑ́ɑ pɑ́Ꞌ pɔ́p kɑ níꞋnɛ yʉ́ʉ ɡúu. Pʉʉ ɡɑ́ mɛkuꞋ mbɔ̌ ntɛ́-pʉɔ pɑ́Ꞌ pɔ́p lɑɑ.

¹⁹ MɛcúꞋlɛ-pʉɔ-Kɛlístɔ mi ɛ́ nǔu shʉ́-Azîi cɛꞋlɛ wʉ́ʉ. Akilɑs pɔ́p Pɛlɛsɛkɑ mbɑ cúꞋlɛ-pʉɔ-Kɛlístɔ yi ɛ́ jʉ́nɛ ndɑ́ pɔ́p lɔk lík-Tsɑpʉɔ ńcɛꞋlɛ wʉ́ʉ tɛꞋ.

²⁰ Pɔ́ɔpɛ́mɑ́ pɛ́tsʉʉ pi pɔ́p zɑꞋnɛ cɛꞋlɛ wʉ́ʉ. Pʉʉ ńcɛꞋlɛ mɛmbʉʉ mʉ́ʉ, ńtsʉ́Ꞌ nɛcɛꞋlɛ, ńniitɛ mɛmbʉʉ mʉ́ʉ nǔu ntɛ́ yɛ pʉɔ-Sɛ́.

²¹ KwɑꞋ mɔ Pɔ̂l, n dɔk pɔ́ yɑ́ɑ, ŋ́ŋwɑꞋnɛ yɔ ńcɛꞋlɛ.

²² Ŋu lɑɑ mbɔɔ kɔŋ Tsɑpʉɔ Yɛ́su pɔ́, Sɛ́ níꞋ ndɔɔ tú-ŋɡɑŋ. Mɑlɑnɑtɑ Tsɑpʉɔ wɛk, tɔ́!

²³ Tsɑpʉɔ wɛkŋɛ níꞋ mbɔ́tnɛ nǔu pʉʉ pɛ́tsʉʉ.

²⁴ N dɔk pɑ́Ꞌ pɛkŋɛ tɛmtɛ́nɛ ḿbɔ́ nzʉʉ Kɛlístɔ ŋ́kɔŋ wʉ́ʉ pɛ́tsʉʉ.