Luka 22 - Azelle New Testament Portions

Yahuda ma gara amaze ma nya Yeso

¹ Ni se obaki owa burode ogome se ata wuza oyis anu ni owe voto, ogome se a gosan ome “Obaki Owo Shakata.”

² Ana sasaru a tupiris neng ano masano makirri ma Musa, nga gangarri nane se nga neng ngona me tii, baka se nga ya beye ba ano.

³ Nze Onoburu pete ayimi Yahuda se agosamme Iskariyoti, ono vento ayimi ano yemasanga ye Yeso anka biturrun neng repo me.

⁴ Nze ma ngame maka bi neng ana sasaru a tupiris neng ano saru ono wankǝli a atitǝu Ogomo Asharri nane se ma neng nya Yeso a nye.

⁵ Nze nga kone lome dede, nze nga bi neng me ago nga ya nya me iru.

⁶ Me mama garre na nenme, nze maya gǝngǝrǝ owarri se manen nya Yeso dan neng uru wa ano ne.

Yeso ma gorro owucu emo wucu Obaki Owo Shakata

⁷ Nze odara obaki oburode ogome se ata ngona oye oyis anu ni orai, odara ogome se a ya tuzu kotang ko Obaki owo Shakata me.

⁸ Nze Yeso tome an Bitrus neng Yohana ma go nye, “Ngame ne eka gorro, emo wucu ewo Obaki Owo Shakata me a wuci.”

⁹ Nze nga sangara me nga gom me, “Ngo ya narra ogona agorro abaze?”

¹⁰ Nze ma gon nye, “In ge pete ogweri mi eya gurnan oyono neng edakarri, etarso me ayimi atitǝu ageme se maya pete ano.

¹¹ Nze egoneng ono atitǝu mi, ‘Achakura na guna agon ngo ogora ogome se mi neng ane yemasanga man ya chǝkǝnǝ iwucu emo wucu ewo Obaki Owo Shakata anu yo?’

¹² Maya beze akanyi oye ogora osaru a tara oye gora se ana gorro ome oze eya gorro kado koyaya.”

¹³ Nze nga ngame nga morra koyaya derte nane se Yeso na buku a nye, nze nga gorro eyabo wucu ewo Obaki Owo Shakata me.

Yeso ma wuci emo wucu ewo Obaki owo Shakata

¹⁴ Ni se ocha me denye nze, Yeso bura chǝkǝnǝ a bate a toma me nga ga rai nga chǝkǝnǝ a wucu eyabo wucu mi nan me.

¹⁵ Nze ma gon nye, “Na dakano anara ogona ewucu emo wucu ewo Obaki Owo Shakata neng nyi kamo guna in bura okona kwaiye.

¹⁶ Miya gosan nyi in ze ma ga wucu eme wucu gina ne, se ana binja eme geme se ama buku a tara emo wucu mi ayimi Togomo To Ogomo Asharri.”

¹⁷ Nze ma kai koso ko shine manyi ma inabi nze ma gode Ogomo Asharri ma go kane, “Kane warne ayima akanyi.

¹⁸ Miya gosan nyi asuru akane emma ga shinǝ manyi ma inabi magina ne se Togomo To Ogomo Asharri tuna ra.”

¹⁹ Nze ma yete ye burode gaze, nze ma gode Ogomo Asharri nze ma pose yeme ma nya nye, ma gosan nye, “Epegina yipung nga rron ye ze ye geme se ama nyan baka oko nyi. Wuza ne epegina anu guna edonzon.”

²⁰ Se ajamu owucu emo nze ma yete koso ko shinǝ manyi ma inabi, ma go, “Koso ko gina koze amagare ogona nane meze manyi maman maze a ya kungkumi baka okunyi.

²¹ Ama ono ogomise maya nya kan awo maze eya wucu emo wucu neng me.

²² Vana Ono ya wǝnǝ sakama nane se ama bi, ama ono gome se maya wuna awon, menen nǝrǝ.”

²³ Nze ane yemasanga rrome ngamo sanngarra topana tonye avizi ayimo kado se ma neng wuna nane.

Mantarra a tara avizi ono saru

²⁴ Nze mantarra ma were a nyi ane yemasanga rrome, ago avizi ayima akanye se maze ono saru.

²⁵ Nze Yeso gon nye, “Agomo dan tuYahudi toze ne, nga wuza nye a gata, gaze ano sasaru ka nye nga ya nǝrǝ guna agonye nye ano mala ano ze.

²⁶ Ama nyi nyizema ngona nane ne. Ono gome se maze ono saru ayima akanyi ama we sakama ono bate se ma wuza nyi etoma.

²⁷ Avizi ano saru ono gom me se mana chǝkǝnǝ maya a wucu emo wucu ne ogome se maya rasan no? Dan ono gome se mana chǝkǝnǝ a wucu emo wucu maze ono saru ne? Ama mi ayimi ka nye min ze sakama ono rasa emo wucu ze.

²⁸ “Ama nyizi ma tore neng mi ocha ogome se emmaza a kuna kwaiye.

²⁹ Sakama nane se ashon ma nya a gata awowuza togomo nane ze mina ga nya nyi a gata.

³⁰ Anuguna ewuci eshi neng mi a togomo taton, iya chǝkǝnǝ aturako to togomo, ewuza togomo to bisana biturru neng repo Isaraila.

Bitrus ma go mata ru Yeso ne

³¹ “Bitrus, Bitrus, kuna eyabo, Shetan maya gǝngǝrǝ orona omasa kǝ nyi zal, ma kǝlǝ nyi nane se akǝllǝ ze erra ayimi tubati.

³² Ama mina ngonai beroromo, tego owona beruwa boi okaso ne, in ngo kurimi owe anawanama kai tore.”

³³ Nze Bitrus garre ma go, “Achakura segina mina goro a ngame mi e nyan nango Inga wi nan ngo.”

³⁴ Nze Yeso go, “Deken bezei Bitrus kamo guna bigorro bi tongarra kane, ngo ya guna ngo ta ron ne ka taro.”

Yeso ma bunku ane yemasanga rrome

³⁵ Nze Yeso sanngarra ano masanga akame ma go, “Ocha ogome se emma Toma nyi de eruni, de emo wucu ni, tego nyi yete toye tukakau ne, ema dera eyabo ne?” Nze nga go, “Aye.”

³⁶ Nze ma gon nye, “Segina ono ogome se ma zen in ru zal ne emo wucu ama manti ne ono ogome se mazemen osankǝli ni ama rǝsi ogodo me, ama kwe osankǝli.

³⁷ Baka ya bi mi e nyi o guna beleng be Ogomo Asharri begina se ama darse bigo, ‘Ama gurame neng ano sharra,’ se bina binja apana akan. Baka epegeme se ama darase a tara akan iya binja nane me.”

³⁸ Ane yemasanga rrome nga gom me, “Achakura tusankǝli tu repo to gina.” Yeso gonnye, “Deke ne belen begeme.”

Yeso ma we beroromo a tara Owo Titi tuZaitun

³⁹ Nze Yeso suri ayima ape, nze ma nya ataro Owo Titi tuZaitun, sakama nane se mana mina a wuza me nze ane yemasanga rrome nga tarso me.

⁴⁰ Nze ma denye arame nze ma gon nye, “Ngona ne beroromo, ano guna tego epete ama eburu ni.”

⁴¹ Nze ma ngame neng a ji bate gar neng obasa izuwa nze ma girwǝnǝ a nyanga, ma we beroromo.

⁴² Ma go, “Tata, a ngo garre osharong matun magina, ama den epegeme se miya barsa mee ze awe ne, se ko epegeme se ngoya barsa mee ze awe.”

⁴³ Nze Otoma Ogomo Asharri ma wonko a me, ma bunku mi.

⁴⁴ Adodonzo amatun megena se maya pete anu nze ma pete aberoromo Ogomo Asharri neng beruwa be vento, baka nane matijeje megemese ma suri a me aminnu akunkuzu a nyanga maaze sakama manyi ma geme se maya akunkuzu.

⁴⁵ Ni se Yeso wera abiroromo, nze ma kuri ayeme se ano yemasanga rrome zanu, nze ma morra nye arrongo baka oganka osharro apuru.

⁴⁶ Ma gon nye, “Baka yaya ze nyi ya rrongo? Werane ewe beroromo ano guna tego epete eyabo eburu ni.”

Ama me Yeso

⁴⁷ Ni se makamo patǝ ano nze ano chebete nga dora nga wonko, Yahuda ono vento ayimi ano biturru neng An ka repo ageme mazema gǝti nye a ji, ma mapeka veto neng Yeso ama bi mi oko neng olǝkǝma me atamo nane se nga wuzaza.

⁴⁸ Nze Yeso sangara me, “Yahuda, ngo ya nya kan mi Vana Ono neng lǝkǝmǝ atamo?”

⁴⁹ Odangara ane yamasanga Yeso se nga nǝri nane, nze nga sanngarra me nga go, “Achakura, e kuzu nye neng tusankǝlini?”

⁵⁰ Nze woi ono vento ayimi aka nye, ma kuzuku otenye oware bilai, o orere ono saru o tupiris.

⁵¹ Nze Yeso gon nye, “Deke ne epegina.” Mama dorre otenyi ono me ono me ma ngamo.

⁵² Nze Yeso gon ana sasaru a tupiris neng ana sasaru ano nǝrǝ Atitǝu Awo Ogomo Asharri neng ana sasaru awa nome ana geme se nga na ra ameya akame, “Ina suru neng tusankǝli neng tubita e min sakama ono kasa togoro tano neng a gata?

⁵³ Koyo odara in ma zen nyi Atitǝu Awo Ogomo Asharri etamenne segina ocha oko nyi na denye, ocha ze owa ana geme se nga ya chǝkǝnǝ a mari.”

Bitrus ma we mantara mata ru Yeso ne

⁵⁴ Nze ngame Yeso nganan me, nga ngamem me atitǝu awo ogomo ono saru o tupiris, a Bitrus geme atarseze ka nye ayiyau.

⁵⁵ Ocha ogome se nga sosa orra atakura nga ya kuna me, Bitrus ma ga rai ma chǝkǝnǝ nye.

⁵⁶ Oye ogalla se maya ye etoma atitǝu mi nǝrǝ mi a chǝkǝnǝ, voto neng orra me nze ma jorto ne a ji ma go, “Ono ginna ono vento ze ayimi anemasanga ye Yeso.”

⁵⁷ Ama Bitrus ma we mantarra ma go, “Ogalla min ta ru ono gina ne.”

⁵⁸ Nze adakano bate oye ono garu Bitrus me ma go, “Ngo ya yima ka nye.” Ama Bitrus go, “Dan mizi ni.”

⁵⁹ Dan neng odaka no ne, “Woi ga go da mantarra ne ono gina ma zen me, ai me ma ono Galili ze.”

⁶⁰ Ama Bitrus go, “Wanno, mintaru epegeme se ngoya biya a tara me ne.” Makamo pate ano, bigorro bi tongarre.

⁶¹ Nze Yeso nyiza a ji ma nǝri Bitrus, Bitrus donze nane se Yeso na buki a me, “Kamo guna bigorro bi tongarra neng atiyǝ kǝne, oya guna otaro ne ka taro.”

⁶² Nze ma suru a kai maka rrewa dede.

Ama bi Yeso otijaji akuri atǝrrǝ mi

⁶³ Ana geme se nga maze a nǝrǝ Yeso nga bi mi otijaji nga kuri nga tarrǝ mi

⁶⁴ Nga ga tǝrrǝ me a ji neng ojankale nga sanngarra me, “Buku avizi na ngonai oware?”

⁶⁵ Nze nga bi mi beye beleng be tutinza chebete.

Amaran neng Yeso a ji ano gwinta beleng

⁶⁶ Se ara sane ana sasaru awano neng ana sasaru a tupiris neng ano masano makirri ma Musa, nga ra nga gurna nze nga ngame Yeso a ji ano gwinta beleng nga bonye.

⁶⁷ Ano gwinta beleng nga sangaro me, “Buku a woro ngo ze Kiristi?” Nze Yeso garre ma gon nye, “Kobarse min buku inyi nima guna biruwa imi ni.

⁶⁸ Inga min we nyi sanngarra, nyi ma garra akan ne.

⁶⁹ Ama asuru a seginna mi Vana Ono maya chǝkǝnǝ owulu oware bilai be Ogomo Asharri se maze ono wuza koyiya.”

⁷⁰ Nze nye zal nga gom me, “Inga nane ze ngo wato ngo ze Vana Ogomo Asharri geme?” Magarre ma go, “Aa nane me ze nyi na buku.”

⁷¹ Nze nga go, “Yaze woro da nǝrǝ okona me ame? Ai woro na kuna neng totenye todo epegeme se mana buku neng ano akame.”