Luka 17 - Azelle New Testament Portions

Belen a tara masharra neng obuza masharra

¹ Oye odara Yeso ma gon ano yemasang rrome, “Epegeme se enan ngona ono a ngona masharra, eyara da mantarra ne. Ono ogome se mana ngona orona oran masharram me maning nǝrǝ.

² Tego woi we vana vento ayima biya a bate bate agina ma we masharra ne, gara atare mi olanjo owarreda ayemelo a vati mi ayimo orawa.

³ A nyi wankǝli a topana tonyi. “Inga owanomokoi woi masharra, obukara a me, Inga ma garre ma deke obuza me.

⁴ Inga masharra a ngo ka sunare odara vento, nze ma kuru ka sunare a ngo ma go, ‘Buzan,’ obuza me da mantarra ne.”

Vati do o ngona biruwa

⁵ Nze A toma me ngo Achakura Yeso, “Malado vati o wuna biruwa Ogomo Asharri dede.”

⁶ Nze Achakura ma gara ma gon nye, “Inga nyi zen o wuna biruwa, se odenye sakama bewo be oyis, egemese ekirra ebate ayimi esana zal, eya iya gunan otiti okuyǝng ogina, ‘Muku ayina oka tore ayimi orawa osaru,’ nze owe nane se nyi na guna owe.

Ochǝkǝnǝ orere o ngoma

⁷ “Inga, woi ayima ka nyi ma zen orere se maya wuza rrome avara, ne owankǝli akame etan. Inga orere me maka suru uja, maya gunan me, ‘Chonno, ora ochǝkǝnǝ owucu emo wucu’?

⁸ Ma zema buku nane me ne, maya gunan me, ‘Ngame ka gorro emete, o gorro apana a kai, o den tan, se mina masa tuwucu, abate oka wuza tuwucu toi’?

⁹ Maya gode orere, baka mana wuza etoma egemese iyǝnkǝnǝ mata wuza eme? Mama bukumi ne.

¹⁰ Nane ze, inga nyi wuza zal eme geme se ana gunan nyi ewe, nze nyi go, woro arere ze base, ‘Woro dan we eyabo se enakera eme geme se ana guna a woro wuza ne.’ ”

Yeso ma ngona ano yekutu biturru a ngamo

¹¹ Ni se Yeso me orona a ngame a Urshalima, nze ma tarse birrangu be in nyanga ma Samariya neng Galili.

¹² Maya pete oye ugwere ogemme, nze aye ano kwene o rrepung yebero nye biturru arawa me nze nga tore ayiyau.

¹³ Nze nga nyiza rremelo nga go, “Achakura Yeso, kuna ogwengwene okodo.”

¹⁴ Ni se Yeso nǝrǝ nye, nze ma gon nye, “Ngame ne a Urshalima a tupiris a nyi wonko nye apun kǝ nyi.” Nga yo runa a ngame geme, nze okwene o bero rrepung yeme odeke nye.

¹⁵ Ni se ono vento ayima ka nye manarǝ mana ngamo, nze ma kuru marawa Yeso maya tongara Ogomo Asharri neng rremelo ya a gata.

¹⁶ Ma ra ma girwǝnǝ a ji Yeso, magon me koka. Ono me ono Samariya ze.

¹⁷ Yeso ma sanngarra ma go, “Dan ano biturru zen ana ngona nye a ngamo ne? Odangara ano turai miyu?

¹⁸ Baka eyaze woi dan rai ma tongarra Ogomo Asharri ne se ogeng oginna?”

¹⁹ Nze Yeso gong ono ogonme, “Wera nga na emekei, o wuna biruwa boi na ngonai a ngamo.”

Ocha ogome se togomo to Ogomo Asharri to ya ra

²⁰ Oye odara tuFarisi nga sangarra Yeso nze nga go, “In shiyu ze togomo to Ogomo Asharri to ya ra?” Nze ma gon nye, “Togomo to ogomo Asharri, tomaran neng eyabo se anan nǝrǝ a ji ni.

²¹ Woi ze ma nu se, ‘Maya guna togena,’ ne ‘Tunini ni.’ Baka togomo to Ogomo Asharri tuya zata akanyi.”

²² Yeso gon ano yemasanga ma me, “Ocha ya ra se nyi neng narra o nǝrǝmi odara vento ayimi todara to Vana Ono, nye ze ma nǝrǝ mi ni.

²³ Ano ya gunan nyi ‘Magina ayina!’ ne ‘Ma nini a nini!’ Tego nyi kuna nye ne, tego itarse nye ne.

²⁴ Iya chǝkǝnǝ sakama omalma se oya malmaza a suru owulu onini angame owulu ogina daro ogome se Vana Ono maya kuru ma ra.

²⁵ Kamo ogona epegina binja Maya kuna kwaiye dede, ano masano magina, nga ya nyame na me.

²⁶ “Sakama nane se ama we ocha Nuhu, nane ze a ya wuza me ocha ogome se mi Vana Ono ya ra.

²⁷ Ocha ogomme se ono maze a tuwucu, neng o wuza a nya, nze nga ya teza agalla nye, a ngame odara ogome se Nuhu ma pete okonggo manyi, a ngame a dara ogome se manyi ma chebete ma rai ma woze odangara ano me zal.

²⁸ “Nane ze ama wuza ocha Lot, ano maze a tuwucu, nga maze akweja neng urǝsǝ to gogorro, a ya tobirra neng aseseko totitau.

²⁹ Nze odara ogome se Lot ma deke Sodom, nze orra neng atantane urun sakama bura a sura sharri, nze a wuza ano ape me zal.

³⁰ “Nane ze eya chǝkǝnǝ odara se mi Vana Ono ya wonko.

³¹ “Odara gon me, ono ogeme se maya a tara ogora atogoro tome ayima atitǝu tego ma tuni ma go maya woro me ne. Nane ze ano ogome se mana ngame uja, tego ma kuru atitǝu ne.

³² A nyi donza neng owai Lot.

³³ Zal ano ogome se maya narra odera rroma rrome, maya dera yeme. Zal ano ogome se ma nya rroma rrome, maya morra yeme.

³⁴ Miya gosan nyi, atiyǝ a gemme a ya morra An ka repo a tete a gadu vento, Ogomo Asharri maya yeta ano vento ma deke ano vento.

³⁵ A ya morra awai repo a ware ida ara vento, Ogomo Asharri maya yita ano vento ma deke ano vento. [

³⁶ Ano An ka repo nga ya ngame uja, Ogomo Asharri maya yita ano vento ma deke ano vento.”]

³⁷ Nze ano yemasanga rrome nga sanngarame, nga go, “Achakura, abaze epegina ya binja?” Nze ma gon nye, “Ara geme se ekeze yanu, ayemme ze tugǝtapu to ya binja.”