Luka 10 - Azelle New Testament Portions

Yeso ma tome ano eturru sunarre neng repo

¹ Nze Yeso zaaka aye ano eturru sunaren neng repo, nze ma Toma nye anka repo repo a nga ngame ayimi ape neng tugwirgwirri zal, ara geme se maya narra ngame.

² Nze ma gon nye, “Itumame e ze chebete, ano wuza me ta barene, sangarra onarame, ama tome neng ane toma me, a nga woze me etoma.

³ Ngame ne na Toma nyi sakama itan ayimi murru.

⁴ Enge were a ngame inga nan tare tuwa da emamate ne da asho okone neng tukakau ne enge ya nga na, e deke obiyoko olantan orona.

⁵ “Zal atau ageme se ebora denye ano, ego, ‘Enasana shammo, ana tauwa gina.’

⁶ Ingase ano ze shammo ataumi, eshammo ekinyi neng oko okunyi oshammo me ochǝkǝnǝ neng nye. Ingase eshammo ze ma nu ni oko okunyi oshammo okuri nyi.

⁷ E chǝkǝnǝ ataume ewucu eshi eme geme se ana nya nyi, baka erreze guna, one Toma mawuchi matijeje mamame, tego pese atutitau bubuni.

⁸ “Zal ape ageme se epete ano, inga ka nyi, ewuchi eme geme se ana nya nyi.

⁹ Ewe ano kwene ogwirimi a nga ngamo, egoneng nye, ‘Togomo to Ogomo Asharri tuna ra voto neng nyi!’

¹⁰ Zal ape ageme se ata ka nyi ni, e tina atu runa egusa,

¹¹ ‘Uturru owa ape ka nyi o gome se o na meshe do atau, woro na zarrauwa nye ome. Iru guna togomo to Ogomo Asharri tuna ra voto neng nyi!’

¹² Miya gusa neng nye a dara bimaso a ya kera kuna ogwengwene o Sodom neng ogwiri ogina.

Tugwiri tugumese tudan garrene

¹³ “Nyi neng narrǝ, ano Koransin, nyi neng narra ano a Betsida, baka towoza tusasaru tugumese ama wuza ayimi akanyi a Taya neng a Sidon, nga ka Asharri neng basa, nga soke tujankale, nze nga chǝkǝnǝ nga gwarǝ ento a topana tonye.

¹⁴ Dara umaso masano beleng biyanu, a ya kera kuna ogwengwene o Taya neng a Sidon a tara ka nyi.

¹⁵ Ngo Kafarnahum, ngo ya wisa biruwa a ya yetakai, a ngame Asharri ni? Aye! A ya duza ye ze angame aro chǝkǝnǝ nu wǝnǝ.

¹⁶ “Zal ono gome se maya rakara ka nyi, mizi maya rakara akan, zal ono geme se ma nya me ne nyi, mizi mana nya meneng, zal ono gome se ma nya meneng, mana nya me ne ono gome se mana toman ze.”

Okuru ano turu sunare neng repo agemme

¹⁷ Ano turu sunare neng repo ogome, nga kuru neng ezalla, nze nga go, “Achakura, zal neng turuhu tobo tuna kunazado, inga woro buku beleng neng nye ayimi ijarroi.”

¹⁸ Nze ma gunan nye, “Na nǝrǝ Shedan agati a sura Asharri, sakama omalma bura.

¹⁹ Kuna ne! Na nya nyi a gata a tara a gata, ano nya me ne ka nyi eya kaye ewa neng elakara, eyabo ze ma morra ka nyi ne.

²⁰ Zal neng nane tego wuza ezalla baka turuhu tobo tuna kunanyi ni, wuza ne ezalla baka ana darsa sejǝsunyi Asharri.”

Yeso ma kone uruntu biruwa

²¹ Ayimi ocha ogome, apuru ma runtu Yeso ayimi uRuhu Usansang, ma go, “Nagodei Asharri, Ogomo Asharri, owayimi Asharri neng masano. Baka se ngoma gorkuza urru epegina, ano rremo neng ano ru eyabo, okon kuri owonke abiya ze, nane ze acho, baka nane meze na rreze ngo.

²² “Achon na deken koyiya zale. Woi ta ru avizi Vana me ne, se Achome, woi ta ru Achomene se Vana me, neng ono gome se Vana me na gara ma beze me.”

²³ Nze ma wangarro ano yemasanga, nze ma buka nye tii, “Nyi ama vati nyi tayeze se nyi ma narrǝ, eme geme se ama wuza.

²⁴ Miya gusa neng nyi, to annabi neng agomo chebete, nga ya narra unarǝ emegenna se nyi ya narrǝ mi, nga dan morra owarri ni. Nyi gaze nga ya narra okona eme geme se nyi ya kunaza me, nga dan kuna ne.”

Otakara beleng be ono Samariya o ngoma

²⁵ Oye dara nze ono masa makirri ma Musa ma were ma tore aa narra kuna apuru Yeso nze ma gom me, “Achakura, yaze neng ngona nze morra rroma ye egemese ezemeng bimaso ne?”

²⁶ Nze Yeso gom me, “Iyaze ama darse a makirri? Ngo barse nnizi?”

²⁷ Nze ma gare ma gom me, “ ‘Barsa Asharri, Ogomo Asharri okoi, neng beruwa boi zal, neng rroma rroi zal, neng, a gata a kai zal, neng adodonzo a kai zal,’ a bate ‘Obarse ono vape ngo sakama apana kai.’ ”

²⁸ Nze Yeso gom me, “Ngona garra derte, ka wuza na nem me oya sopo.”

²⁹ Ama maya narra uzuzu apana a me, nze ma gon Yeso “Avizi onovape emi?”

³⁰ Nze Yeso garre ogomme, “Woi maka suru a Urshalima a ngame a Jariko. Nze ano kasa togoro neng a gata garǝme, nze nga tarrumi nga zuzumi togorro ayi pun nga deke me rroma Asharri.

³¹ Nze opiris ka waka orona ogomme. Nze ma nǝri min ze ma wake ma nga na.

³² Nze woi one bisana be Lawi, ma ga ka waka gaze ma ga takaro a kerro ma wake ma nga na.

³³ Nze oye ono Samariya ga ka waka gaze, nze ma ni mi a tete nze ma kone ogwengwene ome.

³⁴ Nze ma ngame, maka ngona me manenye neng manyi ma inabi ara tora tokwene tome, se ana pela, nze ma tǝsi, nze ma zakumi mawe tara bijake, nze ma nga meme aye atitǝu ageme se agen tuza anu nze ma wankǝlǝ me.

³⁵ Nze ara sane ma zuzu in ru etoma tumuru to repo ma nya o na atitǝu mi, ‘Ama wankǝli a me ingan ka kuru epegeme se una ngona zal neng kursui anu.’ ”

³⁶ Nze Yeso gom me, “Unǝrǝ okoi ayimi an ka taro ageme avizi onovape ono geme se akari ma tarrumi?”

³⁷ Nze ono yemasanga ye makirri ma Musa me ma gara ma gom me, “Ono gome se ma kone ogwengwene ome.” Yeso gom me ngame, “Ka wuza na nem me.”

Yeso ma ngame a nǝrǝ Marta neng Maryamu

³⁸ Yeso neng anemasanga akame atano, nze nga denye oye gweri ogome se oye owai zanu se agusanme Marta, se ma ngame a tǝuwa me.

³⁹ Me Marta ma zen oweno ijarrome Maryamu, mana chǝkǝnǝ voto neng Achakura maya rakara beleng abome.

⁴⁰ Marta gaze o se ya eyabo wucu na yete adodonzo a me; nze ma ngame a Yeso, nze ma gom me, “Achakura, ngo den nǝrǝ uwanon na deken neng o se ya emo wucu sanne? Gunan me ama rai ma malan niga.”

⁴¹ Nze Achakura garre ogomme, “Marta, Marta! Biruwa boi bina wera, a tara to gogorro chebete.

⁴² Eyebo vento ze base a ya narra mee ngoma. Eme geme se Maryamu na zaka, e ze azema kame a me ne.”