Luka 1 - Azelle New Testament Portions

Upuku beleng

¹ Achakura Tiyofilos Ano chebete nga matana nga darse to gogorro togeme se ama woze azate akado.

² Nga ma darse epegeme se nga ma kuna a tonu to ana geme se nga ma nǝri neng a ji aka nye tuni asuru a bibura, nze nga ze nga bi beme.

³ Baka nane meze, mina nǝri ina rreze in darsei eme e vevento, baka se emma kone in kuri in sangarre dede.

⁴ Baka a ngo ru magangan maze epegeme se, ama buka ngo.

Ama buki oyo Yohana ono Obaptisima

⁵ Ocha ogome se Hiridus maze a togomo to Yahudiya, oye Opiris maze anu o tuYahudi se amagusan me Zakariya, owulu tupiris to atitǝu Abija. Rreji ye owai okome a gosan me Alisabatu, me maka suru abirroza be Haruna ze.

⁶ Nye nga repo me zal, nga wuza ochǝkǝnǝ orreze a ji owa Ogomo Asharri, nga ma tarse makirri neng marraku mo Ogomo Asharri zal nane se ma go awuze.

⁷ Nga meng abiya ne, baka se Alisabatu mata yosone, Zakariya neng owai me zal nga na ngona.

⁸ Oye dara, Zakariya apusu to gogorro ayimi Atitǝu Ogomo Asharri, baka se berroza be Abija ze neng etoma a tumuru tome.

⁹ Ama zaka me ana ne se azai tupiris baka maka pusi otorrarre o onya olo Atitǝu Ogomo Asharri.

¹⁰ Ocha ogeme se Zakariya ma pete ayimi atitǝu awo Ogomo Asharri, akuti otorrarre, ano chebete nga binja akǝi, nga ya beroromo.

¹¹ Do kuna odara ne, nze otoma owo Ogomo Asharri orawa a Zakariya, ma tore owulu oware belei ara geme se maya kuti otorrarre ne.

¹² Neng oni otoma owo Ogomo Asharri ogomme, nze Zakariya kerkene, nze beye be me eme dede.

¹³ Nze otoma owo Ogomo Asharri ogomme, “Tego kuna beye ne, Zakariya! Ogomo Asharri na ka beroromo aboi, owai okoi Alisabatu maya yowa kai vana. Ngo ya nya me rriji Yohana.

¹⁴ Apuru ya runta kai neng ezalla, ano chebete gaze nga ya kuna lome, baka oyo ome.

¹⁵ Vano ogonme maya chǝkǝnǝ ono saru a ji Ogomo Asharri. Mazema shinǝ obere ne, ne epegeme se eneng ngona me bammu ne, uRuhu Usansang oya chǝkǝnǝ neng me ama da ayima puru a yimi.

¹⁶ Maze maya kursu ano Isaraila chebete nga ra nga tarse beleng be Ogomo Asharri oko nye.

¹⁷ Maya ra ma mamarra oruna a bate Yeso ra, baka Ogomo Asharri ya nya kame a gata neng uRuhu okome, sakama o ono bezeze taye to Ogomo Asharri Iliya. Maya ngona ana shong Abija nga chǝkǝnǝ shamo neng abiya nye. Maya kuri ma we anagemese nga ta kuna beleng be Ogomo Asharri ne a nga kone. Maya ngona ano agorro baka a nga tarse Ogomo Asharri.”

¹⁸ Nze Zakariya sangarra otoma owo Ogomo Asharri, “Mi neng ngona inizi in ru epegeme se ngona buku iya chǝkǝnǝ na neng me? Min gina se mina ngona, owai okon gina gaze mana ngona.”

¹⁹ Otoma owo Ogomo Asharri magarra ma go, “Mi zi Jibirailu se min turse a ji Ogomo Asharri. Ogomo Asharri na toman in ra in bi beleng neng ngo enbizei beleng be lo begina.

²⁰ Ama ngona nyamine garra neng beleng abon, ozema bi beleng ne se a ngame a dara ogome se a ya yo vana me. Baka beleng abon biya binja ocha ogome se Ogomo Asharri na ngona.”

²¹ Ano ageme se nga ya chǝkǝnǝ akǝi a denta osuru Zakariya, nga ya adodonzo, yaya zena ngona se mana dakano lantan, ayimi Atitǝu Ogomo Asharri.

²² Ni se maka suru mata ru bi beleng ne, nze nga ru se mana ni eye eyabo ayimi Atitǝu Ogomo Asharri. Nze ma bezeze nye beleng neng oware, mana chǝkǝnǝ ono ta ru bi beleng ne anu ne.

²³ Ni se ocha itoma keme na maso Atitǝu Ogomo Asharri, nze ma kuru atitǝu akame.

²⁴ Amarro tumuru tumi bate, nze ayakura kome Alisabatu ma ngona apuru nze ma gorkuza apana me a ngame a tubarma shibi.

²⁵ Baka Alisabatu, “Segina, Ogomo Asharri na kuna ugwegwe ne okon, mana zuzun emme ayima ano.”

Ama buki nane se a ya yo Yeso

²⁶ Alisabatu a tubarma tatse neng o ngona puru, nze Ogomo Asharri ka toma neng otoma owo Ogomo Asharri Jibirailu a ngame oye gweri ayimi in nyanga ma Galili, se a gosan no Nazarat.

²⁷ Ogomo Asharri ma tome me, a oye ogalla se madawa murun vanorrome ne, ogalla ogome se Yusufu vana Dauda ze a wuza a nya a me. Rreji rrome Maryamu.

²⁸ Ni se otoma owo Ogomo Asharri me ra ogalla me, nze ma ogomme, “A ya biyaye oko! Ogomo Asharri ze neng ngo, mana vatui taye.”

²⁹ Ni se Maryamu kuna oko me, nze biruwa bita tetemene, maya dodonzo, yo okoze gene nane.

³⁰ Nze otoma owo Ogomo Asharri me gon me, “Tego kuna beye ne, Maryamu. Ngona morra eyabo e ngoma a suru Ogomo Asharri.

³¹ Ngo gina ngo ya ngona apuru, ngo ya yo vana, ngo ya nya kame rreji Yeso.

³² Maya chǝkǝnǝ ono saru, a ya gosan me Vana Ogomo Asharri se ma Kera Kǝvi. Ogomo Asharri maya ngona a me ogomo sakama onongono me Dauda.

³³ Maya wuza togomo to titǝu Yakubu togeme se tuzemen bimasone, togomo tome toma maso ne.”

³⁴ Nze Maryamu sangarra otoma owo Ogomo Asharri, “Eya ngunan innize e chǝkǝnǝ nane, min gina min ta ru vana orrome ne?”

³⁵ Nze otoma owo Ogomo Asharri me garre ogong me, “URuhu Usansang oya tonu atara kai, a gata Ogomo Asharri ya pata a kai. Baka nane ze vana ogome se ngoya yo me, ogome se oze meng masharra ne, a ya gosan me Vana Ogomo Asharri.”

³⁶ “Egina Alisabatu birruza aboi, ano ya gusa mama yo ne, ayimi tungona tome seginna, ma zen apuru tubarma tase.

³⁷ Baka eyabo ta kirka Ogomo Asharri o wuza ne.”

³⁸ Nze Maryamu go, “Mi orere Ogomo Asharri ze, ichǝkǝnǝ na neng me imi, nane se ngona buku.” Nze otoma owo Ogomo Asharri me nga na ma deke me.

Maryamu ma ngame a Alisabatu

³⁹ A tumuru togonme Maryamu ma gorro maa chonno a ngame a oye ogweri ayimi in nyanga ma Yahudiya. Ogweri mi oya ayimi towo.

⁴⁰ Se Maryamu ma denye ogweri mi, ma pete atitǝu Zakariya, nze ma bi Alisabatu oko.

⁴¹ Se Alisabatu kone oko Maryamu, vana ogome se oya me ayima puru uzuku. URuhu Usansang oma pete me.

⁴² Alisabatu ma nyiza emelo asharri, nze ma go, “Ngo ono ngoma ze ayima wai, vano ogome se oya yimi apuru a kai gaze Ogomo Asharri na vati mi taye!

⁴³ A we innizi Ogomo Asharri deke ayun Asharri akan ze ma rai imi?

⁴⁴ Igena, neng okona oko okoi, nze vana ogome se oya yima apuru akan na cokomo dede baka ezalla.

⁴⁵ Ngo ono ngoma ze baka ngona garra, beleng begina se Ogomo Asharri na buki a ngo biya binja nane se ma buki.”

Maryamu ma tonngarre Ogomo Asharri

⁴⁶ Maryamu go, “Ya tonngarre Ogomo Asharri abiruwa bon.

⁴⁷ Min ye ezalla baka Ogomo Asharri ono buza aka.

⁴⁸ Baka mana kuna ogwengwene okong mi orere okome. A suru kane, ono masano magina zal, nga ya gosan mi ano sana,

⁴⁹ baka Ogomo Asharri o na a gata ze mana wuzang to gogorro to sasaru. Maze ono sansang se mazemeng masharra ne.

⁵⁰ Ma kone ogwengwene owa ana geme se nga kuna beye bome asuru ayimiza angame ayimiza ana geme se nga kuna biye abome.

⁵¹ Neng oware okome owa gata mana wuza togogoro to sasaru! Mana sarma ano nyi zaza topana, in eme geme se nga zen no a nyi ruwa.

⁵² Ma duzu agomo a togoma tonye, nze ma nyiza ana geme se nga zemeng eyabo ne.

⁵³ Ma nya ano toyang to gogorro to ngoma, nze ma deke ano morra neng tare tu uwǝ.

⁵⁴ Ma benke arere akame Isaraila ma kuri ma donza makona ogwengwene okonye,

⁵⁵ sakama nane se ma bi beleng neng ana showado, neng ogona, maya kuna ogwengwene ono ngono okodo Ibirahim neng birruza bome angame a bimaso.”

⁵⁶ Maryamu ma chǝkǝnǝ neng Alisabatu a ngame tubarma tutaro, a bate ma kuru a me ape.

Ama yo Yohana one Obaptisima

⁵⁷ Ni se tumuru togeme se Alisabatu ya yo to binja, nze mayo vana orrome.

⁵⁸ Ano chǝkǝnǝ ara venton meneng berroza bome nga kuna ogona Ogomo Asharri na kuna ogwengwene okome mana yo vana nze ngawoze ezalla dede.

⁵⁹ Ni se vana me binja tumuru urru, nze ano rai atuzu vana me. Nga maze a barasa guna ata nya me rreji ye a shome, Zakariya,

⁶⁰ nze ayun vana me go, “Aye, a ya nya kame rreji Yohana.”

⁶¹ Nze nga go Alisabatu, “Woi ze ma birruza bonyi se atisaza meneng rreji ye geme ne.”

⁶² Nze nga sangara ashon vana meneng oware, ama buku rreji ye vana me se a ya tisiza kame neng no.

⁶³ Nze ma go a ran emo darsa ewere, nze ma dara, “Rreji ye vana me Yohana.” Ni si nga ni nane nze emo damara me nye.

⁶⁴ Ayem me Zakariya ma morra anu bi beleng, nze ma bura o tongarra Ogomo Asharri.

⁶⁵ Beye ba me ano chǝkǝnǝ voto neng nye zal. Beleng beme ba sezarro zal owulu towo tan in nyanga ma Yahudiya.

⁶⁶ Zal anagemese nga kuna emegem me se ama bi, nze nga wuza adodonzo, agusa, “Vano gina ya chǝkǝnǝ in ni zi?” Baka se ana ru ogona oware Ogomo Asharri oze neng me.

Zakariya ma tonngarra Ogomo Asharri

⁶⁷ Nze uRuhu Usansang utu a Zakariya a shon Yohana me, nze ma bi eleng ma Ogomo Asharri ma go,

⁶⁸ “A tongarra Asharri Ogomo Asharri, Asharri o Isaraila! Ma rai ma mala ana kame, ma buza nye.

⁶⁹ Ma wereseza ono kasa kado ono a gata a sura a bi rroze be orere okome Dauda

⁷⁰ (mana binja egemese ma guna maya ngona me tunin embabasa a tonu to to annabi ta tome to sansang).

⁷¹ Maya buza akado a tare ta ano nya me ne akado, neng ana geme se nga ma barasa uniya kado ne.

⁷² Ana neng meze ma kuna ogwengwene owa ana showado, ma donza neng eme geme se ma go maya ngona akanye.

⁷³ Tutono togeme se ma we onongono okodo Ibirahim.

⁷⁴ Ma go maya kasa akado a tare to ano nya me ne akado, baka woro morra orona wuza me etoma da beye ne.

⁷⁵ A woro chǝkǝnǝ da masharra ne, ewuza to gogorro togeme se Ogomo Asharri ya barasa me, zal tumuru todo a masano ma ginna.

⁷⁶ “Ngo gaze vano gina, a ya gosan ngo annabi osaru. Ngoya ware Achakura ara, baka ngo mamarra me orona.

⁷⁷ Ngo ze amasa ano awo Ogomo Asharri, ogo Ogomo Asharri ya visiki akanye masharra ma nye ma kuri ma buza nye.

⁷⁸ Baka Ogomo Asharri ma kuna ejai ewa no chebete, maya Toma neng ono gome se maya buza akado. Maya yankǝnǝng onyana odara asuru,

⁷⁹ oya ngona ara sangsang, ano chǝkǝnǝ a mari neng ano ageme se nga ya adodonzo owǝnǝ.”

⁸⁰ Nze vana mina bare, mana ngona a gata ayimi uRuhu, Ma chǝkǝnǝ a yija a ngame odara ogome se ma suru baka ma bi beleng be lo be Ogomo Asharri ano Isaraila.