Titus 3 - Testamant Nevez 1897 (Jenkins)

CHABISTR III.

¹ Digas sonj dezhe da blega d’ar brinsed ha d’an otoriteou, da zenti outhe, da veza prest da bep œuvr vad;

² da ziwall euz an droug‐prezegerez divarben den, hag euz ar chican, da veza moderet, da ziskouez eun dousder barfet e‐kenver an holl.

³ Rag ni ive, a oa gwech‐all diskiant, dizent, dihenchet, pleget dindan gwall‐ioulou ar c’horf, ha kement tra a roe plijadur, o veva er fallentez hag en anvi, dign a gassoni, ha leun a gassoni an eil a‐enep egile.

⁴ Mes pa eo bet diskouezet madelez ha karantez Doue hor Zalver e‐kenver an dud, hen hen deuz hor zaveteet,

⁵ n’e ket abalamour d’an oberou a justis hor bije great, mes hervez he drugarez, dre ar vadiziant euz an eil c’hinivelez, hag en eur renevezi ac’hanomp dre ar Spered‐Santel,

⁶ hen deuz skulliet varnomp en abondans, dre Jesus‐Christ hor Zalver;

⁷ evit, o veza justifiet dre he c’hras, ma vijemp great, hervez hon esperans, heritourien euz ar vuez eternel.

⁸ Ar gomz‐man a zo gwir, hag e fell d’in e teufez da assuri stard an traou‐man, evit ma teui ar re ho deuz credet en Doue da lakaad evez, ha d’en em rei d’an oberou mad; setu aze an traou a zo mad ha talvoudec d’an dud.

⁹ Mes diwall ouz ar c’histionou foll, al lignezou, an disputou hag ar c’hontestationou divarben al lezen; rag kement‐se a zo vên ha n’eo mad da netra.

¹⁰ Pella diouz an den a zo heretic, goude ma’z pezo exhortet anezhan eur vech pe diou;

¹¹ o c’houzout penaos eun hevelep den a zo troet fall, ha penaos e pec’h, oc’h en em gondaoni he‐unan.

¹² Pa gassin d’id Artemas, pe Tychikus, hast‐affo dond d’am c’havoud da Nicopolis; rag decidet oun da dremen ar goanv eno.

¹³ Bez aketus da ziambrouga en hent Zenas, an doctor euz al lezen, hag Apollos, evit na vanko netra dezhe.

¹⁴ Ha ra zesko ive hon re‐ni d’en em rei d’an oberou mad, pa c’hoarvez dienez, evit na choumint ket hep frouez.

¹⁵ Ar re holl a zo ganen a zalud ac’hanoud. Salud ive ar re a gar ac’hanomp er feiz. Ar c’hras ra vezo ganeoc’h holl! Amen.