S. Jakes 3 - Testamant Nevez 1897 (Jenkins)

CHABISTR III.

¹ Va breudeur, arabad eo e vez kalz a gelennerien en ho touez, rag dond a raio varnomp eur varnedigez rustoc’h.

² Hogen, holl e kwezomp var meur a dra. Mar d’euz unan‐benag ha na deu ket da fazia en he gomzou, hennes a zo eun den parfet, hag a zo capabl da zerc’hel he gorf‐holl bridet.

³ Setu aman, lakaad a reomp eur c’habestr e genou ar c’hezec, evit ober dezhe senti, hag ec’h hellomp trei du‐man ha du‐hont ho c’horf‐holl.

⁴ Setu aman c’hoas, ar batimanchou, pere, petrabenag ma’z int ker braz, ha ma’z int kasset gant an avel grenv, a vez troet du‐man ha du‐hont gant eur stur gwall vihan, el leac’h ma fell d’ar sturier.

⁵ An teod ive a zo eun ezel bihan, ha pretanti a ra beza capabl a draou braz. Setu aman eun tammic bihan a dan; nag a goat na hell‐hen ket da lakaad da gregi?

⁶ An teod a zo ive eun tan, eur bed a fallentez. Evel‐se ez eo lakeat an teod e‐touez hon izili, o souilla ar c’horf holl, hag oc’h entana ar vuez holl, entanet he‐unan gant an ifern.

⁷ A bep seurt loened gwez ha lapoused, a bep seurt amprevaned ha loened‐mor a vez donveet hag a zo bet donveet gant an den;

⁸ mes den e‐bed na hell donvaad an teod; eur gwall‐dra eo ha na heller ket beza mestr dezhan; leun eo a vulum hag a ro ar maro.

⁹ Gant an teod e vennigomp Doue an Tad, ha gant an teod e taolomp malloz var an dud, pere a zo bet great ouz henveledigez Doue.

¹⁰ Euz ar memeus genou e teu bennoz ha malloz. Va breudeur, arabad eo e vez count evel‐se.

¹¹ Daoust hag eur feunteun a daol euz ar memeus toull dour dous, ha dour c’hoero?

¹² Va breudeur, eur vezen‐fiez, hag hi a hell rei olivez; pe eur winien, rei fiez? Evel‐se feunteun e‐bed na hell rei dour sall ha dour dous.

¹³ Ha beza ez euz en ho touez eun den fur ha gwiziec‐benag? Ra ziskouezo he oberou dre eur gundu vad gant an dousder euz ar furnez;

¹⁴ mes mar d’euz en ho calon santimanchou c’hoero a jalouzi, hag eur spered a zisput, diwallit d’en em c’hlorifia ha da lavaret gevier a‐enep ar wirionez.

¹⁵ N’e ket honnes eo ar furnez a zisken euz an env, mes beza ez eo eur furnez euz an douar, euz ar c’hig hag a‐berz an diaoul.

¹⁶ Rag dre‐holl, el leac’h ma ema ar jalouzi hag an disput, eno ez euz direizted hag a bep seurt drouk.

¹⁷ Evit ar pez a zell ar furnez euz an env, da genta ez eo pur, ha neuze sioul, moderet, gouzoud a ra plega, leun eo a drugarez hag a frouez mad, douget evit an eil kerkoulz hag evit egile, hag heb hipocrizi.

¹⁸ Hogen, frouez ar justis a vez hadet er peoc’h, evit ar re en em ro d’ar peoc’h.