Romaned 9 - Testamant Nevez 1897 (Jenkins)

CHABISTR IX.

¹ Me a lavar ar wirionez er C’hrist, na lavaran gaou e‐bed; ha va c’houstians a ro testeni d’in dre ar Spered‐Santel,

² penaos em euz eun dristidigez vraz, ha ne baouez ket va c’halon da veza tourmantet.

³ Rag karoud a rajen beza va‐unan milliget, pell diouz ar C’hrist, evit va breudeur, va c’herent hervez ar c’hig;

⁴ pere a zo Israelited, euz a bere ec’h apparchant an adoption, ar gloar, an alliansou, al lezen, ar servich divin hag ar promessaou;

⁵ pere a zo deuet euz a lignez an tadou, hag euz a bere eo ganet, hervez ar c’hig, ar C’hrist, pehini a zo Doue dreist an holl, benniget da virviken. Amen!

⁶ N’eo ket m’hen defe ger Doue faziet; rag ar re holl a zo deuet euz a lignez Israel, n’int ket euz a Israel;

⁷ hag evithe da veza lignez Abraham, n’int ket holl he vugale; mes scrivet eo: En Isaac e vezo eul lignez hag a zougo da hano;

⁸ da lavaret eo, n’e ket bugale ar c’hig eo a zo bugale da Zoue; mes bugale ar bromessa eo ar re a zo countet da veza al lignez.

⁹ Rag, setu aman geriou ar bromessa: D’ar poent‐man ar bloaz e teuin adare, ha Sara he devezo eur mab.

¹⁰ Ha n’eo ket a‐walc’h kement‐se; mes gant Rebecca e c’hoarvezaz kement‐all, pa he doe concevet daou vab assambles, euz a Isaac, hon tad.

¹¹ Rag ne oant ket ganet c’hoas, ha n’ho doa great na droug na vad, ha koulskoude, evit ma choumje stard ar choaz a Zoue, nann abalamour d’an œuvrou, mes abalamour d’an hini a c’halv, e oe lavaret dezhi:

¹² Ar c’hossa a vezo lakeat dindan ar yaouanka. Evel ma’z eo scrivet:

¹³ Karet em euz Jacob, mes kas em euz bet euz Esaü.

¹⁴ Petra eta a livirimp‐ni? Ha bez’ a zo injustis en Doue? E feçon e‐bed.

¹⁵ Rag lavaret hen deuz da Voises: Me em bezo trugarez euz an hini a behini em bezo trugarez, hag em bezo truez euz an hini a behini em bezo truez.

¹⁶ Kement‐se ne deu ket eta euz a volontez an den, nag euz an hini a red; mes euz a Zoue pehini a ra trugarez.

¹⁷ Rag ar Scritur a lavar da Pharaon: Evit kement‐man em euz da zavet, evit diskouez enoud va galloud, ha ma vezo discleriet va hano dre ar bed holl.

¹⁸ Ober a ra eta trugarez d’an neb ma plij dezhan, hag e laka da galedi an neb a fell dezhan.

¹⁹ Hogen te a lavaro d’in: Perag e teu Doue c’hoas d’en em glem? Rag piou a hell enebi ouz he volontez?

²⁰ Mes kentoc’h, O den, piou oud‐de, evit disput ouz Doue? Daoust hag ar pod‐pri a lavaro d’an hini hen deuz great anezhan: Perag ec’h euz‐te va great evel‐hen?

²¹ Daoust ha n’hen deuz ket ar poder ar galloud da ober euz ar memeus tolzen‐bri, eur vessel evit usachou henorabl, hag unan all evit usachou disterroc’h?

²² Ha petra da lavaret, mar hen deuz Doue, o felloud dezhan diskouez he goler ha rei da anaoud he c’halloud, anduret gant eur batianted vraz vesseliou ar goler, great evit ar gollidigez?

²³ Evit rei da anaoud ive ar pinvidigeziou euz he c’hloar var ar vesseliou a drugarez, great ganthan en avans evit ar gloar, da lavaret eo,

²⁴ var‐n’omp‐ni pere a zo bet galvet ganthan, nann euz a‐douez ar Judevien hep‐ken, mes ive euz adouez ar Jentiled?

²⁵ Hervez m’hen lavar ive er profet Osee: Me a c’halvo va fobl, ar re ne oant ket va fobl, ha va muiakaret, an hini ne oa ket va muia‐karet;

²⁶ hag e c’hoarvezo penaos el leac’h memeus ma oa bet lavaret dezhe: N’oc’h ket va fobl, eno e vezint galvet bugale an Doue beo.

²⁷ Isaias ive a zav he vouez, da lavaret divarben Israel: Ha pa vez an niver euz a vugale Israel ker braz hag hini an treaz euz ar mor, eul loden vihan hep‐ken a zilerc’h a vezo salvet.

²⁸ Rag an Aotrou a echuo hag a zivero an affer gant justis; an Aotrou a rai eun diminu vraz var an douar.

²⁹ Isaias hen devoa lavaret ive araog: Ma n’hen divije Aotrou an armeou lezet ganeomp unan‐benag euz hon raç, e vijemp deuet da veza evel Sodom, hag e vijemp bet rentet henvel ouz Gomor.

³⁰ Petra eta a livirimp‐ni? Penaos ar Jentiled, pere ne glaskent ket ar justis, ho deuz kavet ar justis, da lavaret eo, ar justis a zo dre ar feiz; eleac’h Israel,

³¹ pehini a glaske eul lezen a justis, n’eo ket deuet aben da gavoud al lezen‐ze a justis.

³² Perag? Abalamour n’ho deuz ket he c’hlasket dre ar feiz, mes dre œuvrou al lezen: rag en em stropet int ouz ar mean a laka da gweza;

³³ evel ma’z eo scrivet: Setu e lakaan en Sion eur mean a wall‐lam hag eur roc’h a scandal; ha: Piou‐benag a gred enhan, n’hen devezo ket a leac’h da gaoud mêz.