Romaned 7 - Testamant Nevez 1897 (Jenkins)

CHABISTR VII.

¹ Ha na ouzoc’h‐hu ket, Va breudeur, (rag komz a ran da dud hag a anavez al lezen,) ha na ouzoc’h‐hu ket penaos al lezen n’he deuz galloud var an den nemed keit ha ma ema en buez?

² Rag ar vaouez pehini a zo dimezet, a zo ereet ouz he ozac’h dre al lezen, keit ha ma choum beo; mes mar deu an ozac’h da vervel, hi a zo dizereet euz a lezen he ozac’h.

³ Evel‐se eta, mar deu, e‐pad ma’z eo beo he goaz, da zimezi da eur goaz all, e vezo galvet avoultrez; mes mar deu he ozac’h da vervel, hi a zo liberet euz al lezen, en hevelep doare ma n’eo ket avoultrez, mar deu da zimezi da eur goaz all.

⁴ Evel‐se, va breudeur, c’houi ive a zo maro d’al lezen, dre gorf ar C’hrist, evit beza da eun all, da lavaret eo, d’an hini a zo resussitet a‐douez ar re varo, evit ma tougimp frouez da Zoue.

⁵ Rag pa edomp er c’hig, gwall‐ioulou ar pec’hejou, o kemer nerz dre al lezen, a laboure en hon izili, en hevelep doare ma tougent frouez d’ar maro.

⁶ Mes breman pa’z omp delivret euz al lezen, o veza ma’z omp maro d’al lezen gant pehini e oamp dalc’het, e servichomp Doue en eur spered nevez, ha nann hervez al lizeren, a zo deuet da veza koz.

⁷ Petra eta a livirimp‐ni? Ez eo al lezen pen‐caoz d’ar pec’hed? Doue ra viro! Koulskoude n’am euz anavezet ar pec’hed nemed dre al lezen; rag n’am bije ket anavezet ar gwall‐ioul, ma n’hen divije ket lavaret al lezen: Na c’hoantai ket.

⁸ Mes ar pec’hed, o veza kemeret occasion euz ar gourc’hemen, hen deuz lakeat enoun a bep seurt gwall‐ioulou. Rag anez al lezen, ar pec’hed a zo maro.

⁹ Rag me a oa beo, pa oann gwech‐all heb lezen; mes pa eo deuet ar gourc’hemen, ar pec’hed hen deuz kemeret buez adare, hag ez oun deuet da vervel;

¹⁰ hag ez eo c’hoarvezet ma eo deuet ar gourc’hemen a dlie rei d’in ar vuez, da rei d’in ar maro.

¹¹ Rag ar pec’hed, o kemer occasion euz ar gourc’hemen, hen deuz touellet ac’hanoun, hag hen deuz va lazet dreizhan.

¹² Al lezen eta a zo santel, hag ar gourc’hemen a zo santel, just ha mad.

¹³ Daoust eta hag ar pez a zo mad hen deuz roet d’in ar maro? E giz e‐bed! mes ar pec’hed, evit diskouez eo pec’hed, hen deuz roet d’in ar maro dre eun dra vad, evit ma teuje ar pec’hed dre ar gourc’hemen da veza gwall‐bec’hedus.

¹⁴ Rag ni a oar penaos al lezen a zo spirituel; mes me a zo kigus, gwerzet d’ar pec’hed.

¹⁵ Rag ne gavan ket e vez mad ar pez a ran, ne ran ket ar pez a fell d’in, mes ober a ran ar pez em euz kassoni outhan.

¹⁶ Hogen, mar gran ar pez na fell ket d’in, ec’h anzavan dre eno ez eo mad al lezen.

¹⁷ Ha breman n’eo mui me a ra kement‐se, mes ar pec’hed pehini a choum enoun.

¹⁸ Rag gouzoud a ran penaos ar mad na choum ket enoun, da lavaret eo, em c’hig, rag bolontez em euz da ober ar pez a zo mad; mes ne deuan ket a‐ben d’hen ober.

¹⁹ Rag ne ran ket ar mad a fell d’in; mes ober a ran an droug ne fell ket d’in da ober.

²⁰ Hogen mar gran ar pez ne fell ket d’in, n’e ket me eo her gra eta, mes ar pec’hed eo, pehini a choum enoun.

²¹ Kavoud a ran eta enoun va‐unan al lezen‐man: pa fell d’in ober ar mad, an droug a chom stag ouzin.

²² Rag kemer a ran plijadur el lezen Doue, hervez an den a‐ziabarz;

²³ mes gwelet a ran eul lezen all em izili, pehini a stourm ouz lezen va spered hag am dalc’h ereet dindan lezen ar pec’hed, pehini a zo em izili.

²⁴ Den maleürus ma’z oun! piou a zelivro ac’hanoun euz ar c’horfman a varo? . . . .

²⁵ Trugarekaad a ran Doue dre Jesus‐Christ hon Aotrou! Evel‐se eta, dre ar spered, ez oun stag ouz lezen Doue, mes dre ar c’hig, ouz lezen ar pec’hed.