Romaned 2 - Testamant Nevez 1897 (Jenkins)

CHABISTR II.

¹ Rag‐se, piou‐benag ez oud, O den, hag en em laka barner, n’euz escus e‐bed evidoud; rag en eur varn ar re‐all en em gondaonez da‐unan, pa’z eo gwir, te pehini a varn, a ra ive an traou a reont.

² Rag gouzoud a reomp penaos barnedigez Doue, a‐enep ar re a ra ar seurt trou‐ze, a zo hervez ar wirionez.

³ Ha te a sonj d’id, O den, pehini a varn ar re a ra ar seurt traou‐ze, hag ho gra da‐unan, e tec’hi diouz barn Doue?

⁴ Pe otramant, ha disprijoud a rez‐te pinvidigeziou he vadelez, he batianted hag he hir‐c’houzanvedigez, hep gouzoud e c’halv madelez Doue ac’hanoud d’ar gonversion?

⁵ Mes dre da galeder ha da galon dizent ouz Doue, e tastumez eun tenzor a goler evit an deiz a goler, an deiz ma vezo discleriet ar varnedigez just a Zoue,

⁶ pehini a rento da bep hini hervez he oberou,

⁷ da lavaret eo, ar vuez eternel d? ar re pere, o kenderc’hel da ober ar pez a zo mad, a glask ar gloar, an henor hag an immortalite;

⁸ mes kassoni ha coler d’ar re a zo touellet gant eur spered a zisput ha d’ar re a stourm ouz ar wirionez, hag a zent ouz an injustis;

⁹ trubuil ha gwallenkrez da gement den a ra ar pez a zo fall; d’ar Judeo da genta, ha neuze d’ar Grek;

¹⁰ mes gloar, hag henor ha peoc’h da gement hini a ra ar mad; d’ar Judeo da genta, ha neuze d’ar Grek;

¹¹ rag Doue na zell ket ouz apparans an dud.

¹² Ar re holl ho devezo pec’het heb al lezen, a berisso ive heb al lezen; hag ar re holl ho devezo pec’het, o kaoud al lezen, a vezo barnet dre al lezen;

¹³ rag n’e ket ar re a zelaou al lezen, eo a zo just dirag Doue; mes ar re a vir al lezen eo a vezo justifiet.

¹⁴ Hogen, pa deu ar Jentiled, pere n’ho deuz ket al lezen, da ober, dre natur, an traou commandet gant al lezen, int, pere n’ho deuz ket al lezen, a zalc’h leac’h a lezen dezhe ho‐unan;

¹⁵ diskouez a reont ema scrivet en ho c’halon ar pez a zo commandet gant al lezen; ho c’houstians a rent testeni dezhe, hag ho zonjezonou a damal pe a zifen anezhe;

¹⁶ kement‐man a vezo gwelet en deiz ma teui Doue, hervez va Aviel, da varna, dre Jesus‐Christ, an oberou secret euz an dud.

¹⁷ Te eta, pehini a zoug an hano a Judeo, hag a fiz var al lezen, hag en em c’hlorifi en Doue;

¹⁸ pehini a anavez he volontez, hag o veza desket dre al lezen, a oar mad petra a zo a‐nep al‐lezen;

¹⁹ pehini a gred beza rener ar re dall, sclerijen ar re a zo en devalijen,

²⁰ doctor ar re diwiziec, mestr‐scol an dud simpl, o kaoud ebarz al lezen ar reglen euz ar skiant hag euz ar wiriionez;

²¹ te eta, pehini a zesk ar re all, n’en em zeskez ket da‐unan! Prezeg a rez na dleer ket laerez, hag e ez laeronsiou!

²² Lavaret a rez na dleer ket ober avoultriach, hag e rez avoultriach! Detesti a rez an idolou, hag e laerez au traou sacr!

²³ Te, pehini a denn gloar euz al lezen, a zizhenor Doue, o terri al lezen!

²⁴ rag hano Doue a zo blasphemet abalamour deoc’h e‐touez ar Jentiled, evel ma’z eo scrivet.

²⁵ Ar circoncision a zo talvoudus, ia, mar mirez al lezen; mes mar d’oud eun torer euz al lezen, euz a circonciset e teuez da veza dicirconcis.

²⁶ Rag‐se, mar deu an den, pehini n’eo ket bet circonciset, da viret gourc’hemenou al lezen, daoust ha na vezo ket tremenet evit eun den circonciset, petra‐benag ma’z eo dicirconcis?

²⁷ Ha mar deu an den a zo dicirconcis adaleg he c’hinivelez, da viret al lezen, condaonet e vi ganthan, te pehini, gant al lizeren euz al lezen hag euz ar circonsision, na zentez ket oouz al lezen.

²⁸ Rag ar gwir Judeo n’eo ket an hini hen deuz an apparans a‐ziaveaz hep‐ken, hag ar gwir circoncision n’eo ket an hini a vez great er c’hig a‐ziaveaz;

²⁹ mes euz an diabarz eo e vezer Judeo, hag ar gwir circoncision eo hini ar galon, an hini a zo hervez ar spered, ha nann hervez al lizeren; ha meulodi ar Judeo‐ze na zeu ket euz an dud, mes euz a Zoue.