Romaned 10 - Testamant Nevez 1897 (Jenkins)

CHABISTR X.

¹ Breudeur, dezir va c’halon, ha va feden da Zoue evit Israel, eo ma vezint salvet.

² Rag rei a ran an desteni‐man dezhe, penaos ho deuz zêl evit Doue; mes eur zêl heb anaoudegez;

³ rag evel na anavezont ket ar justis a Zoue, hag o klask etablissa ho justis ho‐unan, n’ho deuz ket pleget d’ar justis a Zoue.

⁴ Rag ar C’hrist eo ar fin euz al lezen, evit justifia kement den a gred.

⁵ Rag Moises a scriv evel‐hen divarben ar justis a zeu euz al lezen: An den a rai an traou‐man, a vevo dreizhe.

⁶ Mes ar justis a zeu dre ar feiz a gomz evel‐hen: Na lavar ket en da galon: Piou a bigno en env? Lavaret kement‐se eo digas ar C’hrist d’an traon ac’hane;

⁷ pe c’haos: Piou a ziskenno e calon an douar? Kement‐se eo lakaad ar C’hrist da zevel adouez ar re varo.

⁸ Petra eta a lavar‐hi? Ar ger a zo tost d’id, en da c’henou hag en da galon. Setu eno ger ar feiz a brezegomp.

⁹ Lavaret a ra penaos mar deuez da anzav a c’henou ez eo Jesus an Aotrou, ha mar credez en da galon hen deuz Doue savet anezhan adouez ar re varo, e vezi salvet.

¹⁰ Rag euz ar galon e creder, evit kaoud ar justis, ha gant ar genou eo ec’h anzaver, evit kaoud ar zilvidigez.

¹¹ Rag ar Scritur a lavar: Piou‐benag a gred enhan, n’hen devezo ket a leac’h da gaoud mêz.

¹² Rag n’euz ket a zifferans etre ar Judeo hag ar Grek, rag holl ho deuz ar memeus Aotrou, pehini a zo pinvidic evit ar re holl a c’halv anezhan.

¹³ Rag piou‐benag a c’halvo hano an Aotrou, a vezo salvet.

¹⁴ Penaos eta e c’halvint‐hi an hini en pehini n’ho deuz ket credet? Ha penaos e credinthi en hini euz a behini n’ho deuz ket klevet komz? Ha penaos e klevint‐hi, ma ne vez den da brezeg?

¹⁵ Ha penaos e vezo prezeget, ma ne vez digasset den? evel ma’z eo scrivet: Na peger kaer eo treid ar re a zigas ar c’helou mad euz ar peoc’h, ar re a annons traou mad!

¹⁶ Mes n’ho deuz ket sentet holl ouz an Aviel; rag Izaias a lavar: Aotrou, piou hen deuz credet d’ar pez hon euz‐ni prezeget?

¹⁷ Evel‐se eta, ar feiz a zeu euz ar pez a glever, hag ar pez a glever, a zeu euz a c’her Doue.

¹⁸ Mes me her goulen, ha n’ho deuz‐hi ket her c’hlevet? Eo zur, ho mouez a zo eat dre ar bed holl, hag ho c’homzou beteg ar pennou pella euz ar bed.

¹⁹ Me her goulen c’hoas: Daoust hag Israel n’hen deuz ket bet a anaoudegez euz ar ger‐ze? Da genta Moises a lavar: Me a lakai ar jalouzi da zevel enoc’h dre eur bobl ha n’eo ket va fobl; lakaad a rin droug da zevel enoc’h dre eur bobl dibourvez a skiant.

²⁰ Hag Isaias hen deuz an hardiegez da lavaret: Kavet oun bet gant ar re na glaskent ket ac’hanoun, anavezet oun bet gant ar re na c’houlennent ket divar va fen. Mes divarben Israel, e lavar: Ahed an deiz em euz astennet va daouarn var‐zu eur bobl pehini a stourm ha na zent ket.