Mazhev 6 - Testamant Nevez 1897 (Jenkins)

CHABISTR VI.

¹ Likit evez na rafac’h hoc’h aluzen dirag an dud, evit beza gwelet ganthe; anez n’ho pezo ket a recompans digant ho Tad pehini a zo en envou.

² Rag‐se pa ri aluzen, na laka ket sôn an drompil en da raog, evel ma ra an hipocrited er sinagogou hag er ruiou, evit beza meulet gant an dud. E gwirionez hen lavaran deoc’h, receô a reont ho recompans.

³ Mes pa rez aluzen, gra ma na ouezo ket da zorn kleiz ar pez a ra da zorn deo;

⁴ evit ma vezo da aluzen great e‐kuz; ha da Dad pehini a vel an traou kuzet, hen rento d’id dirag an holl.

⁵ Ha pa bedi, na ra ket evel an hipocrited; rag int a gar pedi en ho za er sinagogou hag e corn ar ruiou, evit beza gwelet gant an dud. E gwirionez hen lavaran deoc’h, receo a reont ho recompans.

⁶ Mes te, pa bedez, antren en da gambr, hag o veza serret an nor, ped da Dad pehini a zo el leac’h secret‐se; ha da Dad pehini a vel er secret, hen rento d’id dirag an holl.

⁷ Hogen, pa bedit, n’en em zervichit ket a adlavariou didalvez, evel ma ra ar baianed; rag int a gred eo dre galz a gomzou e vezint selaouet.

⁸ Na vezit ket eta henvel outhe; rag ho Tad a oar petra hoc’h euz ezom, araog ma c’houlennit diganthan.

⁹ C’houi eta pedit evel‐hen: Hon Tad pehini a zo en envou, da hano bezet santitiet;

¹⁰ deuet da rouantelez; da volontez bezet great var an douar evel en env;

¹¹ ro deomp hirio hor bara pemdeziec;

¹² pardon deomp hon pec’hejou, evel ma pardonomp ive d’ar re ho deuz hon offanset;

¹³ ha n’hon lez ket da gweza en dentation; mes delivr ac’hanomp diouz an droug. Rag d’id eo ar rouantelez, ar galloud, hag ar gloar da viken. Amen!

¹⁴ Rag mar pardonit d’an dud ho offansou,

¹⁵ ho Tad celestiel a bardono ive deoc’h. Mes mar na bardonit ket d’an dud ho offansou, ho Tad na bardono ket ken neubeut deoc’h hoc’h offansou.

¹⁶ Ha c’hoas pa iunit, na rit ket eur min trist, evel an hipocrited; rag kemer a reont eur visach strujet fall, evit diskouez d’an dud e iunont. E gwirionez hen lavaran deoc’h, receo a reont ho recompans.

¹⁷ Mes te, pa iunez, eol da ben ha gwalc’h da visach;

¹⁸ evit na vezo ket gwelet gant an dud emoud o iun, mes gant da Dad hep‐ken pehini a zo el lec’h secret; ha da Dad pehini a vel er secret, hen rento d’id dirag an holl,

¹⁹ Na zastumit ket a denzoriou evidoc’h var an douar, e pe leac’h e vez kollet pep tra gant ar prenved hag ar merkl, hag e pe leac’h e teu al laeron da doulla, hag e laeront;

²⁰ mes dastumit tenzoriou evidoc’h en env, e pe leac’h na vez kollet netra, na gant ar prenved, na gant ar merkl, hag e pe leac’h ne doul ket al laeron, ha ne laeront ket;

²¹ rag el leac’h ma eman da denzor, eno e vezo ive da galon.

²² Sclerijen ar c’horf eo al lagad: rag‐se mar d’eo sclear da lagad, da holl gorf a vezo sclerijennet;

²³ mes mar d’eo fall da lagad, da holl gorf a vezo teval. Mar d’eo eta tevalijen ar sclerijen a zo enoud, peger brazan devalijen‐ze!

²⁴ Den e‐bed na hell servicha daou vestr; rag, kasaad a rai unan, hag e karo egile; pe en em attacho ouz unan, hag e tisprijo egile. Na hellit ket servicha Doue ha Mammon.

²⁵ Abalamour da ze hen lavaran deoc’h: Na vezit ket en sourci evit ho puez, petra a zebrot, ha petra a evot; nag evit ho corf, petra a wiskot. Ha n’ed eo ket ar vuez muioc’h eged ar boued, hag ar c’horf muioc’h eged an dillad?

²⁶ Sellit ouz lapoused an env; rag ne hadont ket, ne vedont ket, ha ne zastumont ket er c’hreunielou, koulskoude ho Tad celestiel a vag anezhe. Ha n’och‐hu ket kalz talvoudusoc’h egethe?

²⁷ Ha piou ac’hanoc’h‐hu gant he zourci a helfe creski he vent euz a eun ilinad hepken?

²⁸ Ha perag oc’h‐hu en sourci divarben ar wiskamant? Deskit penaos e cresk lili ar parcou; na labouront ket, na nezont ket.

²⁹ Koulskoude me a lavar deoc’h penaos Salomon he‐unan, en he holl c’hloar, n’eo ket bet gwisket evel unan anezhe.

³⁰ Mar gwisk eta Doue er giz‐se yeot ar parcou, pehini a zo hirio, hag a vezo varc’hoas taolet er forn, ha na wiskohen ket ac’hanoc’h‐hu kalz kentoc’h o tud a neubeud a feiz?

³¹ Na vezit ket eta en sourci, o lavaret: Petra a zebrimp‐ni? pe, petra a evimp‐ni? pe, gant petra en em wiskimp‐ni?

³² Rag ar baianed eo a glask an holl draou‐ze; hag ho Tad celestiel a oar hoc’h euz ezom euz an holl draou‐ze.

³³ Mes klaskit da genta rouantelez Doue hag he justis, hag an holl draou‐ze a vezo roet deoc’h ouzpen.

³⁴ Rag‐se na vezit ket en sourci gant an deiz varlearc’h; rag an deiz varlearc’h hen devezo soagn euz ar pez a zell outhan. Da bep devez ez eo awalc’h he boan.