Mazhev 3 - Testamant Nevez 1897 (Jenkins)

CHABISTR III.

¹ En deiziou‐ze e teuaz Ian ar Badezour, o prezeg en dezert ar Jude, hag o lavaret:

² En em gonvertissit, rag rouantelez an envou a zo tost.

³ Rag he‐man eo an hini divarben pehini hen deuz komzet ar profet Izaias, pa lavaraz: Mouez an hini a gri en dezert: Preparit hent an Aotrou: lakit eün he wenojennou.

⁴ Hogen, ar Ian‐ze hen doa eur zae a vleo kanval, hag eur gouriz ler en‐dro d’he groazel; hag he voued a oa killeien‐raden ha mel gwez.

⁵ Neuze Jerusalem, hag ar Jude holl, hag an holl vro var‐dro d’ar Jourdan a zeue er meaz d’he gavout;

⁶ hag e oent badezet ganthan er Jourdan, oc’h anzav ho fec’hejou.

⁷ Mes o velet kalz a Farizianed hag a Saduseed o tond d’he vadiziant, hen a lavaraz dezhe: Raç an aered‐viber! piou hen deuz desket deoc’h tec’hel rag ar goler da zond?

⁸ Grit eta frouez hag a gonven d’ar gonversion.

⁹ Ha na zonjit ket lavaret enoc’h hoc’h‐unan: Beza hon deuz Abraham da dad; rag me a lavar deoc’h, ec’h hell Doue sevel euz ar vein‐ze bugale da Abraham.

¹⁰ Hag ar vouc’hal a zo dija lakeat ouz grizien ar gwez; pep gwezen eta ha na ro ket a frouez mad a vez troc’het ha taolet en tan.

¹¹ Evidoun‐me a vadez ac’hanoc’h en dour evit ar gonversion; mes an hini a zeu var va learc’h a zo galloudussoc’h egedoun, ha n’oun ket dign da zougen dezhan he voutou; hen ho padezo er Spered‐Santel hag en tan.

¹² He groe a zo ganthan en he zorn, hag e netaio ervad he leur, hag e tastumo he winiz er c’hreuniel; mes lakaad a rai ar pell da zevi en eun tan ha na varvo ket.

¹³ Neuze Jesus a zeuaz euz a C’halile d’ar Jourdan, da gavout Ian, evit beza badezet ganthan.

¹⁴ Mes Ian na felle ket dezhan he vadezi, hag a lavare: Me em euz ezom da veza badezet ganez, hag e teuez d’am c’havout!

¹⁵ Ha Jesus, en eur respont, a lavaraz dezhan: Na stourm ket ouzin evit breman; rag evel‐se eo e tere ouzomp accomplissa peb justis. Neuze ne stourmaz ken outhan.

¹⁶ Ha goude ma oa bet badezet Jesus, e savaz rag‐tal euz an dour, ha setu an envou en em zigoraz dezhan, hag e velaz Spered Doue o tisken evel eur goulm hag o tond varnezhan.

¹⁷ Ha setu eur vouez euz an envou, hag a lavaraz: He‐man eo va mab muia‐karet, e pehini em euz lakeat va holl joa.