Mazhev 27 - Testamant Nevez 1897 (Jenkins)

CHABISTR XXVII.

¹ Kerkent ha ma oe deiz, holl brinsed ar veleien ha re Ancien ar bobl en em guzuliaz a‐enep Jesus evit hen lakaad d’ar maro.

² Ha goude beza ereet anezhan, e kasjont anezhan hag hen livrjont da Bons‐Pilat, ar gouarner.

³ Neuze Judas, pehini hen doa trahisset anezhan, o velet e oa condaonet, a zeuaz keuz dezhan hag a zigassaz an tregont pez arc’hant da brinsed ar veleien ha d’ar re Ancien, en eur lavaret:

⁴ Pec’het em euz; trahisset em euz ar goad innosant. Mes int a lavaraz: Petra a ra an dra‐ze deomp‐ni? Kement‐se a zell ouzidte.

⁵ Neuze, goude m’hen doe sklapet ar peziou arc’hant en templ, e sortiaz ac’hane, hag o veza eat kuit, en em grougaz.

⁶ Prinsed ar veleien, o veza kemeret ar peziou arc’hant, a lavaraz: N’eo ket permetet lakaad anezhe ebarz an tenzor, rag an arc’hant‐se eo priz ar goad.

⁷ Ha goude m’ho doe en em guzuliet, e prenjont park eur poder, evit interri an estranjourien.

⁸ Abalamour da ze ar park‐se a zo c’hoas kanvet hirio Park ar goad.

⁹ Neuze e oe accomplisset ar pez a oa bet lavaret dre Jeremi, ar profet, en eur lavaret: Kemeret ho deuz an tregont pez arc’hant, priz an hini a zo bet lakeat he priz, euz an hini a zo bet lakeat he priz gant bugale Israel,

¹⁰ hag ho deuz roet anezhe evit park ar poder, hervez ma oa bet kemennet d’in gant an Aotrou.

¹¹ Hogen, Jesus a zeuaz dirag ar gouarner, hag ar gouarner a c’houlennaz diganthan, en eur lavaret: Ha te eo roue ar Judevien? Ha Jesus a lavaraz dezhan: Hen lavaret a rez.

¹² Ha pa oe tamallet gant prinsed ar veleien hag ar re Ancien, na respontaz netra.

¹³ Neuze Pilat a lavaraz dezhan: Ha na glevez‐te ket pegement a draou a desteniont a‐enep d’id?

¹⁴ Mes Jesus na respontaz ket eur ger dezhan; en hevelep doare ma oa souezet meurbed ar gouarner.

¹⁵ Hogen, ar gouarner hen doa ar c’hustum, bep gwech ma teue gouel Pask, da leuskel d’ar bobl unan euz ar brizonierien, an hini a c’hoantaent kaoud.

¹⁶ Ha neuze ho doa eur prizonier gwall‐vrudet, a c’halvet Barabbas.

¹⁷ Evel ma oant assamblet, Pilat a lavaraz dezhe: Pe hini a fell deoc’h a laoskfen ganeoc’h, Barabbas, pe Jesus a c’halver Christ?

¹⁸ Rag gouzoud a rea dre jalouzi e oa ho doa livret anezhan.

¹⁹ Hogen e‐pad ma oa azezet var he dribunal, he vreg a gassaz eur re‐benag da lavaret dezhan: Diwall da zourcial deuz ar pez a zell ouz an den just‐se; rag eun huvre em euz bet hirio divar he ben hag hen deuz great kalz a boan d’in.

²⁰ Mes prinsed ar veleien hag ar re Ancien a reaz d’ar bobl goulen Barabbas, ha lakaad koll Jesus.

²¹ Hag ar gouarner, o komz adare, a lavaraz dezhe: Pe hini anezhe ho daou a fell deoc’h a laoskfen deoc’h? Hag e respontjont: Barabbas.

²² Pilat a lavaraz dezhe: Petra a rin‐me eta euz a Jesus a c’halver Christ? Holl e leverjont dezhan: Ra vezo crucifiet.

²³ Hag ar gouarner a lavaraz: Mes pe seurt drouk hen deuz‐han great? Neuze e crijont c’hoas krenvoc’h, en eur lavaret: Ra vezo crucifiet.

²⁴ Pa velaz Pilat penaos na c’houneze netra, mes e creske an trubuil, e kemeraz dour, hag e walc’haz he zaouarn dirag ar bobl, en eur lavaret: Me a zo net euz a voad an den just‐se; ouzoc’h‐c’houi e sell kement‐se.

²⁵ Hag ar bobl holl a respontaz: Ra gwezo he voad varnomp‐ni, ha var hor bugale!

²⁶ Neuze e laoskaz ganthe Barabbas, ha goude m’hen doa lakeat skourjeza Jesus, e livraz anezhan dezhe da veza crucifiet.

²⁷ Neuze ar zoudarded a gassaz Jesus da balez ar gouarner, hag e tastumjont var he dro an holl vanden soudarded.

²⁸ Ha goude beza divisket anezhan, e lekejont en‐dro dezhan eur vantel bourpr.

²⁹ Hag o veza great eur gurunen gant spern, e lekejont anezhi var he ben, gant eur gorzen en he zorn deô, hag o plega ho glin dirazhan, e rent goab anezhan, en eur lavaret: Salud roue ar Judevien.

³⁰ Hag o cranchat outhan, e kemerent ar gorzen, hag e skoent ganthan var he ben.

³¹ Goude m’ho doe great goab anezhan evel‐se, e tennjont ar vantel divarnezhan, hag e wiskjont anezhan gant he zillad he‐unan, hag e kasjont anezhan evit hen crucifia.

³² Pa oent o tond er meaz, e kavjont eun den euz a Ziren, hanvet Simon, hag e rejont dezhan dougen croaz Jesus.

³³ Hag o veza erruet en eul leac’h galvet Golgotha, da lavaret eo, leac’h ar pen‐maro, e rojont dezhan da eva gwin‐egr mesket gant ar vestl;

³⁴ mes pa hen doe he danveet, na fellaz ket dezhan eva.

³⁵ Ha goude m’ho doe staget anezhan ouz ar groaz, e rejont partach var he zillad, en eur denna d’ar sort varnezhe; evit ma vije accomplisset ar pez a zo bet lavaret dre ar profet: Partajet ho deuz va dillad etrezhe, ha tennet ho deuz d’ar sort var va zae.

³⁶ Hag o veza azezet, e tiwallent anezhan eno.

³⁷ Lakaad a rejont ive a‐uz d’he ben eur scrid evit rei da anaoud ar sujet euz he gondaonation: he‐man eo jesus roue ar judevien.

³⁸ Crucifiet e oe assambles ganthan daou laër, unan a‐zeô, hag egile a‐gleiz.

³⁹ Hag ar re a dremene a zrouk‐komze diouthan en eur hija ho fen, hag e lavarent:

⁴⁰ Te pehini a ziskar an templ, hag a zav anezhan en tri devez, en em zaveta da‐unan; mar d’oud Mab Doue, disken euz ar groaz.

⁴¹ Er memeus doare ive prinsed ar velein, ar Scribed hag ar re Ancien, a rea goab anezhan en eur lavaret:

⁴² Ar re all hen deuz saveteet, ha na hell ket en em zavetei he‐unan. Mar d’eo roue Israel, ra ziskenno eta breman euz ar groaz, ha ni a gredo enhan.

⁴³ Lakeat hen deuz he fizians en Doue; mar kar Doue anezhan, delivro eta anezhan breman, pa’z eo gwir hen deuz lavaret: Me eo Mab Doue.

⁴⁴ Al laeron pere a oa bet crucifiet assembles ganthan, a rea dezhan an hevelep rebechou.

⁴⁵ Hogen, adaleg ar c’houec’hved beteg an naoved heur, e oa goloet an douar holl a devalijen.

⁴⁶ Hag e‐tro an naoved heur, Jesus a griaz gant eur vouez krenv, en eur lavaret: Eli, Eli, lama sabachthani? da lavaret eo: Va Doue, va Doue, perag ec’h euz‐te va dilezet?

⁴⁷ Hag hinienou euz ar re a oa eno, o veza klevet anezhan a lavaraz: He‐man a c’halv Elias.

⁴⁸ Ha rag‐tal unan anezhe a redaz, hag a gemeraz eur spoue, hag o veza he leuniet a win‐egr, hel lekeaz e pen eur gorzen, hag e roaz dezhan da eva.

⁴⁹ Mes ar re all a lavare: Lest, gwelomp ha dond a raio Elias d’he zavetei.

⁵⁰ Neuze Jesus, o veza criet adare gant eur vouez krenv, a rentaz he spered.

⁵¹ Er memeus amzer ar voal euz an templ en em rogaz en daou hanter, adaleg an neac’h beteg an traoun, an douar a grenaz, hag ar rec’hier a fraillaz,

⁵² ar beziou a zigoraz, ha kalz a gorfou zent, pere a oa maro, a resussitaz;

⁵³ hag o veza deuet er meaz euz ho beziou goude he resurrection, ez ejont er gear zantel, hag e oent gwelet gant kalz a dud.

⁵⁴ Neuze ar c’hantener hag ar re a oa ganthan o tiwall Jesus, pa veljont an douar o krena ha kement a oa c’hoarvezet, a oe spountet braz, hag a lavaraz: E gwirionez, he‐man a oa Mab Doue.

⁵⁵ Bez’ e oa eno kalz a c’hragez pere a zelle a‐ziabell, hag ho doa heuliet Jesus adaleg ar C’halile oc’h he zervicha;

⁵⁶ en ho zouez e oa Mari Magdalen, ha Mari, mam Jakes ha Joses, ha mam mibien Zebede.

⁵⁷ Ha diouz an abardaez, e teuaz eun den pinvidic euz a Arimathe, hanvet Josef, pehini a oa bet ive diskibl da Jesus; he‐man a ieaz da gavout Pilat hag a c’houlennaz corf Jesus;

⁵⁸ ha Pilat a c’hourc’hemenaz hen rei dezhan.

⁵⁹ Goude m’hen doa Josef kemeret ar c’horf, e lienaz anezhan gant eul linsel wenn,

⁶⁰ hag e lekeaz anezhan en eur bez nevez hen doa great toulla er roc’h evithan he‐unan; ha goude beza ruliet eur mean braz ouz dor ar bez, ez eaz kuit.

⁶¹ Ha Mari Magdalen, hag ar Mari all, a oa azezet eno dirag ar bez.

⁶² An deiz varlerc’h, da lavaret eo, an deiz goude preparation ar sabbat, prinsed ar veleien hag ar Farizianed a ieaz assambles da gavout Pilat, hag e leverjont dezhan:

⁶³ Aotrou, deuet eo da vemor deomp penaos an trompler‐ze a lavare pa oa beo: A‐ben tri devez me a resussito.

⁶⁴ Gourc’hemen eta ma vezo diwallet‐mad ar bez beteg an trede deiz, gant aoun na zeufe he ziskibien en noz da laerez anezhan, ha na lavarfent d’ar bobl: Savet eo a‐douez ar re varo. An dromplerez diveza‐man a vez gwassoc’h eget ar c’henta.

⁶⁵ Pilat a lavaraz dezhe: Bez’ hoc’h euz gwarded; it, ha diwallit anezhan evel ma karfet.

⁶⁶ Mond a rejont eta kuit, hag e lekejont sur ar bez, en eur siella ar mean, hag o lakaad gwarded en dro dezhan.