Mazhev 26 - Testamant Nevez 1897 (Jenkins)

CHABISTR XXVI.

¹ Goude m’hen doe Jesus peur‐lavaret an holl gomzou‐ze, e lavaraz d’he ziskibien:

² Gouzoud a rit ema ar Pask a‐ben daou zervez, hag e vezo livret Mab an den evit beza crucifiet.

³ Neuze prinsed ar veleien, ar Scribed ha re Ancien ar bobl en em assamblaz e pales ar beleg‐braz, galvet Caiphas,

⁴ hag en em guzuljont evit tapout Jesus dre finesse hag hen lakaad d’ar maro. Mes lavaret a reant:

⁵ Arabad e ve e‐pad ar gouel, gant aoun na zavfe trouz e‐touez ar bobl.

⁶ Hogen pa oa Jesus en Bethani, en ti Simon, an den lôr,

⁷ e teuaz d’he gavoud eur vaouez, ha ganthi eur vessel alabastr leun a eôl a c’houez‐vad ha precius meurbed, hag her skulliaz var he ben pa oa ouz taol.

⁸ He ziskibien, o velet kement‐se, a oe indiniet, hag e leverjont: Da betra ar c’holl‐ze?

⁹ Rag gallet e vije bet gwerza ker an eôl‐ze, ha rei an arc’hant d’ar beorien.

¹⁰ Mes Jesus, o c’houzoud an dra‐ze, a lavaraz dezhe: Perag e rit‐hu poan d’ar vaouez‐ze? rag eun dra vad he deuz great em c’henver.

¹¹ C’houi ho pezo peorien bepred ganeoc’h, mes n’ho pezo ket bepred ac’hanoun‐me;

¹² ha ma he deuzhi skulliet an eôl‐ze var va c’horf, he deuz hen great evit va sebelia.

¹³ E gwirionez hen lavaran deoc’h, en pe leac’h‐benag er bed holl ma vezo prezeget an Aviel‐man, e vezo lavaret ive en memor anezhi, ar pez he deuz great.

¹⁴ Neuze unan euz an daouzec, hanvet Judas Iscariot, a ieaz da gavoud prinsed ar veleien,

¹⁵ hag e lavaraz dezhe: Petra a rofethu d’in‐me, hag e livrin anezhan deoc’h? Hag e countchont dezhan tregont pez arc’hant.

¹⁶ Ha divar neuze e klaske eun occasion vad‐benag d’hen livra.

¹⁷ Hogen, d’an deiz kenta euz a ouel ar bara hep goell, an diskibien a zeuaz da gavout Jesus, hag e leverjont dezhan: En peleac’h e fell d’id e preparfemp d’id evit dibri pred ar Pask?

¹⁸ Hen a respontaz: It en kear da gavoud hen‐ahen, ha livirit dezhan: Ar mestr a lavar: Va amzer a zo tost; ober a rin ar Pask en da di gant va diskibien.

¹⁹ Hag an diskibien a reaz evel m’hen doa Jesus gourc’hemenet dezhe, hag e preparjont ar Pask.

²⁰ Pa oe deuet an abardaez, en em lakaad a reaz ouz taol gant an daouzec.

²¹ Ha pa oant o tibri, e lavaraz: E gwirionez hen lavaran deoc’h, unan ac’hanoc’h am zrahisso.

²² Hag int glac’haret braz, en em lekeaz, pep hini anezhe, da lavaret dezhan: Aotrou, ha me eo?

²³ Mes hen a respontaz: An hini a laka he zorn ganen er plad, hennes eo am zrahisso.

²⁴ Mab an den evit gwir a ia kuit evel ma’z eo bet scrivet divar he ben; mes malheur d’an hini gant pehini e vezo trahisset Mab an den; gwell e vez d’an den‐ze na vije ket bet ganet.

²⁵ Ha Judas, pehini hen trahisse, o komz outhan, a lavaraz: Mestr, ha me eo? Jesus a lavaraz dezhan: Hen lavaret ec’h euz.

²⁶ Hag evel ma oant o tibri, Jesus a gemeraz bara, hag o veza rentet grasou, e torraz anezhan, hag hen roaz d’he ziskibien, en eur lavaret: Kemerit, debrit, he‐man eo va c’horf.

²⁷ Neuze e kemeraz ar c’halir, hag o veza rentet grasou, hen roaz dezhe, en eur lavaret: Efit holl euz anezhan;

²⁸ rag he‐man eo va goad, goad an allians nevez, pehini a zo skulliet evit kalz evit remission ar pec’hejou.

²⁹ Hogen, lavaret a ran deoc’h penaos na evin mui euz ar frouez‐se euz ar winien, beteg an deiz‐ze en pehini ec’h evin anezhan nevez ganeoc’h en rouantelez va Zad.

³⁰ Ha goude beza canet ar c’hantic, ez ejont er meaz da Venez Olived.

³¹ Neuze Jesus a lavaraz dezhe: En noz‐man e vezin caoz deoc’h holl da gweza; rag scrivet eo: Skei a rin ar pastor, hag ar vanden denved a vezo disperset.

³² Mes, goude ma vezin resussited, ez in araog deoc’h en Galile.

³³ Ha Per, o komz, a lavaraz dezhan: Ha pa gavfe an holl leac’h enoud da gweza, evidoun‐me na gwezin biken.

³⁴ Jesus a lavaraz dezhan: E gwirionez e lavaran d’id penaos, en noz‐man, araog ma cano ar c’hilloc, em nac’hi teir gwech.

³⁵ Per a lavaraz dezhan: Ha pa ve red d’in mervel ganez, na nac’hin ket ac’hanoud. Hag an diskibien holl a lavaraz evel‐t’han.

³⁶ Neuze Jesus a ieaz ganthe da eul leac’h hanvet Gethsemane; hag e lavaraz d’he ziskibien: Azezit aman e‐pad ma’z in a‐hont da bedi.

³⁷ Hag o veza kemeret ganthan Per ha daou vab Zebede, e commansaz beza trist ha gwall ankeniet.

³⁸ Hag e lavaraz dezhe: Va ene a zo trist beteg ar maro; choumit aman ha beillit ganen.

³⁹ Hag o veza eat eun neubeut pelloc’h, e kwezaz var he vizach, o pedi hag o lavaret: Va Zad, mar d’eo possubl ma’z ai ar c’halir‐ze pell diouzin . . . . Koulskoude, n’eo ket evel ma fell d’in, mes evel ma fell d’id.

⁴⁰ Neuze o tond etrezeg he ziskibien, e kavaz anezhe kousket; hag e lavaraz da Ber: Petra, ha n’hoc’h euz‐hu ket gallet beillia eun heur ganen!

⁴¹ Beillit ha pedit, gant aoun ne zeufec’h da gweza en dentation; rag ar spered a zo pront, mes ar c’hig a zo sempl.

⁴² Mond a reaz adare eun eil gwech, hag e pedaz, en eur lavaret: Va Zad, ma na hell ar c’halir‐ze mond pell diouzin hep ma c’hevin anezhan, ra vezo great da volontez.

⁴³ Hag e teuaz, hag ho c’havaz kousket adare; rag ho daou‐lagad a oa pounereet.

⁴⁴ Hag o veza kuiteet anezhe, ez eaz adare hag e pedaz evit an derved gwech, en eur lavaret ar memeus komzou.

⁴⁵ Neuze e teuaz da gavoud he ziskibien, hag e lavaraz dezhe: Kouskit c’hoas ha kemerit ho repos! Setu deuet an heur, ha Mab an den a ia da veza livret etre daouarn ar bec’herien.

⁴⁶ Savit; deomp; setu, an hini a drahis ac’hanoun a dosta.

⁴⁷ Hag evel ma komze c’hoas, setu Judas, unan euz an daouzec, a zeuaz, hag assambles ganthan eur vanden vraz a dud gant klezeier ha bizier, deuet a‐berz prinsed ar veleien hag ar re Ancien euz ar bobl.

⁴⁸ Hag an hini a drahisse anezhan hen doa roet dezhe ar sin‐man: An hini a bokin dezhan, hennes eo, crogit enhan.

⁴⁹ Ha rag‐tal e tostaaz ouz Jesus, hag e lavaraz dezhan: Salud, Mestr; hag e pokaz dezhan.

⁵⁰ Mes Jesus a lavaraz dezhan: Va mignon, da betra oud‐de deuet aman? Neuze o tostaad, e lekejont ho daouarn var Jesus, hag e crogjont enhan.

⁵¹ Ha setu, unan euz ar re a oa gant Jesus, oc’h astenn he zorn, a dennaz he gleze, hag o skei gant eur servicher d’ar beleg braz, e troc’haz he skouarn dezhan.

⁵² Neuze Jesus a lavaraz dezhan: Laka anevez da gleze en he blas; rag ar re holl a gemero ar c’hleze a berisso dre ar c’hleze.

⁵³ Ha sonjal a rez‐te na helfen‐me ket breman pedi va Zad, hag e tigasfe d’in rag‐tal ouzpen daouzec lejion a elez?

⁵⁴ Penaos eta e vefe neuze accomplisset ar Scrituriou, pere a lavar ez eo red e c’hoarvezfe an traou‐man holl.

⁵⁵ Neuze e lavaraz Jesus d’an dud‐se: C’houi a zo deuet gant klezeier ha gant bizier, evel varlerc’h eul laër, da gemeret ac’hanoun; bemdez e oann azezet en ho touez, o kelen en templ ha n’hoc’h euz ket croget enoun.

⁵⁶ Mes an holl draou‐man a zo c’hoarvezet, evit ma vije accomplisset ar pez ho deuz scrivet ar brofeted. Neuze an diskibien holl hen dilezaz, hag a dec’haz kuit.

⁵⁷ Mes ar re ho doa kemeret Jesus a gassaz anezhan da Gaiphas, ar beleg‐braz, en peleac’h e oa assamblet ar Scribed hag ar re Ancien.

⁵⁸ Ha Per a heuliaz anezhan a‐ziabell, bete lez ar beleg‐braz, hag, o veza eat ebarz, ec’h azezaz e‐touez ar zervicherien, evit gwelet ar fin.

⁵⁹ Hogen, prinsed ar veleien, ar re Ancien, hag an holl Sanhedrin a glaske eun desteni faoz benag a‐enep Jesus, evit hen lakaad d’ar maro.

⁶⁰ Mes na gavent ket; ha petra‐benag ma teuaz kalz a destou faoz ne gavent hini e‐bed. Mes er fin e teuaz daou dest faoz, hag a lavaraz:

⁶¹ He‐man hen deuz lavaret: Me a hell diskar templ Doue, hag hen adsevel en tri deiz.

⁶² Neuze ar beleg‐braz a zavaz hag a lavaraz dezhan: Ne respontez eta netra? Petra a lavar ar re‐ze a‐enep d’id?

⁶³ Mes Jesus a davaz. Neuze ar beleg‐braz, o komz, a lavaraz dezhan: Me a gonjur ac’hanoud, dre an Doue beo, da lavaret deomp ha te eo ar C’hrist, Mab Doue?

⁶⁴ Jesus a respontaz dezhan: Hen lavaret ec’h euz; mes c’hoas me a lavar deoc’h, penaos divarvreman e velot Mab an den azezet a‐zeô da c’halloud Doue, hag o tond var goabrennou an env.

⁶⁵ Neuze ar beleg‐braz a rogaz he zillad, en eur lavaret: Gwall‐gomzet hen deuz; daoust hag ezom hon euz‐ni c’hoas a destou? Klevet hoc’h euz breman he wall‐gomz.

⁶⁶ Petra a zeblant deoc’h? Int a respontaz: Meritout a ra ar maro!

⁶⁷ Neuze e cranchjont ouz he vizach, hag e rojont taoliou‐dorn dezhan, ha re all a skoe anezhan gant ho bizier, en eur lavaret:

⁶⁸ Christ, difin gant piou oud bet skoet.

⁶⁹ Hogen Per a oa azezet en diaveaz ebarz ar porz, hag eur vatez a dostaaz outhan hag a lavaraz dezhan: Te a oa ive gant Jesus a C’halile.

⁷⁰ Mes hen nac’h a reaz dirag an holl, en eur lavaret: Na ouzon ket petra a leverez.

⁷¹ Hag evel ma oa o vond er meaz dre an nor, eur vatez all a velaz anezhan, hag a lavaraz d’ar re a oa eno: He‐man a oa ive gant Jesus a Nazaret.

⁷² Per hen nac’haz adare gant le‐douet, en eur lavaret: Ne anavezan ket an den‐ze.

⁷³ Eun neubeud amzer goude, ar re a oa eno a dostaaz hag a lavaraz da Ber: Adra zur te a zo ive euz an dud‐se; rag da anaoud a rer diouz da langach.

⁷⁴ Neuze e commansaz da zrouk‐pedi ha da douat, en eur lavaret: Ne anavezan ket an den‐ze; ha rag‐tal ar c’hilloc a ganaz.

⁷⁵ Hag e teuaz sonj da Ber euz a c’her Jesus, pehini hen doa lavaret dezhan: Araog ma cano ar c’hilloc, ez pezo va nac’het teir gwech. Hag o veza eat er meaz, e welaz c’houero.