Mazhev 25 - Testamant Nevez 1897 (Jenkins)

CHABISTR XXV.

¹ Neuze rouantelez an envou a vezo henvel ouz deg gwerc’hez pere, o veza kemeret ho lampou, a ieaz er meaz da zialben ar pried.

² Hogen, pemp anezhe a oa fur, ha pemp a oa foll.

³ Ar re foll, en eur gemeret ho lampou, na gemerjont ket a eôl ganthe.

⁴ Mes ar re fur a gemeraz eôl en ho vesselliou gant ho lampou.

⁵ Hag evel ma talee ar pried da zond, e voredjont holl hag e choumjont kousket.

⁶ Hogen var‐dro hanter‐noz, e oe klevet tud o crial: Setu erru ar pried, deuit er meaz da rancontr anezhan.

⁷ Neuze an holl werc’hezed a zavaz, hag a breparaz ho lampou.

⁸ Hag ar re foll a lavaraz d’ar re fur: Roit deomp euz hoc’h eôl, rag mouga a ra hon lampou.

⁹ Mes ar re fur a respontaz, en eur lavaret: Gant aoun n’hor be ket awalc’h evidomp hag evidoc’h, it kentoc’h da gavoud ar re a verz, ha prenit evidoc’h hoc’h‐unan.

¹⁰ Mes, e‐pad ma’z eent da brena, ar pried a zeuaz; hag ar re a oa prest a antreaz ganthan e sal an eured, hag e oe serret an nor.

¹¹ Goude‐ze, e teuaz ive ar gwerc’hezed all, hag e lavarjont: Aotrou, Aotrou, digor deomp!

¹² Mes hen a respontaz: E gwirionez hen lavaran deoc’h, n’hoc’h anavezan ket.

¹³ Beillit eta, rag na ouzoc’h nag an deiz nag an heur ma teuio Mab an den.

¹⁴ Rag henvel eo ouz eun den pehini, o vond da eur vro bell, a c’halvaz he vevelien hag a lekeaz he vadou etre ho daouarn.

¹⁵ Ha da unan e roaz pemp talant, da eun all daou, ha da eun all unan; da bep hini hervez he c’halloud; hag ez eaz en hent rag‐tal.

¹⁶ Neuze, an hini hen doa bet ar pemp talant a ieaz, hag a drafikaz ganthe; hag a c’hounezaz pemp talant all.

¹⁷ Er memeus feçon, an hini hen doa bet daou, a c’hounezaz ive daou all.

¹⁸ Mes an hini n’hen doa bet nemed unan, a ieaz hag a doullaz en douar, hag a guzaz arc’hant he aotrou.

¹⁹ Pell goude, aotrou ar vevelien‐ze a zistroaz, hag a reaz dezhe renta count.

²⁰ An hini hen doa bet pemp talant a zeuaz eta, hag a zigassaz pemp talant all, en eur lavaret: Aotrou, pemp talant ez poa roet d’in; setu aman pemp talant all em euz gounezet ouz‐pen.

²¹ He aotrou a lavaraz dezhan: Ervad, servicher mad ha fidel; bet oud fidel var neubeud a dra, da lakaad a rin var galz; antren e joa da Aotrou.

²² An hini hen doa bet daou dalant a zeuaz ive, hag a lavaraz: Aotrou, daou dalant ez poa roet d’in; setu aman daou dalant all em euz gounezet ouzpen.

²³ He aotrou a lavaraz dezhan: Ervad, servicher mad ha fidel; bet oud fidel var neubeud a dra, da lakaad a rin var galz; antren e joa da aotrou.

²⁴ Mes an hini n’hen doa bet nemed eun talant, a zeuaz hag a lavaraz: Aotrou, gouzoud a rean penaos ez oud eun den criz, hag a vêd eleac’h n’ec’h euz ket hadet, hag a zastum eleac’h n’ec’h euz ket skulliet;

²⁵ ha dre ma’m boa aoun araz’oud, ez oun eat hag em euz kuzet da dalant en douar; setu aman d’id ar pez a zo d’id.

²⁶ Mes he Aotrou a respontaz dezhan: Servicher fall ha didalvez, te a ouie penaos e vedan eleac’h n’em euz ket hadet, ha penaos e tastu‐man eleac’h n’em euz ket skulliet,

²⁷ neuze ’ta e tliez rei va arc’hant d’ar var c’hadourienarc’hant, ha pa vijen deuet em bije tennet ar pez a zo d’in gant an interest.

²⁸ Lammit eta an talant diganthan; ha roit‐han d’an hini hen deuz dek talant.

²⁹ Rag d’an hini hen deuz, e vezo roet c’hoas, hag hen devezo muioc’h; mes digant an hini n’hen deuz ket, e vezo lammet memeus ar pez hen deuz.

³⁰ Taolit eta ar servicher didalvoudec‐se en devalijen a ziaveaz; eno e vezo ar gwelvan hag ar skrign‐dent.

³¹ Hogen, pa zeui Mab an den en he c’hloar, hag an holl elez santel ganthan, neuze ec’h azezo var an tron euz he c’hloar.

³² Hag an holl nationou a vezo dastumet dirazhan, hag hen a zispartio an eil diouz egile, evel ma tisparti ar mesaer an denved diouz ar bouc’hed.

³³ Hag e lakaio an denved a‐zeô dezhan, hag ar bouc’hed a‐gleiz.

³⁴ Neuze ar Roue a lavaro d’ar re a vezo a‐zeô dezhan: Deuit, c’houi pere a zo benniget gant va Zad, da bossedi en heritach ar rouantelez a zo bet preparet deoc’h abaoe crouidigez ar bed;

³⁵ rag naoun am euz bet, ha c’houi hoc’h euz roet da zibri d’in; sec’hed am euz bet, ha c’houi hoc’h euz roet da eva d’in; estranjour oun bet, ha c’houi hoc’h euz va digemeret;

³⁶ noaz e oann, ha c’houi hoc’h euz va gwisket; klanv e oann, hag hoc’h euz va bizitet; er prizon e oann, hag ez oc’h deuet d’am gwelet.

³⁷ Neuze ar re just a responto dezhan: Aotrou, pegoulz hon euz‐ni da velet o kaout naoun, hag hon euz roet da zibri d’id; pe o kaout sec’hed, hag hon euz roet da eva d’id?

³⁸ Ha pegoulz hon euz‐ni da velet estranjour, hag hon euz da zigemeret; pe noaz, hag hon euz da wisket?

³⁹ Ha pegoulz hon euz‐ni da velet klanv pe er prizon, hag ez omp deuet d’az kavout?

⁴⁰ Hag ar Roue a responto hag a lavaro dezhe: E gwirionez hen lavaran deoc’h, dre ma hoc’h euz great kement‐se da unan euz ar re vihana‐man euz va breudeur, hoc’h euz hen great d’in‐me va‐unan.

⁴¹ Neuze e lavaro ive d’ar re a vezo a‐gleiz: Tec’hit diouzin, tud milliget, hag it en tân eternel, a zo bet preparet evit an diaoul hag he elez;

⁴² rag naoun am euz bet, ha n’hoc’h euz ket roet da zibri d’in; sec’hed am euz bet, ha n’hoc’h euz ket roet da eva d’in;

⁴³ estranjour e oann, ha n’hoc’h euz ket va digemeret; noaz e oann, ha n’hoc’h euz ket va gwisket; klanv e oann hag er prizon, ha n’hoc’h euz ket va bizitet.

⁴⁴ Ar re‐man a responto ive: Aotrou, pegoulz hon euz‐ni da velet o kaout naoun, pe sec’hed, pe o veza estranjour, pe en noaz, pe klanv, pe er prizon, ha n’hon euz‐ni ket da zicouret?

⁴⁵ Hag hen a responto dezhe: E gwirionez hen lavaran deoc’h, pa n’hoc’h euz ket great kement‐se da unan euz ar re vihana‐man, n’hoc’h euz ket hen great d’in‐me va‐unan.

⁴⁶ Hag ar re‐man az ai kuit d’ar poaniou eternel; mes ar re just az ai er vuez eternel.