Mazhev 24 - Testamant Nevez 1897 (Jenkins)

CHABISTR XXIV.

¹ Pa oa Jesus o sortial euz an templ hag o vont kuit, he ziskibien a dostaaz outhan evit diskouez dezhan al labouriou kaer euz an templ.

² Ha Jesus a lavaraz dezhe: Ha na velit‐hu ket an holl draou‐ze? E gwirionez hen lavaran deoc’h, na vezo ket lezet aman an eil mean var egile, holl e vezint diskaret.

³ Ha pa oe azezet var menez Olived, he ziskibien a dostaaz outhan a‐du, hag a lavaraz dezhan: Lavar deomp peur e c’hoarvezo kement‐se, ha pehini a vezo ar sin euz da zonedigez hag euz a fin ar bed.

⁴ Ha Jesus, o respont, a lavaraz dezhe: Diwallit na dromplfe den ac’hanoc’h.

⁵ Rag meur a hini a zeuio em hano, en eur lavaret: Me eo ar C’hrist, hag e tromplint kalz a dud.

⁶ Klevet a refot komz euz a vrezelliou hag euz a vrud‐brezel; likit evez na vec’h troublet, rag red eo d’an holl draou‐ze c’hoarvezoud; mes ar fin na vezo ket c’hoas.

⁷ Rag eur bobl a zavo a‐enep eur bobl all, hag eur rouantelez a‐enep eur rouantelez all; ha beza e vezo kernez, ha bossen ha krennamant douar e meur a leac’h.

⁸ Mes kement‐se holl na vezo nemed commansamant ar poaniou.

⁹ Neuze e livrint ac’hanoc’h da veza tourmantet, hag e lazint ac’hanoc’h; hag e veot kaseet gant an holl nationou abalamour d’am hano.

¹⁰ Neuze ive kalz a vezo scandalizet, hag en em drahissint an eil egile, hag ho devezo kassoni an eil deuz egile.

¹¹ Ha meur a fals‐profet a zavo, hag a dromplo kalz a dud.

¹² Ha dre ma cresko ar fallentez, ar garantez a ienao e calon kalz a dud.

¹³ Mes an neb a gendalc’ho beteg ar fin, hennes a vezo salvet.

¹⁴ Hag an aviel‐man euz ar rouantelez a vezo prezeget dre ar bed holl, en testeni d’an holl nationou; ha neuze e teuio ar fin.

¹⁵ Pa velot eta el leac’h santel an abomination euz an dezolation, a behini hen deuz komzet ar profet Daniel (ra daolo‐plet an hini a lenno anezhan), neuze, ar re a vezo er Jude,

¹⁶ ra dec’hint er meneziou;

¹⁷ an hini a vezo var gorre an ti, diwallo da zisken evit kemeret tra e‐bed euz he di;

¹⁸ hag an hini a vezo er park, diwallo da zistrei var he giz evit kemeret he zillad.

¹⁹ Malheur d’ar gragez o tougen frouez, ha d’ar magerezed en deiziou‐ze!

²⁰ Pedit evit ne rankoc’h ket tec’hel er goanv, nag en deiz ar sabbat;

²¹ rag bez’ e vezo neuze eun affliction vraz, evel n’euz ket bet adaleg commansamant ar bed bete vreman, ha na vezo biken.

²² Ha ma na vije ket bet diveret an deiziou‐ze, na vije bet den saveteet; mes diveret e vezint abalamour d’ar re a zo choazet.

²³ Neuze, mar lavar unan‐benag deoc’h: Ar C’hrist a zo aman; pe: A‐hont ema; na gredit ket.

²⁴ Rag sevel a raio fals‐Christed, ha fals‐profeted hag a rai miraclou braz ha burzudou, evit trompla, mar gellont, ar re choazet ho‐unan.

²⁵ Setu c’houi avertisset breman.

²⁶ Rag‐se mar bez lavaret deoc’h: Ema ar C’hrist en dezert; n’az it ket: Ema er c’hambchou distro, na gredit ket.

²⁷ Rag, evel ma teu al luc’heden euz ar Zavheol ha ma sclera beteg ar C’huz‐heol, evel‐se ive e vezo donedigez Mab an den.

²⁸ Rag en pe leac’h‐benag ma vezo ar c’horf maro, eno en em zastumo an egled.

²⁹ Rag‐tal goude an affliction euz an deiziou‐ze, an heol a devalaio, hag al loar na roio ket he sclerijen, hag ar stered a gwezo euz an env, ha puissansou an envou a vezo bransellet.

³⁰ Neuze e vezo gwelet sin Mab an den en env; neuze ive an holl boblou euz an douar a vezo glac’haret, hag a skoio var boul ho c’halon, hag e velint Mab an den o tond var goabrennou an env, gant eur galloud hag eur c’hloar braz.

³¹ Hag hen a gasso he elez gant sôn skiltruz an drompil, hag an elez a zastumo assambles ar re choazet ganthan euz ar pevar avel, adaleg eur pen euz an env beteg ar pen all.

³² Hogen deskit eur barabolen dre ar vezen‐fiez: Pa gommans he brancou beza tener hag he deliou da zispaka, ec’h ouzoc’h penaos eo tost an hanv.

³³ Evel‐se ive c’houi, pa velot kement‐se holl, gouezit ervad ema tost Mab an den hag ema e‐kichen an nor.

³⁴ E gwirionez hen lavaran deoc’h, ar generation‐man na dremeno ket ken na vezo c’hoarvezet an holl draou‐ze.

³⁵ An env hag an douar a dremeno, mes va c’homzou‐me na dremenint ket.

³⁶ Mes den ne anavez an deiz nag an heur‐ze, nag an êlez euz an env ken‐neubeud, n’euz nemed va Zad hag ho anavez.

³⁷ Hag evel ma c’hoarvezaz en amzer Noe, evel‐se ive e c’hoarvezo pa zeuio Mab an den;

³⁸ rag, evel en deiziou araog an diluj, e oant o tibri hag oc’h eva, o timezi hag o rei da zimezi, beteg an deiz ma’z eaz Noe ebarz an arc’h;

³⁹ hag evel na ouient netra ken a zeuaz an diluj d’ho c’has holl ganthan; evel‐se ive e c’hoarvezo pa zeuio Mab an den.

⁴⁰ Neuze, deuz daou a vezo er park, unan a vezo kemeret hag egile lezet;

⁴¹ deuz diou a vezo o vala en eur vilin, unan a vezo kemeret hag e‐ben lezet.

⁴² Beillit eta; rag na ouzoc’h ket da be heur e tle dond hoc’h Aotrou.

⁴³ Hogen gouezit an dra‐man, penaos ma ouefe ar pen‐tiegez da be boent euz an noz e tle al laër dond, e veillfe ha na lezfe ket toulla he di.

⁴⁴ Rag‐se c’houi ive en em zalc’hit prest; rag Mab an den a zeuio d’an heur ha na sonjit ket.

⁴⁵ Piou eo eta ar servicher fidel ha fur a zo bet lakeat gant he aotrou da vestr var he diegez, evit rei d’he vevelien ho boued d’ar poent?

⁴⁶ Eürus ar servicher‐ze mar kav he aotrou anezhan oc’h ober evel‐se pa erruo.

⁴⁷ E gwirionez hen lavaran deoc’h, he lakaad a raio da gommandi var he holl vadou.

⁴⁸ Mes mar d’eo eur servicher fall, hag a lavar en he galon: Dale a ra va aotrou da zond;

⁴⁹ ha mar en em laka da skei gant he gen‐servicherien, da zibri ha da eva gant mezverien;

⁵⁰ aotrou ar servicher‐ze a zeuio d’an deiz na vezo ket ouz he c’hortoz, ha d’an heur na ouvezo ket;

⁵¹ hag e tispartio anezhan diouz ar re all, hag e roio dezhan he lod gant an hipocrited: eno e vezo ar gwelvan hag ar skrign‐dent.