Mazhev 23 - Testamant Nevez 1897 (Jenkins)

CHABISTR XXIII.

¹ Neuze Jesus a gomzaz ouz ar bobl, hag ouz he ziskibien, hag a lavaraz dezhe:

² Ar Scribed hag ar Farizianed a zo azezet var gador Moises.

³ Mirit eta, ha grit kement a lavaront deoc’h da ober; mes na rit ket hervez ho oberou, rag lavaret a reont, mes ne reont ket.

⁴ Rag eren a reont bec’hiou pounner, pere na heller ket da zougen, hag e lekeont anezhe var diou‐skoaz an dud; mes na fell ket dezhe lakaad ho biz d’ho finval.

⁵ Hag ober a reont ho holl oberou evit beza gwelet gant an dud; rag ledan a reont ho phulacteriou, hag asten a reont franjou ho dillad;

⁶ karoud a reont ar plasou kenta er festou, hag ar c’hadoriou kenta er sinagogou;

⁷ ha beza saludet er plasennou public, ha beza galvet gant an dud: Mestr, mestr.

⁸ Mes c’houi, ne lakit ket gervel ac’hanoc’h, Mestr; rag unan hep‐ken eo ho mestr, ar C’hrist; ha c’houi holl a zo breudeur.

⁹ Ha na c’halvit den var an douar ho tad; rag n’hoc’h euz nemed eun Tad hepken, an hini a zo en envou.

¹⁰ Ha na lakit ket gervel ac’hanoc’h doctored; rag n’hoc’h euz nemed eun Doctor hepken, pehini eo ar C’hrist.

¹¹ Mes ra vezo ar brassa en ho touez ho servicher.

¹² Rag piou‐benag en em huellaio, a vezo izelleet; ha piou‐benag en em izellaio, a vezo huelleet.

¹³ Malheur deoc’h, Scribed ha Farizianed hipocrit, abalamour ma serrit rouantelez an envou ouz an dud; na antreit ket ebarz hoc’h‐unan, ha na lezit ket da antren ar re a fell dezhe mond ebarz.

¹⁴ Malheur deoc’h, Scribed ha Farizianed hipocrit, abalamour ma tevorit tiez an intanvezed, ha ma rit evit digarez pedennou hir; evit se e recevfot eur varnedigez vrassoc’h.

¹⁵ Malheur deoc’h, Scribed ha Farizianed hipocrit, rag redec a rit dre ar mor ha dre an douar evit ober eun diskibl; hag eur vech great, e rentit anezhan mab d’an ifern diou wech muioch egedoc’h hoc’h‐unan.

¹⁶ Malheur deoc’h, renerien dall, pere a lavar: Mar deu unan‐benag da douat dre an templ, an dra‐ze n’ed eo netra; mes an hini a dou dre aour an templ, hennes a rank derc’hel d’he c’her!

¹⁷ Tud diskiant ha dall; pehini eo ar brassa, pe an aour, pe an templ dre behini eo santifiet an aour?

¹⁸ Ha piou‐benag, eme c’houi, hen deuz touet dre an aoter, an dra‐ze n’eo netra; mes mar hen deuz touet dre an offrans pehini a zo varnezhi, e ranko derc’hel d’he c’her.

¹⁹ Tud diskiant ha dall! rag pehini eo ar brassa, pe an offrans, pe an aoter dre behini eo santifiet an offrans?

²⁰ Piou‐benag eta a dou dre an aoter, a dou dreizhi, ha dre gement a zo varnezhi;

²¹ ha piou‐benag a dou dre an templ, a dou dre an templ ha dre an hini a zo o choum enhan;

²² ha piou‐benag a dou dre an env, a dou dre dron Doue, ha dre an hini a zo azezet varnezhan.

²³ Malheur deoc’h, Scribed ha Farizianed hipocrit, rag paea a rit an deog var ar menth, var an anet, ha var ar c’houmin, hag e lezit an traou ar muia talvoudec euz al lezen, ar justis, an drugarez hag ar fidelite. An traou‐man a oa dleet da ober, hep tremen ober ar re‐all.

²⁴ Renerien dall, pere a zil eur fubuen, hag a lounk eur c’hanval!

²⁵ Malheur deoc’h, Scribed ha Farizianed hipocrit, rag netaad a rit an diaveaz euz an tas hag euz ar plad, ha c’houi en diabarz a zo leun a laeronsiou hag a zireizded.

²⁶ Farizian dall, neta da genta an diabarz euz an tas hag euz ar plad, evit ma teui ive an diaveaz da veza nêt.

²⁷ Malheur deoc’h, Scribed ha Farizianed hipocrit, rag henvel oc’h ouz beziou gwennet, pere a zo kaer da velet en diaveaz, mes pere a zo en diabarz leun a eskern tud varo hag a bep seurt traou brein.

²⁸ Evel‐se c’houi ive, en diaveaz a zeblant d’an dud beza just, mes en diabarz ez oc’h leun a hipocrizi hag a fallagriez.

²⁹ Malheur deoc’h, Scribed ha Farizianed hipocrit, rag sevel a rit beziou d’ar brofeted, hag ec’h ornit beziou ar re just;

³⁰ Hag e livirit: Mar vijemp bet en amzer hon tadou, na vijemp ket bet en em lakeat ganthe da skuill goad ar brofeted.

³¹ Evel‐se c’houi a zo testou a‐enep deoc’h hoc’h‐unan, penaos ez oc’h bugale ar re ho deuz lazet ar brofeted.

³² Ha c’houi a laka bar muzur ho tadou.

³³ Serpanted, raç an aered‐viber, penaos e tec’hot‐hu diouz barnedigez an ifern?

³⁴ Dre‐ze, setu, e kassan deoc’h profeted, tud fur ha Scribed; c’houi a lazo hag a grucifio lod; a skourjezo lod all en ho sinagogou, hag a bersecuto anezhe deuz an eil kear d’eben.

³⁵ Evit ma kwezo varnoc’h an holl oad just a zo bet skuilliet var an douar, adaleg goad Abel, an den just‐se, bete goad Zakari, mab Barachi, a zo bet lazet ganeoc’h etre an templ hag an aoter.

³⁶ E gwirionez hen lavaran deoc’h, kement‐se holl a gwezo var ar generation‐man.

³⁷ Jerusalem, Jerusalem, te, pehini a laka ar brofeted d’ar maro, hag a vein ar re a vez kasset d’id, na ped gwech n’em euz‐me ket c’hoanteet dastum da vugale, evel ma tastum ar iar he lapoused dindan he diou‐askel, ha n’eo ket bet fellet deoc’h.

³⁸ Setu, ho ti a ia da veza rentet dezert.

³⁹ Rag hen lavaret a ran deoc’h, n’am gwelot mui, ken na lavarfot: Benniget ra vezo an hini a zeu en hano an Aotrou!