Mazhev 22 - Testamant Nevez 1897 (Jenkins)

CHABISTR XXII.

¹ Jesus a gomzaz c’hoas outhe dre barabolennou, hag a lavaraz:

² Rouantelez an envou a zo henvel ouz eur roue pehini a reaz eured he vab;

³ hag e kassaz he vevelien da c’hervel ar re a oa bet pedet d’an eured; mes ne fellaz ket dezhe dond.

⁴ Kas a reaz adare mevelien all en eur lavaret dezhe: Livirit d’ar re a zo pedet: Va lein em euz preparet: va eujened ha va loened lard a zo lazet, ha pep tra a zo prest; deuit d’an eured.

⁵ Mes int na rejont van e‐bed euz a gement‐se, hag ez ejont kuit, unan d’he vereri, hag eun all d’he drafic.

⁶ Hag ar re all a grogaz en he vevelien, ho gwall‐dretaz, hag ho lazaz.

⁷ Pa glevaz ar roue kement‐se, e savaz drouk enhan, hag o veza kasset he zoudarded di, e tistrujaz ar vuntrerien‐ze, hag e tevaz ho c’hear.

⁸ Neuze e lavaraz d’he vevelien: An eured a zo prest, mes ar re a oa pedet ne oant ket dign.

⁹ It eta er c’hroaz‐hentchou, ha pedit d’an eured ar re holl a gavfot.

¹⁰ Hag he vevelien, o veza eat dre an hentchou, a zastumaz kement a gavjont a dud, mad ha fall, ha sal an eured a oe karget a dud pere a oa ouz taol.

¹¹ Hag ar roue, o veza eat ebarz evit gwelet ar re a oa ouz taol, a velaz eno eun den ha n’hen doa ket gwisket eur zae a eured.

¹² Hag e lavaraz dezhan: Va mignon, penaos oud‐de antreet aman hep kaoud eur zae a eured? Hag he‐man a choumaz serret he c’henou.

¹³ Neuze ar roue a lavaraz d’ar vevelien: Ereit he zaouarn hag he dreid, kassit anezhan kuit, ha taolithen en devalijen a‐ziaveaz; eno e vezo ar gwelvan hag ar skrign‐dent.

¹⁴ Rag kalz a zo galvet, mes neubeud a zo choazet.

¹⁵ Neuze ar Farizianed, o veza eat kuit, en em guzuliaz evit klask tapoud anezhan en he gomzou.

¹⁶ Hag e kasjont dezhan lod euz ho diskibien gant an Herodianed, pere a lavaraz dezhan: Mestr, gouzoud a reomp penaos ez oud gwirion, ha penaos e teskez hent Doue hervez ar wirionez, hep sourcial petra vez an den, rag na zellez ket ouz apparans an dud.

¹⁷ Lavar deomp eta petra a zeblant did euz an dra‐man: Ha permetet eo, pe n’hen d’eo ket, paea an taillou da Cezar?

¹⁸ Mes Jesus, oc’h anaoud ho fallagriez, a lavaraz: Hipocrited ma’z oc’h! perag e tentit‐hu ac’hanoun?

¹⁹ Diskouezit d’in ar pez arc’hant gant pehini e paer an taillou. Hag int a ziskouezaz dezhan eun diner.

²⁰ Hag hen a lavaraz dezhe: Imach piou, hag hano piou eo ar re‐man.

²¹ Int a lavaraz dezhan: Euz a Cezar. Neuze e lavaraz dezhe: Rentit eta da Cezar ar pez a zo da Cezar, ha da Zoue ar pez a zo da Zoue.

²² Pa glevjont kement‐se e oent souezet; hag o veza lezet anezhan, ec’h ejont kuit.

²³ En deiz‐ze ar Saduseed, pere a lavar n’euz ket a resurrection, a zeuaz d’he gavoud, hag e rejont ar goulen‐man outhan:

²⁴ Mestr, Moises hen deuz lavaret: Mar marv unan‐benag hep bugale, he vreur a zimezo d’he intanvez, hag a zavo lignez d’he vreur.

²⁵ Hogen, bez’ e oa en hon touez seiz breur, hag ar c’henta, goude beza bet dimezet, a varvaz; hag o veza n’hen doa ket a vugale, e lezaz he vreg gant he vreur.

²⁶ Evel‐se a reaz ive an eil, an trede, beteg ar seizved.

²⁷ Goude ar re‐man holl, ar vreg a varvaz ive.

²⁸ Er resurrection eta, da behini euz ar seiz e vezo‐hi greg, rag int holl ho deuz bet anezhi?

²⁹ Mes Jesus, o respont, a lavaraz dezhe: En errol emoc’h, o veza na anavezit ket ar Scrituriou, nag ar galloud euz a Zoue.

³⁰ Rag er resurrection, ar oazed na gemerint ket a c’hragez, nag ar gragez a briejou, mes beza e vezint evel elez Doue en env.

³¹ Hag evit ar pez a zell resurrection ar re varo, n’hoc’h euz‐hu ket lennet ar pez a zo bet lavaret deoc’h gant Doue:

³² Me eo Doue Abraham, Doue Isaac, ha Doue Jacob? Doue n’eo ket Doue ar re varo, mes Doue ar re veo.

³³ Hag ar bobl, o klevet kement‐se a oa souezet braz euz he gelennadurez.

³⁴ Ar Farizianed, o veza klevet hen doa serret ho genou d’ar Saduseed, en em assamblaz.

³⁵ Hag unan anezhe, eun doctor euz al lezen, a c’houlennaz diganthan evit hen amprouv:

³⁶ Mestr, pehini eo ar gourc’hemen braz euz al lezen?

³⁷ Jesus a lavaraz dezhan: Karoud a ri an Aotrou da Zoue euz da holl galon, hag euz da holl ene, hag euz da holl spered.

³⁸ Hennes eo ar c’henta hag ar gourc’hemen braz.

³⁹ Ha setu aman an eil hag a zo henvel outhan: Karoud a ri da nessa evel‐d’oud da‐unan.

⁴⁰ Euz an daou c’hourc’hemen‐ze e talc’h an holl lezen hag ar brofeted.

⁴¹ Hag ar Farizianed, o veza en em assamblet, Jesus a c’houlennaz diganthe:

⁴² Petra a zeblant deoc’h euz ar C’hrist? Da biou ez eo mab? Int a respontaz dezhan: Da Zavid.

⁴³ Hag hen a lavaraz dezhe: Penaos eta e c’halv David anezhan, dre ar Spered, he Aotrou, en eur lavaret: An Aotrou hen deuz lavaret d’am Aotrou:

⁴⁴ Azez a‐zeo d’in, bete ma lakain da inimied da scabel dindan da dreid?

⁴⁵ Mar galv eta David anezhan he Aotrou, penaos ec’h hell hen beza mab dezhan?

⁴⁶ Ha den na hellaz respont eur ger dezhan; hag adaleg an devez‐ze den na gredaz ken hen interroji.