Mazhev 20 - Testamant Nevez 1897 (Jenkins)

CHABISTR XX.

¹ Rag rouantelez an envou a zo henvel ouz eur pentiegez hag a ieaz er meaz beure‐mad da c’hopra labourerien evit he winien.

² Hag o veza great marc’had gant al labourerien eun diner evit eun devez, e kassaz anezhe d’he winien.

³ Mond a reaz c’hoas er meaz var‐dro an trede heur, hag e velaz darn all pere a oa var ar blasen hep ober netra, hag e lavaraz dezhe:

⁴ It ive c’houi d’am gwinien, hag e roin deoc’h ar pez a vezo just.

⁵ Hag ec’h ejont d’ar winien. Mond a reaz er meaz adare e‐tro ar c’houec’hved, hag an naoved heur, hag e reaz ar memeus tra.

⁶ Hag o veza eat er meaz e‐tro an unecved heur, e kavaz re all hag a oa dilabour, hag e lavaraz dezhe: Perag e choumit‐hu aze hed an deiz hep ober netra?

⁷ Int a respontaz dezhan: Dre n’eo deuet den e‐bed da c’hopra ac’hanomp. Hag hen a lavaraz dezhe: It ive c’houi d’am gwinien, hag e recevot ar pez a vezo just.

⁸ Pa oe deuet an abardaez, mestr ar winien a lavaraz d’he vevel braz: Galv al labourerien, ha ro dezhe ho gopr, o commans gant ar re ziveza beteg ar re genta.

⁹ Ar re a oa bet gopreet e‐tro an unecved heur o veza deuet, e recevjont peb a ziner.

¹⁰ Pa zeuaz ar re genta, e sonje dezhe e recevjent muioc’h; mes ar re‐man a recevaz ive peb a ziner.

¹¹ Ha pa ho doe recevet anezhan e vurmurent a‐enep ar pentiegez, en eur lavaret:

¹² Ar re ziveza‐ze n’ho deuz labouret nemed eun heur, hag ec’h euz lakeat anezhe ingal deomp‐ni, pere hon euz douget ar beac’h euz an deiz hag euz an domder.

¹³ Mes hen, o respont, a lavaraz da unan anezhe: Va mignon, na ran gaou e‐bed ouzid; ha n’ec’h euz‐te ket great marc’had ganen evit eun diner?

¹⁴ Kemer ar pez a zo d’id, ha kea kuit. Felloud a ra d’in rei d’an diveza‐man kement ha d’id.

¹⁵ Daoust ha n’eo ket permetet d’in ober ar pez a garan gant ar pez a zo d’in? Pe daoust ha da lagad‐te a zo fall, abalamour m’az oun‐me mad?

¹⁶ Evel‐se ar re ziveza a vezo ar re genta, hag ar re genta ar re ziveza; rag kalz a zo galvet, mes neubeud a zo choazet.

¹⁷ Ha Jesus, o pignad da Jerusalem, a gemeraz he zaouzec diskibl a‐gostez var an hent, hag a lavaraz dezhe:

¹⁸ Setu ni o pignat da Jerusalem, ha Mab an den a vezo livret da brinsed ar veleien ha d’ar Scribed, hag e condaonint anezhan d’ar maro,

¹⁹ hag e livrint anezhan d’ar Jentiled, evit ober goab anezhan, hen skourjeza, hag hen crucifia; mes an drede deiz e resussito.

²⁰ Neuze mam mibien Zebede a dostaaz outhan, gant he mibien, hag en em brosternaz da c’houlen eun dra‐benag diganthan.

²¹ Hag hen a lavaraz dezhi: Petra a fell d’id? Hi a lavaraz dezhan: Lavar ma vezo azezet an daou vab‐man d’in, unan a‐zeo d’id, hag egile a‐gleiz, en da rouantelez.

²² Mes Jesus a respontaz hag a lavaraz: Na ouzoc’h ket petra a c’houlennit. Gallout a hellit‐hu eva ar c’halir ez anme da eva, pe beza badezet gant ar vadiziant, a behini e tlean‐me beza badezet? Int a lavaraz dezhan: Gallout a reomp.

²³ Hag hen a lavaraz dezhe: Gwir eo ec’h evfot va c’halir, hag e veot badezet gant ar vadiziant a behini e vezin badezet; mes evit beza azezet a‐zeo hag a‐gleiz d’in, n’eo ket d’in‐me hen rei; kement‐se na vezo roet nemed d’ar re da bere ez eo destinet gant va Zad.

²⁴ Pa glevaz an deg all an dra‐ze e kemerjont kâs ouz an daou vreur‐ze.

²⁵ Ha Jesus, o veza galvet anezhe, a lavaraz dezhe: Gouzoud a rit penaos prinsed an nationou a zo mestr varnezhe, ha penaos ar re vraz a c’houarn anezhe gant otorite.

²⁶ Mes n’e ket evel‐se eo e tle beza en ho touez; er c’hontrol, piou‐benag a fello dezhan beza braz en ho touez, ra vezo servicher deoc’h.

²⁷ Ha piou‐benag a fello dezhan beza ar c’henta en ho touez, ra vezo esclav deoc’h,

²⁸ evel m’az eo deuet Mab an den, nann evit beza servichet, mes evit servicha hag evit rei he vuez da rançon evit kalz a dud.

²⁹ Hag evel m’az eant kuit euz a Jerico, eur bobl vraz a ieaz var he lerc’h.

³⁰ Ha setu daou zen dall, pere a oa azezet var bord an hent, o klevet e oa Jesus o tremen, a gommansaz da grial, en eur lavaret: Aotrou, Mab David, bez truez ouzomp!

³¹ Hag ar bobl a c’hourdrouze anezhe evit ober dezhe tevel; mes int a grie c’hoas krenvoc’h, en eur lavaret: Aotrou, Mab David, bez truez ouzomp!

³² Ha Jesus a choumaz en he za, hag o veza galvet anezhe, e lavaraz dezhe: Petra hoc’h euz c’hoant e rafen deoc’h?

³³ Hag e leverjont dezhan: Aotrou, ra vezo digoret hon daou‐lagad deomp.

³⁴ Ha Jesus, o kaout truez outhe, a douchaz ouz ho daou‐lagad, ha kerkent e veljont sclear, hag ec’h heuljont anezhan.