Mazhev 19 - Testamant Nevez 1897 (Jenkins)

CHABISTR XIX.

¹ Pa hen doe Jesus peur‐lavaret ar c’homzou‐ze, e ieaz kuit euz a C’halile, hag e teuaz e costeziou ar Jude, en tu‐all d’ar Jourdan.

² Ha kalz a bobl a ieaz var he lerc’h, hag hen a iac’heaz eno ho c’hlanvourien.

³ Dond a reaz ive Farizianed d’he gavout evit hen tenti, hag e leverjont dezhan: Ha permetet eo da eun den kas kuit he vreg n’euz fors evit pe seurt digarez?

⁴ Hag hen a respontaz dezhe: Ha n’hoc’h euz‐hu ket lennet penaos ar C’hrouer a reaz er pen‐kenta eur goaz hag eur vaouez; ha penaos hen deuz lavaret:

⁵ Abalamour da ze an den a zilezo he dad hag he vam, hag en em roio d’he vreg, hag ho daou ne vezint nemed eur c’hig hep‐ken?

⁶ Evel‐se n’ed int mui daou, mes eur c’hig hep‐ken. Arabad eo eta d’an den dispartia ar pez a zo bet unanet gant Doue.

⁷ Int a lavaraz dezhan: Perag eta hen deuz Moises gourc’hemenet rei d’ar vreg eur scrid a zivors, hag he c’has kuit?

⁸ Hen a lavaraz dezhe: Abalamour da galeder ho calonou eo hen deuz Moises permetet deoc’h kas kuit ho kragez; mes ne oa ket evel‐se er pen‐kenta.

⁹ Mes me a lavar deoc’h penaos piou‐benag a gasso kuit he vreg, nemed evit avoultriach a vez, hag a zimezo da eun all, a ra avoultriach; ha piou‐benag a zimezo da eur vreg kasset kuit, a ra ive avoultriach.

¹⁰ He ziskibien a lavaraz dezhan: Mar d’eo evel‐se stad an den gant ar vreg, n’eo ket mad dimezi.

¹¹ Mes hen a lavaraz dezhe: An holl n’int ket evit receo ar gomz‐ze, n’ez euz nemed ar re da bere ez eo bet roet ar galloud a gement‐se.

¹² Rag bez’ ez euz eunuked, hag a zo eunuked azaleg kov ho mam; re all pere a zo bet great eunuked gant an dud; ha bez’ ez euz re all pere a zo en em c’hreat eunuked ho‐unan abalamour da rouantelez an envou. Piou‐benag a hell compren an dra‐man, ra zeui d’her c’hompren.

¹³ Neuze e oe digasset dezhan bugaligou, evit ma lakaje he zaouarn varnezhe, ha ma pedje; mes an diskibien a reprene anezhe.

¹⁴ Mes Jesus a lavaraz; Lezit ar vugaligou, ha na zifennit ket outhe dond d’am c’havout; rag rouantelez an envou a zo d’ar re a zo henvel outhe.

¹⁵ Ha goude beza astennet he zaouarn varnezhe, ez eaz kuit ac’hane.

¹⁶ Ha setu ma teuaz unan hag a lavaraz dezhan: Mestr mad, petra a dlean‐me da ober a vad evit kaoud ar vuez eternel?

¹⁷ Hen a respontaz: Perag am galvez‐te mad? N’ez euz hini mad e‐bed, nemed Doue hep‐ken. Hogen mar fell d’id mond er vuez, mir ar gourc’hemenou. Pe re? emezhan. Jesus a respontaz dezhan:

¹⁸ Na lazi ket; na ri ket a avoultriach; na laeri ket; na liviri ket a desteni faoz; henor da dad ha da vam;

¹⁹ ha karoud a ri da nessa evel‐d’oud da‐unan. An den yaouank a lavaraz dezhan:

²⁰ Miret em euz an holl draou‐ze adaleg va yaouankiz; petra a vank d’in‐me c’hoas?

²¹ Jesus a lavaraz dezhan. Mar fell d’id beza parfet, kea, gwerz ar pez ec’h euz, ha ro‐hen d’ar beorien; hag e pezo eun tenzor en env; neuze, deuz hag heul ac’hanoun.

²² Mes, pa glevaz an den yaouank ar gomz‐se, ez eaz kuit gwall‐drist, rag madou braz hen doa.

²³ Neuze Jesus a lavaraz d’he ziskibien: E gwirionez hen lavaran deoc’h, dies eo da eun den pinvidic antren e rouantelez an envou.

²⁴ Ha me a lavar deoc’h c’hoas: Ezetoc’h eo da eur c’hanval tremen dre graouen eun nadoz, eged n’ed eo da eun den pinvidic antren e rouantelez Doue.

²⁵ He ziskibien, o veza klevet kement‐se, a oe souezet braz, hag e lavarent: Piou eta a hell beza salvet?

²⁶ Ha Jesus, o sellet outhe, a lavaraz dezhe: Evit an dud, an dra‐ze a zo impossubl: mes evit Doue, pep tra a zo possubl.

²⁷ Neuze Per, o komz outhan, a lavaraz: Setu, ni hon euz dilezet pep tra, hag hon euz da heuliet; petra ’ta a erruo evidomp‐ni?

²⁸ Ha Jesus a lavaraz dezhe: E gwirionez e lavaran deoc’h, penaos c’houi, pere hoc’h euz va heuliet, en eil c’hanedigez, pa azezo Mab an den var dron he c’hloar, e veot ive azezet var daouzec tron, o varna an daouzec tribu a Israel.

²⁹ Ha kement hini hen devezo dilezet ties, pe breudeur, pe c’hoarezed, pe tad, pe vam, pe greg, pe bugale, pe douarou, abalamour d’am hano, a recevo kant gwech kemend all, hag ec’h herito euz ar vuez eternel.

³⁰ Mes kalz euz ar re genta a vezo ar re ziveza; hag ar re ziveza a vezo ar re genta.