Mazhev 17 - Testamant Nevez 1897 (Jenkins)

CHABISTR XVII.

¹ C’houec’h devez goude Jesus a gemeraz ganthan Per, Jakes, ha Ian, he vreur, hag ho c’hassaz a‐gostez var eur menez huel.

² Hag e oe transfiguret dirazhe; he vizach a zeuaz lugernuz evel an heol, hag he zillad skeduz evel ar sclerijen.

³ Er memeus amzer e veljont Moises hag Elias, pere a gomze ganthan.

⁴ Neuze Per o komz, a lavaraz da Jesus: Aotrou, mad eo deomp choum aman; mar fell d’id, greomp aman teir danten; unan evidoud, unan evit Moises, hag unan evit Elias.

⁵ Pa oa c’hoas o komz, eur goabren lugernuz a c’holoaz anezhe; hag eur vouez, o tond er meaz euz ar goabren a lavaraz: He‐man eo va Mab muia‐karet, e pehini eman va holl joa; selaouit anezhan.

⁶ An diskibien, o klevet ar vouez‐ze, a gwezaz var ho bizach, spouronet‐holl.

⁷ Mes Jesus o tostaad a douchaz outhe, hag a lavaraz dezhe: Savit, ha n’ho pezet ket a aoun.

⁸ Hag o veza savet ho daou‐lagad, na veljont den nemed Jesus he‐unan.

⁹ Ha pa oant o tisken divar ar menez, Jesus a reaz outhe an difen‐man: Na livirit da zen ar pez hoc’h euz gwelet, ken a vezo savet Mab an den a‐douez ar re varo.

¹⁰ Hag he ziskibien a c’houlennaz diganthan: Perag eta e lavar ar Scribed e tle Elias dond da genta?

¹¹ Ha Jesus a respontaz dezhe: Gwir eo e tlie Elias dond da genta, ha dressa pep tra.

¹² Mes hen lavaret a ran deoc’h, Elias a zo deuet dija, ha n’ho deuz ket anavezet anezhan; mes great ho deuz dezhan kement a felle dezhe; evel‐se ive eo e tle Mab an den souffr euz ho ferz.

¹³ Neuze an diskibien a gomprenaz hen doa komzet outhe divarben Ian ar Badezour.

¹⁴ Ha pa oent deuet etrezeg ar bobl, e tostaaz outhan eun den pehini en em daolaz d’an daoulin dirazhan, en eur lavaret:

¹⁵ Aotrou bez truez ouz va Mab, rag loarec ha gwall‐dourmantet eo; alies e kwez en tân, hag alies en dour.

¹⁶ Hag hen digasset em euz d’az diskibien, ha n’ho deuz ket gallet gwellaad anezhan.

¹⁷ Ha Jesus a respontaz hag a lavaraz: O raç difeiz ha fallagr, bete pegeit e vezin‐me ganeoc’h? bete pegeit ec’h andurin‐me ac’hanoc’h? Digassithen aman d’in.

¹⁸ Ha Jesus a c’hourdrouzaz an drouk‐spered, hag he‐man a zortiaz euz ar bugel; ha divar an heur‐ze ar bugel a oe iac’heet.

¹⁹ Neuze an diskibien a zeuaz da gavout Jesus en eul leac’h distro, hag e leverjont dezhan: Perag n’hon euz‐ni ket gallet kas an drouk‐spered‐se kuit?

²⁰ Ha Jesus a lavaraz dezhe: Abalamour d’ho neubeud a feiz eo; rag e gwirionez hen lavaran deoc’h, mar ho pije feiz kement hag eur c’hreunen zezo, e lavarjec’h d’ar menez‐man: Kerz ac’hann du‐hont, hag ez aje, ha netra na vije impossubl deoc’h.

²¹ Mes ar seurt drouk‐sperejou n’ed eont kuit nemed dre ar beden hag ar iûn.

²² Hogen pa oent distro en Galile, Jesus a lavaraz dezhe: Mab an den a dle beza livret etre daouarn an dud;

²³ ha lakaad a raint anezhan d’ar maro; mes resussita a rai an drede deiz. Hag an diskibien a oe glac’haret meurbed.

²⁴ Ha pa oent erruet en Cafarnaüm, ar re a receve an didrakmou (arc’hant an taillou), a dostaaz ouz Per, hag a lavaraz dezhan: Daoust hag ho mestr na bae ket ive an didrakmou?

²⁵ He‐man a respontaz: Eo. Ha pa oe eat en ti, Jesus a zialbennaz anezhan, en eur lavaret: Petra a gav d’id, Simon? digant piou e kemer rouane an douar an taillou pe ar gwiriou? Digant ho bugale ho‐unan, pe digant an estranjourien?

²⁶ Per a lavaraz: Digant an estranjourien. Jesus a respontaz dezhan: Ar vugale ’ta a zo kuit d’ho faea.

²⁷ Koulskoude gant aoun ne deufemp d’ho scandaliza, kea d’ar mor, ha taol eun higen, ha kemer ar c’henta pesk a zavo; ha pa pezo digoret he c’henou, e kavi eur stater (eur pez arc’hant); kemer anezhan, ha ro anezhan dezhe evidoun hag evidoud.