Mazhev 15 - Testamant Nevez 1897 (Jenkins)

CHABISTR XV.

¹ Neuze Scribed ha Farizianed a zeuaz euz a Jerusalem da gavout Jesus, hag e leverjont dezhan:

² Perag e tor da ziskibien‐te tradition ar re goz? rag ne walc’hont ket ho daouarn pa zebront ho frêd.

³ Mes hen a respontaz dezhe: Ha c’houi, perag e torrit‐hu gourc’hemen Doue dre ho tradition?

⁴ Rag Doue hen deuz roet ar gourc’hemen‐man: Henor da dad ha da vam; ha c’hoas: Piou‐benag a lavaro malloz var he dad pe var he vam, ra vezo lakeat d’ar maro.

⁵ Mes c’houi a lavar: Piou‐benag a lavaro d’he dad pe d’he vam: Kement am euz evit gallout da zicour a zo eun donezon consacret da Zoue, hennes na ranko ket henori he dad pe he vam.

⁶ Hag evel‐se c’houi hoc’h euz diskaret gourc’hemen Doue gant ho tradition.

⁷ Hipocrited! profetiset mad hen deuz Izaias divar ho pen, pa hen deuz lavaret:

⁸ Ar bobl‐man a dosta ouzin gant ho genou, hag a henor ac’hanoun gant ho muzelou; mes ho c’halon a zo gwall bell diouzin.

⁹ Mes en vên eo ec’h henoront ac’hanoun, o tiski doctrinou hag a zo gourc’hemenou tud.

¹⁰ Hag o veza galvet ar bobl, hen a lavaraz dezhe: Klevit ha comprenit an dra‐man:

¹¹ N’eo ket ar pez a ia er genou co a souil an den; mes ar pez a zeu er meaz euz ar genou, setu eno ar pez a souil an den.

¹² Neuze he ziskibien a dostaaz hag a lavaraz dezhan: Ha n’ec’h euz‐te ket anavezet eo bet scandalizet ar Farizianed pa ho deuz klevet ar pez ec’h euz lavaret?

¹³ Mes hen a respontaz: Kement planten ha n’eo ket bet plantet gant va Zad celestiel, a vezo dic’hriziennet.

¹⁴ Lest anezhe; ar re ze a zo renerien dall o rên ar re dall; hogen mar bez eun den dall o rena eun den dall e kwezint ho daou er poull.

¹⁵ Neuze Per, o komz outhan, a lavaraz: Displeg deomp ar barabolen‐ze.

¹⁶ Ha Jesus a lavaraz: Daoust ha c’houi ive a zo c’hoas hep intentamant?

¹⁷ Ha na gomprenit‐hu ket c’hoas penaos kement a ia er genou a zisken er c’hov, hag a vez taolet el leac’hiou distro.

¹⁸ Mes ar pez a zeu er meaz euz ar genou, a zeu euz ar galon, hag an traou‐ze eo ar re a souil an den.

¹⁹ Rag euz ar galon eo e teu ar sonjezonou fall, al lazerezou, an avoultriajou, al libertinach, al laeronsiou, ar fals testeniou, ar blasphemou.

²⁰ Setu eno an traou a souil an den; mes debri hep beza gwalc’het he zaouarn na souil ket an den.

²¹ Ha Jesus a ieaz ac’hane, hag en em dennaz e costeziou Tir a Sidon.

²² Ha setu eur vreg euz a Ganaan, hag a zeue euz ar c’hosteziou‐ze, a griaz, o lavaret dezhan: Aotrou, mab David! bez truez ouzin! va merc’h a zo gwall‐dourmantet gant an drouk‐spered.

²³ Mes hen na respontaz ger e‐bed dezhi. Hag he ziskibien a dostaaz, hag a bedaz anezhan, en eur lavaret: Kas anezhi kuit, rag crial a ra var hon learc’h.

²⁴ Hag hen a respontaz: N’oun bet kasset nemed etrezeg an denved kollet euz a di Israel.

²⁵ Neuze hi a dostaaz, hag en em brosternaz, en eur lavaret: Aotrou! sicour ac’hanoun.

²⁶ Hen a respontaz: N’eo ket mad kemeret bara ar vugale, hag hen teurel d’ar chass bihan.

²⁷ Mes hi a lavaraz: Gwir eo, Aotrou! koulskoude ar chass bihan a zebr ar bruzun a gwez divar daol ho mistri.

²⁸ Neuze Jesus a respontaz hag a lavaraz dezhi: Greg! da feiz a zo braz; ra vezo great d’id evel ma c’hoanteez. Hag he merc’h a oe iac’heet var an heur‐ze.

²⁹ Jesus, o veza eat ac’hane, a zeuaz tost da vor Galile; hag o veza pignet var eur menez, ec’h azezaz eno.

³⁰ Ha bandennou braz a dud a zeuaz d’hen kavout, o tigas ganthe re gam, re dall, re vud, re vac’haniet, ha kalz a glanvourien all, hag e lekejont anezhe e c’harz treid Jesus; hag hen ho iac’heaz.

³¹ En hevelep doare ma oe ar bobl en admiration, o velet an dud mud o komz, an dud vac’haniet pareet, ar re gam o vale, hag ar re dall o velet; hag e c’hlorifient Doue Israel.

³² Neuze Jesus a c’halvaz d’he gavoud he ziskibien, hag a lavaraz dezhe: Truez em euz ouz ar bobl‐ze, rag tri devez zo emaint ganen, ha n’ho deuz netra da zibri; ha na fell ket d’in ho c’has kuit var iûn, gant aoun ne vankfe ho nerz dezhe en hent.

³³ Hag he ziskibien a lavaraz dezhan: A be leac’h ec’h helfemp‐ni kaoud awalc’h a vara er vro dezert‐man evit contanti kement a dud?

³⁴ Ha Jesus a lavaraz dezhe: Ped bara hoc’h euz‐hu? Hag e leverjont: Seiz, hag eun neubeut peskedigou.

³⁵ Neuze e c’hourc’hemenaz d’ar bobl azeza var an douar.

³⁶ Hag e kemeraz ar seiz bara hag ar pesked, hag o veza rentet grasou, e torraz anezhe, hag ho roaz d’he ziskibien, hag an diskibien ho roaz d’ar bobl.

³⁷ Hag e tebrjont holl, hag e oent rassaziet; hag e testumjont seiz panerad a damou choumet en ho dileac’h.

³⁸ Hogen, ar re ho doa debret a oa pevar mil den anezhe, hep counta ar groagez hag ar vugale.

³⁹ Goude beza kasset kuit ar bobl, Jesus a bignaz en eur vag, hag e teuaz var douarou Magdala.