Mazhev 14 - Testamant Nevez 1897 (Jenkins)

CHABISTR XIV.

¹ En amzer‐ze Herodes an Tetrark a glevaz ar pez a lavaret divarben Jesus;

² hag e lavaraz d’he zervicherien: Ian ar Badezour eo hennes; savet eo a‐douez ar re varo, hag abalamour da ze eo e vez great miraclou dreizhan.

³ Rag Herodes hen doa lakeat cregi en Ian, eren anezhan, hag he lakaad er prizon, abalamour da Herodias, greg Philip he vreur;

⁴ rag Ian a lavare dezhan: N’eo ket permetet d’id he c’haoud evit greg.

⁵ C’hoanteet hen divije lakaad anezhan d’ar maro; mes aoun hen doa rag ar bobl, rag Ian a oa kemeret ganthe evit eur profet.

⁶ Mes da deiz ginidigez Herodes, merc’h Herodias a zansaz dirazhe, hag e plijaz da Herodes;

⁷ en hevelep doare ma touaz rei dezhi kement a c’houlenje.

⁸ Hi, o veza bet aliet gant he mam, a lavaraz: Ro d’in aman, en eur plad pen Ian ar Badezour.

⁹ Hag ar roue a oe glac’haret; koulskoude abalamour d’he le, ha d’ar re a oa ouz taol ganthan, e c’hourc’hemenaz her rei dezhi.

¹⁰ Hag e kassaz tud da zibenna Ian er prizon.

¹¹ Hag he ben a oe digasset en eur plad, ha roet d’ar plac’h iaouank; hag hi a gassaz anezhan d’he mam.

¹² Hag he ziskibien a zeuaz, hag a gemeraz he gorf, hag e c’henterjont anezhan; hag e teujont d’hen lavaret da Jesus.

¹³ Ha Jesus, o veza klevet kement‐se, en em dennaz ac’hane en eur vag a‐du en eul leac’h distro. Pa glevaz ar bobl kement‐se, ec’h heuljont anezhan euz ar c’heariou var droad.

¹⁴ Ha pa deuaz Jesus ac’hane e velaz eur foul braz a dud; hag hen doe truez outhe, hag e iac’heaz ho c’hlanvourien.

¹⁵ Ha diouz an abardaez, he ziskibien a zeuaz d’he gavout, en eur lavaret: Al leac’h‐man a zo dezert ha divezad eo dija; kas kuit ar bobl, evit ma’z aint er villajennou, ha ma prenint boued.

¹⁶ Mes Jesus a lavaraz dezhe: N’eo ket red dezhe mond kuit; roit c’houi da zebri dezhe.

¹⁷ Lavaret a rejont dezhan: N’hon euz aman nemed pemp bara ha daou besk.

¹⁸ Hag hen a lavaraz: Digassit‐he aman.

¹⁹ Ha goude beza gourc’hemenet d’ar bobl azeza var ar yeot, e kemeraz ar pemp bara hag an daou besk, hag en eur zevel he zaou‐lagad etrezeg an env, e rentaz grasou; hag o veza torret anezhe, e roaz ar baraou d’he ziskibien, hag an diskibien, ho roaz d’ar bobl.

²⁰ Hag e tebrjont holl, hag e oent rassaziet; hag e tastumjont a damou choumet en ho dilearc’h daouzec panerad leun.

²¹ Hag ar re ho doa debret a oa var dro pemp mil den, hep counta ar groagez hag ar vugale.

²² Kerkent goude Jesus a reaz d’he ziskibien sevel er vag, ha mond araog dezhan en tu all e‐pad ma vije o kas kuit ar bobl.

²³ Ha goude m’hen doe kasset ar bobl, hen a bignaz he‐unan var ar menez evit pedi; hag an noz o veza deuet, e oa eno he‐unan.

²⁴ Hogen ar vag a oa neuze e‐kreiz ar mor, gwall‐gasset gant an tarzou‐mor, rag an avel a oa a‐enep.

²⁵ Ha d’ar bevare veilladen euz an noz, Jesus a ieaz d’ho c’havoud o vale var ar mor.

²⁶ Ha pa velaz an diskibien anezhan o vale var ar mor, e oent troublet, hag e leverjont: Eun teuz eo; hag e crijont gant ar spount.

²⁷ Mes kerkent Jesus a gomzaz outhe, en eur lavaret: Ho pezet fizians; me eo, n’ho pezet ket a aoun.

²⁸ Ha Per a respontaz dezhan, o lavaret; Aotrou! mar d’eo te, ro urz d’in da vond d’az kavout var an doureier.

²⁹ Jesus a lavaraz dezhan: Deuz. Ha Per a ziskennaz euz ar vag, hag a valeaz var an dour, evit mond da gavout Jesus.

³⁰ Mes pa velaz e oa krenv an avel, e teuaz aoun dezhan; hag evel ma commanse da anfonsi, hen a griaz, o lavaret: Aotrou! Savetâ ac’hanoun.

³¹ Ha rag‐tal Jesus, oc’h asten he zorn, a grogaz enhan, hag a lavaraz dezhan: Den a neubeud a feiz, perag ec’h euz‐te douetet?

³² Ha pa oent pignet er vag, an avel a baouezaz.

³³ Neuze ar re a oa er vag a dostaaz, hag a adoraz anezhan, o lavaret: E gwirionez, te eo Mab Doue.

³⁴ Ha goude m’ho doa treuzet ar mor e teujont e bro Jennezaret.

³⁵ Ha pa ho doe tud al leac’h‐se anavezet anezhan, e kasjont tud dre an holl vro‐ze tro‐var‐dro, hag e tigasjont an holl dud klanv.

³⁶ Hag e pedent anezhan d’ho lezel da douch hep‐ken ouz ar bord euz he zae; ha kement hini a douchaz outhan a oe iac’heet.