Mazhev 11 - Testamant Nevez 1897 (Jenkins)

CHABISTR XI.

¹ Pa hen doe Jesus echuet da rei ar gourc’hemenou‐man d’he zaouzec diskibl, ez eaz ac’hane da gelen ha da brezeg en ho c’heariou.

² Hogen, Ian, o veza klevet komz er prizon euz a oberou ar C’hrist, a gassaz daou euz he ziskibien da lavaret dezhan:

³ Ha te eo an hini a dle dont, pe dleoud a reomp‐ni gortoz eun all?

⁴ Ha Jesus a respontaz hag a lavaraz dezhe: It, ha livirit da Ian ar pez a glevit hag a velit:

⁵ Ar re dall a vel, ar re gam a vale, ar re ler a zo neteet, ar re vouzar a glev, ar re varo a resussit, hag an aviel a zo prezeget d’ar re baour.

⁶ Eürus eo an hini n’en em scandalizo ket abalamour d’in.

⁷ Evel ma’z eant kuit, Jesus a gommansaz lavaret d’ar bobl divarben Ian: Da velet petra oc’h‐hu eat en dezert? Eur gorzen hijet gant an avel?

⁸ Mes da velet petra oc’h‐hu eat? Eun den gwisket gant dillad kaer? Setu, ar re a zoug dillad kaer a choum en tiez rouane.

⁹ Petra eta oc’h‐hu eat da velet? Eur profet? Ia, a lavaran deoc’h, ha mui eged eur profet.

¹⁰ Rag hennes eo an hini divarben pehini eo scrivet: Setu, e kassan va c’hannad dirag da faç, da brepari an hent en da raog.

¹¹ E gwirionez hen lavaran deoc’h, e‐touez ar re a zo ganet divar groagez, n’eo bet savet hini brassoc’h eged Ian ar Badezour; koulskoude, an hini distera en rouantelez an envou a zo brassoc’h egethan.

¹² Mes abaoe amzer Ian ar Badezour bete vreman, rouantelez an envou a vez kemeret dre fors, hag an dud violant eo a gemer anezhi.

¹³ Rag an holl brofeted hag al lezen ho deuz profetiset beteg Ian.

¹⁴ Ha mar fell deoc’h va c’hredi, hen eo an Elias‐se a dlie dont.

¹⁵ Ra zelaouo an neb hen deuz diou‐skouarn da glevet.

¹⁶ Mes ouz petra e comparachin‐me ar generation‐man? Henvel eo ouz bugale azezet er plasennou public, hag a gri d’ho c’hamaraded, en eur lavaret:

¹⁷ Sônet hon euz deoc’h gant ar fleüt, ha n’hoc’h euz ket danset; kanet hon euz hirvoudou deoc’h, ha n’hoc’h euz ket skuliet a zaelou.

¹⁸ Rag Ian a zo deuet, hep na dibri nag eva; hag e leveront: Eun drouk‐spered a zo enhan.

¹⁹ Mab an den a zo deuet, o tibri hag oc’h eva; hag e leveront: Setu eun debrer hag eun ever, eur mignon d’ar bublicaned, ha d’ar bec’herien. Mes ar furnez a zo bet justifiet gant he bugale.

²⁰ Neuze hen a gommansaz ober rebechou d’ar c’heariou en pere hen doa great an darnvuia euz he viraclou, abalamour n’ho doa ket en em gonvertisset.

²¹ Malheur d’id, Korazin! malheur d’id Betsaida! rag ma vije bet great en Tir hag en Sidon ar miraclou a zo bet great enoc’h, pell zo e vijent en em gonvertisset en eur gemer ar zac’h hag al ludu.

²² Rag‐se hen lavaran deoc’h: Eassoc’h e vezo da Dir ha da Sidon en deiz ar varn eged deoc’h‐hu.

²³ Ha te, Cafarnaüm, pehini a zo bet savet beteg an env, a vezo izeleet beteg an ifern; rag ma vije bet great en Sodom ar miraclou a zo bet great enoud, e vije c’hoas hirio en he za.

²⁴ Rag‐se hen lavaran deoc’h, eassoc’h e vezo da zouar Sodom en deiz ar varn eged d’id.

²⁵ En amzer‐ze Jesus a lavaraz: Da veuli a ran, ô Tad, Aotrou an env hag an douar, dre ma ec’h euz kuzet an traou‐man ouz ar re fur hag ar re wiziec, ha ma ec’h euz ho discleriet d’ar vugale vihan.

²⁶ Ia, o Tad, rag evel‐se eo bet kavet mad ganez.

²⁷ Pep tra a zo bet roet d’in gant va Zad; ha den na anao ar Mab nemed an Tad; ha den na anao an Tad nemed ar Mab, hag an hini da behini e vezo bet plijet gant ar Mab hen rei da anaoud.

²⁸ Deut d’am c’havout, c’houi holl pere a zo skuiz ha bec’hiet, ha me ho soulajo.

²⁹ Kemerit va ieô varnoc’h, ha deskit ganen, rag me a zo dous, hag humbl a galon, hag e kevfot ar repos d’hoc’h eneou;

³⁰ rag va ieô a zo eazet, ha va beac’h a zo skanv.