Sant Marc 9 - Testamant Nevez 1897 (Jenkins)

CHABISTR IX.

¹ Lavaret a reaz ive dezhe: E gwirionez e lavaran deoc’h, bez’ ez euz hinienou aman prezant, ha na varvint ket ken ho devezo gwelet rouantelez Doue o tond gant galloud.

² C’houec’h devez goude, Jesus a gemeraz ganthan Per, Jakes ha Ian, hag ho c’hassaz assambles ganthan a‐gostez var eur menez huel; hag e oe transfiguret dirazhe.

³ He zillad a zeuaz da veza lugernus, gwenn evel an erc’h, ker gwenn ken n’euz kandier e‐bed var an douar a helfe renta ker gwenn‐ze.

⁴ Hag e veljont dirazhe Elias ha Moises, pere a gomze gant Jesus.

⁵ Neuze Per, o komz ouz Jesus, a lavaraz: Mestr, aman eo mad deomp choum; greomp teir danten, unan evidoud, unan evit Moises, hag unan evit Elias.

⁶ Rag na ouie ket petra a lavare, dre ma oant spountet braz.

⁷ Hag e teuaz eur goabren hag a c’holoaz anezhe: hag eur vouez a zeuaz euz ar goabren, hag a lavaraz: He‐man eo va Mab muia‐karet, selaouit anezhan.

⁸ Ha kerkent o veza sellet en dro dezhe, na veljont mui den ganthe nemed Jesus hep‐ken.

⁹ Ha pa oant o tisken divar ar menez, e tifennaz outhe lavaret da zen ar pez ho doa gwelet, ken a vije resussitet Mab an den a‐douez ar re varo.

¹⁰ Hag e talc’hjont ar gomz‐se, o c’houlen an eil digant egile petra a zinifie resussita a‐douez ar re varo.

¹¹ Hag ec’h interrojent anezhan, en eur lavaret: Perag e lavar ar Scribed ez eo red e teufe Elias da genta?

¹² Hen a respontaz: Gwir eo penaos Elias a dle dond da genta hag e reizo a‐nevez an holl draou; ha penaos Mab an den, hervez ma’z eo scrivet divar he ben, a dle souffr kalz, ha beza disprizet.

¹³ Mes hen lavaret a ran deoc’h, Elias a zo deuet dija, evel ma’z eo scrivet divar he ben, ha great ho deuz dezhan kement a felle dezhe.

¹⁴ Hag, o veza deuet etrezeg an diskibien all, e velaz eur bobl vraz en dro dezhe, ha Scribed o tisput ganthe.

¹⁵ Ha rag‐tal, evel ma velaz an holl bobl‐ze anezhan, e oent souezet braz, hag o tiredec, e saludjont anezhan.

¹⁶ Neuze e c’houlennaz digant ar Scribed: Divarben petra e tisputec’h‐hu ganthe?

¹⁷ Hag unan euz ar bobl, o komz, a lavaraz: Mestr, digasset em euz d’id va mab pehini a zo dalc’het gant eur spered mud.

¹⁸ E pe leac’h‐benag ma ve pa grog enhan, e vez stlapet d’an douar ganthan; ne ra nemed eonenni, skrigna he zent, ha dizec’ha; hag em euz pedet da ziskibien d’hen kas kuit; mes n’ho deuz ket gallet.

¹⁹ Neuze Jesus a respontaz dezhe: O raç incredul, pegeit e choumin‐me ganeoc’h? pegeit e supportin‐me ac’hanoc’h? Digassit‐hen d’in.

²⁰ Int eta hen digassaz dezhan; ha kerkent ha ma velaz Jesus, ar spered a zifretaz anezhan gant nerz, hag e kwezaz d’an douar, hag en em rullie oc’h eonenni.

²¹ Neuze Jesus a c’houlennaz digant he dad: Pegeit amzer a zo abaoe ma c’hoarvez kement‐man ganthan? An tad a lavaraz: Adaleg he vugaleach.

²² Hag alies hen deuz ar spered‐se taolet anezhan en tan hag en dour, evit hen lakaad da berissa mes mar gellez eun dra‐benag, sicour ac’hanomp ha kemer truez ouzomp.

²³ Jesus a lavaraz: Mar gellez credi, pep tra a zo possubl d’an hini a gred.

²⁴ Ha rag‐tal tad ar bugel a griaz hag a lavaraz, en eur wela: Cridi a ran, Aotrou, sicour ac’hanoun em incredulite.

²⁵ Ha pa velaz Jesus penaos e tirede ar bobl assambles, e c’hourdrouzaz ar spered impur, en eur lavaret dezhan: Spered mud ha bouzar, me a c’hourc’hemen d’id, kea er meaz euz ar bugel‐ze, ha na antre mui enhan.

²⁶ Hag ar spered a zortiaz en eur leuskel eur griaden vraz hag en eur hija anezhan gant nerz; hag ar bugel a zeuaz da veza evel maro, en hevelep doare ma lavare meur a hini: Maro eo.

²⁷ Mes Jesus, o kemeret he zorn, a reaz dezhan sevel; hag e choumaz en he za.

²⁸ Pa oe eat Jesus en ti, he ziskibien a c’houlennaz diganthan a‐gostez: Perag n’hon euz‐ni ket gallet kas kuit an drouk‐spered‐se?

²⁹ Hag hen a respontaz dezhe: Ar seurt drouk‐sperejou‐ze na hellont beza kasset kuit nemed dre ar beden ha dre ar iun.

³⁰ Hag o veza eat ac’hane, e treuzjont ar Galile; ha Jesus na fellaz ket dezhan e vije gouezet kement‐man gant den.

³¹ Koulskoude e kelenne he ziskibien, hag e lavare dezhe: Mab an den a ia da veza livret etre daouarn an dud, hag e lakaint anezhan d’ar maro; mes goude ma vezo bet lakeat d’ar maro, e resussito an trede deiz.

³² Mes int na gomprenent ket ar gomz‐se; ha ne gredent ket goulen diganthan.

³³ Dond a reaz goude‐ze da Gapernaüm, ha pa edo en ti, e c’houlennaz diganthe: Divarben petra e tisputec’h‐hu etrezoc’h en hent?

³⁴ Mes int a dave; rag disputet ho doa etrezhe en hent, evit gouzoud piou anezhe a vije ar brassa.

³⁵ Hag hen, o veza azezet, a c’halvaz an daouzec hag a lavaraz dezhe: Mar fell da unan‐benag beza ar c’henta, e vezo an diveza euz an holl, ha servicher an holl.

³⁶ Hag o veza kemeret eur bugel bihan, e lekeaz anezhan en ho c’hreiz; hag, o terc’hel anezhan etre he zivrec’h, e lavaraz dezhe;

³⁷ Piou‐benag a receo unan euz ar vugaligou‐man em hano, a receo ac’hanoun; ha piou‐benag a receo ac’hanoun, n’eo ket me eo a receo, mes an hini hen deuz va digasset.

³⁸ Neuze Ian, o komz outhan, a lavaraz: Mestr, gwelet hon euz eun den ha na heul ket ac’hanomp, o kas kuit an drouk‐sperejou en da hano, hag hon euz difennet outhan ober kement‐se, abalamour ne heul ket ac’hanomp.

³⁹ Mes Jesus a lavaraz: Na zifennit ket outhan; rag n’euz den hag a ra burzudou em hano, hag a helfe kerkent drouk‐komz ac’hanoun.

⁴⁰ Rag an hini n’ema ket a‐enep deomp, a zo evidomp.

⁴¹ Ha piou‐benag a roio deoc’h da eva eur verennad dour em hano, abalamour ma’z oc’h d’ar C’hrist, e gwirionez hen lavaran deoc’h, na gollo ket he recompans;

⁴² mes piou‐benag a roio gwall exempl da unan euz ar re vihan‐ze pere a gred enoun, gwelloc’h e vez dezhan e vez staget ouz he c’houzoug eur mean milin, hag e vez taolet er mor.

⁴³ Mar gra da zorn d’id kweza er pec’hed, troc’h anezhan; gwell eo d’id antren monz er vuez, eget kaout da zaou zorn, ha mond en ifern, en tan ha na varvo biken,

⁴⁴ e pe leac’h ho freon na varv ket, hag an tan ne voug ket.

⁴⁵ Ha mar gra da droad d’id kweza er pec’hed, troc’h anezhan; gwell eo d’id antren er vuez, o kaoud eun troad hep‐ken, eget kaoud da zaou droad, ha beza taolet en ifern, en tan ha na varv, ket,

⁴⁶ e pe leac’h ho freon na varv ket, hag an tan ne voug ket.

⁴⁷ Ha mar gra da lagad d’id kweza er pec’hed, difram anezhan; gwell eo d’id antren en rouantelez Doue, o kaoud eul lagad kep‐ken, eget kaoud daou‐lagad, ha beza taolet en eun ifern a dan?

⁴⁸ e pe leac’h ho freon na varv ket, hag an tan ne voug ket.

⁴⁹ Rag pep den a vezo sallet gant tan; ha pep sacrifis a vezo sallet gant holen.

⁵⁰ Eun dra vad eo an holen; mes mar deu an holen da goll he vlaz, gant petra e sallot‐hu anezhan?

⁵¹ Ho pezet holen enoc’h hoc’h‐unan, ha bezit en peoc’h etrezoc’h.