Sant Marc 6 - Testamant Nevez 1897 (Jenkins)

CHABISTR VI.

¹ Jesus o veza eat achane, a zeuaz d’he vro he‐unan, hag he ziskibien a heulliaz anezhan.

² Ha pa oe deuet deiz ar sabbat, e commansaz da gelen er sinagog; ha kalz, o klevet anezhan, a oe souezet meurbed, hag e lavarent: A be leac’h e teu an holl draou‐ze d’an den‐man? Petra eo ar furnez‐ze a zo bet roet dezhan, hag a be leac’h e c’hoarvez ma veler burzudou ker braz great dre he zaouarn?

³ Ha n’eo ket he‐man ar c’halvez, mab Mari, breur Jakes, Joses, Jud ha Simon? He c’hoarezed ha n’emaint‐hi ket aman ganeomp? Hag e kavent leac’h enhan da veza scandalizet.

⁴ Mes Jesus a lavaraz dezhe: Eur profet n’ed eo disprizet nemed en he vro, e‐touez he gerent hag en he di he‐unan.

⁵ Ha na hellaz ober eno burzud e bed, nemed ma iac’heaz eun niver bihan a dud klanv, en eur lakaad he zaouarn varnezhe.

⁶ Hag e oa souezet o velet ne gredent ket; hag ez eaz dre ar villajennou tro‐var‐dro, en eur gelen.

⁷ Neuze e c’halvaz an Daouzec, hag e commansaz ho c’has daou‐ha‐daou, hag e roaz dezhe galloud var ar sperejou impur;

⁸ hag e tifennaz outhe kemer netra evit an hent, nemed eur vaz hep‐ken; na bissac’h, na bara, nag arc’hant en ho c’houriz;

⁹ mes e rankjent mond en hent gant sandalou en ho zreid, hag heb dougen diou zae.

¹⁰ Lavaret a reaz ive dezhe: E pe ti‐benag ma c’hantreot, choumit enhan bete ma’z eot kuit euz al leac’h‐se.

¹¹ Ha piou‐benag n’ho tigemoro ket, ha na zelaouo ket ac’hanoc’h, pa’z eot kuit ac’hane, hejit ar boultren euz ho treid en testeni a‐enep dezhe. E gwirionez hen lavaran deoc’h, eassoc’h e vezo da Sodom ha da Gomor en deiz ar varn, eged d’ar gear‐ze.

¹² O veza eat kuit, e prezegjont d’an dud en em gonvertissa,

¹³ hag e kasjont kuit kalz a zrouk‐sperejou, hag ec’h eoljont gant eôl kalz a dud klanv, hag e iac’hejont anezhe.

¹⁴ Hogen, ar roue Herodes a glevaz komz euz a Jesus, rag he hano a oa dija brudet braz, hag e lavaraz: Ar Ian‐ze, pehini a vadeze, a zo savet a‐douez ar re‐varo; ha se a zo caoz ma veler burzudou great ganthan.

¹⁵ Re all a lavare: Elias eo hennes; ha lod all a lavare: Eur profet eo, pe evel unan euz ar brofeted.

¹⁶ Herodes eta, o veza klevet komz divar he ben, a lavaraz: Hennes eo Ian, an hini em euz lakeat da zibenna; savet eo a‐douez ar re varo.

¹⁷ Rag Herodes hen doa kasset tud da gregi e Ian, hag hen doa lakeat he staga er prizon, abalamour da Herodias, greg Philip, he vreur, rag hen a oa dimezet dezhi.

¹⁸ Rag Ian a lavare da Herodes: N’eo ket permetet d’id kaout greg da vreur.

¹⁹ Rag‐se Herodias he doa drouk outhan, hag he doa c’hoant d’hen laza; mes na helle ket,

²⁰ rag Herodes a zouje Ian, o c’houzoud e oa eun den just ha santel; respet hen doa evithan; ober a rea memeus meur a dra hervez he avizou, hag hen selaou a rea gant plijadur.

²¹ Mes eun dervez favorabl a erruaz. Herodes, da zeiz he c’hanedigez, a reaz eur fest d’ar pennou braz euz he balez, d’he genta officerien, ha d’ar re huella euz a C’halile.

²² Merc’h Herodias a antreaz eno, hag o veza danset, ha plijet da Herodes ha d’ar re a oa azezet ouz taol ganthan, ar roue a lavaraz d’ar plac’h yaouank: Goulen diganen ar pez a giri, hag hen roin d’id.

²³ Hag e touaz dezhe: Petra‐benag a c’houlenni diganen, me hen roio d’id, ha pa vez an hanter euz va rouantelez.

²⁴ Hag, o veza eat er meaz, hou‐man a lavaraz d’he mam: Petra a c’houlennin‐me? Hag he mam a lavaraz: Pen Ian ar Badezour.

²⁵ Hag o veza deuet gant hast da gavoud ar roue, e reaz he goulen, en eur lavaret: Me a fell d’in e rofez breman d’in, en eur plad, pen Ian ar Badezour.

²⁶ Hag ar roue a oe glac’haret braz; koulskoude, abalamour d’al le hen doa great ha d’ar re a oa azezet assambles ganthan, na fellaz ket dezhan refusi anezhi.

²⁷ Hag ar roue a gassaz kerkent unan euz he warded, hag e c’hourc’hemenaz dezhan digas pen Ian.

²⁸ Ar gward a ieaz, hag a droc’haz he ben dezhan ebarz er prizon; hag o veza he zigasset en eur plad, e roaz anezhan d’ar plac’h yaouank, hag ar plac’h yaouank, hen roaz d’he mam.

²⁹ Ha diskibien Ian, o veza klevet kement‐se, a zeuaz hag a gemeraz he gorf, hag e lekejont anezhan en eur bez.

³⁰ Hag an ebestel a zeuaz assambles etrezeg Jesus, hag a gontaz dezhan pep tra, kement ho doa great, ha kement ho doa kelennet.

³¹ Hag e lavaraz dezhe: Deuit a‐gostez, en eul leac’h dezert, ha kemerit eun tam repos. Rag kement a dud a oa o tond hag o vond, ma n’ho doa ket zo‐ken amzer da zibri.

³² Hag ez ejont ac’hane en eur vag, a‐gostez en eul leac’h dizarempred.

³³ Mes ar bobl a velaz anezhe o vond kuit, ha kalz a anavezaz anezhan; hag e redjont di, var droad, euz an holl geariou, hag o veza en em gavet araog dezhe, en em dastumjont dirazhan.

³⁴ Neuze Jesus, o veza deuet er meaz, a velaz kalz a bobl; hag hen doe truez outhe, dre ma oant evel denved ha n’ho deuz pastor e‐bed; hag en em lekeaz da ziski kalz a draou dezhe.

³⁵ Hag evel ma oa dija divezad, he ziskibien a zeuaz d’he gavoud, hag e leverjont dezhan: Al leac’h‐man a zo dezert, ha divezad eo dija;

³⁶ kas anezhe kuit, evit ma’z aint er villajennou hag er bourcou divar dro, hag evit ma prenint bara; rag n’ho deuz netra da zibri.

³⁷ Hag e lavaraz dezhe: Roit c’houi hoc’h‐unan da zibri dezhe. Hag e leverjont dezhan: Ha mond a rankimp‐ni da brena evit daou c’hant diner a vara, evit rei dezhe da zibri?

³⁸ Hag e lavaraz dezhe: Ped bara hoc’h euz‐hu? It ha gwelet. Ha pa ho doe gwelet, e leverjont: Pemp bara ha daou besk.

³⁹ Neuze e c’hourc’hemenaz dezhe ober d’an holl azeza, a vandennou, var ar yeot glaz.

⁴⁰ Hag ec’h azezjont, a renkajou a gant hag a hanter‐kant.

⁴¹ Ha Jesus a gemeraz ar pemp bara hag an daou besk, hag, o sevel he zaou‐lagad var‐zu an env, e rentaz grasou, hag e toraz ar baraou, hag ho roaz d’he ziskibien, evit ho frezanti d’ar bobl; hag e rannaz ive an daou besk etrezhe holl.

⁴² Hag e tebrjont holl hag e oent rassaziet;

⁴³ hag e tastumjont daouzec panerad leun euz an demoranchou bara, hag euz ar pesked.

⁴⁴ Hogen, ar re ho doa debret euz ar baraou‐ze a oa var‐dro pemp mil den anezhe.

⁴⁵ Kerkent goude, e reaz d’he ziskibien pignad er vag, ha mond en he raog en tu all d’ar mor etrezeg Bethsaida, e‐pad ma kasje kuit ar bobl.

⁴⁶ Ha goude m’hen doe ho c’hasset kuit ez eaz var ar menez da bedi.

⁴⁷ Ha pa oe deuet an abardaez, ar vag a oa e‐kreiz ar mor, ha Jesus a oa he‐unan var an douar.

⁴⁸ Hag e velaz penaos ho doa kalz a boan o roenvia, dre ma oa an avel control dezhe; ha var‐dro ar bederved beilladen euz an noz, e teuaz etrezeg enhe, o vale var ar mor, ha c’hoant hen doa da veza araog dezhe.

⁴⁹ Mes int pa veljont anezhan o vale var ar mor, a gredaz penaos e oa eun teuz, hag e commansjont da grial.

⁵⁰ Rag holl e veljont anezhan, hag e oent spountet; mes kerkent hen a gomzaz outhe, hag a lavaraz dezhe: Ho pezet fizians, me eo; n’ho pezet ket aoun.

⁵¹ Neuze e pignaz en ho zouez er vag, hag an avel a davaz; hag e oant souezet meurbed hag en eun estlam euz ar vrassa.

⁵² Rag n’ho doa ket comprenet miracl ar baraou, dre ma oa ho c’halonou kaledet.

⁵³ Ha pa ho doe treuzet ar mor, e teujont da vro Jenezaret; hag e touarjont eno.

⁵⁴ Kerkent ha ma oent deuet er meaz euz ar vag, tud ar vro‐ze a anavezaz anezhan,

⁵⁵ hag e redjont dre an holl vro‐ze, hag en em lakjont da zigas dezhan var gweleou bihan ar re a oa klanv, e pe leac’h‐benag ma klevent e oa.

⁵⁶ Hag e pe leac’h‐benag ma c’hantree, er bourcou, pe er c’heariou, pe var ar meaz, e lekeent an dud klanv var ar plasennou, hag e pedet anezhan ma c’heljent da vihana touch ouz bord he zae; ha kement hini a douche outhan a oa pareet.