Sant Marc 5 - Testamant Nevez 1897 (Jenkins)

CHABISTR V.

¹ Arruout a rejont en tu all d’ar mor, en bro ar Gadarened.

² Ha kerkent ha ma oe diskennet Jesus euz ar vag, e teuaz d’he zialben eun den a oa o tond euz ar beziou, hag a oa possedet gant eur spered impur.

³ He‐man a rea he choumach er beziou, ha ne halle den he zerc’hel stag zoken gant chadennou;

⁴ rag alies, goude ma oa bet lakeat hualou var he dreid, ha ma oa bet staget gant chadennou, e oa bet diframmet ganthan ar chadennou ha toret an hualou; ha den na helle dond a‐ben anezhan.

⁵ Hag e choume atao, noz deiz, var ar meneziou hag er beziou, o crial hag oc’h en em vlonsa gant mein.

⁶ Pa hen doe gwelet Jesus a‐ziabell, e teuaz en eur redec d’en em brosterni dirazhan,

⁷ hag e lavaraz, en eur grial a vouez huel: Petra a zo etre te ha me, Jesus, Mab an Doue Holl‐galloudec! Da gonjuri a ran, dre an hano a Zoue, na dourmant ket ac’hanoun.

⁸ Rag Jesus a lavare dezhan: Spered impur, kea er meaz euz an den‐ze.

⁹ Ha Jesus a c’houlennaz diganthan: Pe hano ec’h euz? Hag hen a respontaz: Lejion eo va hano, o veza ma’z omp kalz.

¹⁰ Hag e pede stard anezhan na gasche ket anezhe er meaz euz ar vro‐ze.

¹¹ Hogen, bez’ e oa eno, var gostez ar meneziou, eur vanden vraz a voc’h o peuri.

¹² Hag an holl drouk‐sperejou a bede anezhan, en eur lavaret: Kas ac’hanomp er moc’h‐ze, evit ma’z aimp enhe. Ha rag‐tal Jesus a bermetaz dezhe.

¹³ Neuze ar sperejou impur‐ze, o veza eat er meaz, a antreaz er moc’h, hag ar vanden, a oa anezhe var‐dro daou vil, en em daolaz d’an traon er mor, hag e oent beuzet eno.

¹⁴ Hag ar re a oa o vessa ar moc’h a redaz kuit, hag a gassaz ar c’helou‐ze en kear ha var ar meaz.

¹⁵ Hag an dud a zeuaz er meaz da velet ar pez a oa c’hoarvezet; hag e teujont etrezeg Jesus, hag e veljont an hini a oa bet dalc’het gant al lejion a zrouk‐sperejou, azezet, gwisket hag en he skiant vad; hag e teuaz aoun braz dezhe.

¹⁶ Hag ar re ho doa gwelet kement‐se, a gontaz dezhe ar pez a oa c’hoarvezet gant an den possedet ha gant ar moc’h.

¹⁷ Neuze en em lekejont d’hen pedi da vont kuit euz ho bro.

¹⁸ Ha pa oe pignet er vag, an hini a oa bet dalc’het gant an drouk‐spered a bedaz anezhan d’hen lezel da choum ganthan.

¹⁹ Mes Jesus na bermetaz ket dezhan, hag a lavaraz dezhan: Kea d’az ti da gavoud da dud, ha lavar dezhe an traou burzudus hen deuz great an Aotrou d’id, ha penaos hen deuz bet truez ouzid.

²⁰ Hag ez eaz kuit, hag en em lakeaz da ziscleria en Decapolis an traou burzudus hen doa great Jesus dezhan; hag an holl a oe souezet braz.

²¹ Jesus o veza adare treuzet ar mor er vag hag eat d’an tu all, eur foul braz a dud en em zastumaz en dro dezhan, hag hen a oa tost d’ar mor.

²² Hag unan euz a chefou ar sinagog, hanvet Jairus, o veza gwelet anezhan, en em daolaz d’he dreid, hag a bedaz stard anezhan,

²³ en eur lavaret: Va merc’h vihan a zo prest da vervel; deuz da astenn da zaouarn varnezhi, evit ma vezo iac’heet, hag e vevo.

²⁴ Ha Jesus a ieaz ganthan; hag e oe heulliet gant eur bobl vraz, pehini a waske anezhan.

²⁵ Neuze eur vaouez, hag a oa klanv gant an dioada abaoe daouzec vloaz,

²⁶ hag he doa souffret kalz etre daouarn meur a vedeusin, hag he doa dispiniet kement he doa, hep kaout soulajamant e‐bed, mes kentoc’h en em gavet gwassoc’h c’hoas,

²⁷ o veza klevet komz euz a Jesus, a zeuaz aziadre e‐touez ar foul hag a douchaz ouz he zae.

²⁸ Rag lavaret a rea; Mar gellan hep‐ken touch ouz he zae, e vezin pare.

²⁹ Ha rag‐tal he dioada a ehanaz; hag e santaz en he c’horf e oa pareet euz he c’hlenved.

³⁰ Kerkent, Jesus oc’h anaoud enhan he‐unan ar vertuz a oa eat euz anezhan, a zistroaz e‐kreiz ar bobl, en eur lavaret: Piou hen deuz touchet ouz za dillad?

³¹ Hag he ziskibien a lavaraz dezhan: Gwelet a rez e wask ar bobl ac’hanoud, hag e leverez: Piou hen deuz touchet diouzin?

³² Hag e selle en dro dezhan, evit gwelet an hini hen doa great kement‐se.

³³ Neuze ar vaouez, spountet hag en eur grena, o c’houzoud ar pez a oa bet great enhi, a zeuaz hag en em daolaz d’he dreid, hag a lavaraz dezhan ar wirionez var he hed.

³⁴ Ha Jesus a lavaraz dezhi: Va merc’h, da feiz hen deuz da zaveteet; kea en peoc’h ha bez pare euz da glenved.

³⁵ Pa oa c’hoas o komz, e teuaz tud euz a di ar chef euz ar sinagog da lavaret dezhan: Da verc’h a zo maro; nachoum ket pelloc’h da skuiza ar Mestr.

³⁶ Kerkent ha m’hen doe Jesus klevet ar gomz‐ze, e lavaraz da chef ar sinagog: Bez hep aoun, cred hep‐ken.

³⁷ Ha na bermetaz da zen mond var he lerc’h, nemed da Ber, da Jakes ha da Ian, breur Jakes.

³⁸ O veza erruet en ti ar chef euz ar sinagog, e velaz an drouz vraz a oa ganthe ha tud o wela, hag o crial var bouez ho fen.

³⁹ Hag o veza eat ebarz, e lavaraz, dezhe: Perag e rit‐hu an drouz‐ze, ha perag e welit‐hu? N’eo ket maro ar bugel, mes kousket hep‐ken.

⁴⁰ Hag e rent goab anezhan; mes hen, goude beza great dezhe holl mond er meaz, a gemeraz tad ha mam ar bugel, hag ar re a oa assambles ganthan, hag ec’h antreaz el leac’h ma oa gourvezet ar bugel.

⁴¹ Hag, o veza kemeret he dorn, e lavaraz dezhi: Talitha coumi; da lavaret eo: Plac’h vihan, sav, me hen lavar d’id.

⁴² Ha rag‐tal ar plac’h vihan a zavaz hag en em lekeaz da vale, rag daouzec vloaz he doa. Hag e oent souezet meurbed.

⁴³ Hag e c’hourc’hemenaz stard dezhe lakaad evez na ouvezje den kement‐se; hag e lavaraz dezhe rei dezhi da zibri.