Sant Marc 4 - Testamant Nevez 1897 (Jenkins)

CHABISTR IV.

¹ Jesus a gommansaz adare da gelen e‐tal ar mor, ha kement a dud en em zastumaz var he dro, ma pignaz var eur vag, hag ec’h azezaz enhi,

² hag an holl bobl a oa var an douar e bord ar mor. Hag hen a zeske dezhe kalz a draou dre barabolennou, hag e lavare dezhe en he gelennadurez:

³ Selaouit: Eun hader a ieaz er meaz evit hada;

⁴ ha pa oa oc’h hada, e c’hoarvezaz da zarn euz an had kweza a‐hed an hent, hag al lapoused a zeuaz hag hen debraz holl;

⁵ lod all a gwezaz en eul leac’h meinee, e pe leac’h n’hen doa ket kalz a zouar; hag e savaz kerkent, dre ma ne oa ket doun en douar;

⁶ mes pa oe savet an heol, e oe devet, ha dre n’hen doa ket a c’hrizien, e sec’haz;

⁷ lod all a gwezaz e‐touez ar spern; hag ar spern a zavaz hag a vougaz anezhan, ha ne roaz ket a frouez;

⁸ ha lod all a gwezaz en douar mad hag e roaz frouez, pehini a zavaz hag a greskaz, en hevelep doare ma rapportaz unan tregont, eun all tri‐ugent, hag eun all kant.

⁹ Hag e lavaraz dezhe: Ra zelaouo an neb hen deuz diou‐skouarn da glevet.

¹⁰ Hogen, pa edo he‐unan, ar re a oa en dro dezhan gant an Daouzec, a c’houlennaz diganthan divarben ar barabolen‐ze.

¹¹ Hag e lavaraz dezhe: Roet eo deoc’h da anaoud myster rouantelez Doue; mes d’ar re a zo a ziaveaz e vez lavaret pep tra dre barabolennou;

¹² evit o velet, ma velint ha na apercevint ket; hag o klevet, ma klevint ha na gomprenint ket; gant aoun na zistrofent ha na vez pardonet dezhe ho fec’hejou.

¹³ Hag e lavaraz dezhe: Ha na gomprenit‐hu ket ar barabolen‐ze? Penaos eta e comprenot‐hu ar parabolennou all.

¹⁴ An hader a had ar Ger.

¹⁵ Ar re a zo a‐hed an hent, eo ar re a zo hadet ar Ger enhe, mes kerkent m’ho deuz he glevet, e teu Satan hag e lam kuit ar Ger a oa bet hadet en ho c’halonou;

¹⁶ er memeus doare, ar re a receo an had el leac’chiou meinec, eo ar re pere, kerkent ha ma klevont ar Ger, a receo anezhan gant joa;

¹⁷ mes n’ho deuz ket a c’hrizien enhe ho‐unan, ha ne badont nemed eur momant, neuze kerkent ha ma sav trubul pe bersecution abalamour d’ar Ger, e vezont scandalizet.

¹⁸ Hag ar re a receo an had e‐touez ar spern, eo ar re a zelaou ar Ger;

¹⁹ mes sourciou ar bed‐man, tromplerez ar madou ha meur seurt desiriou all o tond varnezhe, a voug ar Ger, hag e teu da veza difrouez;

²⁰ mes ar re ho deuz recevet an had en douar mad, eo ar re a zelaou ar Ger, hag a receo anezhan, hag a zoug frouez, unan tregont, eun all tri‐ugent, hag eun all kant.

²¹ Lavaret a eure c’hoas dezhe: Daoust ha digasset e vez eur c’houlaouen evit he lakaad dindan eur boezel, pe dindan eur gwele? Ha n’ed eo ket kentoc’h evit he lakaad var eur c’hantoleur?

²² Rag n’euz netra kuzet ha na dle beza discleriet, ha netra goloet ha na dle beza rentet anat.

²³ Mar hen deuz unan‐benag diou‐skouarn da glevet, ra zelaouo.

²⁴ Lavaret a reaz c’hoas dezhe: Likit evez ouz ar pez a glevit. Diouz ar muzur gant pehini e vuzurit e vezo muzuret deoc’h, ha deoc’h‐hu pere a zelaou e vezo roet c’hoas muioc’h.

²⁵ Rag an neb hen deuz e vezo roet dezhan; mes an hini n’hen deuz ket, e vezo lammet diganthan zoken ar pez hen deuz.

²⁶ Lavaret a reazc’hoas: Rouantelez Doue a zo henvel ouz eun den hag hen deuz taolet had en douar;

²⁷ pe hen a gousko pe hen a vezo var ar bale, koulz en noz evel en deiz, an had ne ehan ket da ziwann ha da greski hep ma oar an den penaos.

²⁸ Rag an douar a ro anezhan he‐unan, da genta ar yeot, neuze an damoezen, ha goude‐ze ar c’hreunen en damoezen.

²⁹ Ha pa vez dare ar frouez, e lekeer rag‐tal ar fals enhan, rag an eost a zo deuet.

³⁰ Lavaret a eure c’hoas: Deuz a betra e lavarimp ez eo henvel rouantelez Doue, pe dre be seurt parabolen ec’h hallimp‐ni hen rei da gompren?

³¹ Henvel eo ouz eur c’hreunen moutard, pehini, pa vez hadet, a zo ar bihana euz an holl hadou a vez taolet en douar;

³² mes goude ma vez hadet, e sav hag e teu da veza brassoc’h eged an holl louzou all, hag e taol brancou braz, en hevelep doare ma hell lapoused an env choum dindan he disheol.

³³ Dre galz a barabolennou euz ar seurt‐se e tisclerie dezhe ar Ger, hervez ma c’hallent compren anezhan.

³⁴ Ha na gomze ket outhe hep parabolen; mes, pa en em gave he‐unan gant he ziskibien, e tisclerie pep tra dezhe.

³⁵ En devez‐se, pa oe deuet an abardaez, e lavaraz dezhe: Tremenomp en tu all d’ar mor.

³⁶ Hag o veza kasset kuit ar bobl, e kasjont Jesus ganthe evel ma oa er vag; ha bez’ e oa ive bagou bihan all hag a iea assambles ganthan.

³⁷ Neuze e savaz eur barrad gwall amzer, hag o veza ma en em daole ar mor var ar vag, e oa erru dija karget a zour.

³⁸ Mes hen a oa e pen adre ar vag, kousket var eur pluec; dihuna a rejont anezhan, hag e leverjont dezhan: Mestr, ne rez van e‐bed eta, vid hon gwelet o vond da goll?

³⁹ Mes hen, o veza dihunet, a gomzaz gant otorite ouz an avel, hag a lavaraz d’ar mor: Ro peoc’h ha choum sioul. Hag an avel a davaz, hag an amzer a zeuaz da veza calm braz.

⁴⁰ Neuze e lavaraz dezhe: Perag hoc’h euz‐hu aoun? Penaos n’hoc’h euz‐hu ket a feiz?

⁴¹ Hag int spouronet‐holl a lavare an eil d’egile: Piou eta eo he‐man, pa rank zo‐ken an avel hag ar mor senti outhan?