Sant Marc 3 - Testamant Nevez 1897 (Jenkins)

CHABISTR III.

¹ Jesus a antreaz eur vech all er sinagog, ha bez’ e oa eno eun den hag oa dizec’het he zorn.

² Hag int a zelle piz outhan da velet hag hen a iac’haje anezhan da zeiz ar sabbat, evit gallout hen tamal.

³ Hag e lavaraz d’an den a oa dizec’het he zorn: Sav ha choum aze er c’hreiz.

⁴ Neuze e lavaraz dezhe: Ha permetet eo da zeiz ar sabbat ober vad pe ober drouk? savetei eun den, pe hen lezel da berissa? Mes na rojont respont e‐bed dezhan.

⁵ Neuze, o sellet gant coler ouz ar re a oa en‐dro dezhan, glac’haret o velet pegen kaledet e oa ho c’halonou, e lavaraz d’an den‐ze: Astenn da zorn. Hag hen a astennaz anezhan, hag he zorn a zeuaz iac’h evel egile.

⁶ Hag ar Farizianed, o veza eat er meaz, en em guzuliaz rag‐tal gant an Herodianed a‐enep dezhan, evit gouzout petra da ober evit hen koll.

⁷ Mes Jesus en em dennaz gant he ziskibien etrezeg ar mor, hag eur foul braz hen heulliaz euz a C’halile, hag euz ar Jude, euz a Jerusalem, euz an Idume hag euz an tu all d’ar Jourdan.

⁸ Hag an dud divar dro Tir ha Sidon, o veza klevet ar burzudou a rea, a zeuaz ive d’he gavoud e niver braz.

⁹ Hag hen a lavaraz d’he ziskibien derc’hel prest eur vag dezhan, abalamour d’ar bobl vraz‐ze, gant aoun na vije re‐wasket ganthe.

¹⁰ Rag bez’ hen doa iac’heet kalz anezhe, en hevelep doare ma en em daole varnezhan kement hag ho doa gwall‐glenvejou evit gallout touch outhan.

¹¹ Hag ar sperejou impur, pa her gwelent, en em brosterne dirazhan, hag a grie, o lavaret: Te eo Mab Doue!

¹² Mes hen a c’hourc’hemene stard dezhe diwall da ziscleria anezhan.

¹³ Goude‐ze e pignaz var eur menez, hag e c’halvaz d’he gavoud ar re a felle dezhan, hag e teujont d’hen kavout.

¹⁴ Hag hen a lekeaz daouzec anezhe evit beza assambles ganthan, evit ho c’has da brezeg,

¹⁵ ha da gaoud ar galloud da iac’haad ar c’hlenvejou ha da gas kuit an drouk‐sperejou.

¹⁶ Ar re‐man a oe Simon, da behini e roaz an hano a Ber;

¹⁷ ha Jakes mab Zebede, ha Ian breur Jakes, da bere e roaz an hano a Boanerjes, da lavaret eo, mibien ar gurun;

¹⁸ hag Andre, Philip, Barthelemi, Maze, Thomas, Jakes mab Alfe, Tadde, Simon ar C’hananead, ha Juda Iscariot,

¹⁹ an hini a drahissaz anezhan.

²⁰ Neuze e tistrojont d’an ti; hag ar bobl en em zastumaz adare eno, en hevelep doare na hellent ket zoken dibri ho boued.

²¹ Pa glevaz he gerent kement‐se, ez ejont evit cregi enhan; rag lavaret a reant: Kollet eo he skiant ganthan.

²² Hag ar Scribed, pere a oa diskennet euz a Jerusalem, a lavare: Possedet eo gant Beelzebul, ha dre brins an drouk‐sperejou eo e kas kuit an drouk‐sperejou.

²³ Mes Jesus, o veza galvet anezhe, a lavaraz dezhe dre barabolennou: Penaos ec’h hell Satan kas Satan kuit?

²⁴ Rag mar bez eur rouantelez diviset a‐enep dezhi he‐unan, na hell ket ar rouantelez‐ze choum en he za;

²⁵ ha mar bez eun ti diviset a‐enep dezhan he‐unan, na hell ket an ti‐ze choum en he za;

²⁶ mar sav eta Satan a enep dezhan he‐unan ha mar ema diviset, na hell ket derc’hel da bad; mes fin a zo dezhan.

²⁷ Den na hell antren en ti eun den krenv ha kemeret he vadou diganthan, nemed ereet hen defe da genta an den krenv‐ze; ha neuze e kemero kement tra a zo en he di.

²⁸ E gwirionez hen lavaran deoc’h, pep pec’hed a vezo pardonet da vugale an dud, hag ive pep gwall‐gomz dre behini ho devezo gwall‐gomzet;

²⁹ mes piou‐benag hen devezo gwall‐gomzet a‐enep ar Spered‐Santel, na vezo biken pardonet dezhan; mes coupabl eo euz a eur pec’hed eternel.

³⁰ Jesus a gomzaz evel‐se, abalamour ma lavarent: Possedet eo gant eur spered impur.

³¹ He vreudeur hag he vam a zeuaz eta, hag o choum er meaz, e kasjont tud d’hen gervel; hag ar bobl a oa azezet en dro dezhan.

³² Hag e oe lavaret dezhan: Setu da vam ha da vreudeur a zo du‐hont er meaz o klask ac’hanoud.

³³ Mes hen a respontaz: Piou eo va man, ha piou eo va breudeur?

³⁴ Neuze en eur zellet ouz ar re a oa azezet en dro dezhan, e lavaraz: Setu aman va mam ha va breudeur.

³⁵ Rag piou‐benag a rai bolontez Doue, hennes eo va breur, ha va c’hoar ha va mam.