Sant Marc 15 - Testamant Nevez 1897 (Jenkins)

CHABISTR XV.

¹ Kerkent ha ma oe deiz, prinsed ar veleien, gant ar re Ancien, ar Scribed hag ar c’honseil holl euz ar Sanhedrin, o veza en em guzuliet assambles, a gassaz Jesus liammet, hag hen livraz da Bilat.

² Ha Pilat a c’houlennaz diganthan: Ha te eo roue ar Judevien? Jesus a respontaz dezhan: Hen lavaret a rez.

³ Ha prinsed ar veleien a accuse anezhan euz a galz a draou.

⁴ Mes Pilat a interrojaz c’hoas anezhan hag a lavaraz dezhan: Ha na respontez netra? Gwel a begement a draou e roont testeni a‐enep d’id.

⁵ Mes Jesus na respontaz mui netra, en hevelep doare ma oa Pilat estonet braz.

⁶ Hogen, hen a oa custum d’ar gouel‐ze, da leuskel ganthe eur prizonier, an hini a c’houlennent.

⁷ Ha bez’ e oa er prison assambles gant ar re ho doa sicouret anezhan, unan hanvet Barabbas hag hen doa great eur vuntrerez e‐kreiz eur revolt.

⁸ Hag ar bobl a gommansaz da c’houlen, en eur grial a‐bouez ho fen, ma raje evel m’hen doa great a‐viskoas dezhe.

⁹ Pilat a respontaz dezhe: Ha c’houi a fell deoc’h e laoskfen deoc’h roue ar Judevien?

¹⁰ Rag gouzoud a rea e oa dre jalouzi ho doa prinsed ar veleien livret anezhan.

¹¹ Mes ar re‐man a boulzaz ar bobl da c’houlen ma vije leusket kentoc’h Barabbas ganthe.

¹² Mes Pilat, o komz c’hoas outhe, a lavaraz: Petra eta a fell deoc’h e rafen euz an hini a hanvit roue ar Judevien?

¹³ Hag int a griaz adare: Crucifi anezhan!

¹⁴ Ha Pilat a lavaraz dezhe: Mes pe seurt drouk hen deuz‐hen great? Hag int a griaz c’hoas krenvoc’h: Crucifi anezhan!

¹⁵ Pilat eta, o c’hoantaat contanti ar bobl, a leuskaz ganthe Barabbas; ha goude beza lakeat skourjeza Jesus, e livraz anezhan da veza crucifiet.

¹⁶ Neuze ar zoudarded a zigassaz anezhan en diabarz ar palez, da lavaret eo, er pretouer, hag e tastumjont eno an holl vanden zoudarded;

¹⁷ hag e lakejont dezhan eur vantel ruz‐pourpr, hag o veza great eur gurunen spern, e lekejont anezhi var he ben.

¹⁸ Hag e commansjont da zaludi anezhan, en eur lavaret: Salud, roue ar Judevien!

¹⁹ Hag e skoent var he ben gant eur gorzen, hag e cranchent outhan, hag o taoulina, e stouent dirazhan.

²⁰ Goude beza great goab anezhan, e lamjont ar vantel pourpr divarnezhan, hag o veza gwisket anezhan gant he zillad he‐unan, e kasjont anezhan ganthe evit hen crucifia.

²¹ Hag evel ma oa eun den euz a Cyren, hanvet Simon, tad da Alexandr ha da Rufus, o tremen dre eno, o tistrei euz ar parkou, e rejont dezhan dougen croaz Jesus.

²² Hag e kasjont anezhan en eul leac’h hanvet Golgotha, da lavaret eo, leac’h ar Pen‐maro.

²³ Hag e rojont dezhan da eva gwin mesket gant mirrh; mes na gemeraz ket anezhan.

²⁴ Ha goude m’ho doe crucifiet anezhan, e rejont partach var he zillad, hag e tennjont d’ar sort varnezhe, evit gouzoud ar pez hen divije pep hini.

²⁵ An trede heur e oa pa grucifijont anezhan.

²⁶ Ar sujet euz he gondaonation a oa scrivet evel‐hen: ROUE AR JUDEVIEN.

²⁷ Crucifia a rejont daou laer assambles ganthan, unan a‐zeo, hag egile a‐gleiz dezhan.

²⁸ Evel‐se e oe accomplisset ar gomz‐man euz ar Scritur: Lakeat eo bet e renk an dorfetourien.

²⁹ Hag ar re a dremene dre eno a outraje anezhan, en eur hija ho fen hag o lavaret: Ac’han‐ta! te, pehini a ziskar an templ, hag a zav anezhan a‐nevez en tri deiz;

³⁰ en em zaveta da‐unan, ha disken euz ar groaz.

³¹ Evel‐se ive prinsed ar veleien hag ar Scribed a rea goab anezhan, hag a lavare etrezhe: saveteet hen deuz ar re all, ha n’eo ket evit en em zavetei he‐unan.

³² Ra ziskenno eta breman euz ar groaz ar C’hrist, roue Israel, ma velimp ha ma credimp. Hag ar re a oa crucifiet ganthan, a zrouk‐komze ive outhan.

³³ Pa oa deuet ar c’houec’hved heur, e oe tevalijen var an douar holl, beteg an naoved heur.

³⁴ Ha d’an naoved heur, Jesus a griaz gant eur vouez krenv: Eloï, Eloï, lamma sabachthani? Da lavaret eo: Va Doue, va Doue, perag ec’h euz‐te va dilezet?

³⁵ Hag hinienou euz ar re a oa eno, o veza klevet anezhan, a lavare: Setu, ema o c’hervel Elias.

³⁶ Hag unan anezhe a redaz, hag a leuniaz eur spoue gant gwin‐egr, hag o veza hen lakeat e pen eur gorzen, e roaz da eva dezhan, en eur lavaret: Lezit; gwelomp ha dond a rai Elias d’hen lemmel euz ar groaz.

³⁷ Neuze Jesus, o veza leusket eur griaden vraz, a rentaz ar spered.

³⁸ Hag ar voal euz an templ a freuzaz en daou, adaleg an neac’h beteg an traon.

³⁹ Hag ar c’hantener, pehini a oa eno dirazhan, o velet penaos e oa tremenet en eur grial evel‐se, a lavaraz: An den‐man en gwirionez a oa Mab Doue.

⁴⁰ Bez’e oa ive eno gragez hag a zelle a‐ziabell, e‐touez pere e oa Mari Magdalen, ha Mari, mam da Jakes ar yaouanka ha da Joses, ha Salome,

⁴¹ pere hen heullie hag hen serviche pa edo en Galile, ha kalz a re all pere a oa pignet ganthan da Jerusalem.

⁴² Evel ma oa dija divezad, ha ma oa deiz ar breparation, da lavaret eo, an deiz di‐araog ar sabbat,

⁴³ Josef a Arimathe, eur senatour henoret braz, pehini ive a c’hortoze rouantelez Doue, a ieaz heb aoun da gavout Pilat, hag a c’houlennaz diganthan corf Jesus.

⁴⁴ Pilat a oe souezet o klevet e oa maro dija; hag o veza galvet ar c’hantener, e c’houlennaz ha pell a oa abaoe ma oa maro.

⁴⁵ Ha p’hen doe klevet gant ar c’hantener, e roaz ar c’horf da Josef.

⁴⁶ Ha Josef, o veza prenet eul linsel, a ziskennaz anezhan euz ar groaz, a lekeaz al linsel en‐dro dezhan, hag a lekeaz anezhan en eur bez a oa bet kleuzet er roc’h; hag e rulliaz eur mean ouz dor ar bez.

⁴⁷ Ha Mari Magdalen, ha Mari, mam Joses, a zelle pe leac’h e lakeet anezhan.